1. (a) Yu inap tingim wanem ol gutpela pasin bilong Jehova? (b) Taim yu stadi long ol pasin bilong God, olsem wanem dispela bai helpim yu?

 TAIM yu tingim pasin bilong Jehova, yu inap tingim wanem ol gutpela pasin? Ating yu tingim pasin laikim, stretpela pasin, savetingting, na bikpela strong. Tasol yumi save olsem Jehova i gat planti gutpela pasin. Inap planti yia nau, ol buk na nius bilong yumi i bin stori long 40 narapela narapela pasin bilong Jehova. Sapos yu mekim stadi bilong yu yet, o mekim famili stadi long olgeta wan wan bilong ol dispela pasin, yu bai kisim planti save moa long Jehova! Yu bai pilim moa yet ol gutpela pasin bilong em. Dispela bai mekim na yu bai laik tru long bihainim pasin bilong Jehova na pas gut moa wantaim em.—Jos. 23:8; Sng. 73:28.

2. (a) Mekim tok piksa long olsem wanem pasin bilong stadi long ol gutpela pasin bilong Jehova inap helpim yumi long laikim moa yet ol dispela pasin. (b) Yumi bai stori long wanem samting long dispela stadi na long narapela 2-pela stadi i kamap bihain?

² Wanem samting i save kirapim yu long laikim tru wanpela samting? Tingim olsem: Yu laik traim wanpela kaikai em i nupela long yu. Pastaim yu smelim naispela smel bilong en. Bihain yu teistim na pilim swit bilong en. Na bihain yu yet i kukim kain kaikai olsem. Long wankain pasin, yumi inap laikim moa yet wanpela gutpela pasin bilong Jehova. Pastaim yumi kisim sampela save long dispela pasin, yumi tingim tingim olsem wanem Jehova i save soim dispela pasin, na yumi yet i bihainim dispela pasin long i stap bilong yumi. (Efe. 5:1) Dispela stadi na narapela 2-pela stadi i kamap bihain bai stori long sampela gutpela pasin bilong Jehova. Taim yumi stori long wan wan bilong ol dispela pasin, yumi bai bekim ol dispela askim: Wanem mining bilong dispela pasin? Olsem wanem Jehova i soim dispela pasin? Na olsem wanem yumi ken bihainim dispela pasin bilong Jehova?

3, 4. (a) Taim ol narapela i no pret long i go long wanpela man, dispela i kamapim klia wanem samting? (b) Olsem wanem Jehova i soim olsem ol man i no ken pret long i go long em?

³ Pastaim yumi mas kisim stretpela save olsem taim ol narapela i no pret long i go long wanpela man, orait dispela i kamapim klia olsem dispela man i gat pasin helpim, ol narapela i no hatwok long toktok long em, na em i gat taim long toktok wantaim ol narapela. Ol gutpela tok, pasin, na gutpela smail bilong dispela man i soim olsem em i redi long putim yau na helpim ol narapela.

⁴ Jehova i gat pasin we i mekim na ol man i no pret long i go long em. Maski em tasol i gat bikpela strong winim olgeta lain long heven na long graun, em i kirapim yumi long beten long em. Em i save putim yau long beten bilong yumi na helpim yumi long ol samting yumi askim long en. (Ritim Song 145:18; Aisaia 30:18, 19.) Yumi inap toktok long God long kain kain taim na ples, na i no gat mak long hamas minit yumi laik beten na toktok long em. Em i no save les long harim beten bilong yumi. (Sng. 65:2; Jems 1:5) Baibel i stori long Jehova long pasin we i mekim na yumi amamas long toktok long em long rot bilong beten. Olsem: Devit i tok Jehova “i save lukautim” na “was gut” long yumi. (Sng. 34:15; 63:8) Profet Aisaia i tok Jehova i olsem wasman bilong sipsip. Em i tok: “Wasman i save putim ol pikinini sipsip long bros na karim wokabaut.” (Ais. 40:11) Tingim, Jehova i laik bai yumi stap klostu tru long em olsem wanpela pikinini sipsip em wasman i karim long han bilong em. Taim yumi holim kain tingting olsem long Papa bilong yumi, dispela bai kirapim yumi long laikim em moa yet! Olsem wanem yumi inap bihainim tru pasin bilong Jehova?

5. Bilong wanem em i bikpela samting long ol elda i mas i gat pasin we i mekim na ol narapela i no pret long go long ol?

⁵ I no longtaim i go pinis, sampela Witnes long ol narapela narapela kantri i kisim dispela askim, “Yu laikim tru wanem pasin bilong ol  elda?” Planti bilong ol i tok, ol i laikim ol elda em “Ol narapela i no pret long i go long ol.” Em tru olsem yumi olgeta i mas wok strong long kisim dispela pasin, tasol em i bikpela samting moa long ol elda i mas i gat dispela pasin. (Ais. 32:1, 2) Bilong wanem em i bikpela samting tru long ol elda i mas i gat pasin we i mekim na ol narapela i no pret long i go long ol? Wanpela sista i tok em inap save long ol gutpela pasin bilong elda sapos elda yet i gat pasin we i mekim na sista i no pret long toktok wantaim em. Ating yumi bai wanbel long dispela tok, a? Olsem na yu inap mekim wanem na bai ol narapela i no pret long toktok wantaim yu?

6. Wanem wanpela samting yu ken mekim bambai ol narapela i amamas long toktok wantaim yu?

⁶ Wanpela rot em olsem, yu mas soim olsem yu tingim tru ol narapela na yu redi long helpim ol. Dispela bai mekim na ol bratasista, na ol yangpela tu, bai amamas long toktok wantaim yu. (Mak 10:13-16) Carlos, em yangpela mangi i gat 12 krismas, em i tok: “Mi lukim ol elda long Haus Kingdom i smail na mekim gutpela pasin, na mi laikim dispela pasin.” Olsem na i gutpela ol elda i tok ol i redi long putim yau na helpim ol narapela, tasol pasin bilong ol i mas strongim dispela tok. (1 Jon 3:18) Orait ol elda i ken mekim wanem?

7. Bilong wanem sampela man i save amamas long toktok wantaim yumi taim yumi pasim kat bilong kibung? Dispela i givim wanem skul long yumi?

⁷ Tingim dispela stori: I no longtaim i go pinis, wanpela brata i go long kibung long narapela kantri. Taim em i stap long balus bilong i go bek long ples, em i pasim kat bilong kibung we i gat dispela tok long en, “Kingdom Bilong God i Mas i Kam!” Wanpela wokman insait long balus i lukim dispela kat na em i tok, ‘Kingdom i mas i kam!’ Brata i stori gut wantaim dispela wokman, na wokman i kisim sampela magasin bilong yumi. Bilong wanem ol manmeri i no pret long toktok wantaim yumi taim yumi pasim kat bilong kibung? Long wanem, kat bilong kibung i save kirapim laik bilong ol man long painimaut wanem hap yumi laik go long en, na tu, kat i soim olsem yumi amamas long stori long ol bilip bilong yumi. Long wankain pasin, ol elda i mas soim ol bratasista olsem oltaim ol i amamas long toktok wantaim ol. Orait, wanem sampela pasin em ol elda i ken bihainim?

8. Olsem wanem ol elda i ken soim olsem ol i tingim tru ol narapela? Dispela i mekim na ol bratasista long kongrigesen i pilim olsem wanem?

⁸ Long planti kantri, yu inap soim olsem yu tingim tru ol brata na sista bilong yu taim yu smail gut long ol, sekanim ol, o tok gude long ol. Husat i mas go pas long mekim ol dispela samting? Baibel i stori olsem taim Jisas i bung wantaim ol disaipel bilong em, em yet “i kam klostu” na toktok wantaim ol. (Mat. 28:18) Long wankain pasin, ol elda long nau i traim long go klostu long ol narapela na toktok wantaim ol. Dispela i mekim na ol narapela long kongrigesen i pilim olsem wanem? Wanpela painia sista husat i gat 88 krismas i tok: “Taim mi go insait long Haus Kingdom na lukim ol gutpela smail na harim ol gutpela tok bilong ol elda, dispela i save kirapim mi long laikim ol tru.” Narapela sista i tok: “Taim ol elda i smail na tok welkam long mi taim mi go long miting, dispela i save mekim gut bel bilong mi.”

9, 10. (a) Olsem wanem Jehova i soim gutpela pasin yumi ken bihainim? (b) Olsem wanem ol elda i ken bihainim pasin bilong Jehova?

 ⁹ Sapos yumi laik bai ol narapela i no pret long toktok wantaim yumi, orait yumi yet i mas lusim sampela haptaim long toktok wantaim ol. Jehova i soim gutpela pasin yumi ken bihainim. Baibel i tok: “Em i no stap longwe long yumi olgeta wan wan.” (Apo. 17:27) Wanpela rot bilong ol elda long bihainim pasin bilong Jehova em olsem, paslain na bihain long ol miting ol i ken toktok wantaim ol brata na sista, em ol yangpela na ol lapun wantaim. Wanpela painia brata  i tok: “Mi save amamas tru taim wanpela elda i askim mi long wok painia bilong mi i olsem wanem, na em i putim yau long harim bekim bilong mi.” Wanpela sista husat i bin mekim wok bilong Jehova klostu 50 yia nau, em i tok: “Taim ol elda i lusim sampela haptaim long toktok wantaim mi bihain long miting, dispela i save helpim mi long pilim olsem ol i tingim mi.”

¹⁰ Em tru olsem ol elda i gat planti wok. Tasol long taim bilong miting, ol i mas lusim sampela haptaim long toktok wantaim ol bratasista.

11, 12. (a) Wanem kain tingting i save stiaim man long mekim wankain pasin long ol narapela? (b) Olsem wanem Baibel i soim olsem Jehova i save mekim wankain pasin long olgeta man?

¹¹ Narapela gutpela pasin bilong Jehova em olsem, em i save mekim wankain pasin long olgeta man. (Apo. 10:34) Sapos yumi laik mekim wankain pasin long olgeta man, pastaim yumi mas holim tingting olsem i stret long mekim dispela pasin. Man husat i gat kain pasin olsem, em i no save tingim lukluk bilong ol man o hamas mani ol i gat, nogat. Dispela kain man i save mekim wankain pasin long olgeta man, long wanem, em i tingim pasin tru bilong ol.

¹² Jehova i stap namba 1 gutpela piksa long pasin bilong mekim wankain pasin long olgeta man. Baibel i tok Jehova “i save mekim wankain pasin long olgeta man,” na “em i no save bihainim wantok pasin.” (Ritim Aposel 10:34, 35; Lo 10:17.) Yumi ken skelim wanpela eksampel.

13, 14. (a) Wanem hevi i bin painim 5-pela pikinini meri bilong Selofehat? (b) Olsem wanem Jehova i soim olsem em i save mekim wankain pasin long olgeta man?

 ¹³ Paslain long lain Israel i go insait long Graun Bilong Promis, 5-pela pikinini meri bilong Selofehat i gat wanpela hevi na ol i laik stretim. Wanem dispela hevi? Papa bilong ol i dai pinis, na ol i no inap kisim graun bilong em. Bilong wanem? Long wanem, Lo i makim olsem ol pikinini man tasol inap kisim graun. Tasol papa bilong ol i no gat pikinini man na em i dai. (Nam. 26:33, 52-55) Olsem wanem? Ol arapela wanblut bai kisim dispela hap graun? Ol pikinini meri bilong Selofehat bai mekim wanem?

¹⁴ Ol i go long Moses na askim em long helpim ol, na ol i tok: “I tru, [papa bilong mipela] i no gat pikinini man bilong kisim nem bilong en, tasol bilong wanem nem bilong papa i mas lus long yumi Israel?” Yu ting Moses i tok, ‘Dispela tok i stap long lo, na i no gat wanpela samting mi inap mekim bilong helpim yupela’? Nogat, Moses i askim Jehova long helpim em long stretim dispela hevi. (Nam. 27:2-5) Orait Jehova i tok wanem? Em i tokim Moses olsem: “Dispela tok bilong ol pikinini meri bilong Selofehat em i stret. Olsem na yu mas givim ol dispela meri sampela graun bilong lain bilong papa bilong ol. Larim ol i kisim graun bilong en.” Na Jehova i mekim sampela samting moa. Em i tokim Moses long raitim dispela tok long Lo, olsem: “Sapos man i no gat pikinini man, na em i gat pikinini  meri tasol, na bihain em i dai, orait ol pikinini meri bilong en i ken kisim ol samting bilong en.” (Nam. 27:6-8; Jos. 17:1-6) Kirap long dispela taim, olgeta meri long lain Israel husat i gat wankain hevi, ol inap kisim hap graun bilong papa.

15. (a) Jehova i save mekim wanem pasin long ol manmeri bilong em, na long ol lain husat i no gat helpim? (b) Wanem sampela arapela stori bilong Baibel i soim olsem Jehova i save mekim wankain pasin long olgeta manmeri?

¹⁵ Dispela disisen i soim klia olsem Jehova i save mekim wankain pasin long ol man na meri wantaim! Ol dispela 5-pela susa i no gat wanpela i stap bilong helpim ol, na Jehova i rispektim ol na mekim stretpela pasin long ol wankain olsem em i mekim long olgeta arapela manmeri bilong lain Israel. (Sng. 68:5) Dispela stori i wankain olsem planti stori bilong Baibel we i soim olsem Jehova i save mekim wankain pasin long ol manmeri bilong em.—1 Sml. 16:1-13; Apo. 10:30-35, 44-48.

16. Olsem wanem yumi inap bihainim pasin bilong Jehova na mekim wankain pasin long olgeta man?

¹⁶ Olsem wanem yumi inap bihainim pasin bilong Jehova na mekim wankain pasin long olgeta man? Tingim, yumi bai mekim wankain pasin long olgeta man sapos yumi holim tingting olsem i stret long mekim dispela pasin. Ating yu pilim olsem yu save bihainim dispela pasin. Tasol sampela taim i hatwok long save sapos yumi bihainim tru dispela pasin o nogat. Olsem na yu ken mekim wanem bilong save olsem tru tru yu save mekim wankain pasin long olgeta man o nogat? Jisas i stap gutpela piksa long yumi. Taim em i laik save long tok ol narapela i mekim long em, em i askim ol pren bilong em olsem: “Ol manmeri i wok long tok Pikinini bilong man i husat tru?” (Mat. 16:13, 14) Ating yu ken singautim wanpela pren husat bai tok tru long yu na askim olsem, ‘Yu ting mi save mekim wankain pasin long olgeta man? Ol narapela i ting mi save bihainim dispela pasin o nogat?’ Ating em bai tokim yu olsem, sampela taim yu save mekim gutpela pasin moa long ol manmeri bilong wanpela lain, o ol i gat planti mani, o bikpela save. Sapos em i mekim kain tok olsem long yu, orait yu mas mekim wanem? Beten long Jehova, na askim em long helpim yu long senisim tingting yu holim long ol narapela bambai yu inap bihainim gut pasin bilong Jehova na mekim wankain pasin long olgeta man.—Mat. 7:7; Kol. 3:10, 11.

17. Yumi ken mekim wanem ol samting bilong soim olsem yumi mekim wankain pasin long olgeta man?

 ¹⁷ Long kongrigesen, yumi inap soim olsem yumi bihainim pasin bilong Jehova taim yumi rispektim na helpim gut olgeta man. Olsem: Taim yu singautim ol brata na sista long kam long haus bilong yu, yu ken singautim ol bratasista bilong kain kain sindaun. O yu ken singautim sampela husat i no gat planti mani olsem yu, o poroman marit bilong ol i dai pinis, o ol yangpela husat i no gat famili long tok i tru. (Ritim Galesia 2:10; Jems 1:27.) Taim yumi mekim wok autim tok, yumi save toktok wantaim ol manmeri bilong kain kain sindaun na ol i kam long kain kain kantri. Oganaisesen bilong Jehova i save wokim ol buk na nius bilong Baibel long 600 tokples. Yumi gat gutpela rot tru bilong soim olsem yumi save mekim wankain pasin long olgeta man!

18. Ol man i no save pret long i go long Jehova, na em i save mekim wankain pasin long olgeta man, orait taim yu tingim ol dispela pasin, dispela i mas kirapim yu long mekim wanem?

¹⁸ Taim yumi lusim sampela haptaim long tingim ol gutpela pasin bilong Jehova, olsem ol man i no pret long i go long em, na em i save mekim wankain pasin long olgeta manmeri, dispela bai kirapim yumi long laikim moa yet ol dispela pasin. Orait dispela bai mekim na yumi bihainim pasin bilong Jehova na kamapim klia ol dispela pasin long ol samting yumi mekim long ol brata bilong yumi, na ol man yumi bungim long wok autim tok.