Ol Skul Tiokratik i Kamapim Pasin Laikim Bilong Jehova
JEHOVA em i Nambawan Bikpela Tisa bilong yumi. (Ais. 30:20) Pasin laikim i kirapim em long skulim na trenim ol arapela. Olsem, pasin laikim i kirapim Jehova long soim Jisas “olgeta samting em yet i save mekim.” (Jon 5:20) Jehova i laikim yumi ol Witnes bilong em, olsem na em i “skulim [yumi] long gutpela pasin bilong toktok” taim yumi wok strong long givim ona long em na long helpim ol arapela.—Ais. 50:4.
Komiti Bilong Wok Tisa bilong Gavening Bodi i bihainim pasin bilong Jehova long laikim ol arapela na ol i yusim 10-pela skul tiokratik bilong givim trening long ol lain we laik na sindaun bilong ol i opim rot long ol i ken insait long ol dispela skul. Olsem wanem? Yu luksave olsem ol dispela skul i kamapim klia pasin laikim bilong Jehova?
Bai yu amamas long ritim sotpela stori long ol dispela skul tiokratik na stori bilong sampela husat i bin i go long ol dispela skul. Na bihain, askim yu yet: ‘Olsem wanem ol skul i kam long God inap helpim mi?’
KISIM HELPIM LONG OL TRENING TIOKRATIK
Jehova em i “God bilong pasin laikim,” na trening bilong em i mekim na laip bilong yumi i gat as bilong en, na i redim yumi long winim ol hevi, na i helpim yumi long kisim bikpela amamas long wok autim tok. (2 Kor. 13:11) Olsem ol disaipel bilong pastaim, yumi inap tru long helpim ol arapela, na “skulim ol long bihainim olgeta samting” Jehova i tokim yumi long mekim.—Mat. 28:20.
Ating yumi no inap i go long olgeta bilong ol dispela skul, tasol yumi inap kisim helpim long wanpela o sampela bilong ol. Na yumi ken bihainim ol tok bilong Baibel yumi kisim long ol dispela skul. Na tu, yumi ken mekim wok autim tok bilong yumi i kamap gutpela moa taim yumi wok wantaim ol wokboi bilong Jehova husat i kisim gutpela trening.
Askim yu yet olsem, ‘Mi inap stretim rot we mi inap i go long sampela bilong ol dispela skul?’
Ol manmeri i lotuim Jehova i pilim olsem pasin bilong sapotim ol dispela gutpela skul na insait long ol em wanpela gutpela wok. Mipela i laik bai trening yu kisim i helpim yu long go klostu moa long God na inapim yu long mekim ol wok bilong yu long sait bilong lotu, moa yet wok bilong autim gutnius.
