PAPA bilong mi i gat pasin daun na em i save wok hat. Em i laikim stretpela pasin, olsem na em i laikim tru tok bilong Baibel taim em i harim long namba 1 taim long 1953. Kirap long dispela taim, em i wok strong long skulim mipela ol pikinini long ol samting em i lainim. Pastaim, mama i no laik lusim ol bilip na pasin bilong lotu Katolik. Tasol bihain, em tu i amamas long kisim save long ol tok bilong Baibel.

Mama i no save gut long rit, na papa i save mekim wok long gaden, na long olgeta de em i save wok inap planti aua. Olsem na i hatwok long papa na mama long stadi wantaim mipela. Sampela taim papa i save pilim taiet stret, olsem na em i save aislip long taim bilong stadi. Tasol hatwok bilong em i no lus nating. Mi fesbon, olsem na mi skulim susa na 2-pela brata bilong mi. Mipela i save stori long pasin bilong Noa long laikim tru famili bilong em, na pasin bilong em long bihainim tok bilong God. Mi laikim tru dispela stori! Famili bilong mipela i kirap long stadi long Baibel, na mipela olgeta i go long ol miting long Haus Kingdom long Roseto degli Abruzzi, em taun i stap klostu long solwara Edriatik, long Itali.

Long 1955 taim mi gat 11 krismas, mi na mama i bihainim ol maunten i go kamap long Rom, na mipela i go long fes kibung bilong mipela. Kirap long dispela taim, mi save laikim tru ol kibung.

Mi baptais long 1956, na mi kirap mekim wok painia. Taim mi gat 17 krismas, mi kamap painia salim long Latina, em taun i stap long hap saut bilong Rom, inap 300 kilomita longwe long ples bilong mi. Em nupela taun na ol man i no tingting tumas long ol neiba i gat wanem tingting long ol. Olsem na ol man i amamas long kisim ol nius bilong Baibel em mi na painia poroman bilong mi i tilim. Mi amamas tru, tasol mi yangpela tumas na mi wari yet long famili bilong mi. Dispela i helpim mi long tingim olsem Jehova i laik bai mi stap long dispela hap, na mi laik bihainim tok bilong em.

Bihain, ol i salim mi go long biktaun Milan long helpim wok bilong redim “Everlasting Good News” Kibung Intenesenel long 1963. Long dispela kibung, mi wok volantia wantaim planti bratasista, wanpela bilong ol em yangpela brata  bilong taun Florence, nem bilong em Paolo Piccioli. Long namba 2 de bilong kibung, em i givim naispela tok long olsem wanem ol singel inap mekim bikpela wok moa long wok bilong Jehova. Olsem na mi kisim tingting olsem, ‘Dispela brata i no inap tru long marit.’ Tasol bihain long kibung, mitupela i stat long raitim pas i go i kam. Mitupela i luksave olsem mitupela i putim ol wankain mak na mitupela wantaim i laikim tru Jehova na mipela i laik bihainim tok bilong em. Mitupela Paolo i marit long 1965.

Mi mekim wok painia long taun Florence inap 10-pela yia. Mipela i amamas long lukim ol kongrigesen i kamap bikpela, na ol yangpela i kamap strong long tok i tru. Mitupela Paolo i amamas long lusim sampela haptaim long stori wantaim ol dispela yangpela long ol tok bilong Baibel, na mekim ol samting bilong kisim amamas. Paolo i save pilai soka wantaim ol. Em tru olsem mi laik lusim sampela haptaim long stap wantaim man bilong mi, tasol mi luksave olsem em i mas givim sampela haptaim long helpim ol famili na ol yangpela long kongrigesen.

Mi save amamas tru taim mi tingim planti lain mipela i bin stadi wantaim ol long Baibel. Wanpela em Adriana; em i bin stori long 2-pela narapela famili long ol samting em i lainim. Ol dispela famili i pasim tok long bung wantaim wanpela pris na skelim sampela bilip olsem God Triwan na dispela bilip olsem ol man i gat spirit i no save dai. Tripela bikman bilong lotu i kam long dispela bung. Tasol ol sumatin bilong Baibel inap lukim klia olsem toktok bilong ol bikman i no stret liklik wantaim tok bilong Baibel. Bihain long dispela bung, 15 manmeri long ol dispela famili i kamap Witnes.

Long nau yumi save autim tok long kain kain rot. Tasol long bipo, Paolo i save toktok wantaim ol pris long ol tok bilong Baibel, na em i save long olsem wanem em inap kamapim gut ol bilip bilong yumi. Wanpela taim em i sanap long ai bilong ol manmeri em ol i no Witnes. Ol pris i bin tokim ol manmeri long givim sampela askim bilong semim Paolo. Tasol ol samting i no kamap olsem ol pris i bin tingim. Wanpela man i askim olsem i stret long ol lotu i insait long wok politik, o nogat. Tasol ol pris i no save long olsem wanem ol bai bekim dispela askim. Long dispela taim stret lait i dai, olsem na ol i pinisim dispela bung. Sampela yia bihain, mipela i painimaut olsem ol pris i bin pasim tok long wanpela man i ken pasim ol lait sapos ol pris i painim hat long bekim ol askim.

Tenpela yia bihain long mitupela Paolo i marit, ol i singautim mipela long mekim wok sekit. Paolo i holim gutpela wok mani, olsem na mipela i no kirap  kwik long tok orait. Tasol mipela i lusim sampela haptaim long beten na skelim gut dispela samting, na bihain mipela i tok orait long kisim dispela asainmen. Mipela i amamas long lusim sampela haptaim long stap wantaim famili husat i lukautim mipela. Long apinun, mipela olgeta i save bung na mekim stadi, na bihain Paolo i save amamas long helpim ol pikinini long mekim homwok, moa yet em homwok bilong matematiks. Na tu, Paolo i save amamas long rit, olsem na em i save stori long ol gutpela samting na ol samting bilong strongim mipela. Long olgeta Mande, mipela i save autim tok long ol taun we i no gat Witnes long en, na mipela i save singautim ol man long kam bilong harim wanpela tok bai kamap long apinun.

Bihain long mipela i mekim wok sekit inap 2-pela yia, ol i singautim mipela long i go wok long Betel long Rom. Paolo i wok long Dipatmen Bilong Lo na mi wok wantaim Magasin Dipatmen. Dispela em bikpela senis, tasol mipela i redi long bihainim tok. Mipela i amamas long lukim planti wok moa i kamap long brens, na tu, mipela i amamas long lukim olsem namba bilong ol bratasista long Itali i kamap bikpela moa. Na tu, long dispela taim gavman bilong Itali i tok orait long ol Witnes Bilong Jehova i ken mekim wok lotu. Mipela i amamas tru long nupela asainmen bilong mipela.

Long 1980 samting, taim mipela i mekim wok long Betel, wanpela kot i kamap long Itali em planti man i harim stori bilong en. Kot i sutim tok long tupela marit em ol i Witnes, olsem tupela i gat asua long dai bilong pikinini meri bilong tupela, long wanem, ol i pasim em long kisim blut. Tasol tupela i no gat asua. Pikinini i dai, long wanem, em i kisim bikpela sik bilong blut we i save painim planti man long Itali na long ol narapela kantri i stap klostu. Ol bratasista long Betel i helpim ol loya bilong dispela tupela marit. Ol i wokim wanpela liklik nius na nius Kirap! na givim bilong helpim ol manmeri long save long tok Baibel i mekim long blut, na bai ol i ken kliagut olsem pikinini i dai long bikpela sik bilong blut. Insait long ol dispela mun, Paolo i save wok inap olsem 16 aua long olgeta wan wan de na em i no save malolo. Mi mekim olgeta samting mi inap mekim bilong sapotim em.

Mipela i bin marit inap 20 yia na narapela senis i kamap. Mi kisim bel taim mi gat 41 krismas na Paolo i gat 49 krismas. Long notbuk i gat det bilong dispela taim mi tokim em olsem mi gat bel, Paolo i raitim tok olsem: “Beten: Sapos i tru, orait helpim mipela long stap yet long fultaim sevis, na i no malolo long ol wok bilong lotu, na helpim mipela long bihainim gutpela pasin na stap olsem gutpela papamama. Na moa yet, helpim mi long mekim ol samting mi save toktok long en taim mi mekim wok tisa inap 30 yia nau.” Long nau, taim mi tingim dispela  tok, mi luksave olsem Jehova i bin harim beten bilong mitupela Paolo.

Taim Ilaria i bon, dispela i kamapim bikpela senis long sindaun bilong mipela. Sampela taim mitupela Paolo i save bel hevi, olsem Sindaun 24:10 i tok: “Sapos taim nogut i painim yu na bun bilong yu i slek, orait yu no gat strong tru.” Tasol mitupela i wok yet long strongim narapela narapela.

Long nau, planti taim Ilaria i tok em i amamas olsem papamama i bin mekim planti wok long fultaim sevis taim em i wok long kamap bikpela. Oltaim em i save pilim olsem papamama i laikim em na tingim em tru. Long de olgeta mi save lukautim em. Long apinun taim Paolo i kam bek long haus, em i save pilai wantaim Ilaria na helpim em long mekim ol homwok. Paolo i save mekim olsem maski sampela taim em i save stap i go inap bikmoning tru, olsem 2 o 3 klok, bilong pinisim ol wok bilong em yet. Ilaria i save tok, “Papa em bes pren bilong mi.”

Bilong helpim Ilaria long bihainim stretpela pasin, mipela i save stretim em, na sampela taim mipela i save tok strong liklik. Mi tingim wanpela taim we em i bin pilai wantaim wanpela pren, tasol em i bikhet. Mipela i yusim tok bilong Baibel long helpim em long save long as na em i no ken bikhet. Na tu, mipela i kirapim em long tok “Sori” long pren bilong em long dispela taim yet.

Ilaria i tok papamama bilong em i laikim tru wok autim tok, na dispela i helpim em tu long laikim tru dispela wok. Nau em i marit pinis, na em i kliagut olsem em i bikpela samting long yumi mas bihainim tok bilong Jehova na larim em i stiaim yumi.

Long 2008, Paolo i painimaut olsem em i gat sik kensa. Pastaim i luk olsem em inap kamap orait gen, olsem na em i strongim mi. Mipela i traim long painim ol gutpela dokta bilong helpim Paolo. Mitupela Ilaria i mekim ol longpela beten na askim Jehova long strongim mipela long karim hevi. Paolo em strongpela man bilong wok, olsem na mi bel hevi tru taim mi lukim olsem isi isi em i wok long lusim strong bilong em. Paolo i dai long 2010, na dispela i mekim na mi bel hevi tru. Mitupela i bin marit inap 45 yia olgeta, na taim mi tingim olgeta wok mitupela i bin mekim, dispela i save mekim gut bel bilong mi. Mipela i bin givim bel olgeta long mekim wok bilong Jehova, na mi save olsem Jehova i no inap lusim tingting long wok mipela i bin mekim. Mi bilip na wetim dispela taim we tok bilong Jon 5:28, 29 bai kamap tru na Paolo bai kirap bek.

Mi tingim mi yet olsem dispela liklik gel husat i laikim tru stori bilong Noa. Mi laik bihainim yet tok bilong Jehova na mekim olgeta samting em i laik mi mas mekim. Mi kisim save olsem olgeta kain hevi yumi karim, olgeta kain samting yumi lusim, olgeta dispela em liklik samting tru taim yumi skelim wantaim ol gutpela blesing em God i save givim long yumi. Long laip olgeta bilong mi, mi luksave olsem gutpela samting i save kamap taim yumi bihainim tok bilong Jehova.