1. Olsem wanem pasin bilong toktok gut wantaim i helpim ol marit?

 WANPELA brata long Kanada i tok, “Mi laik stap wantaim meri bilong mi, na mi no laik lusim nating taim long stap wantaim ol narapela.” Dispela brata i tok moa olsem taim em i stap wantaim meri bilong em, long gutpela taim em i save amamas tru, na long taim nogut em inap tru long karim hevi. Wanpela man marit long Australia i tok, “Mi marit inap 11-pela yia pinis, na insait long ol dispela yia i no gat wanpela de i lus nating we mi no toktok wantaim meri bilong mi.” Em i tok pasin bilong toktok gut wantaim i bin helpim ol long trastim narapela narapela na dispela i strongim marit bilong ol. Wanpela sista long Kosta Rika i tok, pasin bilong toktok gut wantaim i bin helpim em na man bilong em long stap amamas insait long marit bilong ol. Em i tok: “Dispela i mekim na mipela i go klostu moa long Jehova, mipela i winim ol traim, mipela i stap wanbel, na pasin laikim bilong mipela i kamap strong.”

2. Bilong wanem sampela taim i hatwok long ol marit long toktok gut wantaim?

² Olsem wanem? Yu save toktok gut wantaim poroman marit bilong yu? Em tru olsem sampela taim bai yupela i gat hevi long pasin bilong toktok gut wantaim. Yutupela wantaim i gat sin, na yutupela i gat narapela narapela pasin. (Rom 3:23) Ating yupela i kam long narapela narapela sindaun na papamama i bin bihainim narapela narapela pasin bilong mekim bikpela long yupela. Olsem na ating yupela i gat narapela narapela pasin bilong toktok. Long dispela as, saveman John M. Gottman na savemeri Nan Silver i mekim wanpela wok painimaut na ol i tok, ol marit i mas redi long wok strong sapos ol i laik toktok gut wantaim na helpim marit bilong ol long i stap longpela taim.

3. Wanem samting i bin helpim planti long mekim marit bilong ol i stap strong?

³ Man marit na meri marit i mas mekim bikpela wok tru na bai marit i stap strong, na dispela bai mekim ol i stap amamas tru. (Sav. 9:9) Tingim marit bilong Aisak na Rebeka. (Stt. 24:67) Baibel i stori olsem maski tupela i bin marit inap longpela taim pinis, ol i holim strong yet pasin bilong laikim tru narapela  narapela. Long nau tu, planti i bin mekim marit bilong ol i stap strong. Wanem samting i bin helpim ol? Ol i lain long bihainim gutpela pasin na tokaut stret long tingting i stap long bel bilong ol. Ol i bihainim gutpela tingting, soim pasin laikim, pasin rispek, na pasin daun. Orait nau yumi bai stori long olsem wanem ol dispela pasin inap helpim ol marit long kisim pasin bilong toktok gut wantaim.

4, 5. Olsem wanem gutpela tingting inap helpim tupela marit long pilim tingting bilong narapela narapela? Stori long dispela.

⁴ Sindaun 16:20 i tok: “Sapos man i putim yau gut long tok bilong ol man i skulim em, orait em bai i gat gutpela sindaun.” Tok Bilong God i givim yumi gutpela tingting na save bilong helpim marit long i stap amamas. (Ritim Sindaun 24:3.) Olsem Stat 2:18 i tok, God i wokim meri olsem poroman bilong man. Dispela i makim olsem man na meri i no wankain, olsem na ol bai inapim narapela narapela long samting em narapela i sot long en. Olsem na pasin bilong ol meri long toktok i no wankain long pasin bilong ol man long toktok. Planti meri i gat pasin bilong stori long filings bilong ol, ol narapela manmeri, na pasin bilong ol narapela long pas gut wantaim narapela. Pasin bilong toktok gut wantaim na kamapim stret tingting i stap long bel, dispela i save helpim meri long pilim olsem narapela i laikim em. Planti man i no gat pasin bilong stori long filings bilong ol, tasol ol i gat laik long stori long wok bilong ol, ol hevi, na rot bilong stretim hevi. Na tu, ol man i laik bai ol narapela i rispektim ol.

⁵ Wanpela sista long Briten i tok, “Man bilong mi i save tingting tasol long stretim hevi kwiktaim, na em i no save putim yau long stori bilong mi.” Dispela sista i tok moa olsem dispela pasin i save mekim em i bel hevi, long wanem, em i laik tru bai man i putim yau tasol long stori bilong em na traim long pilim tingting bilong em. Wanpela man marit i tok, “Taim mi na meri bilong mi i marit nupela, mi gat pasin bilong painim kwik rot bilong stretim hevi bilong meri.” Tasol i no longtaim dispela man i painimaut olsem meri bilong em i laik bai em i putim yau tasol long stori bilong em. (Snd. 18:13; Jems 1:19) Man marit i gat gutpela tingting, em i save gut long filings bilong meri bilong em, na pasin bilong em bai mekim na meri i pilim olsem man i laikim em. Em bai kamapim klia long meri olsem em i tingim tru tingting na filings bilong meri. (1 Pita 3:7) Na tu, meri marit i gat gutpela tingting, em bai traim long pilim tingting bilong man bilong em. Taim man marit na meri marit i mekim ol samting em God i laik ol i mas mekim, marit bilong ol bai i gat amamas na tupela inap wok bung wantaim long mekim ol gutpela disisen.

6, 7. (a) Olsem wanem tok bilong Saveman 3:7 inap helpim ol marit long bihainim gutpela tingting? (b) Olsem wanem meri marit inap bihainim gutpela tingting taim em i toktok long man bilong em? Man marit i mas wok strong long mekim wanem?

⁶ Tupela marit i mas save olsem i gat “taim bilong pasim maus na taim bilong toktok.” (Sav. 3:1, 7) Wanpela sista husat i marit inap 10-pela yia pinis i tok, em i luksave long wanem taim i gutpela long em i ken toktok wantaim man bilong em long sampela samting. Sapos man bilong em i gat planti wok tru, orait dispela sista i save wetim narapela taim i stret long em i ken toktok wantaim em. Olsem na pasin bilong ol long toktok gut wantaim i kamap gutpela moa. Taim meri marit i “wetim gutpela taim” na em i toktok gut long man bilong em, orait man bai amamas long putim yau long tok bilong em.—Ritim Sindaun 15:23.

⁷ Man marit Kristen bai putim yau long stori bilong meri bilong em, na tu, em bai stori long em yet i pilim olsem wanem. Wanpela elda husat i marit inap 27 yia pinis i tok: “Mi mas lain long tokim meri bilong mi long ol samting mi pilim tru long bel.” Wanpela brata husat i marit inap 24 yia pinis i tok, em i no save amamas long stori long ol hevi. Em i pilim olsem sapos em i no stori long ol hevi, orait ol dispela hevi bai pinis. Tasol em i tok moa olsem: “Mi luksave olsem sapos mi kamapim tingting bilong mi, dispela i no makim olsem mi no gat strong. Taim mi hatwok long kamapim tingting bilong mi, mi save beten bambai mi inap  makim gut ol tok bilong mekim na bihainim stretpela pasin taim mi toktok. Bihain mi save pulim win gut na kirap long toktok.” Em i bikpela samting long tupela marit i mas makim gutpela taim bilong toktok. Olsem, ating long taim tupela yet i stap na skelim teks bilong de o long taim ol i ritim Baibel wantaim.

8. Wanem samting inap helpim ol marit long wok strong long toktok gut moa wantaim narapela narapela?

⁸ Ating bai i hatwok long tupela marit i senisim pasin bilong ol long toktok gut wantaim. Man marit na meri marit i mas beten askim God long helpim ol, na ol i mas wok strong long stretim pasin bilong ol long toktok gut wantaim. Ol inap mekim olsem sapos ol i laikim Jehova, ol i laik amamasim em, na ol i tingim marit olsem samting i holi. Wanpela sista husat i bin marit inap 26 yia pinis i tok: “Mi na man bilong mi i tingim tru lo bilong Jehova long marit, olsem na mipela i no tingting liklik long seperet. Dispela i mekim na mipela i wok strong long stretim ol hevi long rot bilong toktok gut wantaim.” Ol marit husat i bihainim dispela pasin na ol i stap gut long God, ol bai mekim God i amamas na em bai blesim ol.—Sng. 127:1.

9, 10. Tupela marit i ken mekim wanem bambai pasin laikim bilong ol i kamap strong moa?

⁹ Pasin laikim em nambawan bikpela samting insait long marit. Baibel i tok olsem “pasin laikim em i nambawan gutpela rot bilong mekim ol man i kamap wanbel.” (Kol. 3:14) Bihain long sampela haptaim, pasin laikim tru i save kamap strong taim tupela marit i stap gut wantaim long gutpela taim na long taim nogut. Ol bai stap gutpela pren na pas gut moa, na ol bai amamas long stap gut wantaim. I no olsem ol i mekim sampela bikpela samting olsem yumi lukim long ol muvi, nogat, ol i mekim planti liklik samting bilong helpim poroman marit na dispela pasin i save strongim marit. Ol i mekim ol kain liklik samting olsem: Holimpasim narapela, mekim naispela tok na gutpela pasin, givim naispela smail, o mekim gutpela askim long de bilong poroman i olsem wanem. Ol kain liklik samting olsem i save givim bikpela helpim tru long marit. Tupela marit husat i bin marit inap 19 yia pinis, ol i tok long san ol i save ring o salim teks mesis long narapela narapela bilong save long samting narapela i mekim.

¹⁰ Taim tupela marit i laikim tru narapela narapela, ol bai wok yet long save gut long poroman marit. (Fili. 2:4) Taim ol i mekim olsem, pasin laikim bilong ol bai kamap strong moa maski tupela wantaim i gat sampela pasin kranki. Sapos marit i stap amamas, orait isi isi em bai kamap strong moa. Olsem na sapos yu marit pinis, askim yu yet olsem: ‘Mi save gut long poroman marit bilong mi o nogat? Mi save gut long samting em i pilim na  tingting long en? Mi save tingim ol gutpela pasin bilong em we i bin mekim na mi kirap long laikim em?’

11. Bilong wanem pasin rispek i bikpela samting insait long marit? Stori long wanpela eksampel em Baibel i kamapim.

¹¹ Maski tupela marit i stap amamas, dispela i no makim olsem marit bilong ol i gutpela olgeta, nogat. Ating tupela bai i no wanbel long sampela samting. Olsem: Sampela taim Abraham na Sara i no save wanbel. (Stt. 21:9-11) Tasol dispela i no bagarapim marit bilong ol. Bilong wanem? Long wanem, ol i rispektim narapela narapela. Olsem: Taim Abraham i askim Sara long mekim wanpela samting, Abraham i tok “i gutpela yu tokim ol olsem.” (Stt. 12:11, 13) Sara i bihainim tok bilong Abraham na kolim em olsem “bikman.” (Stt. 18:12) Tasol sapos tupela marit i mekim hatpela tok long narapela narapela, dispela i soim olsem ol i no rispektim poroman marit. (Snd. 12:18) Na sapos ol i no gat pasin rispek, marit bilong ol inap bagarap.—Ritim Jems 3:7-10, 17, 18.

12. Taim man na meri i marit nupela, bilong wanem ol i mas wok strong long soim pasin rispek taim ol i toktok long narapela narapela?

¹² Taim man na meri i marit nupela, ol i mas wok strong long toktok gut na rispektim poroman marit. Dispela bai helpim ol na i no hatwok long ol i toktok gut wantaim na tokaut stret long tingting i stap long bel bilong ol. Wanpela man marit i stori olsem bihain long em i marit nupela, insait long sampela yia em na meri bilong em i no kliagut long filings na pasin bilong poroman marit, na ol samting em poroman i nidim. Sampela taim dispela i save mekim ol i kros na bel hevi. Tasol ol i bihainim stretpela tingting na ol i save lap na amamas wantaim, olsem na dispela i helpim ol long pas gut wantaim. Em i tok tu olsem em i bikpela samting long bihainim pasin daun, i no les kwik, na bilip long Jehova. Dispela em gutpela skultok bilong helpim yumi olgeta!

13. Bilong wanem pasin daun em i bikpela samting bilong helpim ol marit long i stap amamas?

¹³ Tupela marit inap toktok long gutpela pasin na pasin isi sapos tupela wantaim i “mekim pasin daun.” (1 Pita 3:8) Wanpela brata husat i marit inap 11-pela yia pinis, em i tok pasin daun bai kirapim ol marit long stretim hevi, long wanem, dispela pasin bai kirapim ol long tok, “Sori.” Wanpela elda husat i bin marit inap 20 yia pinis i tok, “Sampela taim dispela tok ‘Sori’ i bikpela samting  moa winim dispela tok ‘Mi laikim yu tru.’” Em i stori olsem pasin bilong beten i helpim em na meri bilong em long bihainim pasin daun. Em i tok, “Taim mitupela meri bilong mi i beten long Jehova, dispela i save helpim mipela long tingim olsem mipela i sinman tasol na God i gat bikpela pasin helpim.” Dispela i helpim ol long kisim stretpela tingting long ol yet na long hevi i painim ol.

14. Pasin antap inap mekim wanem long marit?

¹⁴ Pasin antap i save mekim na i hatwok tru long man marit na meri marit long toktok gut wantaim na stretim ol hevi. Man i gat pasin antap, em bai hatwok long tok, “Sori tru, plis lusim rong bilong mi.” Em bai givim ol eskius long ol rong em i mekim, na em bai sutim tok long narapela na i no tokaut olsem em yet i rong. Taim ol narapela i rongim man i gat pasin antap, dispela man i gat pasin antap bai i no inap mekim ol samting bilong kamap wanbel. Em bai mekim tok long hatpela pasin o em bai i no laik tru long toktok wantaim narapela. (Sav. 7:9) Yes, pasin antap inap bagarapim marit. I gutpela long yumi mas tingim olsem, “God i save sakim ol man i gat pasin antap, tasol em i save kamapim bikpela pasin helpim long ol man i gat pasin daun.”—Jems 4:6.

15. Olsem wanem tok bilong Efesus 4:26, 27 inap helpim tupela marit long stretim hevi bilong ol?

¹⁵ Taim tupela marit i no wanbel long wanpela samting, orait ol i mas wok strong long stretim kwik hevi na abrusim pasin antap. Pol i tokim ol Kristen olsem: “No ken larim san i go daun na yupela i belhat yet. Na no ken opim rot long Satan.” (Efe. 4:26, 27) Wanem samting inap kamap sapos tupela marit i no bihainim dispela skultok bilong Baibel? Wanpela sista i tok: “Inap sampela nait mi no slip gut!” Em gutpela moa long stretim kwik hevi na bihainim pasin isi. Tasol i gutpela long man marit na meri marit i larim bel i kol liklik paslain long ol i toktok wantaim long stretim hevi. Na tu, ol i mas beten askim Jehova long helpim ol long bihainim pasin daun. Dispela bai helpim tupela long tingim ol samting ol bai mekim bilong stretim hevi, na i no tingim filings bilong ol yet tasol.—Ritim Kolosi 3:12, 13.

16. Olsem wanem pasin daun inap helpim tupela marit long tingim tru ol gutpela pasin na save bilong poroman marit?

¹⁶ Pasin daun inap helpim tupela marit long tingim ol gutpela pasin na save bilong narapela narapela long mekim sampela wok. Olsem: Meri marit i gat save bilong mekim wanpela wok na dispela i opim rot na em inap helpim famili. Man marit husat i gat pasin daun, em bai i no pilim olsem save bilong em i winim save bilong meri long olgeta samting, nogat, em bai strongim meri long yusim yet save bilong em. Taim man marit i mekim olsem, orait dispela bai soim olsem em i laikim na tingim tru meri bilong em. (Snd. 31:10, 28; Efe. 5:28, 29) Na tu, meri marit husat i gat pasin daun, em bai i no inap hambak na tok bilas olsem man bilong em i no gat wankain save olsem em. Tupela i kamap olsem “wanpela bodi,” olsem na taim ol i bihainim pasin antap na mekim ol kain samting olsem, dispela i save bagarapim bel bilong tupela wantaim.—Mat. 19:4, 5.

17. Wanem samting inap helpim marit long i stap amamas na givim biknem long God?

¹⁷ Ating yu laik bai marit bilong yu tu i stap wankain olsem bilong Abraham na Sara, na Aisak na Rebeka. Yu laik bai marit bilong yu i stap amamas, stap longpela taim, na givim biknem long Jehova. Olsem na tingim marit long wankain pasin olsem God i tingim. Kisim save long gutpela tingting i stap long Baibel. Tingim tru ol gutpela pasin bilong poroman marit bambai pasin laikim bilong yutupela i ken kamap strong moa. (Sol. 8:6) Wok strong long bihainim pasin daun. Rispektim narapela narapela. Sapos yu mekim ol dispela samting, orait marit bilong yu bai givim amamas long yu yet na long Papa bilong yu long heven. (Snd. 27:11) Wanpela brata husat i bin marit inap 27 yia pinis, em i tok: “Mi no save mi bai stap olsem wanem sapos meri bilong mi i no stap. Marit bilong mipela i wok long kamap strong long olgeta de. Dispela i kamap, long wanem, mitupela i laikim Jehova na olgeta taim mitupela i save toktok gut wantaim.” Orait, marit bilong yu tu inap kamap strong olsem!