1. Taim ol man i harim dispela tok wokboi, ol i save tingim wanem samting?

 INAP olsem 2,500 yia i go pinis, wanpela saveman bilong Grik i tok: “I no gat man i save amamas long stap olsem wokboi.” Planti long nau bai wanbel long dispela tok. Taim ol man i harim dispela tok wokboi, ol i save tingim ol man em ol narapela i daunim ol na ol i stap kalabus, na ol i mekim wok bilong helpim ol man husat i bosim ol, na i no bilong helpim ol yet.

2, 3. (a) Krais i givim wanem ol samting long ol gutpela wokboi bilong em? (b) Bai yumi skelim wanem ol askim?

² Tasol Jisas i kamapim klia olsem ol disaipel bilong em bai stap olsem ol wokman i gat pasin daun, olsem ol wokboi. Taim ol Kristen tru i mekim wok olsem ol wokboi, dispela i no makim olsem bosman bilong ol bai daunim ol o mekim hatpela pasin long ol, nogat. Bosman bilong ol i givim biknem long ol, trastim ol, na rispektim ol. Olsem: Tingim tok Jisas i mekim long wanpela “wokboi” paslain long Jisas i dai. Krais i tok em bai givim wok long wanpela “gutpela wokboi i gat savetingting.”—Mat. 24:45-47.

³ Long wankain stori em Luk i raitim, em i kolim dispela wokboi olsem “bosboi.” (Ritim Luk 12:42-44.) Planti bilong ol gutpela Kristen em ol i stap laip long nau, ol i no memba bilong dispela lain bosboi. Tasol Baibel i soim olsem olgeta man husat i mekim wok bilong God, ol i stap olsem ol bosboi. Ol i mekim wanem ol wok? Yumi mas i gat wanem tingting long ol dispela bosboi? Bilong kisim bekim bilong ol dispela askim, yumi bai stori long wok em ol bosboi bilong bipo i save mekim.

4, 5. Ol bosboi bilong bipo i bin mekim wanem ol wok? Stori long sampela.

⁴ Long bipo, sapos bosman i trastim wanpela wokboi na  makim em long bosim olgeta samting i kamap long haus o long wok bisnis bilong bosman, orait dispela wokboi bai mekim wok olsem bosboi. Dispela bosboi i gat namba long bosim ol samting long haus, mani, na ol narapela wokboi. Yumi ken tingim Elieser, em i bin mekim wok bilong bosim olgeta samting bilong Abraham. Ating Abraham i bin salim Elieser i go long Mesopotemia long painim wanpela meri bilong pikinini man bilong em, Aisak. Dispela em i wanpela bikpela wok tru!—Stt. 13:1, 2; 15:2; 24:2-4.

⁵ Josep, em tumbuna pikinini bilong Abraham, em i lukautim olgeta samting long haus bilong Potifar. (Stt. 39:1, 2, 4) Bihain, Josep tu i gat wanpela bosboi bilong “lukautim haus bilong Josep.” Dispela bosboi i stretim rot bilong givim kaikai na wara long 10-pela brata bilong Josep. Na tu, em i bihainim tok bilong Josep na yusim kap silva bilong Josep long traim ol brata bilong em bambai i luk olsem ol i bin stilim dispela kap. Dispela i kamapim klia olsem ol bosman i save trastim tru ol bosboi bilong ol.—Stt. 43:19-25; 44:1-12.

6. Ol elda Kristen i mekim wanem ol wok olsem ol bosboi?

⁶ Planti handret yia bihain, aposel Pol i tok wasman Kristen i mas mekim wok olsem “bosboi i mekim wok bilong God.” (Tai. 1:7) Ol wasman i gat wok long lukautim “ol sipsip bilong God,” olsem na ol i save givim ol tok bilong stiaim kongrigesen na go pas long mekim ol wok. (1 Pita 5:1, 2) Ol wasman i gat kain kain wok bilong mekim. Olsem: Planti wasman Kristen long nau i lukautim wanpela kongrigesen tasol. Ol wasman raun i lukautim planti kongrigesen. Na Brens Komiti i lukautim olgeta kongrigesen insait long wanpela kantri. Tasol olgeta wasman i mas mekim gut wok bilong ol, long wanem, olgeta i mas “bekim tok long God long dispela wok ol i bin mekim.”—Hib. 13:17.

7. Olsem wanem yumi save olsem olgeta Kristen i mekim wok olsem ol bosboi?

⁷ Olsem wanem long planti arapela Kristen em ol i no mekim wok olsem ol wasman? Aposel Pita i raitim wanpela pas i go long olgeta Kristen na em i tok: “Yupela ol gutpela bosboi bilong ol kain kain presen em bikpela pasin helpim bilong God i as bilong en. Yupela olgeta wan wan i bin kisim presen, olsem na yupela i mas yusim ol dispela presen bilong helpim ol arapela.” (1 Pita 1:1; 4:10) God i soim bikpela pasin helpim long yumi olgeta, na em i givim ol samting olsem presen, yumi gat save bilong mekim sampela kain wok, na yumi inap yusim dispela long helpim ol wanbilip. Olsem na olgeta wokman bilong God i mekim wok olsem ol wokboi, na God i givim biknem long ol, trastim ol, na givim wok long ol.

8. Wanem wanpela bikpela stiatok em yumi mas tingim?

⁸ Orait nau yumi bai skelim 3-pela stiatok em yumi ol lain i stap olsem ol bosboi i mas tingim. Namba 1 stiatok: Yumi olgeta i bilong God na yumi mas bekim tok long em long olgeta wok yumi mekim. Pol i tok: “Yupela i no bilong yupela yet, long wanem, God i baim yupela long bikpela pe,” em blut bilong Krais olsem sakrifais. (1 Kor. 6:19, 20) Yumi bilong Jehova, olsem na yumi mas bihainim tok bilong em, na ol tok bilong em i no hatwok long bihainim. (Rom 14:8; 1 Jon 5:3) Na tu, yumi kamap olsem ol wokboi bilong Krais. Wankain olsem ol bosboi bilong bipo, yumi gat fridom long mekim planti samting, tasol i gat mak bilong en. Maski yumi mekim wanem ol wok long nau, yumi stap yet olsem ol wokman bilong God na Krais.

9. Jisas i stori olsem wanem long pasin i stap namel long bosman na wokboi?

⁹ Jisas i helpim yumi long save long pasin i stap namel long bosman na wokboi. Em i stori long ol disaipel long wanpela wokboi husat i wok inap de olgeta na em i kam bek long haus. Yu ting bosman i tok: “Kam hariap na sindaun long tebol”? Nogat. Em i tok: “Redim samting bilong mi long kaikai bilong apinun, na pasim laplap  na tilim ol samting long mi inap long mi kaikai na dring pinis, na bihain yu ken i go kaikai na dring.” Jisas i laik skulim ol disaipel long wanem samting? Em i tok: “Olsem na yupela tu, taim yupela i mekim pinis ol wok bilong yupela, yupela i mas tok, ‘Mipela ol wokboi nating. Wok mipela i bin mekim, em wok bilong mipela na i stret mipela i mekim.’”—Luk 17:7-10.

10. Wanem samting i soim olsem Jehova i amamas long olgeta hatwok bilong yumi long wok bilong em?

¹⁰ Jehova i amamas long olgeta hatwok bilong yumi long wok bilong em. Baibel i tok: “God i no man bilong mekim pasin i no stret na bai em i lusim tingting long ol wok yupela i bin mekim na pasin bilong yupela long laikim tru nem bilong em.” (Hib. 6:10) Jehova i save askim yumi long mekim wok inap long skel bilong yumi. Ol wok em i askim yumi long mekim, ol i bilong helpim yumi, na i no bilong givim hevi long yumi. Olsem long stori bilong Jisas, wokboi i no save putim laik bilong em yet i stap namba 1 na mekim ol samting bilong amamasim em yet, nogat. Long wankain pasin, taim yumi dediket long God, yumi mekim disisen bilong putim laik bilong God i stap namba 1 long laip bilong yumi. Yu wanbel long dispela tok?

11, 12. Yumi stap olsem ol bosboi, olsem na yumi mas soim wanem pasin? Yumi mas abrusim wanem ol samting?

¹¹ Namba 2 stiatok: Yumi olgeta i stap olsem ol bosboi, olsem na yumi stap aninit long ol wankain lo. Em tru olsem i gat sampela wok em bilong sampela lain tasol long kongrigesen Kristen long mekim. Tasol planti arapela wok em bilong olgeta long mekim. Olsem: Yumi stap olsem ol disaipel bilong Krais na ol Witnes Bilong Jehova, olsem na yumi mas laikim tru narapela narapela. Jisas i tok pasin laikim bai soim klia husat ol i Kristen tru. (Jon 13:35) Yumi laikim ol wanbilip bilong yumi, na tu, yumi wok strong long soim pasin laikim long ol arapela em ol i no wanbilip. Dispela em samting yumi olgeta inap mekim, na yumi mas mekim.

¹² Yumi gat wok tu long bihainim stretpela pasin. Yumi laik abrusim ol pasin na wokabaut em Baibel i tambuim. Pol i tok: “Ol man i save mekim pasin pamuk, na lotuim ol imis, na mekim pasin adaltri, na ol man i orait long ol man i mekim pasin sem long ol, na ol man i slip wantaim ol man, na ol stilman, na ol gridi man, na ol spakman, na ol man bilong toknogutim ol arapela, na ol man bilong pulim ol samting bilong ol arapela, olgeta dispela kain man bai i no inap i go insait long kingdom bilong God.” (1 Kor. 6:9, 10) Em tru olsem yumi mas taitim bun long bihainim ol stretpela lo bilong God. Tasol taim yumi mekim olsem, dispela bai helpim tru yumi, olsem yumi bai gat gutpela helt, pas gut wantaim ol narapela, na God bai orait long yumi.—Ritim Aisaia 48:17, 18.

13, 14. Olgeta Kristen i mas mekim wanem wok? Yumi mas i gat wanem tingting long dispela wok?

¹³ Tingim tu olsem bosboi i gat wok em i mas mekim. Na olsem tasol, yumi tu i gat wok yumi mas mekim. Yumi bin kisim wanpela gutpela presen tru—em save bilong tok i tru. God i laik yumi mas autim dispela save long ol narapela tu. (Mat. 28:19, 20) Pol i tok: “Ol man i ken tingim mipela olsem ol wokman i stap aninit long Krais na ol bosboi i gat wok long lukautim ol tok hait holi bilong God.” (1 Kor. 4:1) Pol i save olsem bosboi i mas lukautim gut “ol tok hait holi” na mekim gut wok bilong autim ol dispela tok long ol narapela olsem Bosman, Jisas Krais, i tokim em long mekim.—1 Kor. 9:16.

¹⁴ Taim yumi autim tok i tru long ol narapela, dispela i soim olsem yumi laikim ol tru. Em tru olsem olgeta wan wan Kristen i gat narapela narapela sindaun. Olsem na skel bilong ol long wok autim tok bai i no wankain. Jehova i save long skel bilong ol. Bikpela samting em olsem, yumi mas mekim olgeta samting yumi inap mekim. Long dispela rot, yumi soim olsem yumi laikim tru God na ol narapela man.

15-17. (a) Bilong wanem bosboi i mas mekim gut wok bilong em? (b) Jisas i kamapim wanem stori bilong soim hevi inap kamap sapos yumi no mekim gut wok bilong yumi?

¹⁵ Namba 3 stiatok i klostu wankain long 2-pela stiatok em yumi stori pinis long en, olsem: Yumi mas stap gut long God na bihainim tok. Bosboi i ken i gat planti gutpela pasin na save gut long mekim wok, tasol ol dispela save inap kamap olsem samting nating sapos em i no mekim wok o i no stap gut long bosman. Sapos bosboi i stap gut long bosman, dispela bai helpim em long mekim gut wok na wok bilong em bai kamap gutpela. Tingim gen tok bilong Pol, olsem: “Bosboi i mas stap olsem man i save mekim tru wok bilong em.”—1 Kor. 4:2.

¹⁶ Sapos yumi stap gut long God, em bai givim pe long yumi. Sapos yumi no stap gut long God, yumi bai lus long kisim pe. Yumi lukim dispela stiatok long stori bilong Jisas long ol wokboi i kisim mani talen. Ol wokboi husat i kisim mani long bosman na “mekim wok bisnis” long en, bosman i tok amamas long ol na givim bikpela pe long ol. Tasol wokboi husat i kisim mani long bosman na i no mekim gutpela wok long en, bosman i kolim em “wokboi nogut,” “lesman,” na “yusles wokboi.” Ol i rausim mani long han bilong em na tromoi em i go ausait.—Ritim Matyu 25:14-18, 23, 26, 28-30.

¹⁷ Long narapela taim tu, Jisas i stori long samting inap kamap sapos yumi no stap gut long God. Em i tok: “Wanpela maniman i gat wanpela bosboi. Dispela maniman i harim olsem bosboi bilong en i wok long westim ol samting bilong en. Olsem na em i singautim bosboi i kam na tokim em, ‘Em wanem kain tok mi harim long yu? Yu go wokim wanpela ripot long ol wok yu bin mekim na givim long mi, long wanem, yu no inap bosim haus moa.’” (Luk 16:1, 2) Bosboi i westim ol samting bilong bosman, olsem na bosman i pinisim em long wok. Yumi kisim  bikpela skul long dispela stori! Oltaim yumi mas mekim gut olgeta wok em God i laik yumi mas mekim.

18. Bilong wanem yumi no ken skelim wok bilong yumi wantaim wok bilong ol narapela?

¹⁸ Yumi olgeta wan wan i ken askim yumi yet olsem, ‘Mi gat wanem tingting long wok bilong mi olsem bosboi?’ Hevi inap kamap taim yumi skelim wok bilong yumi yet wantaim ol narapela. Baibel i tok: “Olgeta man wan wan i mas skelim wok bilong ol yet. Na long dispela rot, bai ol i amamas long samting ol yet i mekim, na ol i no ken skelim ol yet wantaim narapela.” (Gal. 6:4) Yumi mas skelim wok bilong yumi yet, na no ken skelim wok bilong yumi wantaim wok bilong ol narapela. Dispela bai helpim yumi na yumi no kisim pasin antap, na yumi bai i no inap bel hevi. Taim yumi skelim wok bilong yumi yet, yumi mas tingim olsem sindaun i save senis. Ating helt bilong yumi i no gutpela, krismas i go antap, na yumi gat sampela narapela wok, olsem na yumi no inap mekim olgeta samting olsem long pastaim. O ating yumi inap mekim bikpela wok moa winim wok yumi mekim long nau. Sapos olsem, orait traim long mekim wok bilong yumi i kamap gutpela moa.

19. Sapos yumi no kisim wanpela wok, bilong wanem yumi no ken bel hevi?

¹⁹ Narapela samting yumi mas tingim em ol wok yumi gat pinis na ol wok yumi laik tru long kisim. Olsem: Ating wanpela brata i laik mekim wok olsem elda long kongrigesen o em i laik mekim sampela tok long ol kibung. I gutpela long em i wok strong long winim ol mak bambai em inap kisim ol dispela wok, tasol yumi no ken bel hevi sapos em i no kisim dispela wok hariap. Ating em bai kisim dispela wok bihain long sampela haptaim, long wanem, i gat sampela risen yumi no kliagut long en. Tingim olsem: Moses i ting em i redi long bringim lain Israel i go ausait lusim Isip, tasol em i mas wet inap 40 yia paslain long em i mekim olsem. Insait long dispela haptaim, em i kamapim ol pasin em i mas i gat bilong stap olsem lida bilong dispela bikhetlain.—Apo. 7:22-25, 30-34.

20. Yumi inap kisim wanem skul long pasin bilong Jonatan?

²⁰ Sampela taim yumi no inap kisim wanpela wok. Dispela samting i bin kamap long Jonatan. Em i pikinini man bilong Sol na em inap kamap king bilong bosim lain Israel. Tasol God i makim Devit long kamap king, na em i yangpela moa long Jonatan. Jonatan i mekim wanem? Em i orait long dispela samting na em i helpim Devit maski bagarap inap painim em. Em i tokim Devit: “Bai yu kamap king bilong Israel, na mi bai stap namba 2 bilong yu.” (1 Sml. 23:17) Yumi inap kisim wanem skul long pasin bilong Jonatan? Pasin bilong Jonatan i no wankain olsem pasin bilong papa bilong em. Jonatan i orait long ol samting i kamap, na em i no jeles long Devit. Yumi no ken jeles long ol narapela long wok ol i kisim, nogat, yumi olgeta i mas tingting tasol long mekim gut ol wok yumi gat pinis. Yumi ken bilip tru olsem long nupela taim, Jehova bai inapim tru ol stretpela laik bilong olgeta wokman bilong em.

21. Yumi mas i gat wanem tingting long wok bilong yumi olsem ol bosboi?

²¹ Yumi mas tingim olsem God i trastim yumi na yumi inap i stap olsem ol bosboi, olsem na yumi no stap olsem ol wokboi em ol bosman i save daunim na mekim hatpela pasin long ol, nogat. Yumi stap narapela kain tru. Yumi amamas tru, long wanem, God i givim biknem long yumi, na nau long dispela laspela haptaim yumi inap mekim wanpela wok we i no inap kamap gen, em wok bilong autim gutnius. God i larim yumi yet long makim wanem rot yumi bai bihainim long mekim ol wok em i givim long yumi. Olsem na yumi mas stap olsem ol bosboi i mekim gut wok. Yumi ken amamas tru long gutpela samting yumi gat, olsem yumi inap mekim wok bilong Man i stap nambawan tru winim olgeta man long heven na long graun.