LONG mun Februeri long 1951, inap olsem 122 painia i go kamap long South Lansing, New York, bilong insait long namba 17 klas bilong Skul Gileat. Sampela bilong ol dispela sumatin husat bai kamap misineri em Lowell Turner, William (Bill) Kasten, Richard Kelsey, na Ramon Templeton. Lowell na Bill i bilong Michigan, Richard i bilong Iowa, na Ramon i bilong California. Ol i kamap gutpela pren.

Faivpela mun bihain, bikpela amamas i kamap taim ol i toksave olsem Brata Nathan Knorr long hetkota bai kam toktok long ol sumatin. Dispela 4-pela brata i kamapim tingting bilong ol olsem, sapos rot i op, ol i laik wok wantaim long wankain kantri. Olsem wanem? Em taim nau bilong save long wanem kantri ol bai wok misineri long en? Yes, em taim nau bilong save!

Amamas bilong ol sumatin i wok long go bikpela taim Brata Knorr i kirap tokaut long ol kantri ol bai go na wok long en. Namba 1 lain em i singautim i go long pletfom em ol dispela 4-pela brata, ol i pret, tasol bel bilong ol i stap isi taim ol i harim olsem ol bai go long wankain kantri! Tasol ol bai go we? Taim ol i toksave olsem ol bai go long Jemani, olgeta wanklas bilong ol i amamas tru na paitim han.

Ol Witnes Bilong Jehova long olgeta hap i amamas long harim stori bilong ol Witnes long Jemani, em ol i stap strong long bilip long taim gavman bilong Hitler i bosim kantri kirap long 1933. Planti bilong ol sumatin i tingim taim we ol i bungim ol klos na ol narapela samting bilong salim long sip long ol brata bilong ol long Yurop bihain long Wol Woa 2. Ol lain bilong God long Jemani i stap gutpela piksa tru long pasin bilong bilip, tingting strong, strongim bel, na bilip long Jehova. Long dispela taim Lowell i bin kisim tingting olsem, ‘Nau mipela bai bungim na kisim save long ol dispela gutpela bratasista.’ Long dispela as tasol, olgeta sumatin i amamas tru na ol i ringim ol famili na ol pren long apinun long stori long dispela samting!

Long Julai 27, 1951, dispela 4-pela pren i kalap long sip Homeland na lusim bris long East River, New York, na ol bai seil inap 11-pela de bilong go long Jemani. Brata Albert Schroeder, wanpela tisa bilong Skul Gileat em bihain em i kamap wanpela memba bilong Gavening Bodi, i skulim ol long fes sentens long tok Jeman. Orait nau ol i stap wantaim  sampela pasindia em ol i bilong Jemani na ol i ting ol inap lainim sampela tok moa bilong tok Jeman. Tasol pasin bilong ol dispela pasindia long tingting na toktok long tok Jeman i no wankain. Ol dispela brata i paul olgeta!

Long Tunde moning bilong Ogas 7, bihain long ol i kisim sik long raun long solwara, ol dispela brata i kamap long Hamburg, Jemani. Long olgeta hap ol i lukluk, ol i lukim ol mak bilong woa we i bin kamap inap 6-pela yia i go pinis. Ol i sori tru long ol samting ol i lukim, na bihain ol i kalap long tren na long nait olgeta ol i ron i go long Wiesbaden, em hap we brens ofis i stap long en.

Bikmoning tru long Trinde ol i bungim Hans, em fes Witnes ol i bungim long Jemani—nem Hans em nem bilong ol Jeman. Em i kisim ol long kar na bringim ol i go long Betel na em i lusim ol wantaim wanpela lapun sista husat i no save liklik long tok Inglis. Dispela sista i ting olsem ol bai kliagut long tok bilong em sapos em i apim nek na toktok strong. Maski em i apim nek i go antap tru, olgeta bilong ol i hatwok yet long kliagut long tok bilong narapela narapela. I no longtaim Brata Erich Frost, em brata i lukautim brens, i kam na tok welkam long ol long tok Inglis. Nau ol inap toktok gut.

Klostu long pinis bilong Ogas, ol i go long namba 1 kibung bilong ol long Jemani, em Kibung “Clean Worship” long taun Frankfurt am Main. Inap 47,432 manmeri i bung na 2,373 i baptais, na dispela i strongim gen tingting na laik bilong ol dispela brata long mekim wok misineri na autim tok. Tasol sampela de bihain, Brata Knorr i tokim ol olsem ol bai stap long Betel na wok long hap.

Bipo ol i bin singautim Ramon long go wok long Betel long Amerika, tasol em i no laik go, long wanem, em i gat bikpela laik long mekim wok misineri. Richard na Bill tu i no bin tingting long go wok long Betel. Tasol nau ol i kisim amamas long wok ol i mekim long Betel, na ol i bilip tru olsem Jehova i save long wanem rot i gutpela bilong helpim ol. Em savepasin long bihainim rot Jehova i makim, na i no long bihainim tingting na laik bilong yumi yet. Sapos yumi mekim olsem, yumi bai amamas long mekim wok bilong Jehova long wanem wanem hap yumi  go long en na bai yumi mekim olgeta kain wok em i givim long yumi.

Planti bratasista long Jemani Betel i amamas long sampela brata long Amerika i kam stap wantaim ol na ol inap prektis long mekim tok Inglis. Tasol wanpela de, amamas bilong ol i pinis. Brata Frost i kam long daining rum na long strongpela nek em i mekim tok Jeman na i luk olsem em i toktok long wanpela bikpela samting. Planti bilong Betel famili i stap isi tru na ai i lukluk tasol long plet bilong ol na ol i no lukluk nabaut. Ol dispela brata i kam nupela long Betel ol i no save Brata Frost i tok wanem, tasol ol i pilim olsem ol dispela toktok i makim ol. Olsem na taim Brata Frost i tok strong olsem, “VERBOTEN!” (“I tambu tru!”), na long strongpela nek em i kolim namba 2 taim, dispela i mekim na bel bilong ol i no stap isi. Ol i mekim wanem na dispela samting i kamap?

Taim ol i kaikai pinis, wantu olgeta i lusim daining rum na hariap i go long rum bilong ol. Bihain wanpela brata i tok: “Yupela i mas mekim tok Jeman bambai yupela inap helpim mipela. Olsem na Brata Frost i tok i tambu tru long tok Inglis wantaim yupela, inap long taim yupela i lainim tok Jeman.”

Kwiktaim Betel famili i bihainim dispela tok. Dispela i helpim ol nupela brata long lainim tok Jeman. Na tu, dispela i skulim ol olsem tok kaunsel i kam long wanpela gutpela brata i bilong helpim ol yet, maski pastaim i hatwok long ol long bihainim. Tok kaunsel bilong Brata Frost i soim olsem em i tingim tru wok i kamap insait long oganaisesen bilong Jehova, na tu, em i laikim tru ol lain brata. a Olsem na bihain ol dispela 4-pela brata i laikim em tru!

Yumi inap kisim gutpela skul long pasin bilong ol pren husat i stap gut long God, na dispela inap helpim yumi tu long kamap gutpela pren bilong Jehova. Ol dispela 4-pela brata i kisim planti skul long ol brata na sista long Jemani em ol i stap strong long bilip—dispela lain i planti tru na i hatwok long kolim nem bilong olgeta—na ol i kisim skul tu long narapela narapela. Richard i tok: “Lowell i gat sampela save long tok Jeman na em inap toktok gut, tasol mipela ol narapela i hatwok yet. Namel long mipela 4-pela, krismas bilong em i bikpela moa, olsem na mipela save go long em bilong kisim helpim long sait bilong tokples na long go pas long wok.” Ramon i tok: “Bihain long mipela i stap 1-pela yia pinis long Jemani, mi amamas tru taim wanpela brata long Swiselan i orait long mipela i ken yusim haus  bilong em long namba 1 holide bilong mipela long Swiselan! Inap 2-pela wik mipela yet bai stap na i no gat nid long mipela bai wari long mekim tok Jeman! Tasol mi no tingim samting em Lowell bai mekim. Em i strong long mipela i mas yusim tok Jeman long ritim na stori long teks bilong de long olgeta moning! Maski mi bel hevi long dispela, em i strong yet long mipela i mas mekim olsem. Tasol mipela i kisim wanpela gutpela skul. Yu mas bihainim tok bilong ol lain em ol i laik helpim yu, maski sampela taim yu no wanbel long tingting bilong ol. Dispela pasin i bin helpim mipela inap planti yia, na mipela inap daun long ol tok i kam long oganaisesen bilong God.”

Dispela 4-pela pren i lain long kisim gutpela tingting bilong narapela narapela, olsem Filipai 2:3 i tok: “Daunim yupela yet na tingim olsem ol arapela i winim yupela.” Olsem na planti taim 3-pela pren i save wanbel na askim Bill long mekim ol wok em ol yet i ting ol i no inap mekim gut olsem em. Lowell i tok, “Taim i gat sampela hevi i kamap na mipela i mas mekim sampela samting bilong stretim, mipela i save askim Bill long go pas long stretim. Mipela olgeta i save long stretim hevi, tasol mipela i wanbel long em i mekim, long wanem, mipela i no gat save o strongpela bel wankain olsem em.”

Isi isi olgeta wan wan bilong 4-pela pren i marit. Pasin pren bilong ol i kirap long pasin bilong ol long laikim Jehova na laikim wok bilong autim tok fultaim, olsem na olgeta i gat tingting long painim poroman marit husat i putim laik bilong mekim wok bilong Jehova i go pas. Fultaim sevis i skulim ol olsem pasin bilong givim samting i winim pasin bilong kisim samting, na pasin bilong tingim laik bilong ol yet i mas stap namba 2 na wok bilong Kingdom i mas stap namba 1. Olsem na ol i makim ol sista husat i insait long fultaim sevis pinis. Long dispela rot i gat 4-pela marit i kamap we i stap strong na i gat amamas.

Bilong pasin pren o marit i ken stap oltaim, ol i mas pas gut wantaim Jehova. (Sav. 4:12) Maski bihain meri bilong Bill na Ramon i dai, tupela wantaim i bin kisim helpim na amamas em gutpela poroman marit i ken givim. Lowell na Richard i amamas long kisim yet dispela sapot long meri bilong ol. Tasol Bill i marit gen, em i mekim gutpela disisen long painim wanpela poroman marit we tupela i ken stap yet long fultaim sevis.

Long ol yia bihain, asainmen bilong ol i senis na ol i go long narapela narapela hap—olsem long Jemani, Ostria, Laksambek, Kanada, na Amerika. Dispela i mekim na ol 4-pela pren i no inap i stap wantaim olsem ol i laik. Tasol maski ol i stap longwe long narapela, oltaim ol i save toktok long narapela narapela, amamas taim wanpela i kisim blesing, na sori taim wanpela i karim hevi. (Rom 12:15) Ol kain pren olsem i dia tumas olsem na yumi mas amamas tru long ol. Ol i gutpela presen i kam long Jehova. (Snd. 17:17) I hatwok tru long painim kain pren olsem long nau! Tasol olgeta Kristen tru inap kisim kain planti gutpela pren olsem. Yumi ol Witnes Bilong Jehova, yumi amamas olsem yumi inap  stap pren bilong ol wanbilip bilong yumi long olgeta hap bilong graun, na moa yet yumi stap pren bilong God Jehova na Krais Jisas.

Wankain olsem yumi, dispela 4-pela pren i gat sampela hevi long laip bilong ol. Ol i karim hevi long poroman marit i dai, bikpela sik, lukautim ol lapun papamama, mekim bikpela long pikinini taim ol i stap yet long fultaim sevis, pret na tingting planti taim ol i kisim nupela asainmen, na moa yet hevi bilong i go lapun. Tasol ol yet i save olsem ol gutpela pren em ol i stap klostu o longwe, ol i save helpim ol man i laikim tru Jehova long sanap strong na karim olgeta wan wan hevi.

Em gutpela samting tru olsem Lowell, Ramon, Bill, na Richard i bin dediket long Jehova taim ol i gat 18, 12, 11 na 10 krismas. Na taim krismas bilong ol i stap namel long 17 na 21, olgeta i insait long fultaim sevis. Ol i bihainim tok i stap long Saveman 12:1, olsem: “God i bin wokim yumi olgeta. Olsem na long taim yupela i yangpela yet, yupela i mas tingim em.”

Sapos yu wanpela yangpela Kristen brata, na Jehova i singautim yu long insait long fultaim sevis, orait gutpela sapos yu redi long mekim olsem. Long bikpela pasin helpim bilong Jehova, yu inap kisim wankain amamas olsem dispela 4-pela pren, long mekim wok sekit, wok distrik, o wok son; wok long Betel, kamap Brens Komiti; kamap tisa long Skul Bilong Wok Kingdom o Skul Bilong Wok Painia; na mekim ol tok long ol liklik na bikpela kibung. Dispela 4-pela pren i amamas long save olsem planti tausen manmeri i kisim helpim long wok ol i mekim! Olgeta dispela samting i kamap, long wanem, long taim ol i yangpela yet ol i kirap bihainim singaut bilong Jehova na givim bel olgeta long mekim wok bilong em.—Kol. 3:23.

Long nau, Lowell, Richard, na Ramon i wok wantaim gen long brens ofis long Selters, Jemani. Sori tru olsem Bill i dai long 2010 taim em i mekim wok olsem painia salim long Amerika. Dai bilong em i givim bikpela bel hevi tru long 3-pela brata em olgeta i bin stap gutpela pren tru klostu 60 yia! Tasol God bilong yumi Jehova, em i no inap lusim tingting long ol pren bilong em. Yumi ken bilip olsem taim Kingdom Bilong God i bosim graun, em bai kirapim bek ol pren Kristen em dai i bin painim ol.

Paslain long Bill i dai, em i raitim dispela tok: “Insait long dispela 60 yia yumi stap pren, mi no inap tingim wanpela taim mi bel hevi. Pasin bilong yumi long pas gut i stap olsem samting i dia tumas long mi.” Orait ol 3-pela pren bilong em husat i save olsem gutpela pasin pren bilong ol bai kirap gen long nupela taim, ol i mekim dispela tok, “I olsem nau tasol pasin pren bilong mipela i kirap.”