Yu Tingim Yet?
Olsem wanem? Yu bin ritim gut ol tok bilong ol nupela Wastaua? Orait, yu ken traim bekim ol dispela askim i stap daunbilo:
Olsem wanem yumi inap bosim gut maus?
Yumi mas skelim bel bilong yumi yet. Yumi no ken hariap long sutim tok long pasin bilong wanpela brata, i gutpela yumi skelim wanem samting i kirapim em long mekim dispela pasin. Nogut yumi sutim tok long em na bai ol narapela i ting pasin bilong yumi i gutpela moa winim em. Sapos yumi sutim tok long narapela, dispela inap kamapim bikpela hevi.—8/15, pes 21.
Olsem wanem Lo i kamapim tingting bilong God long pasin ol man i mas mekim long ol meri?
Ol meri bilong lain Israel i stap fri long mekim planti samting, na i gat rot long ol inap kisim skul. Ol man i mas rispektim na givim biknem long ol, na ol inap mekim ol samting ol i gat rait long mekim.—9/1, pes 5-7.
Wanem ol samting bai kamap paslain long de bilong Jehova i kamap?
Ol bai tokaut olsem, “Nau em i taim bilong bel isi na gutpela sindaun!” Ol lain man bai kirapim pait na bagarapim Bikpela Babilon. Ol bai kirapim pait long lain bilong God. Pait bilong Armagedon bai kamap, na bihain long en, Satan na ol ensel nogut bai stap kalabus.—9/15, pes 4.
Yumi no save long wanem taim pinis bai kamap, na olsem wanem dispela i helpim yumi?
Yumi no save long wanem de na aua, na dispela i opim rot long yumi inap kamapim klia tingting i stap long bel bilong yumi. Yumi inap mekim God i belgut long yumi. Dispela i kirapim yumi long daunim laik bilong yumi yet na bilip tru long God na long tok bilong em long Baibel. Na tu, yumi inap larim ol hevi i stretim pasin bilong yumi na mekim i kamap gutpela moa.—9/15, pes 24-25.
Olsem wanem yumi inap yusim tok bilong Stat 3:18, 19 long helpim man husat i bilip long helpaia?
Dispela ves i tok, taim Adam i dai em bai go bek long graun, na i no olsem em bai go long helpaia.—10/1, pes 13.
Revelesen 1:16, 20 i stori long “7-pela sta” i stap long han sut bilong Jisas, na dispela i makim husat?
Dispela i makim ol Kristen em God i makim ol long holi spirit long lukautim kongrigesen, na dispela i makim tu olgeta lain elda.—10/15, pes 14.
Olsem wanem ol famili inap karim hevi taim ol i gat dinau?
Ol marit i mas bihainim pasin isi na toktok gut long dinau ol i gat. Ol i mas skelim gut baset bilong ol. Ol inap mekim ol samting bilong kisim sampela mani moa o no ken baim sampela samting. Ol inap tingim sampela rot long bekim dinau bilong ol, ating ol i ken toktok wantaim ol lain em ol i bin kisim dinau long ol. Tasol ol i mas i gat stretpela tingting long mani. (1 Tim. 6:8)—11/1, pes 19-21.
Olsem wanem Jisas i soim klia pasin daun em Aisaia 50:4, 5 i tok long en?
Ol dispela ves i tok, man em God i ‘skulim long gutpela pasin bilong toktok,’ em i no inap “surik long wok em [God] i laik givim” long em. Jisas i mekim pasin daun, na em i putim gut yau long skul i kam long Papa bilong em. Jisas i amamas na i redi long larim Jehova i skulim em, na em i lukim olsem God i mekim pasin daun taim em i marimari long ol sinman.—11/15, pes 11.
Olsem wanem wanpela stem bilong Estonia i tokaut klia long pasin bilong ol Witnes Bilong Jehova long i stap gut long God?
Long 2007, National Post Office i kamapim wanpela nupela stem i soim pasin em gavman Stalin i bin mekim bilong pinisim lain Estonia. Stem i gat namba 382, na dispela i makim namba bilong ol Witnes na ol pikinini bilong ol, taim gavman i rausim ol long 1951 bilong i go kalabus long Rasia.—12/1, pes 27-28.
