1, 2. (a) “Haus win bilong Devit” i makim wanem samting? Olsem wanem ol i stretim bek dispela haus win? (b) Long nau husat i stap olsem ol wokman bilong Jehova?

 LONG wanpela miting bilong lain hetman long Jerusalem long 49 C.E., Jems i tok: “Simeon [Pita] i stori gut long olsem wanem God i bin tingim ol man bilong ol arapela lain long namba 1 taim. Na God i mekim olsem bilong kisim wanpela lain em nem bilong en i ken stap long ol. Na dispela i stret wantaim tok bilong ol Profet, ol i bin raitim tok olsem, ‘Bihain long ol dispela samting mi bai kam bek, na dispela haus win bilong Devit i pundaun pinis em bai mi wokim gen. Ol samting i bagarap long en mi bai wokim na sanapim gen na bai ol manmeri bilong dispela lain husat i stap yet, na ol manmeri bilong ol arapela lain em nem bilong mi i stap long ol, ol i ken wok strong long painim Jehova. Em tok bilong Jehova, em man i mekim ol dispela samting i kamap na ol man i save long en kirap long bipo yet.’”—Apo. 15:13-18.

² Dispela tok “haus win bilong Devit,” i makim ol king i kamap long lain famili bilong Devit. Dispela haus win i bin “pundaun” taim ol i rausim laspela king bilong Juda long wok king, em Sedekaia. (Amo. 9:11) Tasol dispela tok profet i tokaut olsem God bai “stretim bek” dispela haus win. Dispela i makim olsem bai i gat narapela king husat bai kamap long lain bilong Devit, em Jisas. (Ese. 21:27; Apo. 2:29-36) Jems i tok dispela tok profet i tokaut tu olsem God bai makim ol man bilong lain Juda na bilong ol arapela lain long mekim wok king wantaim Jisas long heven. Dispela lain em God i makim na planti milion manmeri bilong lain “arapela sipsip,” ol i wok long autim tok i tru.—Jon 10:16.

3, 4. Wanem samting i helpim ol Juda long Babilon long i go klostu long Jehova?

³ Taim ol Juda i go kalabus long Babilon, dispela i soim klia olsem “haus win bilong Devit” i pundaun pinis. Ol Babilon i bihainim lotu giaman. Olsem wanem bai ol manmeri bilong God inap stap gut long God insait long dispela 70 yia ol i stap long Babilon? Long wankain pasin olsem lain bilong God long nau i stap gut long God long dispela graun em Satan i bosim. (1 Jon 5:19) Ol wokman bilong Jehova i gat ol gutpela samting tru we i helpim ol long stap gut long God.

⁴ Wanpela bilong ol gutpela samting yumi gat long nau em olsem, yumi gat Baibel olgeta. Ol Juda long Babilon i no bin gat Baibel olgeta. Tasol ol i save long ol tok i stap long Lo Bilong Moses na long Tenpela Lo. Ol i save long ol “song bilong Saion” na planti savetok. Na tu, ol i save long sampela manmeri bilong bipo em ol i bin stap gut long Jehova. Ol Juda i krai, long wanem, ol i laik go bek long asples bilong ol, na ol i no lusim tingting long Jehova. (Ritim Song 137:1-6.) Olgeta dispela samting i helpim ol long i go klostu long Jehova maski ol i stap long Babilon, em ples we i pulap tru long ol bilip na pasin giaman.

5. Ol manmeri bilong Babilon na Isip bilong bipo tru i bin bilip long wanem ol god triwan?

⁵ Long bipo tru, ol man i save lotuim ol god triwan, em olsem 3-pela god i pas wantaim na kamap 1-pela god tasol. Olsem: Wanpela god triwan ol Babilon i bin lotuim em god bilong mun, god bilong san, na god meri bilong kamapim pikinini, na pait. Lain Isip i bin lotuim ol god triwan em ol i stap olsem famili, i gat papa, mama, na pikinini man. Maski ol dispela god i pas wantaim olsem god triwan, sampela man i tingim olsem strong bilong ol i no wankain. Wanpela god triwan bilong ol Isip em god man Osairis, god meri Aisis, na pikinini man, Horas.

6. God Triwan em wanem samting? Bilong wanem ol manmeri bilong Jehova i no bilip long God Triwan?

⁶ Long nau, lain Kristen i skulim ol man olsem i gat God Triwan, olsem i gat wanpela God na insait long en i gat Papa, Pikinini, na holi spirit. Tasol dispela bilip i mekim na i luk olsem Jehova i no gat olgeta strong, na dispela inap makim olsem i no em tasol i stap olsem God. Jehova i bin lukautim lain bilong em na ol i no bilipim dispela tok giaman. Yumi kisim save pinis olsem “Bikpela, em wanpela tasol em i God bilong yumi.” (Lo 6:4) Jisas tu i bin mekim wankain tok na ol Kristen tru i bilipim dispela tok.—Mak 12:29.

7. Paslain long man i kisim baptais na kamap Kristen tru, em i mas i gat wanem bilip long God?

⁷ Jisas i tokim ol disaipel bilong em long “kamapim ol disaipel long olgeta lain man, na baptaisim ol long nem bilong Papa na bilong Pikinini na bilong holi spirit.” (Mat. 28:19) Dispela i makim olsem, sapos man i laik kisim baptais na kamap Kristen tru na stap olsem Witnes Bilong Jehova, em i mas bilip olsem Papa, Jehova, em i gat bikpela namba moa winim Jisas, na Jisas em i Pikinini Bilong God, na em i bin kam long graun bilong givim pe bilong baim bek yumi. Em i no ken bilip olsem holi spirit em i wanpela hap bilong God Triwan, nogat, em i strong bilong God. (Stt. 1:2) Wanpela bilong ol gutpela samting bilong yumi em olsem, yumi save olsem bilip bilong God Triwan i daunim biknem bilong God, na em i wanpela bilip giaman.

8. Ol Babilon i bilip olsem ol god bilong ol na ol spirit nogut inap mekim wanem?

⁸ Ol manmeri long Babilon i bilip long ol god bilong ol, na tu, ol i bilip long ol  spirit nogut na wok bilong ol spirit. Wanpela buk (The International Standard Bible Encyclopaedia) i tok ol Babilon i bilip olsem ol spirit nogut inap mekim ol man i sik. Ol manmeri i save beten long ol god bilong ol na askim ol long lukautim ol na bai ol spirit nogut i no ken bagarapim ol.

9. (a) Olsem wanem planti Juda i kisim save long ol giaman tingting long ol spirit nogut? (b) Olsem wanem yumi stap gut na wok bilong spirit nogut i no bagarapim yumi?

⁹ Taim ol Juda i stap long Babilon, planti bilong ol i kisim save long ol tingting giaman. Bihain, planti Juda i kirap long bilipim tingting bilong ol Grik olsem ol spirit nogut inap helpim ol. Tasol God i tokim yumi olsem wok bilong ol spirit nogut, o pasin bilong toktok wantaim ol spirit nogut, dispela inap nogutim yumi na i no stret long mekim. Dispela tok i tru em wanpela bilong ol gutpela samting bilong yumi. (Ais. 47:1, 12-15) Yumi stap gut, long wanem, yumi bihainim tok bilong Jehova na sakim wok bilong ol spirit nogut.—Ritim Lo 18:10-12; Revelesen 21:8.

10. Ol pasin nogut na ol tingting i no stret em Bikpela Babilon i bihainim i bin kirap long wanem hap?

¹⁰ Long nau tu, planti man bilong ol lotu giaman i insait long ol wok bilong ol spirit nogut, wankain olsem ol lain long taim bilong Babilon long bipo tru. Olsem na Baibel i kolim olgeta lotu giaman long graun olsem Bikpela Babilon. (Rev. 18:21-24) Ol dispela lotu giaman i wankain stret long lotu bilong Babilon long bipo tru, long wanem, ol tingting i no stret na ol pasin nogut i bin kirap long dispela hap. Bikpela Babilon i mekim wok bilong ol spirit nogut, lotuim ol imis, na mekim ol narapela sin, olsem na klostu nau em bai bagarap.—Ritim Revelesen 18:1-5.

11. Ol buk na nius bilong yumi i kamapim wanem ol tok lukaut long wok bilong ol spirit nogut?

¹¹ Jehova i tok: “Mi no laik lukim moa pasin bilong mekim wok long narapela kain strong.” (Ais. 1:13, NW) Bihain long yia 1800, planti man i bin insait long wok bilong ol spirit nogut. Olsem na Zion’s Watch Tower bilong Me 1885 i stori long dispela samting. Dispela nius i tok ol lotu bilong bipo tru i skulim ol man olsem ol daiman i stap laip long narapela hap, na ol stori nating bilong ol man bilong narapela narapela lain i kirap long dispela tingting. Dispela nius i tok tu olsem ol spirit nogut i bin giaman olsem ol i dispela lain husat i dai pinis na ol i laik toktok wantaim ol man i stap laip, olsem na ol spirit nogut i bin stiaim tingting na pasin bilong planti man. Wanpela buklet bilong bipo (What Say the Scriptures About Spiritism?) i bin givim wankain tok lukaut, na ol nupela buk na nius bilong yumi long nau tu i mekim olsem.

12. God i bin kirapim Solomon long stori olsem wanem long samting i painim ol man i dai pinis?

¹² “Olgeta man husat i kisim save long tok i tru,” ol i save olsem ol daiman i no kisim pen. (2 Jon 1) Solomon i stori long ol man husat i stap long “ples bilong ol man i dai pinis,” em matmat, na em i tok: “Dok i gat laip i winim laion i dai pinis. . . . Olsem tasol, ol man i gat laip i winim ol man i dai pinis. Long wanem, ol i save wanpela samting bai i kamap long ol. Ol i save bai ol i dai. Tasol ol man i dai pinis, ol i no inap save long wanpela samting. . . . Sapos yu mekim wanpela wok, orait taitim bun na mekim save tru. Long wanem, bai yu no inap mekim wok o tingting o kisim gutpela tingting na save long ples bilong ol man i dai pinis, dispela ples bai yu go long en.”—Sav. 9:4, 5, 10.

13. Ol Juda i kisim wanem bilip i kam long lotu na pasin bilong lain Grik?

¹³ Jehova i bin tokim ol Juda long samting i save painim ol man i dai pinis. Tasol  taim Grik i bosim Juda na Siria, ol i traim long kirapim ol man long bihainim lotu na pasin bilong ol Grik. Olsem na ol Juda i kirap long bilip olsem ol man i gat wanpela spirit we i save stap laip yet taim man i dai. Ol i bilip olsem dispela spirit i save go stap long wanpela hap na kisim pen long dispela hap. Ol Grik i no namba 1 lain long bilip olsem i gat wanpela ples bilong kisim pen long en. Wanpela buk (The Religion of Babylonia and Assyria) i tok ol Babilon i bilip olsem i gat wanpela ples em ol strongpela god i stap long en, na ol spirit nogut i save givim pen long ol man. Dispela i soim klia olsem ol Babilon i bilip olsem taim man i dai, wanpela samting i save lusim bodi bilong em na stap laip yet.

14. Jop na Abraham i gat wanem save long dai na kirap bek?

¹⁴ Maski Jop i no gat Baibel, em i save long samting i save painim ol man taim ol i dai. Em i save tu olsem sapos em i dai, Jehova, em God bilong pasin laikim, em bai laikim tumas long kirapim em bek. (Jop 14:13-15) Abraham tu i bilip long kirap bek. (Ritim Hibru 11:17-19.) Jop na Abraham i no bilip olsem ol daiman i stap laip long wanpela hap, nogat. Sapos man i no inap i dai, orait i no gat wok long kirapim em bek. Spirit bilong God i helpim Jop na Abraham long bilip long kirap bek. Ol dispela tok i tru em hap bilong ol gutpela samting bilong yumi.

15, 16. Olsem wanem God i kisim bek yumi long sin na dai?

¹⁵ Yumi mas amamas olsem God i bin tokim yumi tu long olsem wanem em i bin kisim bek yumi long sin na dai. (Rom 5:12) Yumi save olsem Jisas “i no kam bilong ol man i mas helpim em, nogat, em i kam bilong helpim ol man na givim laip bilong em olsem pe bilong baim bek planti manmeri.” (Mak 10:45) Em i gutpela samting tru long yumi save long “wok bilong Krais Jisas long givim pe bilong baim bek man”!—Rom 3:22-24.

 ¹⁶ Long taim bilong ol aposel, sapos ol man i laik bai God i fogivim ol, orait ol i mas tanim bel long ol rong bilong ol na bilip long ofa bilong Jisas long baim bek man. Long nau yumi tu i mas mekim olsem. (Jon 3:16, 36) Sapos man i bilip long ol giaman tok, olsem tok bilong God Triwan na ol man i gat spirit i no save dai, orait pe bilong baim bek man i no inap helpim em. Tasol yumi inap kisim helpim long en. Yumi gat stretpela save long Pikinini Bilong God, “long rot bilong pe bilong baim bek man, Pikinini bilong en i mekim yumi i kamap fri, dispela i makim olsem ol sin bilong yumi i tekewe.”—Kol. 1:13, 14.

17, 18. Wanem ol samting inap helpim yumi long kisim save long histori bilong ol Witnes Bilong Jehova? Dispela save bai helpim yumi olsem wanem?

¹⁷ Sampela moa bilong ol gutpela samting yumi gat em olsem, God i skulim yumi long ol narapela samting tu na em i helpim na blesim yumi long kain kain rot. Ol Yiabuk bilong yumi i stori long olsem wanem ol manmeri bilong Jehova long olgeta hap bilong graun i mekim yet wok bilong em. Yumi inap kisim save long histori bilong ol Witnes Bilong Jehova long vidio Faith in Action, Part 1 na Part 2, na ol kain buk olsem Jehovah’s Witnesses—Proclaimers of God’s Kingdom. Na ol magasin bilong yumi i save stori long ol ekspiriens bilong ol bratasista bilong yumi.

¹⁸ Em i gutpela long yumi kisim save long histori bilong ol Witnes Bilong Jehova, wankain olsem ol manmeri bilong lain Israel i bin kisim save long olsem wanem God i bin helpim ol. (Kis. 12:26, 27) Taim Moses i kamap lapun, em i tokim lain Israel olsem: “Yupela tingim ol samting i bin kamap bipo bipo tru. Askim ol papa bilong yupela long tokim yupela long wanem samting i bin kamap. Na askim ol lapun long stori long yupela long ol samting bilong bipo.” (Lo 32:7) Yumi olgeta i amamas long litimapim nem bilong God na tokim ol narapela long ol wok em i bin mekim. (Sng. 79:13) Ol skul yumi kisim long histori bilong yumi olsem lain bilong Jehova, dispela bai helpim yumi long mekim yet wok bilong em.

19. Yumi save long tok i tru, olsem na yumi mas mekim wanem?

¹⁹ Long dispela taim nogut bilong nau, yumi amamas olsem yumi gat tok i tru i kam long God. (Snd. 4:18, 19) Olsem na yumi mas wok yet long stadi long Tok Bilong God na autim tok long ol narapela. Yumi pilim wankain olsem man bilong raitim song husat i tok: “Bai mi autim tok olsem, ‘Bikpela tasol em i stretpela.’ God, yu bin skulim mi long taim mi liklik yet na i kam inap long nau, na mi save tokaut yet long ol gutpela gutpela samting yu bin mekim. Nau mi lapun pinis na gras bilong mi i waitpela olgeta, tasol God, yu no ken lusim mi. Yu mas i stap wantaim mi na bai mi autim tok bilong bikpela strong bilong yu long ol lain manmeri i kamap bihain.”—Sng. 71:16-18.

20. Taim yumi stap gut long Jehova, yumi soim klia wanem samting? Yu gat wanem tingting long wok bos bilong Jehova na pasin bilong yumi long lotuim em?

²⁰ Taim yumi stap gut long Jehova, yumi soim klia olsem yumi bilip long wok bos bilong em na i stret yumi lotuim em. (Rev. 4:11) Jehova i givim spirit bilong em long helpim yumi long autim gutnius long ol narapela na mekim gut bel bilong ol na helpim ol long bilip na wetim gutpela samting i kamap bihain. (Ais. 61:1, 2) Satan bai i no gat rait moa bilong bosim lain bilong God na olgeta man bilong graun. Ol gutpela samting yumi gat long sait bilong lotu inap helpim yumi long sanap strong na stap klostu long Jehova na bai yumi inap mekim wok bilong em long nau na i go inap oltaim oltaim.—Ritim Song 26:11; 86:12.