Yu Tingim Yet?

Olsem wanem? Yu bin ritim gut ol tok bilong ol nupela Wastaua? Yu ken traim bekim ol dispela askim i stap daunbilo:

Yu ting Samson i kisim strong long gras bilong en?

Gras yet i no givim strong long Samson. Gras bilong en i stap olsem mak bilong pasin bilong em long pas gut wantaim God, olsem wanpela Promisman. Taim Delaila i katim gras bilong Samson, dispela i putim hevi long pasin bilong Samson long pas gut wantaim God.—4/15, pes 9.

Olsem yumi save lukautim bodi, wanem 3-pela samting yumi ken mekim bilong lukautim tingting i stap long bel?

(1) Gutpela kaikai. Bodi bilong yumi i nidim ol gutpela kaikai, na long wankain pasin yumi mas kisim ol gutpela tok i helpim yumi long pas gut wantaim God. (2) Eksasais. Pasin bilong givim bel long autim tok inap strongim laik bilong yumi long mekim wok bilong Jehova. (3) Lain yumi stap namel long ol. Yumi ken daunim sampela presa long rot bilong bung planti taim wantaim ol wanbilip husat i save tingim yumi.—4/15, pes 16.

Taim poroman marit i no bin stap gut long poroman, tupela marit i ken mekim wanem bilong kisim gen pasin bilong trastim narapela?

Ol i mas (1) tok tru long poroman; (2) wok gut wantaim; (3) lusim ol olpela pasin na kisim nupela pasin; na (4) save olsem i gat taim bilong lusim tingting long rong na sindaun gut gen wantaim poroman.—5/1, pes 12-15.

Taim wanpela brata i mekim fiuneral, bilong wanem i no stret long yusim Song 116:15 (NW ) bilong makim man i dai?

Ves i tok: “Dai bilong ol manmeri i stap gut long Jehova em samting i dia tumas long ai bilong en.” Dispela i makim olsem God i no inap larim ol manmeri i stap gut long em, olsem lain olgeta, i dai bikos ol i dia tumas long ai bilong en. Em i no inap larim ol man i pinisim lain olgeta bilong em i stap long graun.—5/15, pes 22.

Ol kolpota ol i husat?

Paslain long 1931, ol i save yusim nem “kolpota” bilong makim ol bratasista husat i mekim wankain wok olsem ol painia bilong nau.—5/15, pes 31.

Wanem ol samting i soim olsem Baibel i no wanpela buk nating ol man i bin raitim?

Baibel i gat ol tok profet i bin kamap tru. Baibel i kamapim ol stori tru, i no ol stori nating. I stret wantaim saiens, na tok bilong wanpela buk bilong Baibel i stret wantaim tok bilong narapela buk bilong Baibel. Baibel i save helpim yumi long nau.—6/1, pes 4-8.

“Ol dispela king,” bilong Daniel 2:44 (NW ) i makim husat?

Ol i makim tasol ol kingdom, o ol gavman, em ol i hap bilong traipela imis em Daniel i stori long en.—6/15, pes 17.

Wanem taim Gavman Briten-Amerika i bin kamap namba 7 strongpela gavman em Baibel i stori long en?

Dispela i bin kamap taim Briten na Amerika i kirap wok bung wantaim long taim bilong Wol Woa 1.—6/15, pes 19.

Olsem wanem God i save fogivim na i no tingim moa ol sin bilong ol man i tanim bel?

Long ol man em Jehova i orait long ol, em i tok: “Bai mi lusim sin bilong ol na mi no ken tingim moa.” (Jer. 31:34) Long rot bilong pe bilong baim bek man, em inap fogivim ol sin. Na em i no tingim moa ol dispela sin, olsem em i no inap givim strafe gen long man long ol dispela sin.—7/1, pes 18.

Bilong wanem yumi ken bilip long ol mirakel em Baibel i stori long en?

Planti taim ol i bin kamap long ai bilong planti man, na i no long ples hait. Ol man i no bihainim olkain bilaspasin taim ol i wokim ol mirakel. Ol dispela mirakel i bilong givim glori long God, ol man nogat. Baibel i stori long planti narapela narapela mirakel, na ol birua long dispela taim i no tok olsem ol dispela mirakel i no bin kamap. Ol dispela samting i helpim yumi long bilip long ol mirakel em Baibel i stori long en.—8/1, pes 7-8.