Angela a em singel sista i gat 35 krismas samting. Ol elda bai visitim em, olsem na em i pret liklik. Em i tingting olsem, ‘Ol elda bai tok wanem long mi? Mi save olsem mi no go long sampela miting, tasol long de olgeta mi lukautim ol lapun, olsem na mi save pilim taiet stret taim mi go long haus.’ Na tu, mama bilong Angela i save sik oltaim na dispela i mekim na em i wari.

Sapos yu wanpela bilong ol elda husat bai i go visitim Angela, orait yu bai mekim wanem bilong strongim em? Wanem namba 1 samting yu inap mekim bilong redi long i go visitim wanpela man em ‘skin bilong em i les’?—Jer. 31:25.

Yumi olgeta i save pilim taiet, long wanem, yumi mekim ol wok bilong yumi yet o yumi mekim wok bilong God. Olsem: Taim profet Daniel i lukim wanpela visen we em i no kliagut long en, dispela i mekim em i “bel hevi tru” na em i pilim olsem olgeta strong bilong em i pinis. (Dan. 8:27) Olsem na God i salim ensel Gebriel i go bilong kamapim mining bilong ol samting em Daniel i lukim long visen, na tokim em olsem Jehova i harim pinis beten bilong em. Na tu, ensel i tokim Daniel olsem ‘God i laikim em tumas.’ (Dan. 9:21-23) Bihain, narapela ensel i go long Daniel na i mekim wankain tok bilong strongim em.—Dan. 10:19.

Yu tu inap mekim wankain samting taim yu visitim wanpela long kongrigesen husat i pilim olsem skin bilong em i les o em i bel hevi. Paslain long yu visitim em, yu mas lusim sampela haptaim long tingim hevi bilong em. Em i gat wanem ol hevi? Olsem wanem ol dispela hevi inap daunim em? Em i gat wanem ol gutpela pasin? Richard i mekim  wok elda winim 20 yia, na em i tok em i save tingim ol gutpela pasin bilong brata paslain long em i go lukim em. Na tu, em i save tingim gut hevi bilong brata. Dispela i save helpim Richard long strongim brata. Sapos yu na narapela elda bai i go visitim wanpela brata o sista, orait i gutpela long yutupela i stori long hevi bilong em paslain long yutupela i go visitim em.

Sampela taim i hatwok long ol brata long kamapim tingting bilong ol long ol elda. Olsem wanem yu inap mekim gut bel bilong brata? I gutpela sapos yu smail na mekim sampela gutpela tok taim yu go bungim em. Michael i mekim wok elda winim 40 yia na taim em i visitim ol brata, em i save mekim kain tok olsem: “Wanpela gutpela wok tru em ol elda i ken mekim em long visitim ol brata long haus bilong ol na save gut moa long ol. Olsem na mi amamas tru taim mi save olsem mi bai kam visitim yu.”

Paslain long yu mekim tok bilong strongim brata, yu ken beten na kolim ol gutpela pasin bilong em, olsem bilip, pasin laikim, na pasin bilong em long karim hevi na sanap strong. Aposel Pol i bin mekim olsem taim em i mekim beten bilong helpim ol brata. (1 Tes. 1:2, 3) Taim yu mekim kain beten olsem, yu helpim brata na helpim yu yet tu long kisim stretpela tingting long dispela visit. Olsem na toktok bilong yu bai strongim em. Beten bilong yu inap mekim gut bel bilong brata. Ray husat i mekim wok elda inap planti yia, em i tok yumi olgeta i save lusim tingting long ol gutpela samting yumi mekim long wok bilong God, na yumi save amamas taim wanpela i tokim yumi long ol dispela samting.

Wanpela rot bilong strongim brata na givim “presen i kam long God” em olsem, yu ken yusim Baibel long helpim em maski yu ritim 1-pela ves tasol. (Rom 1:11) Olsem: Sapos brata i bel hevi tru, em inap pilim olsem em i nogut olgeta. Yu ken ritim tok bilong man bilong raitim song husat i pilim olsem em i wankain olsem “olpela skin meme bilong pulimapim wain em ol i tromoi pinis.” Maski  man bilong raitim song i pilim olsem, em i tok: “Mi no lusim tingting long ol lo bilong yu.” (Sng. 119:83, 176) Taim yu stori pinis long dispela skripsa, yu ken tokim brata olsem yu bilip olsem em tu i “no lusim tingting” long ol lo bilong God.

Olsem wanem yu inap yusim Baibel long strongim sista husat i lusim ol miting na wok autim tok? Tok piksa bilong koin drakma inap strongim em. (Luk 15:8-10) Ating dispela koin i bin stap long nekles i gat planti arapela koin silva long en. Taim yu stori wantaim sista long dispela tok piksa, yu inap helpim em long luksave olsem em tu i dia tru insait long kongrigesen. Yu inap helpim em long luksave olsem em i wanpela liklik sipsip i stap long lain bilong Jehova, na Jehova i tingim em tru.

Ol bratasista i save amamas long stori long ol skripsa ol i ritim. Olsem na yu yet i no ken toktok! Taim yu ritim pinis wanpela ves, yu ken makim wanpela hap tok bilong ves na askim brata long kamapim tingting bilong em. Olsem: Taim yu ritim pinis 2 Korin 4:16, yu ken askim olsem, “Yu inap tingim ol rot we Jehova i bin givim ‘nupela strong’ long yu?” Dispela kain askim inap opim rot long yupela i toktok gut wantaim, na dispela bai strongim yupela olgeta.—Rom 1:12.

Na tu, yu inap strongim brata taim yu stori long wanpela man o meri em Baibel i stori long en husat i bin karim wankain hevi olsem dispela brata. Sapos brata i bel hevi tru, em inap pilim wankain olsem Hana na Epafroditus. Tupela wantaim i bin bel hevi tru, tasol ol i dia tumas long ai bilong God. (1 Sml. 1:9-11, 20; Fili. 2:25-30) Baibel i gat stori bilong planti arapela manmeri em yu inap yusim.

Bihain long yu visitim brata, yu mas soim yet olsem yu tingim em. (Apo. 15:36) Taim yu pinisim visit, yu ken pasim tok long wok wantaim em long autim tok. Bernard i mekim wok elda inap planti yia pinis, na em i tok taim em i bungim wanpela brata em i bin visitim, em i save bihainim savetingting na askim brata bambai em inap painimaut sapos sampela skultok bilong em i helpim dispela brata. Em i save tok, “Olsem wanem, dispela skultok i helpim yu?” Taim yu mekim ol dispela samting, yu bai painimaut sapos i gat sampela samting moa yu ken mekim bilong helpim brata.

Bikpela samting moa, ol bratasista i mas pilim olsem yumi tingim ol, kliagut long hevi bilong ol, na laikim ol tru. (1 Tes. 5:11) Olsem na paslain long yu visitim wanpela brata, yu mas tingim hevi em i karim. Beten long samting yu bai mekim taim yu visitim em. Skelim gut na makim ol skripsa i stret long yusim. Taim yu mekim olsem, yu bai painim ol tok we inap givim nupela strong long man em ‘skin bilong em i les’!