1. Olsem wanem wanpela meri i soim olsem em i no givap long ran long resis?

 TAIM Mary Decker i stap tineja yet, em i bin kisim biknem long ran long ol resis. Em i save ran gut tru, olsem na planti man i ting em bai winim gol medal long Olimpik gems long 1984. Tasol wanpela hevi i kamap. Taim em i ran long resis bilong 3 tausen mita, em i bamim lek bilong narapela na em i pundaun, na em i no inap pinisim dispela resis. Maski dispela samting i kamap, dispela i no pinisim laik bilong em long ran long ol resis. Klostu olsem 1-pela yia bihain long dispela hevi, em i ran long resis bilong 1 kilomita na em i ran spit moa winim olgeta narapela meri long bipo.

2. Ol Kristen i ran long wanem kain resis? Yumi mas i gat wanem pasin taim yumi ran?

² Laip bilong yumi olsem Kristen i olsem yumi ran long resis. Em resis bilong kisim laip oltaim. Yumi no ken larim wanpela samting i pasim yumi long ran long dispela resis. Em i no sotpela resis we man i mas ran spit bilong winim. Na em i no resis we man i ran isi isi na em i ken stop sampela taim, nogat. Dispela resis i olsem resis maraton, em longpela resis. Man i ran long maraton i mas i gat pasin bilong no ken les kwik, na em i mas ran i go inap long em i kamap long pinis bilong dispela resis. Aposel Pol i raitim pas long ol Kristen long Korin na em i tok: “Ating yupela i no save olsem olgeta man insait long resis i save ran, tasol wanpela tasol i save kisim prais? Yupela i mas ran olsem bai yupela i ken kisim prais.”—1 Kor. 9:24.

3. Husat inap winim resis bilong kisim laip oltaim?

³ Baibel i tokim yumi long ran long dispela resis.  (Ritim 1 Korin 9:25-27.) Prais bilong dispela resis em laip oltaim. Dispela resis i narapela kain long ol narapela resis, long wanem, olgeta insait long dispela resis inap kisim prais sapos ol i no les kwik na ran i go inap long pinis bilong en. (Mat. 24:13) Man bai lus long resis sapos em i no bihainim ol lo bilong resis o em i stop long ran taim resis i no pinis yet. Dispela resis tasol i gat prais bilong laip oltaim.

4. Bilong wanem i hatwok long ran long resis bilong kisim laip oltaim?

⁴ I hatwok long ran long resis bilong kisim laip oltaim. Jisas Krais i bin ran long dispela resis na em i no bin pundaun liklik, tasol i no gat wanpela bilong yumi inap mekim olsem. Jems i tok, “yumi olgeta i save popaia,” olsem pundaun planti taim. (Jems 3:2) Ol popaia bilong yumi yet o ol popaia bilong ol narapela inap mekim na yumi no ran strong long resis o yumi stop sampela taim. Sapos dispela samting i kamap, ating yumi bai nidim ol narapela long helpim yumi bambai yumi inap ran gen long resis. Olsem na yumi no ken kirap nogut sapos yumi pundaun planti taim.—1 Kin. 8:46.

5, 6. (a) Long ol Kristen, bilong wanem “i no gat wanpela samting inap mekim ol i pundaun”? Wanem samting inap helpim Kristen long “kirap gen” taim em i pundaun? (b) Bilong wanem sampela i no save “kirap gen” taim ol i pundaun?

⁵ Taim yumi pundaun, ol samting yumi mekim bai soim klia pasin tru bilong yumi. Sampela man husat i pundaun, ol i save kirap gen na mekim yet wok bilong God. Sampela i no laik tanim bel. Sindaun 24:16 i tok: “Sapos stretpela man i save pundaun planti taim, oltaim em bai i kirap gen. Tasol sapos taim nogut i painim ol man bilong mekim pasin nogut, bai ol i bagarap olgeta.”

⁶ Maski sapos yumi pundaun, yumi inap kirap gen. Sapos yumi trastim Jehova, em bai redi long helpim yumi taim yumi gat sampela hevi o mekim sampela popaia. Em bai helpim yumi long “kirap gen,” long wanem, em i save olsem yumi laikim em tru. Tasol ol manmeri nogut i no gat laik long kirap gen. Ol i no laik kisim helpim i kam long holi spirit na ol manmeri bilong God. Baibel i tok long ol manmeri husat i laikim lo bilong Jehova olsem, “i no gat wanpela samting  inap mekim ol i pundaun.” Olsem na maski sapos yumi pundaun, yumi inap ran gen long resis bilong kisim laip oltaim.—Ritim Song 119:165.

7, 8. Taim man i “pundaun,” em i ken mekim wanem na bai God i ken orait yet long em?

⁷ Sampela taim man i save mekim sin, long wanem, em i gat sampela pasin kranki. Em inap mekim wankain popaia planti taim. Tasol Jehova bai tingim em yet olsem stretpela man sapos em i kirap gen, olsem em i tanim bel tru na wok strong long mekim samting i stret. Dispela i wankain long pasin em God i bin mekim long lain Israel, em i save tingim ol olsem stretpela lain sapos ol i tanim bel long ol rong ol i mekim. (Ais. 41:9, 10) Sindaun 24:16 i no strong long kolim ol popaia yumi mekim, tasol em i soim olsem Jehova bai helpim yumi long “kirap gen.” (Ritim Aisaia 55:7.) God Jehova na Jisas Krais i bilip tru olsem yumi bai mekim olgeta samting yumi inap mekim, na ol i strongim yumi long “kirap gen.”—Sng. 86:5; Jon 5:19.

⁸ Taim wanpela man i ran long maraton na em i pundaun, sapos em i kirap kwik, orait em bai gat taim bilong sanap gen na ran yet long resis. Yumi no save long “dispela de na dispela aua” em pinis bilong dispela resis bilong kisim laip oltaim bai kamap. (Mat. 24:36) Tasol sapos yumi wok strong long no ken larim wanpela samting i pundaunim yumi, orait em bai isi moa long yumi ran na pinisim resis. Orait yumi ken mekim wanem na bai yumi no pundaun?

9. Yumi bai stori long wanem 5-pela samting?

⁹ Yumi bai stori long 5-pela samting we inap pundaunim yumi: ol pasin kranki bilong yumi, laik bilong skin, wansait pasin insait long kongrigesen, hevi na pasin birua, na pasin kranki bilong ol narapela. Sapos wanpela bilong ol dispela samting i bin pundaunim yu, tingim olsem Jehova i gat pasin bilong isi na em bai i no inap givap kwik long yu.

10, 11. Devit i gat wanem pasin kranki?

¹⁰ Ol pasin kranki bilong yumi i olsem ol ston i slip long rot. Stori bilong King Devit na aposel Pita inap helpim yumi long luksave long 2-pela pasin kranki. Sampela taim Devit i no bosim bel, na sampela taim Pita i pret long ol man i gat wanem tingting long em.

¹¹ Sampela taim King Devit i no save bosim bel bilong em. Olsem na em i bin mekim sin wantaim Batseba. Bihain, Devit i laik pait long Nabal, long wanem, Nabal i bagarapim gutnem bilong em. Maski sampela taim Devit i no tingting gut na mekim ol samting, oltaim em i mekim ol samting em Jehova i orait long en. Taim em i mekim rong, ol narapela i helpim em na em inap “kirap gen.”—1 Sml. 25:5-13, 32, 33; 2 Sml. 12:1-13.

12. Maski Pita i mekim ol pasin kranki, em i mekim wanem na em i stap yet long resis?

¹² Pita i pret long ol man i gat wanem tingting long em. Em i stap gut long Jisas na Jehova, tasol sampela taim pret i daunim em na em i mekim rong. Olsem, inap 3-pela taim em i giaman na tok em i no save long Jisas. (Luk 22:54-62) Long narapela taim, em i mekim gut moa long sampela Kristen na i olsem ol i gutpela moa winim ol narapela Kristen. Pita i gat tingting kranki, na ol narapela long kongrigesen inap bihainim tingting kranki bilong em. Olsem na Pol i givim strongpela tok kaunsel long Pita. (Gal. 2:11-14) Yu ting Pita i bel hevi long dispela tok kaunsel na em i lusim resis bilong laip? Nogat. Em i tingim gut tok bilong Pol, em i senisim tingting, na stap yet long dispela resis.

13. Bilong wanem ol hevi bilong helt inap pundaunim yumi?

¹³ Ol hevi bilong helt inap givim bikpela hatwok long yumi. Dispela i mekim na sampela i save lusim resis. Olsem: Wanpela sista long Japan i kisim baptais, na 17 yia bihain  em i kisim bikpela sik. Em i larim hevi bilong helt i mekim na em i kamap slek long tok i tru, na em i lusim wok autim tok. Bihain, 2-pela elda i go lukim em na strongim em gen. Em i kisim gen pasin bilong go long ol miting, na em i pilim gutpela tok ol bratasista i mekim long em na em i krai. Nau sista bilong yumi i ran gen long resis bilong laip.

14, 15. Yumi mas mekim wanem taim yumi kisim ol laik nogut? Stori long dispela.

¹⁴ Planti manmeri i bin pundaun, long wanem, ol i tingim ol laik bilong skin. Sapos dispela samting i kamap long yumi, orait yumi mas mekim olgeta samting yumi inap long mekim bambai tingting na pasin bilong yumi i stap klin olsem ol lo bilong God i makim. Jisas i tok, sapos ai o han bilong yumi i mekim na yumi pundaun, orait yumi mas “kamautim na tromoi i go.” Yumi mas rausim ol tingting doti na ol pasin we inap mekim na yumi no ran moa long resis.—Ritim Matyu 5:29, 30.

¹⁵ Wanpela brata husat i bin kamap bikpela long tok i tru, em i tok em i bin gat laik bilong slip wantaim narapela man. Em i tok taim em i bung wantaim ol narapela, oltaim em i save pilim olsem em i narapela kain long ol na tingting bilong em i no save stap isi. Taim em i gat 20 krismas, em i kamap painia oltaim na em i mekim wok olsem kongrigesen sevan. Bihain, em i mekim wanpela bikpela rong na em i kisim tok bilong stretim em, na ol elda i helpim em. Em i beten, stadi long Baibel, na wok strong long helpim ol narapela. Ol dispela samting i helpim em long ran yet long resis. Dispela samting i bin kamap planti yia i go pinis, tasol em i tok: “Sampela taim dispela laik i save kamap, tasol mi no save larim dispela i daunim mi. Mi kisim save olsem Jehova i no inap larim wanpela traim i winim strong bilong yumi. Dispela i mekim na mi bilip olsem God i save olsem mi inap winim dispela traim.” Dispela brata i no laik bai wanpela samting i mekim na em i lusim resis. Em i save olsem laip long nupela taim i winim tru olgeta hevi em i karim long nau. Em i tok: “Long nau i go inap long dispela taim i kamap, bai mi wok yet long winim dispela traim.”

16, 17. (a) Wanem samting i bin helpim wanpela brata husat i pilim olsem ol narapela i bin mekim wansait pasin na ol i no tingim em? (b) Yumi mas holim wanem tingting long kongrigesen bambai yumi no ken pundaun?

¹⁶ Yumi inap larim wansait pasin bilong ol narapela long kongrigesen i pundaunim yumi. Long Frans, wanpela brata husat i bin mekim wok elda i pilim olsem ol narapela i mekim wansait pasin na i no tingim em. Em i bel nogut long ol na em i no go moa long ol miting na lusim wok autim tok. Tupela elda i visitim em na putim gut yau taim em i kamapim tingting bilong em. Ol elda i strongim em long bilip long Jehova, na ol i kirapim em long tingim olsem nambawan bikpela samting em long mekim ol samting em God i orait long en. Em i bihainim tok bilong ol na i no longtaim em i kirap gen long ran long resis.

¹⁷ Yumi olgeta i mas tingim olsem Jisas Krais em man God i makim olsem Het bilong kongrigesen. Yumi no ken wari long ol popaia em ol sinman i mekim. Ai bilong Jisas i “lait olsem paia i lait strong tru.” Em i save gut long olgeta samting i kamap insait long kongrigesen, winim tru save bilong yumi yet. (Rev. 1:13-16) Olsem: Yumi inap ting olsem i gat wansait pasin insait long kongrigesen. Tasol ating yumi no save gut long samting i bin kamap o i gat wanem as na em i kamap. Jisas i save stretim ol hevi insait long kongrigesen long stretpela pasin na long taim stret. Olsem na yumi no ken tru larim samting em narapela Kristen i mekim i pundaunim yumi na yumi lusim resis.

18. Olsem wanem yumi inap holimpas bilip taim hevi na pasin birua i painim yumi?

¹⁸ Tupela samting moa we inap pundaunim  yumi em hevi na pasin birua na pasin kranki bilong ol narapela long kongrigesen. Long stori bilong Jisas long man bilong planim sid, Jisas i soim olsem sampela bai pundaun taim “hevi na pasin birua” i painim ol, long wanem, ol i stap olsem lain bilong God. Ol famili, ol neiba, na gavman inap putim hevi o mekim pasin birua long yumi, long wanem, yumi stap long tok i tru. Man inap pundaun sapos “em i no putim rop i go daun long graun,” na dispela i makim olsem bilip bilong em i no strong. (Mat. 13:21) Tasol sapos yumi tingting strong long stap klostu long Jehova, tok bilong Kingdom bai helpim yumi long sanap strong long bilip. Olsem na taim hevi i painim yu, tingim tingim long bel “ol samting i stret long ol man i litimapim.” (Ritim Filipai 4:6-9.) Jehova bai givim yumi strong long holimpas bilip long taim ol hevi i painim yumi bambai yumi no inap pundaun na lusim resis.

19. Yumi ken mekim wanem na bai yumi no pundaun taim narapela i bagarapim bel bilong yumi?

¹⁹ Pasin kranki bilong ol narapela i bin mekim na sampela i no mekim moa wok bilong Jehova. O man inap pundaun, long wanem, ol narapela i mekim ol samting em maus bilong bel bilong em i gat tok long en. (1 Kor. 8:12, 13) Sapos wanpela man i mekim samting we i bagarapim bel bilong yumi, bai yumi mekim wanem? Bai yumi bel hevi na lusim tok i tru? Baibel i tok yumi no ken skelim narapela, nogat, yumi mas lusim rong bilong ol maski yumi pilim olsem i gat as long yumi bel hevi. (Luk 6:37) Sapos wanpela i bagarapim bel bilong yu, orait askim yu yet olsem: ‘Mi tingim pasin bilong mi yet long mekim ol samting na mi skelim ol narapela? Bai mi lusim tok i tru, long wanem, ol brata bilong mi i gat ol pasin kranki?’ Pasin bilong yumi long laikim tru Jehova inap helpim yumi na yumi no larim ol samting ol narapela i mekim i pasim yumi long pinisim resis bilong kisim laip.

20, 21. Long resis bilong kisim laip oltaim, bai yu mekim wanem?

²⁰ Olsem wanem? Yu laik ran na kamap long pinis bilong resis? (2 Tim. 4:7, 8) Sapos olsem, orait yu mas stadi long Baibel na ol buk na nius bilong yumi, mekim wok painimaut, na tingim tingim long bel na bai yu inap save long ol samting we inap pundaunim yu. Beten askim Jehova long strongim yu long rot bilong holi spirit. Tingim, sapos yumi pundaun, yumi inap kirap gen na ran long resis i go inap long pinis bilong en. Ol popaia yumi mekim inap skulim yumi long sampela samting na bai yumi inap ran gut moa long resis.

²¹ Baibel i soim olsem sapos yumi laik kisim prais bilong laip oltaim, orait yumi mas ran long resis i go inap long pinis bilong en. Taim yumi wok long ran, Jehova bai mekim yumi “stap gut tru.” (Sng. 119:165) Em bai wok yet long helpim yumi long nau, na sapos yumi kamap long pinis bilong resis, em bai givim ol blesing bilong oltaim oltaim.—Jems 1:12.