1. Sampela man i gat wanem tingting long ol man bilong narapela kantri? Bilong wanem i no stret long holim dispela kain tingting?

 OLSEM yumi stori pinis long en long atikol i kamap paslain long dispela, sampela manmeri i no save laikim ol manmeri husat i kam long ol narapela kantri. Ol inap pilim olsem ol i winim ol dispela manmeri. Tasol i no stret long holim dispela kain tingting. I no gat wanpela man i winim narapela. Buklet The Races of Mankind i tok maski ol man i bilong narapela narapela lain, olgeta i stap brata brata olsem Baibel i skulim yumi. Maski ol brata i gat narapela narapela pasin, ol i stap yet olsem ol brata.

2, 3. Jehova i gat wanem tingting long ol man bilong narapela kantri?

² Long taim ol i raitim Baibel, God Jehova i mekim wanpela kontrak, o tok promis, long mekim lain Israel i kamap ol manmeri bilong em yet. Maski lain Israel i stap olsem ol lain manmeri bilong God Jehova, Lo i tok long ol i mas rispektim na mekim stretpela pasin long ol manmeri bilong ol narapela lain. Dispela em samting yumi tu i mas mekim long nau. Ol Kristen i no ken luk daun long ol manmeri i kam long ol narapela kantri. Bilong wanem? Aposel Pita i tok: “God i save mekim wankain pasin long olgeta man. Na em i save laikim man husat i save pret long em na bihainim stretpela pasin maski em i bilong wanem lain.”—Apo. 10:34, 35.

³ Long taim bilong Israel long bipo, ol manmeri i kam long ol narapela kantri i gat gutpela sindaun taim ol i pas gut wantaim ol asples lain bilong Israel. Dispela i kamapim klia tingting bilong Jehova, em planti yia bihain aposel Pol i kamapim taim em i askim Jehova olsem: “Ating God em i God bilong ol Juda tasol, a? Ating em i no God bilong ol manmeri bilong ol arapela lain tu? Nogat. Em i God bilong ol arapela lain tu.”—Rom 3:29; Jol. 2:32.

4. Long “lain Israel bilong God,” bilong wanem i no gat wanpela man i stap olsem man bilong narapela kantri?

 ⁴ Taim God i wokim nupela kontrak wantaim ol Kristen em i makim long holi spirit, lain Israel bilong skin i no stap moa olsem ol lain manmeri bilong God. Olsem na lain Kristen em God i makim ol i kamap “lain Israel bilong God.” (Gal. 6:16) Pol i stori olsem insait long dispela nupela lain, “i no gat man Grik o man Juda, o pasin bilong katim skin o pasin bilong i no katim skin, o man bilong narapela ples, o man Sitia, o wokboi, o friman. Tasol Krais em i olgeta samting na em i stap insait long ol.” (Kol. 3:11) Dispela i mekim na insait long kongrigesen Kristen, i no gat man i stap olsem man bilong narapela kantri.

5, 6. (a) Ating sampela man bai i gat wanem askim long Aisaia 61:5, 6? (b) “Ol pris bilong Bikpela” na “ol man bilong ol arapela kantri” em Aisaia i tok long en i makim husat? (c) Olsem wanem “ol pris bilong Bikpela” na “ol man bilong ol arapela kantri” i wok wantaim?

⁵ Tasol ating sampela man bai i laik save long tok profet i stap long Aisaia sapta 61, em truim bilong en i wok long kamap insait long kongrigesen Kristen. Ves 6 bilong dispela sapta i kolim ol lain em ol bai mekim wok olsem “ol pris bilong Bikpela.” Tasol ves 5 i kolim “ol man bilong ol arapela kantri” husat bai wok wantaim ol dispela “pris.” Bilong wanem dispela ves i kolim “ol man bilong ol arapela kantri”?

⁶ Yumi save olsem “ol pris bilong Bikpela” em ol Kristen God i bin makim na ol “i insait long namba 1 kirap bek” na “ol bai stap pris bilong God na bilong Krais, na ol bai mekim wok king wantaim em inap 1,000 yia.” (Rev. 20:6) Na tu, i gat planti Kristen em ol i stap gut long God na ol i bilip na wet long kisim laip long graun. Ol manmeri bilong dispela lain i wok gut wantaim ol Kristen husat bai i go mekim wok long heven. Dispela lain bilong kisim laip long graun, ol i no insait long “lain Israel bilong God,” tasol ol i stap olsem ol manmeri bilong ol narapela kantri. Ol i amamas long helpim wok bilong “ol pris bilong Bikpela,” na ol i stap olsem ol man bilong “brukim graun na planim kaikai” na “lukautim tu ol gaden wain.” Ol i helpim ol Kristen God i makim long givim biknem long God long rot bilong autim tok na skulim ol man long tok i tru. Ol Kristen God i makim na “ol arapela sipsip,” ol i save wok wantaim long skulim ol manmeri long tok i tru na helpim ol long bihainim ol tok ol i lainim.—Jon 10:16.

7. Olsem wanem ol Kristen long nau i wankain olsem Abraham na ol narapela bilipman bilong bipo?

⁷ Olsem yumi bin skelim pinis long stadi i kamap paslain long dispela, ol Kristen tru i  olsem ol man bilong narapela ples, long wanem, ol i stap olsem “tripman” long graun nogut bilong Satan. Ol i wankain olsem ol bilipman bilong bipo, kain olsem Abraham, em Baibel i tok “ol i man em ol arapela i no save long ol na ol i stap olsem tripman long ples ol i sindaun long en.” (Hib. 11:13) Maski yumi bilong kisim laip long heven o long graun, yumi inap pas gut wantaim Jehova olsem Abraham i bin mekim. Jems i tok: “‘Abraham i bilip long Jehova, olsem na long ai bilong em Abraham i olsem stretpela man,’ na Abraham i kisim nem olsem ‘pren bilong Jehova.’”—Jems 2:23.

8. Jehova i mekim wanem tok promis long Abraham? Abraham i gat wanem tingting long dispela tok promis?

⁸ God i tok promis olsem long rot bilong Abraham na ol lain tumbuna bilong em, olgeta famili long graun bai kisim blesing. (Ritim Aposel 3:25.) Maski dispela tok promis bai kamap tru planti yia bihain long Abraham i dai, em i holimpas bilip olsem dispela promis bai kamap tru. Klostu long laip olgeta bilong em, em na famili bilong em i raun long wanpela ples i go long narapela ples, na ol i no stap long wanpela hap stret. Abraham i holimpas pasin bilong em long stap olsem pren bilong Jehova.

9, 10. (a) Olsem wanem yumi inap bihainim pasin bilong Abraham? (b) Yumi ken helpim long bringim wanem singaut i go long ol man?

⁹ Maski Abraham i no save long wanem taim stret em bai lukim truim bilong ol samting em i bilip na wet long en, em i holimpas pasin bilong laikim Jehova na lotuim em. Em i holim wanpela tingting tasol, na em i no tingting long stap oltaim long wanpela ples. (Hib. 11:14, 15) Yumi mas bihainim pasin bilong Abraham, na yumi no ken tingting tumas long kisim planti mani kago, kisim biknem, na kisim gutpela wok mani! Bilong wanem bai yumi wok hat long kisim gutpela sindaun long dispela haptaim em klostu nau bai pinis? Bilong wanem bai yumi laikim tumas ol samting we i no inap stap oltaim? Wankain olsem Abraham, yumi tu i bilip na wet long kisim ol samting i gutpela moa winim ol samting bilong nau. Yumi redi long soim pasin bilong wet i go inap long taim ol tok promis bilong God i kamap tru.—Ritim Rom 8:25.

¹⁰ Jehova i wok yet long singautim ol manmeri bilong olgeta lain man long kisim blesing long rot bilong lain pikinini bilong Abraham. Na bilong bringim dispela singaut i go long ol manmeri long olgeta hap, “ol pris bilong Bikpela” na “ol man bilong ol arapela kantri,” ol i yusim moa long 600 tokples long singautim ol man.

11. Solomon i singautim ol manmeri bilong ol narapela lain long mekim wanem?

¹¹ Taim Solomon i dediketim tempel long yia 1026 B.C.E., em i mekim wanpela samting i stret wantaim tok promis em Jehova i bin mekim long Abraham, na em i luksave olsem ol man bilong olgeta lain tu bai givim biknem long Jehova. Em i beten na tok: “Ol man bilong ol arapela kantri i bin harim tok long biknem bilong yu, na long ol bikpela wok tru yu bin mekim bilong helpim mipela ol manmeri bilong yu. Na sapos wanpela bilong ol i laik lotu long yu na i lusim as ples bilong en na i kam klostu long dispela haus na i beten long yu, orait Bikpela, yu stap long ples bilong yu long heven na yu ken harim beten bilong en na mekim ol samting em i askim yu long mekim. Olsem na bai olgeta lain man long olgeta kantri i ken save long yu na i stap aninit long yu, olsem mipela Israel, ol manmeri bilong yu, i save mekim.”—1 Kin. 8:41-43.

12. Bilong wanem sampela man i tingim ol Witnes Bilong Jehova olsem wanpela lain i narapela kain, o olsem “ol man bilong ol arapela kantri”?

¹² Ol Witnes Bilong Jehova i stap olsem ol man i kam long narapela kantri. Ol i sapotim tru Kingdom Bilong God, em gavman i stap long heven na Krais i stap King bilong en. Olsem  na ol i no insait liklik long wok politik maski sampela man i tingim ol olsem wanpela lain i narapela kain.

13. (a) Olsem wanem yumi inap kisim stretpela tingting na yumi no tingim ol narapela olsem ol man bilong narapela kantri? (b) Long pastaim yet, Jehova i laik bai ol manmeri bilong olgeta lain man i gat wanem tingting long narapela narapela?

¹³ Yumi inap luksave kwik long ol man bilong ol narapela kantri taim yumi harim tokples bilong ol, lukim pasin ol i bihainim, skelim lukluk bilong ol, na pasin bilong ol long bilas na mekim gut skin. Maski i olsem, bikpela samting em ol samting i wankain long olgeta lain man, na i no ol samting i no wankain. Olsem na sampela samting tasol i mekim na yumi tingim ol narapela olsem ol i man bilong narapela kantri. Sapos yumi tingim ol samting we i mekim na yumi wankain long ol narapela, dispela bai mekim na yumi no inap tingim ol olsem ol man bilong narapela kantri. Sapos olgeta manmeri long graun i stap aninit long wanpela wok politik na wanpela gavman tasol, i no gat man bai stap olsem man bilong narapela ples. Jehova i tingting pinis long mekim na bai ol manmeri bilong olgeta lain man i kamap wanpela famili aninit long wanpela wok bos, em wok bos bilong em. Yu ting long nau ol manmeri bilong olgeta lain man inap kisim stretpela tingting na i no tingim ol narapela olsem ol i man bilong narapela kantri?

14, 15. Ol Witnes Bilong Jehova olsem wanpela lain olgeta i holim wanem tingting?

¹⁴ Yumi stap namel long ol manmeri em ol i gat pasin bilong tingim ol yet tasol na litimapim kantri bilong ol, tasol em gutpela long lukim olsem i gat sampela manmeri husat i save laikim ol manmeri bilong olgeta kain lain. Em tru olsem i hatwok liklik long senisim tingting yumi holim long ol manmeri bilong ol narapela lain. Ted Turner, em man husat i bin kamapim CNN TV, em i bin wok wantaim ol saveman i kam long narapela narapela kantri, na em i tok: ‘Mi bin amamas tru long wok wantaim ol dispela manmeri. Mi luksave olsem ol manmeri bilong ol narapela kantri ol tu i sitisen bilong dispela planet, wankain olsem mi.’ Em i putim lo olsem ol wokman bilong em i no ken kolim dispela tok “ol man bilong narapela kantri.” Ol i ken kolim dispela tok “intenesenel.”

¹⁵ Long olgeta hap bilong graun, ol Witnes Bilong Jehova tasol em lain husat i holim wankain tingting olsem bilong God long ol manmeri bilong olgeta lain. Dispela i helpim ol long senisim tingting ol i gat long ol manmeri bilong ol narapela kantri. Ol i no heitim ol dispela manmeri, o pilim olsem ol i no inap trastim ol, nogat. Ol Witnes Bilong Jehova i amamas long narapela narapela pasin na save bilong ol manmeri bilong kain kain lain. Olsem wanem? Yu save tingim tingim dispela gutpela pasin em ol Witnes Bilong Jehova i mekim? Na yu save  tingim tingim olsem wanem dispela pasin i helpim yu long pas gut wantaim ol narapela?

16, 17. Olsem wanem truim bilong Revelesen 16:16 na Daniel 2:44 bai helpim yu?

¹⁶ Klostu nau olgeta kantri i stap long nau bai pait long Jisas Krais na ami bilong em long laspela pait bilong daunim wok bos bilong God, nem bilong dispela pait “long tok Hibru ol i kolim Armagedon.” (Rev. 16:14, 16; 19:11-16) Winim 2,500 yia i go pinis, holi spirit i stiaim profet Daniel long mekim tok profet long samting bai painim ol gavman bilong graun em ol i laik pasim samting em God i tingting pinis long kamapim. Em i tok: “Na taim ol dispela king i stap yet God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.”—Dan. 2:44.

¹⁷ Tingim gutpela samting bai kamap taim dispela tok profet i kamap tru. Long nau ol man i putim banis namel long ol yet na ol man bilong ol narapela kantri, tasol dispela pasin bai pinis. Ating sampela samting bai i no wankain, na dispela bai soim olsem God i wokim planti gutpela samting na olgeta i gat kain kain bilas bilong en. Kain samting olsem i mas kirapim yumi olgeta long wok strong long givim biknem long Man Bilong Wokim yumi, em God Jehova.

18. Wanem ol senis i kamapim klia olsem ol Witnes Bilong Jehova i no tingim narapela narapela olsem “ol man bilong ol arapela kantri”?

¹⁸ Yu ting i hatwok long ol manmeri bilong narapela narapela kantri long stap olsem wanpela lain tasol? Nogat, i no hatwok long mekim olsem. Yumi inap bilip tru olsem dispela samting bai kamap. Ol Witnes Bilong Jehova i no tingim narapela narapela olsem ol i “man bilong ol arapela kantri.” Olsem: Long nau ol i pasim ol liklik brens ofis na mekim ol wok bilong en long ol narapela kantri bambai em i isi moa long stiaim na inapim tru wok bilong autim gutnius bilong Kingdom. (Mat. 24:14) Maski i gat banis i stap namel long narapela narapela kantri, dispela i no pasim ol Witnes Bilong Jehova long mekim ol dispela senis, na lo i no tambuim dispela samting. Dispela tu i kamapim klia olsem Jisas Krais husat i mekim wok olsem King em Jehova i makim, em i wok long mekim pait bilong pinisim ol samting i stap olsem banis, na klostu nau em bai “winim ol pait”!—Rev. 6:2.

19. Tok i tru i helpim ol manmeri bilong Jehova na ol inap mekim wanem?

¹⁹ Ol Witnes Bilong Jehova i kam long planti kantri na ol i mekim narapela narapela tokples, tasol dispela i no pasim ol long holim strong tok i tru. Dispela i strongim tru pasin wanbel namel long ol. (Ritim Sefanaia 3:9.) Maski ol i stap long dispela haptaim we i pulap long pasin nogut, ol i stap wanbel olsem wanpela bikpela lain famili long olgeta hap bilong graun. Dispela i soim klia olsem, long nupela taim bai i no gat man i stap olsem man bilong narapela kantri. Long dispela taim, olgeta manmeri bai amamas long tingim ol man bilong olgeta kain lain na skin olsem olgeta i stap brata brata.