DISPELA samting i kamap long 1949 winim 60 yia i go pinis, tasol stori bilong mi i kirap planti yia paslain long dispela. Papa bilong mi, Hendrik, em man bilong samapim ol su na lukautim ol gaden long Donderen, em wanpela liklik taun long Drenthe provins, Netelan. Mi bon long 1927. Famili bilong mipela i gat 7-pela pikinini na mi namba 4. Haus bilong mipela i stap longwe long biktaun, na arere long rot we i no gat kolta long en. Planti neiba bilong mipela em ol fama, na mi amamas long stap long fam. Long 1947, taim mi gat 19 krismas, mi kisim save long tok i tru long rot bilong wanpela neiba bilong mipela em Theunis Been. Mi no bin laikim Theunis long namba 1 taim mi bungim em, tasol bihain long Wol Woa 2, em i kamap wanpela Witnes Bilong Jehova, na mi luksave olsem em i mekim gutpela pasin pren winim long bipo. Mi kirap nogut olsem pasin bilong em i senis, olsem na mi putim yau long em taim em i tokim mi long ol tok promis bilong God long paradais bai kamap long graun. I no longtaim mi kisim tok i tru, na mitupela i kamap gutpela pren tru. a

Mi kirap autim tok long Me 1948, na long neks mun, Jun 20, mi kisim baptais long wanpela kibung long taun Utrecht. Long Janueri 1, 1949, mi kirap mekim wok painia na ol i salim mi i go bilong mekim wok long Borculo, em wanpela ples long hap is bilong Netelan, na i gat wanpela liklik kongrigesen long dispela ples. Mi mas wokabaut inap 130 kilomita, olsem na mi ron long baisikol bilong i go long  dispela ples. Mi ting mi bai lusim 6-pela aua, tasol bikpela ren na strongpela win i mekim na mi lusim 12 aua bilong i go kamap long dispela ples, maski mi kisim tren na ron inap 90 kilomita! Mi go kamap long apinun tru long haus bilong wanpela famili Witnes, na mi stap wantaim ol na mekim wok painia long dispela ples.

Long dispela taim bihain long woa, ol man i no gat planti samting bilong skin. Mi gat wanpela siot na wanpela trausis we i bikpela tumas, na narapela trausis bilong mi i sotpela tru! Olsem mi stori pinis, planti hevi i painim mi long namba 1 mun bilong mi long taun Borculo, tasol Jehova i blesim wok bilong mi na mi inap mekim sampela Baibel stadi. Bihain long 9-pela mun, ol i makim mi long i go mekim wok long Amsterdam.

Mi kamap bikpela long fam, tasol nau mi stap long Amsterdam, em bikpela siti bilong Netelan. Wok autim tok i karim gutpela kaikai. Long namba 1 mun, mi tilim planti buk moa winim 9-pela mun i go pinis. I no longtaim na mi lukautim 8-pela Baibel stadi. Bihain long ol i makim mi olsem wanpela kongrigesen sevan (nau ol i kolim olsem kodineta bilong lain elda), mi kisim asainmen bilong mekim namba 1 pablik tok bilong mi. Mi pilim olsem em bikpela wok tru na mi no inap long mekim, olsem na mi amamas tru taim ol i salim mi i go long narapela kongrigesen paslain long taim bilong mi long mekim pablik tok. Mi no save olsem long ol yia bihain mi bai mekim planti tok tru winim 5,000!

Long Me 1950, ol i salim mi i go long taun Haarlem. Long dispela hap ol i makim mi long mekim wok sekit. Inap 3-pela de olgeta mi no inap slip. Mi tokim Robert Winkler, em wanpela brata husat i wok long brens ofis olsem mi no fit long mekim dispela wok, tasol em i tok: ‘Raitim tasol ol tok long pepa bilong wok sekit. Yu bai lain long mekim wok.’ Bihain liklik mi kisim trening inap 1-pela mun na mi kirap mekim wok olsem sekit sevan (wasman sekit). Taim mi visitim wanpela kongrigesen, mi bungim Janny Taatgen, em wanpela yangpela painia sista husat i laikim tru Jehova, na em i daunim laik bilong em yet na i mekim wok bilong God. Mitupela i marit long 1955. Orait nau Janny bai stori long wanem samting i kirapim em long mekim wok painia, na ol wok mitupela i mekim bihain long mitupela i marit.

Janny: Mama bilong mi i kamap wanpela Witnes long 1945 taim mi gat 11 krismas. Mama i luksave olsem em i bikpela samting long skulim 3-pela pikinini bilong em long tok bilong Baibel, tasol papa i no laikim tok i tru, olsem na mama i save skulim mipela taim papa i no stap long haus.

Namba 1 miting mi bin go long en em wanpela kibung long taun The Hague long 1950. Wanpela wik bihain, mi go long fes miting bilong mi long wanpela Haus Kingdom long Assen, em biktaun bilong Drenthe. Papa i kros nogut tru na em i rausim mi long haus. Mama i tok, “Yu save pinis long wanem hap yu inap stap long en.” Mi save olsem em i tingim ol wanbilip bilong mi. Pastaim mi go stap wantaim wanpela  famili Witnes em ol i stap klostu, tasol papa i putim hevi yet long mi, olsem na mi muv i go long kongrigesen long Deventer (Overijssel), em i stap longwe inap 95 kilomita. Tasol mi stap pikinini yet, olsem na gavman i kotim papa long em i rausim mi long haus. Olsem na papa i tokim mi long kam bek long haus. Maski papa i no kisim tok i tru, em i orait long mi ken i go long olgeta miting na mekim wok autim tok.

Bihain liklik long mi go bek long haus, mama i kisim bikpela sik tru, olsem na mi mas mekim olgeta wok long haus. Maski ol dispela samting i painim mi, mi wok yet long kamap strong long tok i tru na mi kisim baptais long 1951 taim mi gat 17 krismas. Long 1952, bihain long mama i kamap orait gen, mi mekim wok painia haptaim wantaim 3-pela painia sista inap 2-pela mun. Mipela i stap long bot na autim tok long 2-pela taun long Drenthe provins. Mi kirap mekim wok painia oltaim long 1953. Wanpela yia bihain, wanpela yangpela wasman sekit i visitim kongrigesen bilong mipela. Dispela brata em Markus. Mitupela i pilim olsem sapos mitupela i wok wantaim, mitupela bai mekim gut moa wok bilong Jehova, olsem na mitupela i marit long Me 1955.—Sav. 4:9-12.

Markus: Taim mitupela i marit pinis, ol i makim mitupela long mekim wok painia long taun Veendam long Groningen provins. Mipela i stap long wanpela liklik rum em longpela bilong en 2 mita na braitpela bilong en 3 mita. Maski i olsem, Janny i mekim rum i luk nais tru. Long olgeta nait, mitupela i save muvim tebol na 2-pela liklik sia na bai mipela inap putim bet bilong slip.

Bihain long 6-pela mun, ol i singautim mipela long mekim wok bilong raun long Beljam. Long yia 1955, i gat olsem 4,000 pablisa long dispela kantri. Tasol long nau namba bilong ol pablisa em inap olsem 24,000! Long Flanders, long hap not bilong Beljam, ol manmeri i save mekim wankain tokples olsem ol i mekim long Netelan. Tasol pasin bilong ol manmeri long Beljam long kolim tok i narapela kain liklik, olsem na pastaim mipela i mas lain long pasin bilong ol long kolim tok.

Janny: Bilong mekim wok bilong raun, mipela i mas daunim sampela laik bilong mipela yet. Mipela i yusim baisikol long visitim ol kongrigesen na mipela i stap long haus bilong ol bratasista. Mipela i no gat haus bilong mipela yet, olsem na taim mipela i visitim wanpela kongrigesen, mipela i save stap wantaim dispela kongrigesen i go inap long Mande, na long Tunde moning mipela i save lusim ol na i go long narapela kongrigesen. Tasol oltaim mipela i save tingim olsem, wok mipela i mekim em wanpela blesing i kam long Jehova.

Markus: Pastaim, mipela i no save long wanpela brata o sista insait long kongrigesen, tasol ol i mekim gutpela pasin long helpim mipela. (Hib. 13:2) Mipela i visitim olgeta kongrigesen i mekim tokples Dats long Beljam. Mipela i kisim planti blesing long dispela wok. Olsem: Mipela i save long planti bratasista long teritori bilong tokples Dats, na mipela i laikim ol tru. Mipela i lukim planti yangpela i kamap bikpela, kamap strong long tok i tru, dediket long Jehova, na ol i putim wok bilong Kingdom i stap  namba 1 long laip bilong ol. Mipela i amamas tru long lukim planti bilong ol i mekim gut wok bilong Jehova na ol i insait long fultaim sevis. (3 Jon 4) Mipela i “strongim” ol bratasista na ol i strongim mipela, na dispela i helpim mipela long givim bel yet long inapim asainmen bilong mipela.—Rom 1:12.

Markus: Kirap long taim mitupela i marit, mitupela i gat laik tru long go long Skul Gileat. Long olgeta de, mitupela i lusim 1-pela aua long lainim tok Inglis. Tasol i hatwok long yusim ol buk long lainim tok Inglis, olsem na mitupela i kisim holide na go long Inglan na prektis long mekim tok Inglis taim mipela i autim tok. Long 1963, mipela i kisim wanpela envelop i kam long hetkota long Brooklyn. Dispela envelop i gat 2-pela pas, wanpela bilong mi na wanpela bilong Janny. Mi kisim invatesen bilong i go long Skul Gileat inap 10-pela mun. Dispela skul i bilong trenim ol brata na skulim ol long mekim wok insait long oganaisesen. Ol i singautim 100 sumatin i go long dispela skul, na 82 bilong ol em ol brata.

Janny: Long pas bilong mi, ol i tokim mi long beten na skelim sapos mi orait long stap long Beljam taim Markus i go long Skul Gileat. Pastaim mi bin bel hevi. I luk olsem olgeta hatwok bilong mi i lus nating na Jehova i no blesim mi. Maski i olsem, mi kirapim mi yet long tingim olsem Skul Gileat i bilong helpim ol sumatin long inapim wok bilong autim gutnius long olgeta hap bilong graun. Olsem na mi orait long stap bek na mekim wok painia salim long taun Ghent wantaim Anna na Maria Colpaert, em 2-pela sista husat i mekim wok painia salim inap planti yia pinis.

Markus: Mi mas lain gut moa long tok Inglis, olsem na ol i tokim mi long go long Brooklyn 5-pela mun paslain long skul i kirap. Mi helpim wok long Dipatmen Bilong Salim Ol Buk na Dipatmen Bilong Wok Autim Tok. Taim mi wok long hetkota na helpim long redim ol buk na nius bilong salim long sip i go long Esia, Yurop, na Saut Amerika, dispela i helpim mi long pilim tru olsem yumi gat lain brata i stap long olgeta hap bilong graun. Mi tingim Brata A. H. Macmillan husat i bin mekim wok pilgrim (wasman raun) long taim bilong Brata Russell. Long dispela taim, em i lapun pinis na em i no inap harim gut tok, tasol em i save stap long olgeta miting. Dispela i kirapim tru bel bilong mi na i skulim mi olsem yumi no ken kisim tingting olsem pasin bilong bung wantaim long ol miting Kristen em samting nating.—Hib. 10:24, 25.

Janny: Inap 3-pela taim insait long wik, mi na Markus i save salim pas long narapela narapela. Mitupela i misim tru narapela narapela! Tasol Markus i amamas long trening em i kisim long Skul Gileat, na mi kisim bikpela amamas long wok autim tok. Taim Markus i lusim Amerika na i kam bek, mi lukautim 17 Baibel stadi olgeta! I hatwok tru taim mitupela i stap longwe long narapela narapela inap 15 mun, tasol mi luksave olsem Jehova i blesim mitupela long hatwok mipela i mekim. Long de bilong Markus long kam, balus i leit inap sampela aua, olsem na taim em i kam kamap, mitupela i holimpas na krai. Kirap long dispela taim, olgeta taim mitupela i save stap wantaim na mitupela i no lusim narapela narapela.

Markus: Taim mi pinis long Skul Gileat long Disemba 1964 na go bek long Beljam, ol i makim mipela long go wok long Betel. Tasol mipela i stap sotpela taim tasol long Betel. Tripela mun bihain, ol i makim mipela long mekim wok distrik long Flanders. Taim Aalzen na Els Wiegersma i kam long Beljam bilong mekim wok misineri, ol i makim ol long  mekim wok distrik, olsem na mitupela Janny i go bek long Betel na mi mekim wok long Dipatmen Bilong Wok Autim Tok. Kirap long 1968 i go inap long 1980, asainmen bilong mipela i senis planti taim liklik, sampela taim mipela i wok long Betel na sampela taim mipela i mekim wok bilong raun. Orait nau, kirap long 1980 i go inap long 2005, mi mekim gen wok olsem wasman distrik.

Maski asainmen bilong mipela i save senis, mipela i no lusim tingting olsem mipela i dediketim laip bilong mipela bambai mipela inap givim bel olgeta long mekim laik bilong Jehova. Mipela i amamas long mekim olgeta kain asainmen mipela i kisim, mipela i bilip olsem olgeta senis long wok bilong mipela em bilong helpim wok bilong Kingdom.

Janny: Mi bin amamas tru long go wantaim Markus long Brooklyn long 1977 na go wantaim em long Patterson long 1997 taim em i kisim sampela skul moa olsem wanpela memba bilong Brens Komiti.

Markus: Long 1982, Janny i kisim operesen na em i kamap orait gen. Tripela yia bihain, kongrigesen long taun Louvain i orait long mipela i yusim wanpela rum i stap antap long Haus Kingdom. Inap 30 yia olgeta mipela i no gat wanpela haus bilong mipela yet, dispela em namba 1 taim mipela i gat wanpela haus. Long Tunde, taim mipela i stretim kago bilong i go visitim wanpela kongrigesen, mi mas karim kago i go daun na wokabaut long leta i gat 54 step long en! Mi mekim olsem inap planti taim liklik. Olsem na mipela i amamas tru olsem long 2002, ol i stretim rot na mipela inap stap long wanpela rum i stap daunbilo. Taim mi winim 78 krismas, ol i makim mipela long mekim wok olsem painia salim long taun Lokeren. Mipela i amamas tru olsem mipela inap mekim dispela wok na mipela inap autim tok long olgeta de.

Janny: Taim mitupela i bungim ol yia we mitupela wan wan i bin lusim long fultaim sevis, namba bilong ol yia i winim 120! Mitupela i bin lukim truim bilong tok promis bilong Jehova olsem ‘em i no inap tru long lusim yumi,’ na sapos yumi stap gut long em, orait yumi ‘no inap sot long wanpela samting.’—Hib. 13:5; Lo 2:7.

Markus: Taim mitupela i yangpela, mipela i bin givim mipela yet long mekim wok bilong Jehova. Mipela i no tingting long bungim planti samting bilong helpim mipela yet, nogat. Mipela i bin amamas long olgeta kain asainmen na olgeta kain hap ol i makim mipela long i go long en, long wanem, mipela i tingim tru Man mipela i lotuim.