Yes Bilong Yu i Mas Minim Yes
“‘Yes’ bilong yupela i mas minim yes tasol, na ‘Nogat’ bilong yupela i mas minim nogat tasol.”—MAT. 5:37.
1. Jisas i tok wanem long pasin bilong mekim tok tru antap? Bilong wanem em i tok olsem?
PLANTI taim ol Kristen tru i no gat wok long mekim tok tru antap. Ol i bihainim tok bilong Jisas, olsem: “‘Yes’ bilong yupela i mas minim yes tasol.” Tok bilong Jisas i makim olsem man i mas truim tok na mekim ol samting em i tok long mekim. Jisas i tok: “No ken mekim tok tru antap.” Em i mekim dispela tok, long wanem, planti man i gat pasin bilong mekim tok tru antap na ol i no tingting long truim promis bilong ol. Taim man i mekim tok tru antap long mekim wanpela samting na bihain em i no mekim, dispela i soim klia wanem samting? Dispela i soim olsem em i no fit long ol man inap trastim em, na em i stap aninit long strong bilong “Satan.”—Ritim Matyu 5:33-37.
2. Bilong wanem na sampela taim i no gat rong long mekim tok tru antap?
2 Yu ting tok bilong Jisas i makim olsem i no stret long mekim tok tru antap long olgeta samting? Nogat. Olsem yumi lainim long stadi paslain long dispela, God Jehova na stretpela wokman bilong em, Abraham, i bin mekim tok tru antap long ol bikpela samting. Na tu, Lo Bilong God i tok man inap mekim tok tru antap long stretim sampela kain hevi. (Kis. 22:10, 11; Nam. 5:21, 22) Olsem na sampela taim long kot, Kristen i mas mekim tok tru antap bilong makim olsem ol tok bilong em i tru. Na wan wan taim tasol Kristen inap pilim olsem em i mas mekim tok tru antap olsem em bai mekim wanpela samting, o em i tok tru long wanpela hevi i bin kamap. Taim Jisas i sanap long ai bilong Sanhedrin bilong ol Juda na hetpris i tokim em long mekim tok tru antap, Jisas i tok tru long ol. (Mat. 26:63, 64) I no gat wok long Jisas i mekim tok tru antap. Tasol bilong makim olsem tok bilong em i tru, planti taim em i save tok: “Tru tumas mi tokim yupela.” (Jon 1:51; 13:16, 20, 21, 38) Orait nau yumi ken skelim sampela skul yumi ken kisim long pasin bilong Jisas, Pol, na ol narapela em ol i tok Yes na ol i truim Yes bilong ol.
JISAS I LARIM YES BILONG EM I MINIM YES
Kirap long taim Jisas i baptais i go inap em i dai, em i truim promis bilong em long Papa
3. Jisas i bin beten na tok promis long mekim wanem? Papa bilong em long heven i harim beten na i tok wanem?
3 “Harim! Mi kam pinis. . . . Yes God, mi kam bilong mekim laik bilong yu.” (Hib. 10:7) Long dispela beten, Jisas i tok promis long mekim laik bilong God. Dispela i makim olsem em bai mekim olgeta samting olsem ol tok profet i makim long Pikinini bilong promis bai mekim, na tu, em bai larim Satan i ‘kaikaim lek bilong em.’ (Stt. 3:15) I no gat man long graun i bin tok long mekim kain bikpela wok olsem. Jehova i harim beten bilong Jisas na em i tok em i bilip tru long Pikinini bilong em, na i no gat wok long em i askim Jisas long mekim tok tru antap long truim tok promis bilong em.—Luk 3:21, 22.
4. Jisas i bin redi long mekim wanem bambai tok Yes bilong em i minim Yes?
4 Oltaim tok Yes bilong Jisas i save minim Yes. Em i no save larim wanpela samting i pasim em long mekim wok em Papa i givim em long mekim. Em i autim gutnius bilong Kingdom Bilong God, na helpim ol man long kamap disaipel, em ol man God i kirapim ol long kam long Jisas. (Jon 6:44) Baibel i soim klia olsem Jisas i save truim ol tok promis bilong em, na i tok: “Maski i gat hamas tok promis bilong God i stap, olgeta i kamap Yes long rot bilong Jisas.” (2 Kor. 1:20) Tru tumas, Jisas em i nambawan gutpela piksa long pasin bilong bihainim tok promis em i bin mekim long Papa bilong em. Orait nau yumi bai stori long wanpela man husat i bin wok strong long bihainim pasin bilong Jisas.
POL I LARIM YES BILONG EM I MINIM YES
5. Pol i mekim wanem gutpela pasin em yumi inap bihainim?
5 “Bikpela, bai mi mekim wanem?” (Apo. 22:10) Dispela em tok Sol i bin mekim long Bikpela Jisas taim Jisas i kamap long em long visen. Em i laik bai Sol i no ken mekim nogut moa long ol Kristen. Olsem na Sol i hevi long rong bilong em na em i tanim bel, kisim baptais, na orait long mekim wok bilong bringim gutnius bilong Jisas i go long ol narapela lain. Bihain ol i kolim Sol olsem Pol, na long laip olgeta bilong em long graun, em i kolim Jisas olsem “Bikpela” na em i bihainim tok bilong Jisas. (Apo. 22:6-16; 2 Kor. 4:5; 2 Tim. 4:8) Pol i no olsem ol narapela em Jisas i tok long ol olsem: “Bilong wanem yupela i save kolim mi ‘Bikpela! Bikpela!’ tasol yupela i no save bihainim tok bilong mi?” (Luk 6:46) Jisas i laik bai olgeta man husat i kolim em Bikpela, ol i mas mekim ol samting ol i tok ol bai mekim, wankain olsem aposel Pol i bin mekim.
6, 7. (a) Bilong wanem Pol i senisim plen bilong em long visitim Korin? Bilong wanem i no stret long sampela i tok ol i no bilipim tok bilong Pol? (b) Yumi mas soim wanem pasin long ol man i go pas long wok lotu?
6 Pol i givim bel tru long autim tok bilong Kingdom long olgeta hap bilong Esia Maina na Yurop. Em i kirapim planti kongrigesen na em i go visitim ol gen. Sampela taim em i mas mekim tok tru antap bilong makim olsem tok em i raitim i tru. (Gal. 1:20) Taim sampela long Korin i tok ol i no bilip long tok bilong Pol, em i tok: “Yupela i ken bilip long God olsem, tok mipela i mekim long yupela i no Yes na Nogat wantaim.” (2 Kor. 1:18) Taim Pol i raitim dispela tok, em i lusim pinis Efesus na i go long Masedonia bilong go long Korin. Pastaim em i mekim plen olsem em bai go bek long Korin na bihain em bai go long Masedonia. (2 Kor. 1:15, 16) Tasol wankain olsem ol wasman raun long nau, sampela taim plen bilong ol i save senis. Ol i no mekim olsem bilong mekim ol liklik wok nabaut, o inapim laik bilong ol yet, nogat. Ol i mekim olsem taim bikpela hevi i kamap. Long sait bilong Pol, em i no go hariap long Korin, long wanem, em i laik helpim dispela kongrigesen. Olsem wanem dispela i helpim ol?
7 Taim Pol i stap long Efesus em i harim olsem kongrigesen long Korin i gat sampela hevi. Ol brata i no stap wanbel, na wanpela long kongrigesen i bin mekim pasin pamuk na ol i larim em i stap yet. (1 Kor. 1:11; 5:1) Long namba 1 pas Pol i raitim i go long ol Korin, em i givim strongpela tok kaunsel long helpim ol long stretim hevi bilong ol. Olsem na taim Pol i stap long Efesus em i no kisim sip na go stret long Korin, nogat, em i larim sampela haptaim i lus na bai ol brata long Korin inap bihainim tok kaunsel bilong em paslain long em i go kamap. Dispela bai mekim na raun bilong em inap strongim tru ol brata. Long namba 2 pas Pol i raitim, em i tokim ol long as na em i bin senisim plen bilong em, em i tok: “Long ai bilong God mi mekim tok tru antap long laip bilong mi olsem, mi no kamap yet long Korin, long wanem, mi no laik mekim yupela i bel hevi moa.” (2 Kor. 1:23) Yumi no ken tru mekim wankain pasin olsem dispela lain husat i bin sutim tok long Pol. Yumi mas rispektim tru ol man namel long yumi em ol i go pas long wok lotu. Pol i mekim stret ol samting em i tok promis long en. Yumi mas bihainim pasin bilong Pol, wankain olsem em i bihainim pasin bilong Krais.—1 Kor. 11:1; Hib. 13:7.
OL NARAPELA I LARIM YES I MINIM YES
8. Rebeka i mekim wanem gutpela pasin em yumi inap bihainim?
8 “Yes, bai mi go.” (Stt. 24:58) Rebeka i bin mekim dispela tok taim mama na brata bilong em i askim sapos em i redi long lusim ples na go olsem 800 kilomita wantaim wanpela man em i no save long en na kamap meri bilong Aisak, em pikinini bilong Abraham. (Stt. 24:50-58) Rebeka i larim tok Yes bilong em i minim Yes, na em i kamap gutpela meri bilong Aisak na em i stap gut long lotuim God. Long laip olgeta bilong em, em i stap long Graun Bilong Promis na sindaun long ol haus sel olsem lain bilong narapela ples. God i blesim Rebeka na em i kamap tumbuna bilong Pikinini bilong promis, Jisas Krais.—Hib. 11:9, 13.
9. Olsem wanem Rut i larim tok Nogat bilong em i minim Nogat?
9 “Nogat. Yumi olgeta i go bek long lain bilong yu.” (Rut 1:10) Tupela meri Moap em ol man bilong ol i dai pinis, em Rut na Orpa, ol i mekim dispela tok long tambu mama bilong ol, Naomi. Man bilong Naomi i dai pinis na em i lusim Moap na i laik go long Betlehem. Naomi i strong long ol i mas go bek long asples bilong ol, na bihain liklik Orpa i lusim em na go bek. Tasol Rut i larim tok Nogat bilong em i minim Nogat. (Ritim Rut 1:16, 17.) Em i stap wantaim Naomi na em i stap gut long em maski em i no inap lukim gen famili bilong em na em i lusim lotu giaman bilong Moap. Em i lotuim Jehova inap long laip olgeta bilong em, na Jehova i blesim em. Taim Matyu i raitim Baibel na kolim nem bilong ol lain tumbuna bilong Krais, em i kolim nem bilong 5-pela meri, na Rut em wanpela bilong ol.—Mat. 1:1, 3, 5, 6, 16.
10. Aisaia i mekim wanem gutpela pasin em yumi tu i ken bihainim?
10 “Yu salim mi.” (Ais. 6:8) Paslain long Aisaia i mekim dispela tok, em i lukim wanpela visen we Jehova i sindaun long sia king bilong Em antap long tempel bilong Israel. Long dispela visen, Aisaia i harim Jehova i tok: “Bai yumi salim husat? Husat bai i bringim tok bilong mi i go?” Jehova i askim sapos wanpela inap bringim tok bilong Em i go long lain bilong em husat i no bihainim tok. Taim Aisaia i tok: “Yu salim mi,” i kain olsem em i tok, “Yes, mi bai go na mekim wok yu givim long mi.” Aisaia i larim tok Yes bilong em i minim Yes. Em i mekim stret ol samting em i bin tok long mekim. Winim 46 yia, Aisaia i tok profet olsem God bai givim strafe long lain bilong Em husat i no bihainim tok, na bihain Em bai bringim ol i kam bek long ples we Em i laik bai ol i lotuim em long en.
11. (a) Bilong wanem em i bikpela samting tru long yumi mas larim tok Yes bilong yumi i minim Yes? (b) Stori long sampela manmeri em ol i no bin larim tok Yes bilong ol i minim Yes.
11 Bilong wanem Jehova i laik bai ol dispela stori i stap long Baibel? Olsem wanem em i bikpela samting long larim tok Yes bilong yumi i minim Yes? Baibel i givim tok lukaut long yumi olsem sapos ol man i no “bihainim tok ol i bin pasim,” orait “ol i mas i dai.” (Rom 1:31, 32) King bilong Isip, King Sedekaia bilong Juda, na Ananaias na Safaira i no bin larim tok Yes bilong ol i minim Yes, olsem na ol i kisim strafe. Stori bilong ol i stap olsem tok lukaut long yumi.—Kis. 9:27, 28, 34, 35; Ese. 17:13-15, 19, 20; Apo. 5:1-10.
12. Wanem samting bai helpim yumi long larim tok Yes bilong yumi i minim Yes?
12 Yumi stap long “taim bilong las de,” olsem na yumi stap namel long ol manmeri em ol “i no stap gut long narapela,” na “i luk olsem ol i gat pasin bilong givim bel tru long God, tasol ol i no larim strong bilong dispela pasin i bosim wokabaut bilong ol.” (2 Tim. 3:1-5) Yumi no ken tru poromanim ol dispela kain manmeri. Oltaim yumi mas poromanim ol manmeri em ol i save wok strong long larim tok Yes bilong ol i minim Yes.—Hib. 10:24, 25.
NAMBAWAN BIKPELA TOK YES
13. Wanem nambawan bikpela tok Yes em man i bihainim Jisas Krais i save mekim?
13 Nambawan bikpela tok promis em man inap mekim em long taim em i dediket long God. Taim ol man i laik kamap disaipel bilong Jisas, ol i save kisim ol askim long 3-pela narapela narapela taim bilong painimaut sapos tru tru ol bai mekim ol samting em ol i mas mekim. (Mat. 16:24) Taim 2-pela elda i intaviuim wanpela man husat i no baptais yet na em i laik kamap pablisa, ol i save askim em olsem, “Yu gat laik tru long kamap wanpela Witnes Bilong Jehova?” Bihain, taim dispela man i winim sampela moa mak na i laik kisim baptais, ol elda bai bung gen wantaim em na askim em olsem, “Yu dediket pinis long Jehova long rot bilong beten?” Orait long de bilong baptais, man i givim tok i save askim ol lain bilong kisim baptais olsem, “Long rot bilong ofa bilong Jisas Krais, yu hevi long ol sin yu bin mekim na yu tanim bel na yu dediket pinis long Jehova long bihainim laik bilong em?” Orait long ai bilong olgeta husat i stap long de bilong kisim baptais, ol dispela nupela disaipel i save tok Yes, olsem ol i tok promis long mekim wok bilong God inap oltaim.
Yu truim nambawan bikpela tok Yes?
14. Yumi mas givim wanem ol askim long yumi yet?
14 Maski yu kisim baptais nau tasol o yu mekim wok bilong God inap planti yia pinis, yu mas askim yu yet olsem: ‘Mi save bihainim pasin bilong Jisas long larim tok Yes bilong mi i minim Yes na bihainim tok promis mi bin mekim long Jehova? Mi putim wok bilong autim tok na kamapim ol disaipel i stap yet olsem nambawan bikpela wok long laip bilong mi, olsem Jisas i bin tokim yumi long mekim?’—Ritim 2 Korin 13:5.
15. Long wanem ol rot yumi mas larim tok Yes bilong yumi i minim Yes?
15 Bilong bihainim tok promis yumi bin mekim long God taim yumi dediket, yumi mas tok tru long ol narapela bikpela samting tu. Olsem: Sapos yu marit, yu mas bihainim tok promis yu mekim long laikim na tingim tru poroman marit bilong yu. Sapos yu sainim wanpela kontrak bilong wok bisnis o raitim ol tok long wanpela aplikesen pepa long volantia long wok wantaim kongrigesen o oganaisesen, orait yu mas mekim ol samting yu bin promis long mekim. Ating wanpela taim ol i invaitim yu long kaikai long haus bilong wanpela man husat i no gat planti samting na yu orait long go. Yu mas bihainim tok promis yu mekim maski yu kisim narapela invatesen em yu ting i winim namba 1 invatesen. Sapos yu bin autim tok na bungim wanpela man na yu tok promis long i go bek na lukim em, yu mas larim tok Yes bilong yu i minim Yes. Jehova bai blesim wok autim tok bilong yu.—Ritim Luk 16:10.
JISAS, EM HETPRIS NA KING, BAI HELPIM YUMI
16. Sapos yumi no truim wanpela tok promis, orait yumi mas mekim wanem?
16 Baibel i tok yumi gat sin na “yumi olgeta i save popaia,” na moa yet long toktok bilong yumi. (Jems 3:2) Yumi mas mekim wanem sapos yumi luksave olsem yumi no bin truim wanpela tok promis? Long Lo em God i bin givim long lain Israel, sapos wanpela man “i no tingting gut” na i toktok, orait ol bai marimari long em. (Wkp. 5:4-7, 11) Sapos Kristen i no mekim samting em i bin tok promis long mekim, ol bai fogivim em. Sapos yumi tokaut long Jehova olsem yumi no bin truim wanpela tok promis, orait em bai marimari na fogivim yumi long rot bilong Hetpris, Jisas Krais. (1 Jon 2:1, 2) Tasol sapos yumi laik bai God i orait yet long yumi, yumi mas soim olsem yumi tanim bel tru. Olsem, yumi no ken kisim pasin bilong brukim ol tok promis yumi bin mekim. Na yumi mas mekim olgeta samting yumi inap mekim bilong stretim ol hevi i kamap taim yumi brukim tok promis bilong yumi. (Snd. 6:2, 3) Olsem na yumi mas tingting gut paslain long yumi mekim wanpela tok promis em yumi no inap truim.—Ritim Saveman 5:2.
17, 18. Wanem gutpela samting i wetim ol manmeri em ol i wok strong long larim tok Yes bilong ol i minim Yes?
17 Olgeta manmeri husat i lotuim Jehova na ol i wok strong long larim tok Yes bilong ol i minim Yes, ol bai kisim gutpela sindaun tru long bihain! Ol Kristen God i bin makim em namba bilong ol inap 144,000, ol bai kisim laip long heven na ol i no inap dai moa, na ol bai mekim wok king wantaim Jisas long Kingdom inap 1,000 yia. (Rev. 20:6) Bai i gat planti milion manmeri moa i stap long Paradais long graun. Taim Krais i stap King long Kingdom Bilong God, em bai helpim ol dispela manmeri bambai helt na tingting bilong ol i kamap gutpela olgeta.—Rev. 21:3-5.
18 Long pinis bilong wok king bilong Jisas, bai i gat laspela traim. Ol manmeri husat i stap gut long God long laspela traim, ol tasol bai stap long Paradais na oltaim ol bai trastim tok ol narapela i mekim. (Rev. 20:7-10) Long dispela taim bihain, olgeta manmeri bai larim tok Yes bilong ol i minim Yes na tok Nogat bilong ol i minim Nogat. Ol bai bihainim tru pasin bilong gutpela Papa bilong yumi long heven, em Jehova, em “God bilong mekim pasin [“tok,” NW] tru tasol.”—Sng. 31:5.
