TAIM Wol Woa 1 i kamap long yia 1914, planti man i luksave olsem ol Sumatin Bilong Baibel i no save insait long pait. (Ais. 2:2-4; Jon 18:36; Efe. 6:12) Wanem samting i painim ol wokman bilong God long Briten?

Long yia 1916, ol i kamapim wanpela lo long Briten we i tok olsem ol singel man em krismas bilong ol i stap namel long 18 na 40, ol i mas i go long pait. Lo i tok, i no gat rong sapos man i tingim lo bilong lotu o lo bilong stretpela pasin na em i no laik insait long pait. Gavman i kamapim ol kot bilong skelim na makim husat inap kisim dispela kain tok orait.

Maski dispela lo i stap, ol i no givim tok orait long sampela Sumatin Bilong Baibel, olsem na ol i putim 40 brata long kalabus na ol i salim 8-pela i go bilong pait long Frans. Ol brata long Briten i raitim pas i go long Praim Minista Herbert Asquith, na ol i salim dispela pas wantaim wanpela pepa em 5,500 manmeri i bin sainim nem long en bilong askim gavman long larim ol Sumatin Bilong Baibel long lusim kalabus na i go fri.

Bihain, tok i kam olsem dispela 8-pela brata em ol i bin salim ol i go long Frans, ol i no laik insait long pait, olsem na ol soldia bai sutim ol na kilim ol i dai. Tasol taim ol i sanap long ai bilong ol soldia husat bai sutim ol, kot i tokaut olsem ol bai stap long kalabus inap 10-pela yia. Olsem na ol i go bek long Inglan na stap long kalabus.

Taim pait i kamap bikpela, lo i makim tu olsem ol maritman i mas insait long pait. Long Manchester, Inglan, gavman i kotim Henry Hudson, em wanpela dokta na Sumatin Bilong Baibel. Long Ogas 3 1916, kot i tokaut olsem em i brukim lo, olsem na ol i sasim em na putim em long han bilong ami. Long wankain taim long Edinburgh, Skotlan, gavman i kotim James Frederick Scott, em wanpela kolpota husat i gat 25 krismas, na kot i tok em i no gat rong. Dispela i mekim na nambawan kot i laik skelim gen dispela kot keis, tasol ol i lusim na skelim kot keis bilong narapela brata long London. Nem bilong dispela brata em Herbert Kipps, na kot i tok em i gat rong, olsem na ol i sasim em na putim em long han bilong ami.

Long Septemba 1916, inap 264 brata i no laik insait long ami, olsem na ol i askim gavman long givim tok orait long ol. Gavman i givim tok orait long 5-pela brata, ol i makim 154 brata long mekim ol hatpela wok olsem wokim rot na brukim ol ston samting, na ol i makim 23 brata long mekim ol narapela wok bilong helpim ami, na ol i makim 82 brata long insait long ami, na ol i kotim ol narapela na putim ol long kalabus. Planti manmeri i no amamas long gavman i mekim hatpela pasin long ol  dispela brata, olsem na gavman i tok long ol i lusim kalabus na i go mekim ol narapela wok.

Edgar Clay na Pryce Hughes i mekim wok long wanpela bikpela raunwara long Wels; bihain Pryce Hughes i mekim wok olsem wasman bilong brens long Briten. Herbert Senior em i wanpela bilong ol dispela 8-pela brata husat i lusim Frans na kam bek, na gavman i salim em i go long Wakefield Haus Kalabus long Yorkshire. Ol narapela i karim bikpela hevi tru long Dartmoor Haus Kalabus, na bikpela lain long dispela banis kalabus em ol lain husat i no laik insait long ami.

Narapela brata, em Frank Platt, em i tok orait long mekim ol narapela wok long helpim ol soldia, tasol bihain ol i putim em long han bilong ami na inap longpela taim ol i mekim hatpela pasin tru long em. Atkinson Padgett i putim nem long joinim ami na bihain tasol long en, em i kisim save long tok i tru. Olsem na ol bikman bilong ami i mekim nogut tru long em, long wanem, em i no laik insait long pait.

Long dispela taim bipo em klostu 100 yia i go pinis, ol brata bilong yumi i no kliagut olsem ol Kristen i no ken insait long pait, tasol ol i wok strong long amamasim God Jehova. Ol brata em nem bilong ol i stap long dispela ripot, ol i stap gutpela piksa tru long ol i no insait long pait long “taim bilong traim.” (Rev. 3:10)—Histori bilong yumi long Briten.