Long Buk 20 bilong Jewish Antiquities bilong saveman Flavius Josifas, em i bin stap long taim bilong ol aposel, em i stori long dai bilong “Jems, brata bilong Jisas em ol i kolim em Krais.” Planti saveman i ting dispela em tok Josifas yet i raitim. Tasol sampela i gat tupela tingting long narapela tok bilong dispela wankain buk i stori long Jisas. Dispela hap rait ol i kolim Testimonium Flavianum i tok:

“Orait long dispela taim, Jisas i stap na em man i gat savetingting—ating i stret long kolim em man, long wanem, em i bin mekim ol wok i narakain tru—em tisa bilong ol man husat i save amamas long kisim tok i tru. Em i bin pulim planti Juda na planti man bilong ol narapela lain i kam long em. Em i Krais, na taim Pailat i bihainim tok bilong ol bikman namel long yumi na em i tok Jisas i mas i dai long kruse, ol man husat i bin laikim em tru long pastaim ol i no lusim em, long wanem, long namba 3 de em i kamap long ol, olsem ol profet bilong God i bin tok profet long ol dispela samting na ten tausen arapela gutpela samting moa em bai mekim; na lain Kristen em ol i bin kisim dispela nem long em, ol i no pinis—ol i stap yet long nau.”—Buk Josephus—The Complete Works, em William Whiston i tanim.

Klostu long yia 1600 samting, bikpela tok pait i kamap namel long ol man i bilip olsem Josifas i bin raitim tru dispela tok na ol man i ting em i no bin raitim. Serge Bardet, em wanpela saveman bilong Frans husat i gat bikpela save long ol buk i gat nem, em i bin wok strong long stretim dispela tok pait we i bin stap inap 400 yia pinis. Em i mekim wok painimaut na kisim sampela save na em i raitim dispela long wanpela buk nem bilong en Le Testimonium Flavianum—Examen historique considérations historiographiques (The Testimonium Flavianum—A Historical Study With Historical Considerations).

Josifas em man bilong raitim buk, tasol em i no wanpela Kristen. Em i wanpela saveman Juda, olsem na as bilong tok pait i kamap em dispela tok em i raitim long buk olsem Jisas em “Krais.” Bardet i glasim gut dispela samting na em i tok, dispela biknem i stret tru wantaim ‘pasin bilong tok Grik long kolim hap tok bilong makim stret nem bilong man.’ Bardet i tok moa olsem, long tingting bilong wanpela Juda Kristen, ‘Josifas inap tru long kolim dispela biknem Christos,’ na tu, dispela em i wanpela tingting ‘ol man bilong sutim tok ol i no bin tingim, na ol i kranki stret long mekim olsem.’

Olsem wanem? Ating bihain long Josifas, wanpela man i bin skruim hap tok moa i go long dispela tok na em i raitim long kain stail bilong Josifas na bai i luk olsem Josifas yet i bin raitim? Bardet i skelim gut dispela rait na ol samting i bin kamap bipo, na em i bilip olsem i no inap tru long wanpela man inap giaman na mekim olsem. Dispela man ‘i mas i gat bikpela save tru, winim olgeta narapela saveman bilong bipo,’ long giaman na bihainim stret stail bilong Josifas, long wanem, i no gat wanpela man i gat stail olsem bilong Josifas long raitim buk.

Olsem na bilong wanem ol i tok pait long dispela samting? Bardet i painimaut as bilong dispela tok pait na em i tok, “ol man i gat 2-pela tingting long Testimonium, winim ol narapela rait bilong bipo, long wanem, planti askim i kamap long tok bilong Testimonium.” Em i tok moa olsem ol man i gat “narapela kain tingting” na dispela em as bilong ol biknem ol i yusim inap planti 100 yia pinis, na ol i no skelim gut ol tok we i kamapim klia olsem tru tru Josifas i bin raitim dispela tok.

Orait ol dispela tok Bardet i bin glasim gut na kamapim, em bai senisim tingting bilong ol saveman long buk Testimonium Flavianum o nogat, em yumi no save. Tasol em i bin senisim tingting bilong Pierre Geoltrain, em man i gat bikpela save long lotu Juda na em i bin bihainim pasin Grik na lotu Kristen bilong pastaim. Inap longpela taim Pierre i ting wanpela man i bin giaman olsem em i Josifas na em i raitim tok bilong Testimonium, na tu, Pierre i bin tok bilas long ol man i bilip olsem Josifas yet i raitim. Tasol Pierre i bin senisim tingting bilong em. Em i bilip olsem buk bilong Bardet i as na em i senisim tingting. Nau Pierre i tokaut olsem, ‘kirap long nau, i no gat man i mas tok olsem Josifas i no bin raitim dispela hap tok.’

Tasol i gat as tru na ol Witnes Bilong Jehova i bilip olsem Jisas em i Krais—na Baibel yet i stori long dispela samting.—2 Tim. 3:16.