1, 2. Wanem ol hevi i painim ol man? Yumi olgeta wan wan i gat wanem laik?

 YUMI stap long taim bilong hevi. Kain kain disasta i wok long kamap long graun. Ol manmeri i kisim bikpela hevi long ol disasta olsem bikpela guria, sunami, paia, tait wara, volkeno, strongpela win na saiklon. Na tu, ol hevi insait long famili na hevi bilong ol wan wan man yet i mekim na ol i pret na stap bel hevi. Tru tumas, “taim nogut i save painim yumi olgeta.”—Sav. 9:11.

² Lain bilong God i amamas yet long mekim wok bilong em long dispela taim bilong hevi. Tasol yumi olgeta wan wan i laik stap redi long karim ol hevi long dispela taim we pinis bilong pasin nogut bilong nau i wok long kam klostu. Tasol olsem wanem yumi inap long amamas yet long mekim wok bilong God maski ol hevi i painim yumi? Wanem samting bai strongim bel bilong yumi bambai yumi inap karim hevi?

3. Olsem long Rom 15:4, wanem samting inap mekim gut bel bilong yumi taim bikpela hevi i painim yumi?

³ Maski hevi i painim planti man moa long nau winim bipo, long olgeta taim hevi i stap. Yumi ken kisim skul long stori bilong sampela wokman bilong God long bipo, em ol i bin strongim bel long taim bilong hevi.—Rom 15:4.

4. Wanem sampela hevi Devit i mas karim? Wanem samting i helpim em?

⁴ Tingim sampela hevi em Devit i mas karim. King Sol i laik kilim em. Ol birua i pait long Devit, na wanpela taim ol i kisim ol meri bilong em i go. Sampela long ami bilong Devit na sampela ol famili na ol pren bilong em i no stap gut long em. Na long sampela taim, em i bel hevi. (1 Sml. 18:8, 9; 30:1-5; 2 Sml. 17:1-3; 24:15, 17; Sng. 38:4-8) Ol stori bilong Baibel long laip bilong Devit i kamapim klia olsem ol dispela  samting i givim hevi long em. Tasol ol dispela hevi i no daunim bilip bilong em long Jehova. Em i tok: “Bikpela tasol i save lukautim mi, olsem na mi no ken pret long wanpela samting.”—Sng. 27:1; ritim Song 27:5, 10.

5. Wanem samting i helpim Abraham na Sara long stap amamas maski sindaun bilong ol i gat hatwok bilong en?

⁵ Klostu long laip olgeta bilong Abraham na Sara, ol i stap long ol haus sel. Tupela i stap olsem tripman long ol ples em ol i no save long en. Planti taim laip bilong ol i gat hatwok bilong en. Olsem, ol i bin kisim hevi bilong bikpela hangre na ol inap kisim bagarap long han bilong ol kantri i stap klostu long ol. Tasol ol i strongim bel na karim ol dispela hevi. (Stt. 12:10; 14:14-16) Wanem samting i helpim ol long karim ol hevi? Baibel i stori olsem Abraham i “wetim dispela taun i stap strong tru. God em man husat i bin sanapim na wokim dispela taun.” (Hib. 11:8-10) Abraham na Sara i tingting tasol long ol samting bai kamap bihain, na ol i no larim ol hatwok long sindaun bilong ol i mekim ol i bel hevi.

6. Olsem wanem yumi ken bihainim pasin bilong Jop?

⁶ Jop i bin kisim bikpela hevi tru. Piksaim long tingting samting em i pilim taim hevi i painim em long olgeta samting long sindaun bilong em. (Jop 3:3, 11) Na tu, em i no save stret long as na ol dispela hevi i kamap long em. Tasol maski ol dispela samting i kamap, em i no les kwik. Jop i stap gut long God na bilip long em. (Ritim Jop 2:3.) Jop i stap gutpela piksa long yumi ken bihainim!

7. Pol i karim wanem ol hevi taim em i mekim wok bilong God? Wanem samting i strongim bel bilong em long mekim yet wok?

⁷ Tingim gutpela piksa em aposel Pol tu i bin soim. Klostu em i ‘kisim bagarap long ol taun, long ol ples nating, na long solwara.’ Em i tok em i bin “hangre na nek i drai” na ‘kol i bagarapim em na em no gat klos.’ Pol i tok tu olsem sampela taim ol sip em i stap long en i save bagarap long solwara, na wanpela taim em i “trip long solwara inap wanpela nait na wanpela san.” (2 Kor. 11:23-27) Maski olgeta dispela hevi i bin painim em, em i holimpas gutpela tingting. Em i mekim wok bilong God, na wanpela taim klostu dai i painim em, na em i tok: “Dispela i bin kamap bai mipela i no ken bilip long mipela yet, nogat, mipela i mas bilip long God, em dispela man husat i save kirapim bek ol man i dai pinis. Em i bin kisim bek mipela long dai.” (2 Kor. 1:8-10) Planti man i no bin karim ol kain hevi olsem i bin painim Pol. Tasol planti bilong yumi i pilim wankain olsem em. Olsem na pasin bilong em long strongim bel inap helpim yumi.

8. Ol hevi bilong nau inap mekim wanem long yumi? Stori long dispela.

⁸ Long nau, dispela graun i pulap long ol disasta na ol narapela hevi we i mekim na planti man i pilim olsem hevi bilong ol i bikpela na i planti tumas. Sampela Kristen tu i pilim olsem. Lani a i amamas long mekim wok painia wantaim man bilong em long Australia taim em i kirap nogut long painimaut olsem em i gat kensa long susu. Em i tok: “Ol marasin mi kisim i mekim mi sik nogut tru, na mi pilim olsem mi no inap mekim wanpela gutpela wok.” Na em i gat wok tu long lukautim man bilong em husat i bin kisim operesen long bun long baksait. Sapos kain samting olsem i painim yumi, bai yumi mekim wanem?

9, 10. (a) Yumi no ken larim Satan i mekim wanem? (b) Yumi mas holim wanem tingting na bai yumi inap karim “planti hevi,” olsem Aposel 14:22 i kolim?

⁹ Yumi mas tingim olsem Satan i laik yusim ol hevi long daunim bilip bilong yumi na tekewe amamas bilong yumi. Tasol yumi no ken larim dispela samting i kamap. Sindaun 24:10 i tok: “Sapos taim nogut i painim yu na bun bilong yu i slek, orait yu no gat strong tru.” Taim yumi tingim tingim long bel ol stori bilong ol manmeri em Baibel i kolim, olsem sampela em yumi stori pinis long en, dispela inap strongim bel bilong yumi long karim hevi.

¹⁰ I gutpela long tingim tu olsem yumi no inap  rausim olgeta hevi. Yumi mas redi long bungim ol hevi i kamap. (2 Tim. 3:12) Aposel 14:22 i tokim yumi olsem: “Bilong i go insait long kingdom bilong God, yumi mas karim planti hevi.” Yu no ken larim ol hevi i daunim yu, nogat. Yu mas tingim olsem ol hevi i opim rot na yu ken soim olsem yu bilip long God inap helpim yu.

11. Sapos yumi no laik bai ol hevi long laip bilong yumi i daunim yumi, orait yumi mas mekim wanem?

¹¹ Yumi mas tingim ol gutpela samting i kamap long laip bilong yumi. Baibel i tokim yumi olsem: “Sapos bel bilong man i amamas, bai pes bilong en i gutpela. Tasol sapos bel bilong man i hevi, bai tingting bilong en i bagarap.” (Snd. 15:13) Ol dokta i save olsem wanpela samting we inap helpim sikman long kamap orait, em sapos sikman yet i tingim olsem em bai kamap orait. Planti taim, sapos man i kisim marasin na em i no marasin tru, tasol sapos em i tingting strong olsem dispela marasin bai helpim em, em bai kamap orait. Tasol sapos sikman i ting olsem ol dispela marasin i givim hevi long helt bilong em, orait em bai pilim sik moa yet. Dispela stori i kamapim olsem sapos oltaim yumi tingim ol samting long sindaun bilong yumi em yumi no inap senisim, orait dispela bai daunim yumi tru. Yumi tenkyu olsem Jehova i save helpim tru yumi. Long taim ol disasta i kamap, em i save strongim yumi long rot bilong Baibel, ol bratasista, na long rot bilong holi spirit. Oltaim yumi mas tingim ol dispela samting, na dispela bai helpim yumi long i stap amamas. No ken tingim ol hevi i kamap long laip bilong yu, mekim ol samting em yu inap mekim long karim olgeta wan wan hevi, na tingting tasol long ol gutpela samting yu gat pinis.—Snd. 17:22.

12, 13. (a) Wanem samting i bin helpim ol wokman bilong God long karim ol hevi taim disasta i kamap? Stori long dispela. (b) Olsem wanem ol disasta inap helpim yumi long luksave long wanem samting i stap bikpela samting long laip bilong yumi?

¹² Long nau, planti bikpela disasta i kamap long sampela kantri. Yumi ken kisim skul long olsem wanem ol brata long ol dispela hap i sanap strong na karim ol hevi maski i hatwok long ol i mekim olsem. Long Februeri 2010, wanpela bikpela guria na sunami i bagarapim haus na ol samting bilong planti bratasista bilong yumi long Sili. Sampela i no gat rot moa bilong mekim wok mani. Maski ol i kisim dispela hevi, ol brata i strong yet long mekim wok bilong Jehova. Samuel, em haus bilong em i bin bagarap olgeta, em i tok: “Maski dispela bikpela hevi i painim mipela, mi na meri bilong mi i no lusim liklik ol miting na autim tok. Mi pilim olsem dispela i helpim mipela na mipela i no wari tumas.” Dispela tupela marit wantaim ol narapela bratasista ol i no larim hevi bilong disasta i daunim ol, nogat, ol i givim bel tru long mekim yet wok bilong Jehova.

¹³ Long Septemba 2009, bikpela ren i pundaun na tait i karamapim planti hap bilong Manila long Filipins. Wanpela maniman em tait wara i bin bagarapim planti samting bilong em, em i tok tait wara i bin bagarapim sindaun bilong olgeta man na dispela i givim “bikpela pen na hevi long ol maniman na ol rabisman wantaim.” Dispela i kirapim yumi long tingim savetok em Jisas i mekim, olsem: “Bungim ol gutpela gutpela samting bilong yupela long heven we ol binatang na ros i no inap bagarapim, na ol stilman i no inap kam na stilim.” (Mat. 6:20) Mani na ol samting inap long lus kwiktaim, olsem na ol man husat i putim ol dispela samting i stap namba 1 long laip bilong ol, planti taim ol i save bel hevi. Em savetingting long putim Jehova i stap namba 1 long laip bilong yumi, long wanem, yumi inap i stap yet olsem pren bilong Jehova maski wanem wanem samting i painim yumi!—Ritim Hibru 13:5, 6.

14. Bilong wanem yumi mas strongim bel?

¹⁴ Jisas i tokim ol disaipel olsem bai i gat ol hevi i kamap long taim em i kam i stap, tasol em i tok: “Yupela i no ken pret.” (Luk 21:9) Yumi mas strongim bel, long wanem, King Jisas Krais na Jehova, em Man Bilong Wokim olgeta samting, ol i helpim yumi. Pol i strongim Timoti na i  tok: “Holi spirit God i save givim yumi i no save kamapim pasin bilong pret, nogat. Em i save givim strong long yumi na kamapim pasin laikim na pasin bilong bihainim gutpela tingting.”—2 Tim. 1:7.

15. Sampela wokman bilong God i tok wanem long pasin bilong ol long bilip long em? Olsem wanem yumi tu inap kisim wankain pasin bilong strongim bel?

¹⁵ Baibel i tokim yumi long sampela tok ol wokman bilong God i bin mekim long pasin bilong ol long bilip long em. Devit i tok: “God tasol i save was long mi na banisim mi. Olsem na mi save bilip long em. Bikpela i save helpim mi, olsem na mi amamas moa long em.” (Sng. 28:7) Pol i tok: “Long rot bilong dispela man husat i bin laikim yumi tumas, yumi save winim tru olgeta dispela samting.” (Rom 8:37) Taim Jisas i save olsem klostu nau ol bai arestim na kilim em i dai, em i mekim wanpela tok i kamapim klia olsem em i pas gut wantaim God. Em i tok: “Mi no stap wanpis, long wanem, Papa i stap wantaim mi.” (Jon 16:32) Toktok ol dispela wokman bilong God i mekim i soim klia wanem samting? Em i soim olsem ol i bilip tru long Jehova. Sapos yumi lain long bihainim wankain pasin tu long bilip long God, orait dispela bai strongim bel bilong yumi na yumi inap karim olkain hevi i painim yumi.—Ritim Song 46:1-3.

16. Bilong wanem em i bikpela samting long yumi stadi long Tok Bilong God?

¹⁶ Bilong yumi ken strongim bel, yumi mas bilip long God na yumi no ken bilip long strong bilong yumi yet. Yumi inap strongim bel sapos yumi stadi oltaim long Baibel. Taim yumi mekim olsem, yumi bai kisim save long God, na yumi lain long bilip long em. Wanpela sista husat i gat sik bilong bel hevi i stori long samting i helpim em olsem, “Mi save ritim ritim ol gutpela ves i stap long Baibel.” Olsem wanem? Yumi bihainim tok bilong gutpela wokboi i gat savetingting na mekim famili lotu long olgeta wik? Taim yumi mekim ol dispela samting, dispela bai helpim yumi long kisim pasin bilong man bilong raitim song, em i tok: “Mi laikim tru lo bilong yu. Mi save tingting long en long san na long nait.”—Sng. 119:97.

17. (a) I gat wanem narapela samting i stap bilong helpim yumi long strongim bel? (b) Stori long olsem wanem wanpela laip stori long ol buk na nius bilong yumi i bin helpim yu.

¹⁷ Na tu, yumi gat ol buk na nius em Baibel i as bilong en, na ol tok bilong en i strongim yumi long bilip tru long Jehova. Planti bratasista i bin kisim helpim long ol laip stori i stap long ol magasin bilong yumi. Wanpela sista long Esia husat i gat sik bilong bel hevi em ol i kolim bipolar mood disorder, em i amamas taim em i ritim laip stori bilong wanpela brata husat i bin mekim wok misineri na em i bin karim hevi bilong dispela wankain sik. Dispela sista i tok, “Dispela stori i helpim mi long kliagut long hevi bilong mi yet na i strongim mi long bilip na wetim gutpela samting bai kamap bihain.”

18. Bilong wanem oltaim yumi mas beten?

 ¹⁸ Pasin bilong beten inap helpim yumi long kain kain taim. Aposel Pol i kamapim olsem beten em i bikpela samting taim em i tok: “Yupela i no ken tingting planti long wanpela samting, nogat. Long olgeta samting, kamapim ol askim bilong yupela long God, mekim long rot bilong ol beten, na long ol prea we yu beten strong, na long ol beten bilong tok tenkyu long God. Na dispela bel isi bilong God i winim tru tingting bilong man, em bai lukautim bel bilong yupela na tingting bilong yupela long rot bilong Krais Jisas.” (Fili. 4:6, 7) Olsem wanem? Oltaim yumi save beten askim long helpim na bai yumi inap karim ol hevi? Alex, wanpela brata long Briten husat i gat sik bilong bel hevi inap longpela taim pinis, em i tok: “Taim mi toktok long Jehova long beten na harim tok bilong em long rot bilong ritim Baibel, dispela i helpim mi tru.”

19. Yumi mas i gat wanem tingting long pasin bilong go long ol miting Kristen?

¹⁹ Pasin bilong bung long ol miting em narapela bikpela samting bilong helpim yumi. Man bilong raitim song i tok: “Mi laikim tumas bai mi stap long en. Olgeta laik bilong mi i laikim tumas haus bilong yu.” (Sng. 84:2) Yu tu yu gat wankain tingting olsem em? Lani, em yumi stori pinis long em long pastaim, em i kamapim tingting bilong em long pasin bilong ol Kristen long bung wantaim, na em i tok: “Mi mas go long olgeta miting. Mi save olsem mi mas stap long dispela hap sapos mi laik bai Jehova i helpim mi.”

20. Olsem wanem pasin bilong autim tok oltaim i helpim yumi?

²⁰ Narapela samting we inap helpim yumi em long wok strong oltaim long autim tok bilong Kingdom. (1 Tim. 4:16) Wanpela sista long Australia husat i bin gat planti hevi long laip bilong em i tok: “Mi no laik tru long mekim wok autim tok, tasol wanpela elda i askim mi long go wantaim em, na mi go. Jehova i bin helpim mi, olgeta taim mi autim tok mi save pilim amamas.” (Snd. 16:20) Planti i luksave olsem taim ol i helpim ol arapela long bilip long Jehova, dispela i strongim bilip bilong ol yet. Taim ol i helpim ol narapela, dispela i helpim ol na ol i no tingim ol hevi bilong ol yet na ol i tingting long “ol samting i bikpela samting moa.”—Fili. 1:10, 11.

21. Yumi inap bilip long wanem samting maski yumi gat hevi?

²¹ Jehova i givim yumi planti samting bilong helpim yumi na bai yumi inap karim ol hevi. Sapos yumi larim em i helpim yumi, yumi bai amamas maski yumi gat hevi. Na tu, yumi inap lain long kisim pasin bilong strongim bel taim yumi tingim tingim long bel na bihainim ol gutpela pasin bilong ol wokman bilong God. Taim pinis bilong pasin nogut bilong nau i kam klostu, yumi inap bungim planti hevi moa, tasol yumi inap mekim wankain tok olsem Pol i bin mekim: “Bel hevi i daunim tru mipela, tasol mipela i no bagarap olgeta” na “yumi no givap.” (2 Kor. 4:9, 16) Long rot bilong helpim bilong Jehova, yumi inap strongim bel na karim ol hevi bilong yumi.—Ritim 2 Korin 4:17, 18.