Dispela tok i makim ol pikinini spirit bilong God. Olsem wanem yumi save long dispela?

Wanpela ves i tok: “Ol pikinini man bilong God i lukim ol dispela meri i naispela tumas. Na ol i kisim ol meri long laik bilong ol yet na maritim ol.”—Stt. 6:2.

Long namba 1 taim ol i raitim Ol Skripsa Hibru, ol dispela hap tok olsem “ol pikinini man bilong God tru” na “ol pikinini man bilong God” i bin stap long Stat 6:2, 4; Jop 1:6; 2:1; 38:7; na Song 89:6. Ol dispela ves i givim wanem save long yumi?

“Ol pikinini man bilong God tru” em Jop 1:6 i stori long en, em ol pikinini spirit husat i stap raunim sia king bilong God. Wanpela bilong ol em Satan, em i bin “raun long olgeta hap” bilong graun. (Jop 1:7; 2:1, 2) Na tu, Jop 38:4-7 i tok “ol pikinini man bilong God” i bin “amamas na singaut” taim God “i bin putim bikpela ston bilong wokim graun antap long en.” Yumi ken tok ol dispela “pikinini man bilong God” i makim ol ensel, long wanem, God i no wokim yet ol man long dispela taim. Song 89:6 i tok long “ol pikinini man bilong God,” na dispela i makim ol ensel husat i stap wantaim God long heven, na i no makim ol man.

Orait, husat em “ol pikinini man bilong God tru” em Stat 6:2, 4 i stori long en? Ol tok yumi skelim pinis i soim olsem dispela hap tok i makim ol pikinini spirit bilong God em ol i bin kam daun long graun.

Sampela man i ting ol ensel i no inap kisim laik bilong mekim maritpasin. Tok bilong Jisas long Matyu 22:30 i kamapim olsem marit na maritpasin em i no samting i kamap long heven. Tasol sampela taim ol ensel i bin senisim bodi na kamap olsem ol man bilong graun, na ol tu i bin kaikai na dring wantaim ol man. (Stt. 18:1-8; 19:1-3) Olsem na yumi ken tok taim ol ensel i kisim bodi bilong ol man, ol inap mekim maritpasin wantaim ol meri.

I gat ol tok bilong Baibel i soim klia olsem sampela ensel i bin mekim olsem. Jut 6, 7 i tok pasin em ol man long Sodom i bin mekim long pamuk wantaim ol arapela long pasin i narakain tru, dispela i wankain long pasin bilong “ol ensel husat i no stap gut long wok bilong ol na ol i lusim ples stret bilong ol.” Wanpela samting i wankain long ol dispela ensel na ol man bilong Sodom em olsem, “ol i pamuk wantaim ol arapela long pasin i narakain tru.” Wankain tok i stap long 1 Pita 3:19, 20 i kamapim olsem ol bikhet ensel i bin stap tu “long taim bilong Noa.” (2 Pita 2:4, 5) Olsem na yumi ken tok pasin em ol bikhet ensel i mekim long taim bilong Noa i wankain long sin bilong ol manmeri long taun Sodom na Gomora.

Kain tingting olsem i stret taim yumi luksave olsem “ol pikinini man bilong God” em Stat 6:2, 4 i kolim, em ol ensel husat i bin senisim bodi bilong ol na kisim bodi bilong ol man bilong graun na mekim pasin pamuk wantaim ol meri.

Aposel Pita i kamapim klia olsem ol dispela spirit “i bin bikhet long taim bilong Noa. Long dispela taim . . . God i wet i stap na i no les kwik.” (1 Pita 3:20) Tok bilong Pita i makim ol ensel em ol i bihainim Satan na mekim pasin bikhet. “Ol ensel husat i no stap gut long wok bilong ol na ol i lusim ples stret bilong ol,” Jut i tok olsem God “i pasim ol inap oltaim oltaim na ol i stap long bikpela tudak na wetim bikpela de bilong kot.”—Jut 6.

Long taim bilong Noa, olsem wanem ol ensel i sakim tok? Paslain long Bikpela Tait, ol ensel i senisim bodi bilong ol na kamap olsem ol man bilong graun, em samting we i no stret long laik bilong God. (Stt. 6:2, 4) Ol dispela ensel i mekim maritpasin wantaim ol meri, em samting we i no stret long ol i mekim. God i no wokim ol ensel bilong ol i ken mekim maritpasin wantaim ol meri. (Stt. 5:2) God bai pinisim ol dispela bikhet ensel long taim em yet i makim. Olsem Jut i tok, long nau “ol i stap long bikpela tudak”—i olsem ol i stap long kalabus bilong spirit.

Wanem taim Jisas i bin autim tok long “ol spirit i stap long kalabus”? Olsem wanem em i bin autim tok long ol? Pita i tok Jisas i bin autim tok long ol bihain long em “i kirap bek na i stap spirit long heven.” (1 Pita 3:18, 19) Ol narapela ves i soim olsem Jisas i autim tok paslain long Pita i raitim namba 1 pas bilong em. Olsem na ating bihain liklik long Jisas i kirap bek, em i givim strongpela tok long ol bikhet ensel olsem ol bai kisim strafe i stret long rong ol i mekim. Dispela i no makim olsem God bai marimari long ol, nogat. Em i autim tok long ol long kot bai painim ol. (Jna. 1:1, 2) Jisas i bin holimpas bilip na em i stap gut long God i go inap long em i dai na kirap bek—dispela i soim klia olsem Satan i no gat strong long daunim em—olsem na i gat as long em i autim kain strongpela tok olsem.—Jon 14:30; 16:8-11.

Long bihain, Jisas bai pasim Satan long sen na tromoi em wantaim ol bikhet ensel i go insait long hul i no gat as. (Luk 8:30, 31; Rev. 20:1-3) Long nau, ol dispela bikhet ensel i stap long bikpela tudak bilong spirit, na i gat taim we ol bai bagarap na pinis olgeta.—Rev. 20:7-10.