Sampela taim ol saveman i save painim ol samting long graun we i kamapim klia olsem wanpela man em Baibel i stori long en i bin stap tru long bipo. Long 2011, ol saveman bilong Israel i raitim nius i stori long wanpela samting ol i bin painim. Em wanpela bokis ol i wokim long ston na i bilong planim man long en. Dispela bokis i bin stap inap olsem 2,000 yia pinis, na ol i save putim ol bun bilong man long en taim bodi bilong man i sting pinis.

Dispela bokis i gat rait olsem: “Miriam, pikinini meri bilong Yesua, pikinini man bilong Kaiafas, em pris bilong Masia bilong Bet Imri.” Kaiafas em dispela hetpris bilong lain Juda husat i bin stap taim ol i kotim na kilim i dai Jisas. (Jon 11:48-50) Saveman Flavius Josifas i bin stori long em olsem “Josep, ol i kolim em Kaiafas.” I luk olsem dispela bokis bilong planim man i bilong wanpela wanblut bilong dispela hetpris. Bipo ol i bin painim wanpela bokis na ol i ting em i bilong dispela hetpris yet, na rait i stap long bokis i kolim em olsem Yehosef bar Kaiafa, o Josep, pikinini man bilong Kaiafas. a Olsem na i luk olsem Miriam em i wanblut bilong Kaiafas.

Wanpela lain, Israel Antiquities Authority (IAA), em ol i gat save long ol samting bilong bipo, ol i tok ol i bin kisim bokis bilong Miriam long han bilong sampela man em ol i bin stilim dispela bokis long wanpela ples matmat bilong bipo tru. Ol i glasim gut dispela bokis na rait bilong en, na tru tumas em i bilong dispela meri Miriam.

Dispela bokis i givim nupela save long yumi. Wanpela rait long en i kolim “Masia,” em laspela lain bilong 24 lain pris em ol i save senis senis long mekim wok long tempel bilong Jerusalem. (1 Sto. 24:18) Lain IAA i tok rait long bokis i soim olsem “lain famili bilong Kaiafas ol i wanblut bilong lain bilong Masia.”

Na tu, dispela rait i kolim nem Bet Imri. Dispela nem inap kamapim 2-pela kain mining. Lain IAA i tok: “Namba 1 em olsem, Bet Imri em nem bilong wanpela famili bilong lain pris—ol pikinini man bilong Imer (Esra 2:36, 37; Nehemia 7:39-42) em sampela tumbuna pikinini bilong ol i insait long lain Masia. Namba 2 tingting em olsem [Bet Imri] em i asples bilong dispela meri i dai pinis o asples bilong famili olgeta bilong em.” Tasol maski yumi no klia tumas long dispela nem, bokis bilong Miriam i kamapim klia olsem Baibel i stori long ol manmeri em ol i bin kamap long ol famili i bin stap tru long bipo.