DISPELA samting i bin kamap long kompaun bilong King Bilong Swasilan, long Ogas 1936. Robert na George Nisbet i yusim kar i gat spika long pilaim ol rekod bilong musik, na ol rekod bilong ol tok em Brata J. F. Rutherford i bin mekim. King Sobhuza Namba 2 i amamas tru. George i tok: “Mipela i sem nogut tru taim King i askim long baim ol rekod wantaim masin bilong pilaim ol rekod, na bikpela spika bilong autim tok bilong Kingdom!”

Robert i tokim King olsem mipela i no salim ol dispela samting, long wanem, narapela man em papa bilong ol dispela samting. Dispela i mekim na King i laik save long husat em i papa bilong ol dispela samting.

Robert i bekim tok olsem, “Olgeta dispela samting i bilong narapela King.” Orait King Sobhuza i laik save long dispela King em i husat. Robert i tok, “Dispela King em Jisas Krais, em King long Kingdom Bilong God.”

King Sobhuza i soim rispek na tok: “Yes, em i King i gat biknem tru. Mi no laik kisim wanpela samting bilong em.”

Robert i tok: ‘Mi kirap nogut tru long gutpela pasin bilong dispela Nambawan Hetman, King Sobhuza. Em i save gut long tok Inglis, em i gat pasin daun, em i tokaut stret long tingting bilong em, na i no hatwok long toktok wantaim em. Mi sindaun wantaim em long ofis bilong em inap olsem 45 minit, na George i pilaim musik long ausait.

Robert i tok moa: ‘Bihain liklik long dispela de yet, mipela i go long Swasi Nesenel Skul, na gutpela samting tru i kamap long dispela hap. Mipela i autim tok long prinsipol na em i amamas long putim yau. Taim mipela i tokim em olsem mipela i gat masin bilong pilaim ol rekod na mipela i laik bai olgeta sumatin i harim ol rekod, em i amamas tru na em i singautim klostu 100 sumatin long kam sindaun long gras na putim yau. Ol i tokim mipela olsem dispela haiskul i save skulim ol bois long agrikalsa, wok gaden, wok kapenta, sanapim haus, tok Inglis, na mets; na ol i save skulim ol gels long wok nes, wok bilong haus, na ol narapela gutpela wok.’ Bubu meri bilong Nambawan Hetman bilong ples i bin kirapim dispela skul.

Long 1933 samting, King Sobhuza i bin amamas long putim yau taim ol painia i go autim tok long kompaun bilong em. Wanpela taim em i singautim tu 100 soldia em ol i stap olsem ol bodigad bilong em long i kam harim ol rekod bilong tok bilong Kingdom. Em i kisim ol buk na nius, na sabskripsen bilong  ol magasin bilong yumi. I no longtaim King i gat planti buk na nius bilong yumi! Taim gavman bilong Briten i tambuim ol buk na nius bilong yumi long Wol Woa 2, dispela King i bin haitim gut tru ol dispela buk na nius.

King Sobhuza Namba 2 i save amamas long singautim ol Witnes i go insait long kompaun bilong em long Lobamba, na em i save singautim tu ol pris pasto long i kam na harim ol tok bilong Baibel em ol Witnes i autim. Wanpela taim, wanpela Witnes nem bilong em Helvie Mashazi i stori long Matyu sapta 23 na sampela pris pasto i kros na sanap na fosim em long sindaun. Tasol King i katim tok bilong ol na tokim Brata Mashazi long autim tok yet. Na moa yet, King i tokim olgeta long odiens long raitim olgeta ves bilong Baibel ol i harim!

Long narapela taim, bihain long wanpela painia brata i mekim tok, 4-pela pris pasto husat i bin stap na harim tok, ol i haitim kola bilong siot we i makim namba bilong ol olsem pris pasto na ol i tokaut olsem: “Nau mipela i no stap moa olsem ol pris pasto, nogat, mipela ol Witnes Bilong Jehova.” Bihain, ol i askim dispela painia sapos em i gat ol wankain buk olsem bilong Nambawan Hetman bilong dispela ples.

Kirap long 1930 i go inap long taim em i dai long 1982, dispela Nambawan Hetman i soim rispek long ol Witnes Bilong Jehova na maski ol i no bihainim ol pasin bilong ples long Swasilan, em i no larim ol man i mekim nogut long ol. Olsem na i gat as tru long ol Witnes i tenkyu long em, na ol i krai sori tru taim em i dai.

Kirap long yia 2013, i gat olsem 3,000 pablisa long Swasilan. Populesen bilong dispela kantri i winim 1 milion, na olgeta wan wan pablisa inap autim tok long 384 manmeri. Winim 260 painia i mekim bikpela wok long 90 kongrigesen, na 7,496 manmeri i bin bung long Memorial bilong 2012. Dispela i soim klia olsem planti manmeri moa inap kisim tok i tru. Taim ol brata i bin go namba 1 taim long Swasilan long 1930 samting, ol i bin mekim gutpela wok tru na dispela i strongim tok i tru long dispela ples.—Histori bilong yumi i kam long Saut Afrika.