SAMPELA yia i go pinis, Roald na Elsebeth, em tupela marit husat i gat 48 krismas samting, ol i bin i gat gutpela sindaun na ol i stap long Bergen, em namba 2 biktaun bilong Nowe. Tupela wantaim pikinini meri na pikinini man bilong ol, em Isabel na Fabian, i givim bel long mekim wok bilong kongrigesen. Roald i mekim wok elda, na Elsebeth i mekim wok painia, na Isabel na Fabian i stap olsem ol pablisa.

Long Septemba 2009, dispela famili i tingting long mekim samting i narapela kain liklik, ol i laik i go autim tok inap 1-pela wik long wanpela ples i stap longwe. Olsem na Roald na Elsebeth, na Fabian husat i gat 18 krismas long dispela taim, ol i go long Nordkyn em wanpela ples i stap long poin bilong taun Finnmark, antap long Aktik Sekol. Long liklik ples Kjøllefjord, ol i autim tok wantaim ol narapela bratasista em ol tu i kam long autim tok long dispela longwe ples. Roald i tok: “Long kirap bilong dispela wik, mi amamas olsem mi inap stretim ol wok bilong mi na mi inap insait long dispela spesel wok inap 1-pela wik olgeta.” Tasol long dispela wik yet, sampela samting i mekim na bel bilong Roald i no stap isi. Wanem samting i kamap?

Roald i tok: “Mario, em wanpela painia husat i mekim wok long Finnmark, em i askim sapos mipela i redi long i go long taun Lakselv, long helpim wanpela kongrigesen i gat 23 pablisa long en.” Roald i kirap nogut long dispela askim we ol i no bin tingim. Em i tok: “Mitupela Elsebeth i bin tingting long mekim wok long hap i sot tru long ol man bilong autim tok, tasol mipela bai mekim olsem bihain long ol pikinini i kamap bikpela na lusim haus.” Maski Roald i tok olsem, insait long sampela de tasol em i luksave olsem ol manmeri i amamas long kisim save long Jehova. Ol i mas kisim helpim nau, na i no bihain. Roald i tok: “Dispela askim i mekim na bel bilong mi i no stap isi na mi no slip gut inap sampela nait.” Bihain Mario i draivim Roald na famili bilong em i go long Lakselv, em i stap longwe olsem 240 kilomita long hap saut bilong Kjøllefjord. Mario i laik bai dispela famili yet i lukim liklik kongrigesen i stap long dispela hap.

Andreas, em wanpela bilong 2-pela elda long Lakselv, em i soim ol long ples na Haus Kingdom. Ol bratasista bilong dispela kongrigesen i amamas tru na tokim Roald na Elsebeth olsem ol bai amamas sapos famili bilong ol inap i go long dispela hap na helpim wok bilong Kingdom. Andreas i smail wantaim na tok em i bin stretim rot long Roald na Fabian long go long wanpela intaviu long painim wok! Orait nau dispela famili bai mekim wanem?

Namba 1 tok em Fabian i mekim em olsem: “Mi no laik long kam long hia.” Em i tingim ol pren bilong em na kongrigesen em i kamap bikpela long en, olsem na em i nolaik tru long lusim ol na i go stap long wanpela liklik taun. Na tu, em i no pinisim trening bilong em long kamap elektrisen. Tasol taim ol i askim Isabel (long dispela taim em i gat 21 krismas) long em i gat wanem tingting, em i tok: “Dispela tasol em samting mi laik mekim!” Tasol bihain Isabel i tok: “Taim mi skelim gen, mi tingting olsem, ‘Tru tru dispela em gutpela samting? Mi bai misim ol pren bilong mi? Mi ken stap tasol long kongrigesen bilong mi we em isi long mekim ol samting na mi inap save long ol samting i kamap?’” Orait Elsebeth i gat wanem tingting long dispela invatesen? Em i tok: “Mi pilim olsem Jehova i givim dispela asainmen long famili bilong mipela. Tasol mi tingim tu nupela haus bilong mipela em mipela i bin stretim gen na olgeta samting mipela i bin bungim inap 25 yia olgeta.”

Taim dispela spesel wik i pinis, Roald na famili bilong em i go bek long Bergen, tasol ol i no inap long lusim tingting long ol bratasista long Lakselv, em ol i stap longwe inap olsem 2,100 kilomita. Elsebeth i tok: “Planti taim mi beten long Jehova, na mi save toktok wantaim ol pren mipela i bin bungim na salim ol poto na ol ekspiriens i go i kam.” Roald i tok: “Tingting bilong mi i no strong yet long i go sindaun long narapela hap. Na tu, mi mas skelim sapos mipela inap lukautim mipela yet long ol samting mipela i nidim. Olsem wanem bai mipela inap lukautim mipela yet? Planti taim mi beten long Jehova na toktok wantaim famili bilong mi na ol brata husat i bin mekim wankain wok olsem.” Fabian i tok: “Taim mi lusim sampela haptaim moa long skelim ol samting, mi luksave olsem i no gat as long mi tok nogat. Planti taim mi beten long Jehova, na laik bilong i go long narapela hap i kamap strong moa.” Olsem wanem long Isabel? Bilong redim em yet long i go mekim wok long narapela hap, em i kirap mekim wok painia inap 6-pela mun long taun em i stap long en. Long dispela taim em i lusim bikpela haptaim long mekim Baibel stadi bilong em yet, olsem na em i pilim olsem em i redi long i go mekim wok long narapela hap.

Taim laik bilong dispela famili long i go mekim wok long hap i sot long ol pablisa i kamap strong moa, ol i kirap mekim ol samting bilong inapim mak ol i bin putim. Roald i gat wok mani we i gat gutpela pe bilong en, tasol em i askim long kisim malolo inap 1-pela yia. Tasol bos bilong em i askim em long mekim wok haptaim, olsem em i ken wok 2-pela wik na malolo long narapela 6-pela wik. Roald i tok: “Ol i katim pe bilong mi na mi kisim liklik pe, tasol dispela i helpim mipela.”

Elsebeth i tok: “Man bilong mi i askim mi long painim wanpela haus long Lakselv, na putim haus bilong mipela long Bergen long rent. Bikpela haptaim na strong i lus, tasol mipela inap mekim ol dispela samting.” Em i tok moa olsem: “Bihain liklik ol pikinini i painim haptaim wok, na dispela i helpim mipela long baim kaikai na pe bilong kar.”

Isabel i tok: “Taun mipela i go stap long en i liklik, olsem na bikpela hatwok bilong mi em long painim wanpela  wok mani bilong helpim mi long mekim wok painia. Sampela taim mi pilim hatwok.” Maski i olsem, Isabel i kisim 9-pela haptaim wok insait long namba 1 yia, na em inap baim ol samting em i nidim. Olsem wanem long Fabian? Em i tok: “Bilong pinisim skul bilong mi olsem wanpela elektrisen, mi mas mekim wok aprentis. Na mi mekim wok aprentis long Lakselv. Bihain mi mekim gut eksem na mi kisim haptaim wok olsem wanpela elektrisen.”

Marelius na meri bilong em Kesia, ol tu i laik i go mekim wok long ol hap i sot long ol pablisa. Long nau Marelius i gat 29 krismas na em i tok: “Ol tok na intaviu bilong ol kibung i stori long wok painia i bin kirapim laik bilong mi long mekim wok bilong mi i go bikpela moa.” Tasol Kesia, nau em i gat 26 krismas, em i pilim olsem i hatwok tru long em i lusim famili bilong em na i go sindaun long narapela hap. Em i tok: “Mi nolaik tru long i go stap longwe long ol manmeri mi laikim ol tru.” Na tu, Marelius i mekim wok mani fultaim bilong baim rent bilong haus ol i stap long en. Em i tok: “Planti taim mipela i beten na Jehova i helpim mipela long mekim ol senis, olsem na mipela inap i go long narapela hap.” Ol i lusim bikpela haptaim long stadi gut long Baibel. Tupela i salim haus, lusim wok mani, na ol i go long taun Alta, long noten Nowe, long Ogas 2011. Long sapotim ol long mekim wok painia long dispela hap, Marelius i mekim wok olsem akaunten na Kesia i wok long wanpela stua.

Knut na Lisbeth, tupela marit em ol i gat 35 krismas samting, ol i pilim tru ol ekspiriens bilong Yiabuk long sampela husat i mekim wok long ol hap i sot long ol pablisa bilong Kingdom. Lisbeth i tok: “Ol dispela ekspiriens i kirapim laik bilong mipela long i go autim tok long ol narapela kantri. Tasol mi surik long mekim dispela wok, long wanem, mi gat 2-pela tingting olsem mi yet i no fit long mekim dispela wok.” Maski i olsem, ol i mekim ol samting bilong inapim mak ol i putim. Knut i tok: “Mipela i salim haus, na mipela i go stap wantaim mama bilong mi bambai mipela i ken seivim sampela mani. Bihain, mipela i laik save long olsem wanem mipela inap mekim wok long narapela kantri, olsem na mipela i go long wanpela kongrigesen bilong tok Inglis long Bergen, na mipela i stap wantaim mama bilong Lisbeth.” I no longtaim na Knut na Lisbeth i pilim olsem ol i redi long go long narapela kantri, na ol i go long Yuganda. Long olgeta yia, ol i save go bek long Nowe long mekim wok mani inap 2-pela mun. Long dispela rot ol i gat mani inap long lukautim ol yet na ol inap stap long Yuganda na autim tok inap long yia olgeta.

Wanem gutpela samting i kamap long ol dispela lain husat i amamas na redi long mekim wok? Roald i tok: “Long dispela longwe ples, mipela i lusim bikpela haptaim moa bilong stap wantaim olsem wanpela famili, winim long taim mipela i bin stap long Bergen. Famili bilong mipela i bin pas gut wantaim. Mipela i amamas long lukim olsem ol pikinini bilong mipela i kamap strong long tok i tru.” Em i tok moa olsem: “Nau mipela i no tingting tumas long bungim mani kago. Mani kago i no bikpela samting olsem mipela i bin tingim.”

 Elsebeth i luksave olsem em i mas lainim narapela tokples. Bilong wanem? Karasjok em wanpela ples i stap long teritori bilong Lakselv Kongrigesen, em bikples bilong lain Sami, em ol asples lain i sindaun long hap not bilong Nowe, Swiden, Finlan, na Rasia. Olsem na Elsebeth i kisim wanpela kos long tokples Sami bambai em inap autim tok long ol asples lain. Nau em inap long mekim sampela tok long dispela tokples. Olsem wanem? Em i amamas long nupela teritori bilong em? Em i smail na i tok: “Mi lukautim 6-pela Baibel stadi. Mi amamas tru long mekim wok long hia!”

Fabian, nau em i mekim wok painia na kongrigesen sevan, em i tok em na Isabel i bin strongim 3-pela tineja long nupela kongrigesen bilong ol long mekim sampela wok moa long kongrigesen. Long nau, dispela 3-pela tineja i insait tru long wok autim tok. Tupela bilong ol i baptais pinis na ol i bin mekim wok painia haptaim long Mas 2012. Tasol pastaim, isi isi wanpela bilong ol dispela tineja i wok long lusim tok i tru, olsem na em i tok tenkyu long Fabian na Isabel long helpim em long kamap strong gen. Fabian i tok: “Mi pilim tru tok bilong dispela tineja. Mi kisim bikpela amamas tru long helpim narapela!” Isabel i tok: “Long dispela asainmen, mi bin ‘traim na lukim’ olsem Jehova i gutpela.” (Sng. 34:8) Em i tok: “Na tu, mi amamas tru long mi inap stap na mekim wok long hia!”

Long nau, Marelius na Kesia i no gat planti mani kago, tasol laip bilong ol i gat amamas. Dispela kongrigesen long Alta em ol i go stap long en, nau em i gat 41 pablisa. Marelius i tok: “Taim mipela i skelim ol samting mipela i bin mekim, mipela i lukim olsem mipela i bin senisim planti samting long sindaun bilong mipela, na dispela i strongim tru mipela. Mipela i tenkyu long Jehova i orait long mipela inap mekim wok painia long dispela hap. I no gat narapela samting i gutpela moa winim dispela wok.” Kesia i tok moa: “Mi lain long bilip olgeta long Jehova, na em i lukautim gut mipela. Na tu, mi luksave olsem taim mi stap longwe long ol wanblut bilong mi, dispela i helpim mi long pilim tru ol haptaim we mipela i bin stap wantaim. Mi no bel hevi liklik long disisen bilong mipela.”

Olsem wanem long Knut na Lisbeth long Yuganda? Knut i tok: “Sampela haptaim i lus paslain long mipela i lain long nupela ples na pasin bilong ol man long hia. I gat hevi bilong wara, pawa, na mipela i save kisim sik bilong bel, na olgeta dispela hevi i save kamap na pinis, tasol mipela inap mekim planti Baibel stadi olsem mipela i laikim!” Lisbeth i tok: “Inap olsem 30 minit longwe long hap mipela i stap long en, i gat ol teritori em gutnius i no go kamap yet long en. Tasol taim mipela i go kamap long ol dispela teritori, mipela i bungim ol man husat i ritim Baibel, na ol i askim mipela long skulim ol. Mipela i kisim bikpela amamas tru long skulim ol dispela kain man long tok bilong Baibel!”

Yumi ken tingim bikpela amamas bilong Lida bilong yumi long heven, em Krais Jisas, taim em i lukim wok autim tok em i bin kirapim i go kamap long planti hap bilong graun! Em nau! Olgeta manmeri long lain bilong God i amamas tru taim ol i givim ol yet long mekim wok em Jisas i bin givim long ol, em long “kamapim ol disaipel long olgeta lain man.”—Mat. 28:19, 20.