LAIP STORI
Fifti Yia Bilong Fultaim Sevis Klostu Long Aktik Sekel
Mipela i tokim wanpela pren bilong mipela, olsem: “I no hatwok long yu long mekim wok painia. Papa na mama bilong yu i insait long tok i tru, na ol inap lukautim yu.” Tasol em i bekim tok olsem, “Yumi olgeta i gat wanpela Papa tasol.” Bekim bilong em i kirapim mipela long tingim wanpela bikpela samting: Papa bilong yumi long heven i save lukautim na strongim ol wokman bilong em. Tru tumas, long laip olgeta bilong mipela, em i bin lukautim mipela.
FAMILI bilong mipela i gat 10-pela pikinini na mipela i stap long wanpela fam long Noten Ostrobothnia, Finlan. Taim mipela i pikinini yet, Wol Woa 2 i kamap. Maski haus bilong mipela i stap longwe long ples we pait i kamap long en, mipela i save olsem ol man i karim bikpela pen na hevi. Taim ol i tromoi bom long ol biktaun Oulu na Kalajoki, paia i kirap na mekim skai i kamap retpela. Papamama i tokim mipela long i go hait hariap taim mipela i lukim ol balus bilong pait i kam. Olsem na taim Tauno, bikbrata bilong mipela, i stori olsem graun bai kamap paradais long bihain na bai i no gat moa pen na hevi, dispela i kirapim laik bilong mipela long kisim sampela save moa.
Taim Tauno i gat 14 krismas, em i bin ritim ol buk bilong ol Sumatin Bilong Baibel na em i kisim save long tok i tru. Taim Wol Woa 2 i kirap, em i no laik insait long ami, long wanem, maus bilong bel em Baibel i skulim pinis, i gat tok long dispela. Olsem na ol i putim em long kalabus na mekim nogut tru long em. Tasol dispela i strongim tingting bilong em moa yet long mekim wok bilong Jehova. Taim em i lusim kalabus, em i givim bel moa yet long autim tok. Gutpela pasin bilong Tauno long taim bilong ol dispela hevi, i kirapim mipela long i go long ol miting bilong ol Witnes long wanpela ples i stap klostu. Mipela i mekim sampela wok na bungim mani bambai mipela inap i go long ol kibung. Mipela i samapim klos bilong ol neiba, planim anian, na kisim ol prut beri. I gat planti wok long fam, olsem na mipela famili olgeta i no save go long ol kibung long wankain taim.
Ol tok i tru mipela i lainim long Jehova na ol samting em i tingting pinis long mekim, dispela i kirapim mipela long laikim Jehova moa yet, olsem na mitupela wantaim i kisim baptais long 1947. (Annikki i bin gat 15 krismas, na Aili i gat 17 krismas.) Susa bilong mipela, Saimi, em i kisim baptais long wankain yia. Na mipela i stadi long Baibel wantaim narapela susa bilong mipela, Linnea. Em wantaim famili bilong em ol tu i kamap Witnes Bilong Jehova. Taim mipela i baptais pinis, mipela i wokim disisen long mekim wok painia haptaim long sampela mun.
MIPELA I KIRAP MEKIM WOK PAINIA
Long 1955, mipela i go sindaun long Kemi, em wanpela biktaun i stap long hap not. Maski mitupela wantaim i mekim wok mani, mipela i gat laik long mekim wok painia. Tasol mipela i pret olsem sapos mipela i mekim wok mani haptaim, nogut mipela i no inap lukautim mipela yet long ol samting bilong skin. Mipela i pilim olsem pastaim mipela i mas bungim sampela mani. Long dispela taim, painia sista em mipela i stori pinis long en, em i helpim mipela long luksave olsem mipela inap mekim wok painia. Mipela i mas bilip olsem Jehova bai helpim mipela long kisim ol samting mipela i nidim, na mipela i no ken bilip long strong bilong mipela yet o famili bilong mipela.
Mitupela i mekim wok painia inap 50 yia pinis, na dispela mani mipela i bin bungim em i stap yet!
Long 1958, wasman sekit i askim mipela long i go mekim wok painia salim long Sodankylä, long Laplan. Long dispela taim i gat wanpela sista tasol i stap long dispela hap. Em i bin kisim save long tok i tru long narapela kain rot. Olsem: Pikinini man bilong em i go wantaim ol wanklas long raun long Helsinki, em biktaun bilong Finlan. Taim em na ol wanklas i wokabaut raun long biktaun, wanpela lapun sista i givim em wanpela nius Wastaua na tokim em long givim long mama bilong em. Taim mama i ritim dispela nius, wantu em i luksave olsem dispela nius i kamapim tok i tru bilong Baibel.
Long dispela hap i gat somil, em ples bilong katim ol diwai na wokim plaiwut. Mipela i stap long wanpela rum antap long somil, na mipela i mekim ol miting long dispela rum. Pastaim, liklik lain tasol i stap long ol dispela miting, em mitupela yet, dispela sista, na pikinini meri bilong em. Long olgeta wan wan wik mipela i save ritim tasol olgeta tok ol i makim bilong skelim long miting. Bihain wanpela man husat i bin stadi long Baibel wantaim ol Witnes Bilong Jehova, em i kam wok long somil. Dispela man na famili bilong em i kirap long bung wantaim mipela long ol miting, na bihain em wantaim meri bilong em i kisim baptais. Nau, i gat brata bilong lukautim ol miting. Na tu, sampela arapela man husat i wok long somil, ol i kirap long kam long ol miting na ol i kisim tok i tru. I no longtaim grup bilong mipela i kamap kongrigesen.
HATWOK LONG AUTIM TOK
Bilong autim tok, mipela i mas raun long ol longpela rot. Long taim bilong san mipela i save wokabaut, ron long baisikol, na yusim ol bot long painim ol man long teritori. Ol baisikol i helpim gut mipela. Mipela i save yusim baisikol long i go long ol kibung na i go lukim papamama bilong
mipela, em ol i stap longwe inap planti handret kilomita. Long taim bilong kol, mipela i kisim bas long bikmoning na go long wanpela ples, na autim tok long ol haus. Taim mipela i autim tok pinis long wanpela ples, mipela i save wokabaut i go long narapela ples. Sampela taim bikpela sno tru i save karamapim ol rot. Sapos wanpela man i wokabaut paslain long mipela na ol lek mak bilong em i stap yet, orait em bai isi moa long mipela i wokabaut long dispela rot. Tasol sapos sno i pundaun gen, orait dispela i save karamapim gen rot. Long mun Mas samting, sno i save melt na dispela i save mekim na i hatwok long wokabaut.Mipela i lain long werim ol klos bilong hatim skin taim ples i kamap kol na sno i pundaun. Mipela i save werim ol stoking ol i wokim long gras bilong sipsip, 2-pela o 3-pela soks, na ol su i longpela i go inap long skru. Tasol taim mipela i wokabaut, ais i save go pulap insait long su. Taim mipela i kamap long lata bilong wanpela haus, mipela i save rausim su na kapsaitim ais i stap insait long su. Na tu, taim mipela i wokabaut long sno, arere bilong longpela saket bilong mipela i save pas long sno na kamap olsem ais. Wanpela meri i tok: “Ating yupela i gat strongpela bilip, long wanem, weda i no gutpela tasol yupela i kam.” Mipela i bin wokabaut moa long 11-pela kilomita bilong i go long dispela haus.
Planti taim mipela i save slip long haus bilong ol manmeri long ol ples mipela i go long en. Taim apinun i kamap, mipela i save askim ol manmeri sapos mipela inap slip long haus bilong ol. Haus bilong ol i no gat planti samting long en, tasol ol i save soim gutpela pasin pren na mekim gut long mipela. Na ol i givim ples slip na kaikai long mipela. Planti taim mipela i slip antap long ol skin bilong ol animal. Tasol sampela manmeri i gat ekstra rum em mipela inap yusim. Olsem: Wanpela meri i gat bikpela haus, na em i kisim mipela i go long ol rum i stap antap na i givim mipela wanpela rum i gat naispela bet na ol waitpela betsit. Planti taim mipela i save stori wantaim dispela meri na famili bilong em, na toktok wantaim ol long Baibel i go inap long biknait. Long narapela haus, tupela marit i slip long wanpela sait bilong rum, na mipela i slip long narapela sait. Dispela tupela marit i givim planti askim long mipela, na mipela i toktok wantaim ol long Baibel i go inap long tulait i bruk.
GUTPELA SAMTING I KAMAP
Laplan em wanpela naispela ples tru. Tasol ol manmeri husat i kisim save long Jehova, ol i naispela moa. Sampela man mipela i autim tok long ol em ol man husat i go sindaun long Laplan long katim ol diwai. Sampela taim mitupela i save i go insait long wanpela haus na lukim olsem i gat planti man i stap. Ol dispela man i amamas long harim tok bilong Baibel na ritim ol buk na nius bilong yumi.
Mipela i bin kisim planti gutpela ekspiriens. Wanpela taim, mipela i leit long kisim bas, long wanem, klok long bas stesin i ran 5-pela minit paslain.
Olsem na mipela i kisim bas bilong i go long narapela liklik ples. Mipela i no bin autim tok long dispela ples bipo, tasol long namba 1 haus mipela i bungim wanpela yangpela meri, na em i tok: ‘Mi save olsem yupela bai kam.’ Mipela i mekim Baibel stadi wantaim susa bilong em, na em i laik bai susa bilong em i tokim mipela long i go lukim em long dispela de stret. Tasol mipela i no bin kisim dispela toksave. Orait nau mipela i kirapim Baibel stadi wantaim em na ol wanblut husat i stap klostu long em. Bihain liklik mipela i bungim olgeta dispela stadi, em ol inap 12-pela olgeta, na mekim olsem 1-pela stadi tasol. Bihain, planti bilong dispela famili ol i kamap Witnes Bilong Jehova.Long 1965, mipela i kisim asainmen bilong i go long hap saut na wok wantaim kongrigesen long Kuusamo. Long dispela taim i no gat planti pablisa long kongrigesen. Pastaim, i hatwok long autim tok long dispela teritori. Ol manmeri i givim bel tru long lotu bilong ol na ol i no laikim wok mipela i mekim. Tasol planti manmeri i rispektim tok bilong Baibel. Olsem na mipela i traim long save gut long ol manmeri, na bihain long 2-pela yia samting, mipela i no hatwok moa long kirapim ol Baibel stadi.
MIPELA I MEKIM YET WOK AUTIM TOK
Long nau, mitupela i save autim tok long olgeta de, tasol mipela i no inap autim tok inap de olgeta. Long nau em i isi moa long autim tok long bikpela teritori bilong mipela, long wanem, Aili i lain long draivim kar. Pikinini man bilong brata bilong mipela i kirapim Aili long lain long draivim kar, na long 1987 em i kisim laisens taim em i gat 56 krismas. Na tu, nau mipela i stap long wanpela flet long nupela Haus Kingdom.
Mipela i amamas tru olsem planti manmeri i kisim tok i tru long noten Finlan. Taim mipela i kirap mekim wok painia long dispela hap, i no bin gat planti pablisa. Tasol long nau i gat sampela kongrigesen i insait long dispela sekit. Long taim bilong ol kibung, planti taim wanpela i save kam na kolim nem bilong em na stori olsem mipela i bin stadi long Baibel wantaim famili bilong em taim em i stap liklik yet. Tru tumas, God i bin blesim wok bilong mipela.—1 Kor. 3:6.
Long 2008, mipela i winim 50 yia long mekim wok painia salim. Mitupela i tenkyu long Jehova olsem mitupela inap strongim narapela narapela long mekim yet wok bilong em. Tru, mipela i no gat planti samting bilong skin, tasol oltaim mipela i gat ol samting mipela i nidim. (Sng. 23:1) Nau mipela i save olsem i no gat as long mipela i bin pret long mekim wok painia! Insait long ol dispela yia, Jehova i bin strongim mipela olsem em i bin tok promis long mekim, em i tok: “Bai mi mekim yupela i kamap strong na bai mi helpim yupela. Bai mi was gut long yupela . . . long bikpela strong bilong mi.”—Ais. 41:10.