1, 2. Husat ol dispela lain em Pita i kolim ol olsem, “yupela ol man God i makim”? Bilong wanem em i kolim ol olsem “ol tripman”?

 KLOSTU olsem 30 yia bihain long Jisas i go long heven, aposel Pita i mekim dispela tok long wanpela pas em i raitim ‘long ol man God i makim, em ol tripman i stap nabaut long Pontus, Galesia, Kapadosia, Esia, na Bitinia.’ (1 Pita 1:1) Taim Pita i mekim dispela hap tok, “yupela ol man God i makim,” dispela tok i makim ol lain em holi spirit i makim ol na mekim ol i “bon gen, na . . . wetim samting em tru tru bai i kamap,” olsem ol bai mekim wok king wantaim Krais long heven. (Ritim 1 Pita 1:3, 4.) Tasol bilong wanem Pita i kolim dispela lain olsem “ol man bilong narapela ples na ol tripman”? (1 Pita 2:11) Long nau, liklik lain tasol namel long lain Witnes i tok God i bin makim ol long holi spirit. Olsem wanem na bilong wanem yumi ol arapela tu i stap olsem ol man bilong narapela ples na ol tripman?

² I stret long kolim dispela tok “ol tripman” long ol Kristen em God i bin makim long taim bilong ol aposel. Wankain olsem hap lain bilong ol i stap yet long graun long nau, ol i no bilong i stap oltaim long graun. Aposel Pol tu i wanpela bilong dispela “liklik lain sipsip,” em ol Kristen God i bin makim, na em i tok: “Tasol yumi, yumi bilong heven. Na yumi wetim wanpela seivia i kam, em Bikpela Jisas Krais, em i stap long heven.” (Luk 12:32; Fili. 3:20) Ol dispela Kristen i “bilong heven,” olsem na taim ol i dai ol bai lusim graun na i go kisim laip i gutpela moa long heven na ol i no inap dai moa. (Ritim Filipai 1:21-23.) Olsem na i stret long kolim ol olsem “ol tripman” bilong dispela graun em Satan i bosim.

3. Wanem askim i kamap long “ol arapela sipsip”?

³ Tasol olsem wanem long “ol arapela sipsip”? (Jon 10:16) I gat tok bilong Baibel i kamapim olsem ol bai stap  oltaim long graun? Yes, ol bai stap laip oltaim long graun! Tasol long nau, ol tu inap stap olsem ol tripman. Bilong wanem yumi tok olsem?

4. Ol bikman bilong graun i no inap long pinisim wanem ol hevi?

⁴ Taim Satan i bosim yet dispela graun, olgeta manmeri na ol Kristen tu bai wok yet long karim ol hevi i kamap long pasin em Satan i mekim long bikhet long Jehova. Yumi ritim tok i stap long Rom 8:22 olsem: “Yumi save olsem olgeta samting God i wokim, ol i wok long krai na pilim pen wantaim i kam inap long nau.” Ol bikman bilong graun, ol saientis, na ol man husat i mekim wok bilong helpim ol narapela, ol i laik pinisim ol dispela hevi, tasol ol dispela hevi i stap yet.

5. Kirap long 1914, planti milion manmeri i bin mekim wanem? Bilong wanem ol i mekim olsem?

⁵ Olsem na kirap long 1914, planti milion manmeri i makim olsem ol i laik daun long Jisas Krais, em King God i makim. Ol i no laik stap aninit long wok bos bilong Satan. Ol i no laik sapotim dispela graun em Satan i bosim. Ol i givim laip bilong ol na ol samting ol i gat long mekim ol wok bilong helpim Kingdom Bilong God.—Rom 14:7, 8.

6. Olsem wanem ol Witnes Bilong Jehova i stap olsem ol man bilong narapela ples?

⁶ Ol Witnes Bilong Jehova i stap long winim 200 kantri na ol i bihainim gut lo bilong kantri, tasol maski ol i stap long wanem wanem hap, ol i stap olsem ol man bilong narapela ples. Ol i no insait liklik long wok bilong politik na ol samting bilong dispela graun. Long nau tu, ol i tingim ol yet olsem ol sitisen bilong nupela graun em God bai kamapim. Ol i stap olsem ol tripman long dispela haptaim nogut bilong nau, na ol i amamas olsem klostu nau dispela haptaim bai pinis.

7. Olsem wanem ol wokman bilong God inap kamap lain bilong stap oltaim? Ol bai stap oltaim long we?

⁷ Klostu nau Krais bai mekim wok bos na pinisim ol pasin nogut bilong dispela haptaim bilong nau em Satan i bosim. Stretpela gavman em Krais i bosim bai pinisim sin na olgeta samting i mekim ol man i bel hevi. Em bai rausim olgeta man husat i bikhet na i no stap gut long  nambawan wok bos bilong Jehova. Ol man husat i stap gut long God, ol inap kamap lain bilong stap oltaim long Paradais i kamap long graun. (Ritim Revelesen 21:1-5.) Long dispela taim, “olgeta samting God i bin wokim bai lusim dispela kalabus bilong bagarap, na ol bai kisim dispela pasin bilong i stap fri i nambawan tru olsem bilong ol pikinini bilong God.”—Rom 8:21.

8, 9. Taim Pita i tok long “sakim ol laik bilong bel,” dispela i makim wanem samting?

⁸ Pita i kolim ol pasin em ol Kristen i mas bihainim, na em i tok: “Ol pren tru, yupela i stap olsem ol man bilong narapela ples na ol tripman, mi tokim yupela long wok yet long sakim ol laik bilong bel, em ol dispela laik i save pait long yupela.” (1 Pita 2:11) Dispela tok i go long ol Kristen God i bin makim, tasol em i stret tu long ol arapela sipsip bilong Jisas.

⁹ I no gat rong long inapim sampela laik bilong yumi sapos yumi mekim long pasin em God i orait long en. Dispela bai helpim yumi long i stap amamas. Olsem: Yumi gat laik long kisim ol gutpela kaikai na dring, insait long sampela wok na pilai samting, na amamas long bung wantaim ol gutpela pren. Na tu, i stret long ol poroman marit i ken kisim amamas long mekim maritpasin. (1 Kor. 7:3-5) Tasol Pita i toktok long “ol laik bilong bel” we i ‘pait long yumi.’ Jehova i tokim yumi long rot yumi mas bihainim na inapim ol laik bilong yumi. Tasol yumi mas was gut na abrusim ol laik nogut we inap pait long yumi, olsem ol inap bagarapim pasin bilong yumi long pas gut wantaim God. Sapos yumi no mekim olsem, dispela inap bagarapim yumi yet.

10. Wanem sampela samting em Satan i yusim bilong pulim ol Kristen long kamap wanpela bilong ol lain em i bosim?

¹⁰ Satan i laik pulim ol Kristen tru bambai ol i no ken tingim ol yet olsem “ol tripman” long dispela haptaim bilong nau. Satan i yusim mani kago, pasin pamuk, laik bilong kisim biknem, tingting bilong i stap namba 1 long olgeta samting, na pasin bilong litimapim kantri, olsem ol trap bilong pundaunim yumi, na yumi mas luksave long ol dispela samting. Taim yumi tingting strong long sakim ol dispela laik nogut bilong bel, yumi kamapim klia olsem yumi no laik stap olsem wanpela bilong ol lain em Satan i bosim. Yumi soim klia olsem yumi stap olsem ol tripman tasol. Samting yumi laikim tru na yumi wok strong long kisim em olsem, yumi laik stap oltaim long nupela graun em God bai kamapim na i gat stretpela pasin tasol long en.

11, 12. Sampela taim ol asples i save kisim wanem tingting long ol man i kam long ol narapela ples? Ol man i save kisim wanem tingting long ol Witnes Bilong Jehova?

¹¹ Long ol Kristen husat i stap olsem “ol tripman,” Pita i stori moa long ol samting ol i mas mekim, na long ves 12 em i tok: “Mekim yet ol gutpela pasin namel long ol manmeri bilong graun, na maski ol i tok olsem yupela ol man nogut, ol bai lukim gutpela pasin bilong yupela na long dispela rot ol inap givim glori long God long taim em i kam bilong skelim ol samting.” Sampela taim ol asples man i save mekim nogut long ol man i kam long ol narapela ples, em ol tripman. Ol i no wankain olsem ol asples man, olsem na ol asples inap tingim ol olsem ol man nogut. Pasin bilong ol long toktok, mekim ol samting, bilas, na lukluk bilong ol tu bai i no wankain long ol asples lain. Tasol taim ol i mekim gutpela wok, olsem ol i mekim gutpela pasin, dispela i save stretim tingting kranki bilong ol man.

¹² Olsem tasol, ol Kristen tru i no wankain long ol narapela man, kain olsem long pasin bilong toktok na long ol samting ol i makim  bilong kisim amamas long en. Pasin bilong ol long bilas na mekim gut skin i save kamapim klia olsem ol i no stap wankain olsem ol narapela man. Sampela taim ol dispela samting i bin kirapim ol man long sutim tok olsem ol i man nogut. Tasol sampela narapela man inap mekim tok amamas long gutpela pasin ol i bihainim.

13, 14. Olsem wanem “stretpela pasin man i mekim i kamapim ples klia olsem em i gat savetingting”? Stori long dispela.

¹³ Tru tumas, gutpela pasin inap helpim ol man long luksave olsem i no gat as long ol i sutim tok giaman long yumi. Taim Jisas i kam stap olsem man long graun, em tasol i bin stap gut long God, tasol ol man i bin sutim tok tu long em. Sampela i bin kolim em olsem “man bilong kaikai planti tumas na dring planti wain, em i pren bilong ol takisman na ol sinman.” Tasol em i bihainim gutpela tingting na mekim wok bilong God na dispela i soim klia olsem em i no man nogut. Jisas i tok: “Stretpela pasin man i mekim i kamapim ples klia olsem em i gat savetingting.” (Mat. 11:19) Dispela i wankain long nau tu. Olsem: Sampela manmeri i stap klostu long haus Betel long Selters, Jemani, ol i tingim ol brata na sista husat i wok long Betel olsem wanpela lain i narapela kain. Tasol bikman bilong komiuniti i sambai long ol lain i wok long Betel na em i tok: “Ol Witnes husat i wok long dispela hap ol i bihainim wanpela kain pasin bilong ol yet, tasol dispela i no givim hevi long ol narapela long komiuniti.”

¹⁴ I no longtaim i go pinis, wankain samting i bin painim ol Witnes Bilong Jehova long Moscow, Rasia. Ol man i bin sutim planti tok giaman long ol olsem ol i bin mekim ol pasin nogut. Bihain, long Jun 2010, Yuropian Kot ov Human Raits long Strasbourg, Frans, i tok: “Kot i painimaut olsem dispela lain i gat rait long stap fri long mekim lotu, na i no stret long [Moscow] i laik pasim ol long mekim lotu. Ol haus kot bilong kantri i no bin kamapim ‘ol gutpela’ evidens bilong soim olsem dispela lain” i gat asua, olsem ol i gat asua long ol famili i bruk, kirapim ol man long suasaid, o sakim ol marasin samting. Olsem na “ol dispela kot i mekim ol disisen i hatpela tumas na i no stret.”

15. Ol Kristen tru long olgeta hap i bihainim wanem stiatok bilong Baibel?

¹⁵ Ol Witnes Bilong Jehova long Moscow, na long olgeta hap bilong graun, ol i inapim narapela samting em Pita i tok long ol Kristen i mas mekim. Em i tok: “Yupela i mas tingim Bikpela na daun long olgeta wok bos em ol man i bin kamapim. Yupela i mas mekim olsem long king i stap nambawan tru, na long ol hetman.” (1 Pita 2:13, 14) Maski ol Kristen tru i stap narapela kain long ol man nogut bilong dispela graun, ol i bihainim tok bilong Pol na ol i amamas long stap daun long ol gavman em “ol i stap” na mekim wok.—Ritim Rom 13:1, 5-7.

16, 17. (a) Wanem samting i kamapim klia olsem yumi no birua long ol gavman? (b) Sampela bikman bilong politik i bin tokaut long wanem samting?

¹⁶ Taim ol Witnes Bilong Jehova i stap olsem  “ol tripman” long dispela haptaim bilong nau, dispela i no makim olsem ol i laik birua long gavman. Na tu, ol i no birua o pasim wok em ol narapela i mekim bilong stretim ol hevi bilong wok politik o stretim hevi bilong ol man. Ol Witnes Bilong Jehova i no olsem ol narapela lotu em ol i insait long wok politik. Ol i no save traim long stiaim wok bilong ol bikman bilong wok politik. Ol Witnes Bilong Jehova i no gat tingting liklik long birua long gavman o kirapim ol man long mekim olsem, nogat tru!

¹⁷ Taim ol Kristen i bihainim tok bilong Pita long “givim ona long king” na ol i stap daun long ol bikman, ol i soim rispek na givim ona i stret long namba bilong ol dispela bikman. (1 Pita 2:17) Sampela taim, ol bikman bilong gavman i bin tokaut olsem i no gat as long ol i kisim tingting kranki long ol Witnes Bilong Jehova. Olsem: Wanpela politisen bilong Jemani, em Steffen Reiche, bipo em i minista long gavman long taun Brandenburg na bihain em i kamap memba bilong palamen bilong Jemani, em i tok: “Pasin em ol Witnes Bilong Jehova i bihainim insait long ol banis kalabus i bikpela samting long nau tu wankain olsem long bipo, na i helpim pasin demokratik insait long kantri: olsem, ol i holimpas bilip na i no larim lain SS i daunim ol, na ol i mekim pasin sori long ol narapela husat i stap kalabus wantaim ol. Olgeta sitisen bilong kantri bilong yumi i mas i gat ol dispela gutpela pasin, long wanem, ol man i save mekim hatpela pasin long ol man i kam long ol narapela ples, na ol man bilong ol narapela politik grup, o ol man husat i no wanbel long tingting bilong ol narapela.”

18. (a) Bilong wanem yumi gat pasin bilong laikim tru narapela narapela? (b) Ol man i bin mekim wanem tok taim ol i lukim pasin bilong ol Witnes?

¹⁸ Aposel Pita i tok: “Yupela i mas . . . laikim tru olgeta wanbilip bilong yupela, na pret long God.” (1 Pita 2:17) Ol Witnes Bilong Jehova i gat gutpela pasin bilong pret long mekim ol samting God i no laikim, na dispela i strongim ol moa yet long mekim laik bilong em. Ol i amamas long mekim wok bilong Jehova olsem wanpela bikpela lain i stap long olgeta hap bilong graun na ol i gat wankain tingting. Olsem na ol i gat pasin bilong “laikim tru olgeta wanbilip.” Long nau, dispela kain pasin laikim i no stap moa, long wanem, ol man i gat pasin bilong tingim ol yet tasol. Olsem na sampela taim ol man i save kirap nogut tru taim ol i lukim dispela pasin namel long ol Witnes. Wanpela meri husat i wok long kampani bilong Amerika long stretim raun bilong ol turis, em i bin kirap nogut tru taim em i lukim pasin bilong ol Witnes long laikim tru na helpim ol manmeri i kam long ol narapela kantri bilong stap long wanpela intenesenel kibung long Jemani long 2009. Em i tok, long olgeta yia em i bin mekim wok bilong kisim ol turis i go raun, em i no bin lukim kain samting olsem. Bihain wanpela Witnes i tok: “Olgeta tok dispela meri i mekim long mipela i soim olsem em i kirap nogut na i amamas tru.” Olsem wanem? Yu bin harim wankain tok olsem em ol manmeri i bin mekim taim ol i lukim pasin bilong ol Witnes long wanpela kibung em yu bin go long en?

19. Yumi mas tingting strong long mekim wanem? Bilong wanem?

¹⁹ Taim ol Witnes Bilong Jehova i bihainim ol dispela pasin yumi stori pinis long en, na sampela narapela pasin, ol i kamapim klia tru olsem ol i stap olsem “ol tripman” long dispela haptaim bilong nau em Satan i bosim. Na ol i amamas na ol i gat strongpela tingting long stap yet olsem ol tripman. I gat as na ol i bilip tru olsem klostu nau ol bai stap oltaim long nupela taim em God bai kamapim na stretpela pasin tasol bai stap long en. Olsem wanem long yu? Yu bilip na wetim dispela samting?