Watchtower Bilong Simpol Inglis Bilong Wanem Ol i Kamapim?
INAP planti yia pinis, ol manmeri long olgeta hap bilong graun i bin amamas na kisim helpim long ol tok i stap long nius Wastaua em Baibel i as bilong en. Long Julai 2011, ol i kamapim namba 1 Watchtower bilong stadi long simpol Inglis. Dispela nius i tok: “Mipela bai kamapim dispela nupela edisen inap 1-pela yia, na sapos em i helpim gut ol man, orait mipela bai kamapim yet dispela nius.”
Orait nau mipela i amamas long toksave olsem mipela bai kamapim yet dispela nius. Bihain, mipela bai kamapim dispela nius long simpol tok Frans, tok Potugal, na tok Spen.
PLANTI MANMERI I LAIKIM
Bihain long ol bratasista i kisim Watchtower bilong simpol Inglis, sampela bratasista long Saut Pasifik i salim pas na tok: “Nau ol brata i kisimgut ol tok bilong nius Wastaua.” Narapela pas i tok: “Bipo ol i save lusim sampela haptaim long painim mining bilong ol tok, tasol nau ol i yusim dispela haptaim long kisimgut mining bilong ol skripsa em ol i no raitim tok bilong en, na luksave long olsem wanem ol dispela skripsa i stret wantaim tok ol i stadi long en.”
“Bipo ol i save lusim sampela haptaim long painim mining bilong ol tok, tasol nau ol i yusim dispela haptaim long kisimgut mining bilong ol skripsa em ol i no raitim tok bilong en, na luksave long olsem wanem ol dispela skripsa i stret wantaim tok ol i stadi long en”
Wanpela meri husat i grediuet long kolis long Amerika i tok: “Inap 18-pela yia, mi save yusim tokples bilong ol man i gat bikpela save long toktok na rait. Mi kisim pasin bilong toktok na wokim tingting long pasin we i hatwok olgeta. Mi luksave olsem mi mas mekim sampela bikpela senis long pasin bilong mi long toktok na wokim tingting.” Nau em i mekim gut wok bilong autim tok na em i tok: “Dispela Watchtower bilong simpol Inglis i bin helpim mi tru. Pasin ol i yusim long raitim ol tok i skulim mi long mekim ol tok long pasin we i no hatwok long man inap kliagut long en.”
Wanpela sista long Inglan husat i baptais long 1972, em i tok long Watchtower bilong simpol Inglis olsem: “Taim mi ritim namba 1 nius bilong Watchtower bilong simpol Inglis, mi pilim olsem Jehova i sindaun klostu long mi na putim han antap long sol bilong mi na mitupela i rit wantaim. I olsem wanpela papa i ritim stori long pikinini taim pikinini i laik slip.”
Wanpela sista long Betel long Amerika husat i kisim baptais winim 40 yia i go pinis, em i tok dispela Watchtower bilong simpol Inglis i givim sampela nupela save long em. Olsem: Watchtower bilong Septemba 15, 2011 i gat blok, “Some Expressions Explained,” na dispela blok i eksplenim mining bilong ol tok. Em i eksplenim mining bilong dispela hap tok “bikpela lain manmeri ol i olsem bikpela klaut,” olsem i stap long Hibru 12:1 na i tok: “I gat planti manmeri tru em yumi no inap kaunim namba bilong ol.” Dispela sista long Betel i tok: “Dispela tok i mekim save bilong mi long dispela ves i kamap klia moa.” Long ol miting i save kamap long olgeta wik, dispela sista i tok: “Maski sapos pikinini i ritim stret tok i stap long Watchtower bilong simpol Inglis, ol dispela tok i no wankain olsem i stap long Watchtower bilong nomol Inglis em planti long kongrigesen i gat. Olsem na taim pikinini i bekim tok, dispela tok i nupela long yau bilong odiens.”
Narapela sista long Betel i tok: “Mi save laik tru long harim bekim bilong ol liklik pikinini long kongrigesen. Watchtower bilong simpol Inglis i helpim ol na ol inap bilip tru long tok ol i bekim. Ol bekim bilong ol i strongim mi.”
Wanpela sista husat i bin kisim baptais long 1984, em i laikim tru dispela Watchtower bilong simpol Inglis, na em i tok: “Mi pilim olsem ol tok ol i kamapim i bilong mi stret. Mi inap kliagut long ol tok mi ritim. Nau mi bilip tru olsem mi inap bekim tok long taim bilong Wastaua Stadi.”
BIKPELA HELPIM LONG OL PAPAMAMA
Mama bilong wanpela mangi husat i gat 7-pela krismas i tok: “Mi save lusim bikpela haptaim long eksplenim planti sentens taim mipela i redim Wastaua Stadi, na dispela i save mekim na mipela i pilim skin i les.” Olsem wanem Watchtower bilong simpol Inglis i helpim em? Em i tok: “Mi kirap nogut olsem em inap ritim ol paragraf na kliagut long mining bilong ol tok. Em inap mekim olsem, long wanem, ol sentens i sotpela na ol tok bilong en i no hatwok long kliagut long en. Nau em yet i save redim ol bekim bilong kamapim long miting, na olgeta tingting bilong em i save stap long stadi.”
“Mi kirap nogut olsem em inap ritim ol paragraf na kliagut long mining bilong ol tok”
Mama bilong wanpela liklik meri husat i gat 9-pela krismas i tok: “Bipo mipela i save helpim em long redim ol bekim bilong em. Tasol nau em yet i save redim ol bekim. Mipela i no save lusim taim long eksplenim gut ol tok long pasin i no hatwok long em inap kliagut long en. Olsem na nau em i pilim olsem em tu i insait long Wastaua Stadi.”
WANEM TINGTING BILONG OL PIKININI?
Planti pikinini i pilim olsem Watchtower bilong simpol Inglis i bilong helpim ol. Rebecca, em i gat 12-pela krismas, i tok: “Plis kamapim yet dispela nupela edisen!” Em i tok moa olsem: “Mi laikim tru dispela hap ‘Some Expressions Explained.’ Em isi tru long ol pikinini inap kliagut long en.”
Nicolette husat i gat 7-pela krismas, em tu i gat wankain tingting, em i tok: “Bipo mi hatwok long kliagut long ol tok bilong Wastaua. Tasol nau mi yet inap long givim planti bekim.” Emma, em i gat 9-pela krismas, i tok: “Dispela Wastaua i helpim tru mi na brata bilong mi husat i gat 6-pela krismas. Nau mipela inap long kliagut moa long ol tok! Tenkyu tru!”
Planti man i kisim helpim long Watchtower bilong simpol Inglis, long wanem, em i gat ol sentens na ol tok em man inap kliagut long en. Dispela Watchtower i inapim laik bilong planti manmeri, olsem na ol bai wokim yet dispela Watchtower wantaim nomol Wastaua em ol i bin kirap long wokim long yia 1879.
