YUMI amamas tru long lukim olsem planti yangpela Witnes i wok long mekim ol senis long sindaun bilong ol na lusim ekstra mani kago bambai ol inap mekim bikpela wok moa long autim tok. (Mat. 6:22) Ol i mekim wanem ol senis? Ol i bungim wanem ol hevi? Bilong kisim bekim bilong ol dispela askim, yumi ken harim stori bilong sampela em ol i mekim wok autim tok long Meksiko long nau.

Dustin na Jassa i bilong Amerika na ol i marit long Janueri 2007. Bihain liklik, ol i inapim bikpela laik bilong ol—ol i baim bot i gat sel na mekim dispela bot i kamap olsem haus bilong ol. Bot bilong ol i anka klostu long Astoria, Oregon, long Amerika, em naispela taun i stap namel long ol liklik maunten em bus i karamapim na ol bikpela maunten em sno i karamapim, na dispela taun i stap klostu tru long solwara Pasifik. Dustin i tok: “Maski yu lukluk we, olgeta hap i naispela ples tru!” Dispela tupela marit i pilim olsem ol i holim liklik mani kago tasol inap long skel bilong ol, na ol i bilip olsem Jehova bai lukautim ol. Ol i holim kain tingting olsem, ‘Mipela i sindaun long wanpela liklik bot em i longpela inap 7.9 mita, na mipela i wok haptaim tasol, na mipela i go long kongrigesen i mekim narapela tokples, na sampela taim mipela i mekim wok painia haptaim.’ Tasol bihain ol i luksave olsem ol i holim kranki tingting. Dustin i tok: “Mipela i save lusim bikpela haptaim moa long stretim bot, na mipela i no helpim tumas kongrigesen. Mipela i save olsem sapos mipela  i laik putim Jehova i stap namba 1 long laip bilong mipela, mipela i mas mekim sampela senis.”

Jassa i tok: “Taim mi no marit yet, mi bin stap long Inglis kongrigesen long Meksiko. Mi bin amamas long mekim wok autim tok long dispela hap, na mi gat bikpela laik long go bek.” Long taim bilong famili lotu, Dustin na Jassa i laik strongim laik bilong i go mekim wok long narapela kantri, olsem na ol i ritim laip stori bilong ol bratasista husat i bin go sindaun long ol narapela hap we kaikai i redi pinis long gaden. (Jon 4:35) Dustin i tok: “Mitupela tu i laik kisim wankain amamas olsem ol.” Bihain, taim ol pren bilong Dustin na Jassa long Meksiko i toksave long tupela olsem wanpela nupela grup i kamap na ol i nidim helpim, Dustin na Jassa i wokim disisen bilong ol. Tupela i lusim wok mani, salim bot, na ol i go sindaun long Meksiko.

Dustin na Jassa i go sindaun long taun Tecomán—em tu i klostu long solwara Pasifik, tasol em i stap long hap saut bilong Astoria inap olsem 4,345 kilomita. Dustin i tok: “I no gat kolwin na ol naispela maunten. Ples i hot nogut tru, na ol muli diwai i stap long olgeta hap.” Pastaim tupela i no inap long painim wok mani. Tupela i sot long mani, olsem na 2-pela taim long olgeta de ol i kaikai rais na bin tasol. Jassa i tok: ‘Mipela i mekim olsem i go na wanpela taim mipela i pilim olsem mipela i les olgeta long ol dispela kaikai, na kirap long dispela taim ol Baibel sumatin bilong mipela i stat long givim ol mango, banana, popo, na planti muli!’ Bihain tupela i kisim wok long skulim ol man long tokples long rot bilong Intenet, long kampani i stap long Taiwan. Long nau, mani ol i kisim long dispela wok i lukautim ol gut.

Dustin na Jassa i pilim olsem wanem long nupela sindaun bilong ol? Ol i tok: “Dispela em nambawan gutpela samting tru i painim mipela. Nau mitupela i pas gut moa, na tu, mipela i pas gut moa wantaim Jehova. Long olgeta de, mipela i save mekim planti samting wantaim—autim tok, stori long rot bilong helpim ol Baibel sumatin, na redim ol miting. Na tu, i no gat ol samting i putim presa long mipela olsem long pastaim. Nau mipela i pilim tru tok promis i stap long Song 34:8 em i tok, ‘Yupela yet i mas traim na lukim na bai yupela i save olsem Bikpela i gutpela tru.’”

Winim 2,900 bratasista—ol marit na singel, planti i gat krismas namel long 20 na 40—ol i go stap long ol hap bilong Meksiko we i sot long pablisa bilong autim tok bilong Kingdom. I gat wanem as na ol dispela Witnes i go bilong mekim dispela bikpela wok? Taim sampela bilong ol i kisim dispela askim, ol i kolim 3-pela bikpela samting. Wanem ol dispela samting?

Bilong soim olsem ol i laikim tumas Jehova na ol narapela man. Leticia i bin kisim baptais taim em i gat 18 krismas. Em i tok: “Taim mi dediket long Jehova,  mi save olsem mi mas givim bel olgeta long mekim wok bilong em. Olsem na bilong kamapim klia olsem mi laikim tumas Jehova, mi laik givim bikpela haptaim na strong long mekim wok bilong em.” (Mak 12:30) Hermilo, nau em i maritim Leticia, em i gat 22 krismas samting taim em i go sindaun long hap we i sot long ol pablisa. Em i tok: “Mi luksave olsem nambawan gutpela rot bilong soim olsem mi laikim ol narapela man, em long helpim ol long kisim stretpela save long God.” (Mak 12:31) Olsem na em i lusim biktaun Monterrey we em i wok long wanpela benk na em i gat gutpela sindaun long dispela hap, na em i go sindaun long wanpela liklik taun.

Bilong kisim amamas tru we i no inap pinis. Bihain long Leticia i kisim baptais, em i poromanim wanpela strongpela painia sista na ol i go long wanpela taun i stap longwe, na ol i autim tok long dispela hap inap 1-pela mun. Leticia i tok: “Mi kirap nogut. Planti manmeri i putim yau long tok bilong Kingdom mipela i autim long ol, na dispela i givim bikpela amamas tru long mi. Long pinis bilong mun mi tokim mi yet, ‘Em dispela kain wok tasol mi laik mekim!’” Na i wankain tu long Essly, em wanpela singel sista husat i gat 22 krismas samting. Em i lukim bikpela amamas bilong ol bratasista na dispela i kirapim em long i go mekim wok autim tok long ples we i sot long ol pablisa. Taim em i stap yet long haiskul, em i bin bungim sampela Witnes husat i givim bel long autim tok long ol hap we i sot long ol pablisa. Em i tok: “Taim mi lukim bikpela amamas bilong ol dispela bratasista, dispela i kirapim laik bilong mi tu long mekim wankain wok olsem ol.” Planti sista i mekim wankain samting olsem Essly i bin mekim. Long Meksiko, winim 680 singel sista i save autim tok long ol hap we i sot long ol pablisa. Ol i stap olsem gutpela piksa tru long ol yangpela na lapun wantaim!

Bilong stap amamas na mekim laip bilong ol i gat as bilong en. Taim Essly i pinisim haiskul, skul i makim em long go long yunivesiti. Ol wanlain i kirapim em long go long yunivesiti na kisim gutpela sindaun olsem ol narapela manmeri—olsem kisim namba, bikpela wok, kar, na raun long ol narapela kantri. Tasol em i no bihainim tingting bilong ol. Essly i tok: “Sampela pren em ol i Kristen ol i bin mekim olsem, na mi lukim olsem ol samting bilong spirit i no stap moa olsem bikpela samting long ol. Na mi lukim tu olsem taim ol i insait moa long ol samting bilong dispela graun, ol i bel hevi tru long ol hevi i painim ol. Mi laik wok strong long mekim wok bilong Jehova taim mi yangpela yet.”

Essly i mekim sampela narapela kos long skul na dispela i inapim em long painim wok mani bilong lukautim em yet taim em i mekim wok painia, na bihain em i go long wanpela hap we i sot tru long ol pablisa. Na tu, em i kirap lainim tokples bilong lain Otomi na Tlapaneco, em ol asples. Nau em i tingim bek wok em i bin mekim long autim tok inap 3-pela yia long ol  longwe ples, na em i tok: “Mi autim tok long ol hap we i sot tru long ol pablisa na mi kisim bikpela amamas na laip bilong mi i gat as tru bilong en. Na bikpela samting em olsem, mi pas gut moa wantaim Jehova.” Phillip na Racquel, em tupela marit bilong Amerika i gat olsem 30 krismas samting, ol i wanbel long dispela tok. Ol i tok: “Pasin bilong dispela graun i wok long senis kwiktaim, na planti man i pilim olsem laip bilong ol i no gat as moa. Tasol mipela i autim tok long hap we planti manmeri tru i putim yau long tok bilong Baibel, na dispela i mekim na mipela i pilim olsem laip bilong mipela i gat as tru bilong en. Mipela i amamas tru!”

Tru, taim yu mekim wok long ol hap we i sot long ol pablisa, bai yu bungim sampela hevi. Wanpela hevi em ol samting yu mas mekim bilong lukautim yu yet long mani. Bilong mekim olsem, yu mas mekim sampela senis we i stret long hap yu stap long en. Verónica, em wanpela strongpela painia, em i tok: “Long wanpela hap mi bin wok painia long en, mi save redim kaikai na salim long liklik pe. Long narapela hap, mi salim ol klos na katim gras bilong ol manmeri. Long nau mi save klinim wanpela haus na mi gat wanpela klas bilong skulim ol nupela papamama long pasin bilong toktok gut wantaim ol pikinini bilong ol.”

Sampela taim i hatwok long lain long nupela kain pasin na sindaun taim yu stap namel long ol lain asples bilong wanpela longwe ples. Phillip na Racquel i bungim dispela hevi taim ol i mekim wok autim tok namel long ol lain i mekim tokples Nahuatl. Phillip i tok, “Kalsa bilong dispela lain i narapela kain tru long pasin bilong mipela.” Wanem samting i helpim Phillip na Racquel long lain long dispela nupela sindaun? Phillip i tok: “Mitupela i tingim ol gutpela pasin bilong lain Nahuatl—famili bilong ol i pas gut wantaim, ol i mekim gut long narapela narapela, na ol i gat pasin bilong givim samting.” Racquel i tok: “Mipela i lain long planti samting taim mipela i stap long dispela hap na wok wantaim ol bratasista bilong dispela ples.”

Sapos yu laik mekim wok bilong God long sampela longwe ples i sot long ol pablisa, orait nau yu ken mekim wanem bilong redim yu yet? Ol bratasista husat i gat save long mekim kain wok olsem, ol i tok: Paslain long yu go, kirap nau long lusim sampela samting long sindaun bilong yu na lain long mekim wok long ol samting yu gat pinis. (Fili. 4:11, 12) Yu ken mekim wanem samting moa? Leticia i tok: “Mi bin abrusim ol wok mani we inap mekim na mi stap longpela taim long wanpela ples. Mi laik bai mi stap fri na mi redi long go kwik long narapela ples sapos i gat nid long mekim olsem.” Hermilo i tok: “Mi lain long kukim kaikai, na wasim na ainim klos.” Verónica i tok: “Taim mi stap wantaim papamama na ol bratasusa bilong mi, mi save helpim mama long klinim haus na lain long kukim ol gutpela kaikai i gat liklik pe. Na tu, mi lain long lukautim gut mani.”

Levi na Amelia i bilong Amerika na tupela i marit inap 8-pela yia pinis, na ol i stori long olsem wanem beten i bin helpim ol long redi long i go mekim wok autim tok long Meksiko. Levi i tok: “Mipela i skelim hamas mani mipela i mas i gat bilong mekim wok autim tok long narapela kantri inap 1-pela yia, na mipela i beten askim Jehova long helpim mipela long kisim dispela mani stret long wok skin.” Insait long sampela mun tasol, tupela inap bungim stret mani ol i bin kolim long beten, na kwiktaim ol i kirap lusim ples na ol i go. Levi i tok: “Jehova i mekim olsem mipela i bin askim em, olsem na nau mipela tu i mas mekim olsem mipela i bin tok.” Amelia i tok moa olsem: “Mipela i ting mipela bai stap inap 1-pela yia tasol long Meksiko, tasol mipela i stap inap 7-pela yia nau na mipela i no tingting long lusim dispela ples! Mipela i stap hia na mipela inap lukim stret ol samting Jehova i mekim bilong helpim mipela. Long olgeta de, mipela i lukim ol samting i kamapim klia gutpela pasin bilong em.”

Adam na Jennifer em tupela marit bilong Amerika husat i mekim wok autim tok long Meksiko namel long ol lain i mekim tok Inglis, na ol tu i tok pasin bilong beten i bin helpim ol. Tupela i tok: “No ken wet inap sindaun bilong yu i kamap gutpela olgeta. Beten na kamapim dispela laik bilong yu, na mekim ol samting yu kolim long beten. Lusim ol ekstra mani kago, raitim pas i go long brens ofis bilong kantri yu laik i go long en, skelim gut sapos yu inap lukautim yu yet, na taim yu mekim pinis ol dispela samting, orait kirap na go long dispela hap!” a Sapos yu mekim olsem, orait yu bai kisim bikpela amamas na bilip bilong yu bai kamap strong moa.