1, 2. Bilong wanem yumi no ken sutim tok long Jehova long ol hevi i kamap long graun? Stori long dispela.

 TINGIM olsem wanpela man husat i marit na i stap amamas inap planti yia pinis, wanpela taim em i kam bek long haus na em i lukim olsem olgeta samting long haus i bagarap. Ol sia na tebol, ol plet na kap samting, na mat tu i bruk na i stap nabaut. Naispela haus bilong em i luk olsem wanpela ples we bikpela bagarap i bin kamap long en. Yu ting em bai sutim tok long husat? Yu ting em bai tok, “Bilong wanem meri bilong mi i mekim olsem?” Nogat. Ating em bai tok, “Husat i bagarapim ol samting?” Em i save olsem gutpela meri bilong em i no inap bagarapim ol samting long haus.

² Long nau ol man i bagarapim pinis graun. Ol i bagarapim graun, wara, na win. Ol man i pait na bagarapim ol narapela, na mekim pasin pamuk. Tasol Baibel i helpim yumi long save olsem Jehova i no kamapim ol dispela hevi. Em i bin wokim gut graun olsem wanpela gutpela ples paradais we yumi ken stap long en. (Stt. 2:8, 15) Jehova em i God bilong pasin laikim. (1 Jon 4:8) Baibel i tokim yumi olsem Satan em i “hetman bilong dispela graun,” na em i kamapim planti bilong ol dispela hevi.—Jon 14:30; 2 Kor. 4:4.

3. Olsem wanem yumi inap kisim tingting kranki long ol hevi i painim yumi?

³ Tasol yumi no inap sutim tok long Satan long olgeta hevi i painim yumi. Bilong wanem? Long wanem, sampela taim yumi yet i mekim rong na hevi i painim yumi. (Ritim Lo 32:4-6.) Maski i olsem, yumi gat sin, olsem na yumi inap kisim tingting kranki we inap bagarapim yumi. (Snd. 14:12) Tingting kranki inap mekim na yumi no sutim tok long yumi yet o long Satan, nogat, yumi inap kirap long sutim tok long Jehova. Ating yumi inap “kros” long Jehova.—Snd. 19:3.

4, 5. Olsem wanem wanpela Kristen inap “kros” long Jehova?

⁴ Olsem wanem? I gat as long yumi “kros” long Jehova? Nogat, i no gat as long yumi kros long em. (Ais.  41:11) Yumi no inap long daunim God. Em tru olsem yumi no inap tok long maus olsem yumi kros long Jehova. Tasol Sindaun 19:3 i tok ol man i save mekim longlong pasin na “bagarapim ol yet,” na ol i save “kros” long Jehova. Dispela i makim olsem insait long bel, man inap kros long God. Dispela inap mekim na man i senisim sampela pasin bilong em. Olsem: Ating man i no inap givim bel moa long mekim wok bilong Jehova, o em inap lusim pasin bilong bung wantaim kongrigesen.

⁵ Wanem samting inap mekim na yumi “kros” long Jehova? Olsem wanem yumi inap abrusim dispela pasin? Yumi mas save long bekim bilong ol dispela askim na dispela bai lukautim pasin bilong yumi long pas gut wantaim God Jehova!

6, 7. Bilong wanem lain Israel long taim bilong Moses i kirap long komplein long Jehova?

⁶ Olsem wanem na insait long bel, wanpela gutpela wokboi bilong Jehova inap kirap long komplein long God? Dispela stadi bai stori long 5-pela samting we inap mekim na yumi kros, na bai yumi skelim stori bilong Baibel long sampela husat i “kros” long Jehova.—1 Kor. 10:11, 12.

⁷ Tok kranki bilong ol narapela inap stiaim yumi. (Ritim Lo 1:26-28.) Tingim samting Jehova i bin mekim bilong helpim lain Israel. Em i givim 10-pela bikpela hevi long ol Isip na bagarapim Fero na lain ami bilong em long solwara Retsi. Lain Israel i go fri! (Kis. 12:29-32, 51; 14:29-31; Sng. 136:15) Ol manmeri bilong God i redi long i go insait long Graun Bilong Promis. Tasol ol i kirap long komplein long Jehova. Bilong wanem ol i lusim bilip klostu long taim ol bai kisim Graun Bilong Promis? Tenpela man bilong lukstil i bringim ripot nogut long lain Israel na dispela tok i bagarapim bel bilong ol na mekim ol i pret. (Nam. 14:1-4) Olsem na long dispela taim Jehova i no larim ol i go insait long dispela “gutpela kantri.” (Lo 1:34, 35) Dispela i givim wanem skul long yumi? Tok kranki bilong ol narapela inap mekim na bilip bilong yumi i no strong moa, na dispela inap kirapim yumi long komplein long pasin Jehova i bihainim long stiaim lain bilong em.

8. Bilong wanem lain Juda long taim bilong Aisaia i sutim tok long Jehova long ol hevi i painim ol?

⁸ Ol hevi inap mekim na yumi bel hevi. (Ritim Aisaia 8:21, 22.) Long taim bilong Aisaia, bikpela hevi i painim lain Juda. Ol birua i kam raunim hap ol i stap long en. Planti Juda i hangre, long wanem, ol i sot long kaikai. Tasol narapela bikpela hevi tru i painim ol. Ol i no putim yau moa long tok bilong Jehova, olsem na ol i no pas gut moa wantaim em. (Amo. 8:11) Ol i no askim Jehova long helpim ol, nogat, ol i sutim tok long em na long king. Long wankain pasin, sapos hevi i mekim na yumi bel hevi, dispela inap kirapim yumi na insait long bel yumi sutim tok long Jehova na yumi pilim olsem em i no helpim yumi taim yumi nidim helpim.

9. Bilong wanem lain Israel long taim bilong Esekiel i gat tingting kranki long pasin bilong Jehova?

⁹ Yumi no save gut long olgeta samting i bin kamap. Lain Israel long taim bilong Esekiel i no save gut long olgeta samting i bin kamap, olsem na ol i ting pasin bilong God i no stret. (Ese. 18:29) Ol i ting olsem ol i gat rait long skelim ol samting God i mekim na long makim olsem em i bihainim stretpela pasin o nogat, maski ol i no kliagut long as bilong ol samting i kamap. Olsem wanem yumi tu inap mekim wankain popaia? Baibel i kamapim sampela stori em ating yumi no inap kliagut long en, o ating yumi no save long as na ol samting i kamap long laip bilong yumi. Long bel yumi inap pilim olsem Jehova i save mekim wansait pasin na pasin bilong em “i no stret.”—Jop 35:2.

10. Olsem wanem ol man inap bihainim pasin kranki bilong Adam?

 ¹⁰ Yumi no save sutim tok long yumi yet long rong yumi mekim. Taim namba 1 man Adam i bin mekim rong, em i bin sutim tok long God. (Stt. 3:12) Adam i save olsem em i brukim lo bilong God na God bai givim strafe long em. Tasol em i sutim tok long Jehova, i olsem em i tok Jehova i givim meri nogut long em na dispela meri i pulim em long mekim rong. Sampela man i bihainim pasin bilong Adam long sutim tok long God long rong ol yet i mekim. Yumi mas askim yumi yet olsem, ‘Bai mi bel hevi na belhat long rong mi yet i mekim na ting olsem ol lo bilong Jehova i strik tumas na i hat long bihainim?’

11. Yumi inap kisim wanem skul long pasin bilong Jona?

¹¹ Yumi tingim yumi yet tasol. Profet Jona i belhat taim Jehova i marimari long ol manmeri bilong Ninive. (Jna. 4:1-3) Bilong wanem? Jona i pret long ol man bai ting olsem em i wanpela giaman profet, long wanem, em i tok taun bai bagarap, tasol dispela samting i no kamap. Dispela i soim olsem Jona i tingting planti moa long ol man bai i gat wanem tingting long em, na em i no tingim laip bilong ol man. Olsem wanem? Yumi tu inap holim wankain tingting olsem bilong Jona? Sapos yumi tingim yumi yet tasol, yumi inap lusim tingting long samting ol narapela i sot long en. Olsem: Ating yumi bin autim tok inap planti yia pinis olsem klostu nau de bilong Jehova bai kamap. Tasol taim ol narapela i sutim tok long yumi, long wanem, de bilong Jehova i no kamap yet, bai yumi mekim wanem? Bai yumi “kros” long Jehova?—2 Pita 3:3, 4, 9.

12, 13. Yumi ken mekim wanem sapos yumi no wanbel long samting Jehova i mekim o em i larim i kamap?

¹² Yumi ken mekim wanem sapos yumi no wanbel long samting Jehova i mekim o em i larim i kamap? Tingim, dispela em i no savetingting. Sindaun 19:3 i helpim yumi long tingim olsem longlong pasin bilong yumi inap mekim na yumi sutim tok long Jehova long ol hevi em yumi yet i kamapim.  Olsem na yumi ken stori long 5-pela samting we inap helpim yumi na bai yumi no ken tru kros long Jehova.

¹³ Strongim yet pasin pren bilong yu wantaim Jehova. Sapos yumi gat gutpela pasin pren wantaim Jehova, orait yumi no inap kros long em. (Ritim Sindaun 3:5, 6.) Yumi mas bilip strong long Jehova. Yumi no ken tru ting olsem save bilong yumi i winim save bilong Jehova, na yumi no ken tru putim ol laik bilong yumi yet i stap namba 1. (Snd. 3:7; Sav. 7:16) Dispela bai helpim yumi na yumi no sutim tok long Jehova taim hevi i kamap.

14, 15. Yumi ken mekim wanem na bai ol tok kranki bilong ol narapela i no ken stiaim yumi?

¹⁴ No ken larim tok kranki bilong ol narapela i stiaim yu. I gat planti samting i mekim na ol Israel long taim bilong Moses i ken bilip tru olsem Jehova bai helpim ol long go insait long Graun Bilong Promis. (Sng. 78:43-53) Tasol taim 10-pela man bilong lukstil i kam givim ripot nogut, Baibel i tok ol Israel i “no tingim bikpela strong bilong [God],” olsem ol i lusim tingting long samting Jehova i mekim bilong helpim ol. (Sng. 78:42) Sapos yumi tingim tingim long bel olgeta gutpela samting Jehova i mekim bilong helpim yumi, dispela bai helpim yumi long go klostu moa long em. Long dispela rot, yumi no inap larim tok kranki bilong ol narapela i pulim yumi long lusim Jehova.—Sng. 77:11, 12.

¹⁵ Sapos yumi holim tingting kranki long ol bratasista bilong yumi, dispela tu inap pulim yumi long lusim Jehova. (1 Jon 4:20) Olsem: Lain Israel i komplein taim Aron i kisim wok bilong kamap hetpris. Tasol taim ol i mekim olsem, Jehova i pilim olsem ol i komplein long Em. (Nam. 17:10) Long wankain pasin, sapos yumi komplein long ol man em Jehova i makim ol long stiaim wok bilong em hia long graun, i olsem yumi komplein long Jehova.—Hib. 13:7, 17.

16, 17. Bilong wanem yumi no ken sutim tok long Jehova long ol hevi i painim yumi?

¹⁶ Tingim olsem Jehova i no kamapim ol hevi i painim yumi. Long taim bilong Aisaia, ol Israel i lusim pasin bilong lotuim Jehova, tasol Em i laik yet long helpim ol. (Ais. 1:16-19) Taim yumi gat ol hevi long nau, yumi amamas long save olsem Jehova i tingim yet yumi na em i laik helpim yumi. (1 Pita 5:7) Jehova i tok promis tu long yumi olsem em bai givim strong long yumi na yumi ken stap gut yet long em.—1 Kor. 10:13.

¹⁷ Maski Jop i stap gut long Jehova, em i karim bikpela hevi. Taim hevi i painim yumi, yumi mas tingim olsem Jehova i no kamapim dispela hevi. Baibel i tok olsem God i save laikim stretpela pasin, na em i no save laikim pasin nogut. (Sng. 33:5) Yumi mas bihainim wankain pasin olsem Elihu, em pren bilong Jop. Elihu i save olsem Jehova i no save mekim pasin nogut o pasin i no stret. (Jop 34:10) Jehova i save givim yumi “olgeta gutpela presen na olgeta presen i nambawan tru.” Em i no kamapim ol hevi i painim yumi.—Jems 1:13, 17.

18, 19. Bilong wanem yumi no ken kisim 2-pela tingting long Jehova? Stori long tok piksa.

¹⁸ No ken kisim 2-pela tingting long Jehova. God i gutpela olgeta na tingting bilong em i winim tru tingting bilong yumi. (Ais. 55:8, 9) Sapos yumi gat pasin daun, yumi bai tokaut olsem yumi no kliagut long olgeta samting. (Rom 9:20) Planti taim yumi no save long olgeta samting i bin kamap. Ating yu bin luksave olsem dispela tok em i tru, olsem: “Taim wanpela man i sanap long kot na toktok, i luk olsem tok bilong en bai i win. Tasol taim arapela man i askim em long kliaim dispela tok, ol man i no save husat tru bai i win.”—Snd. 18:17.

¹⁹ Olsem: Ating wanpela gutpela pren i mekim samting em yumi no kliagut long en o em i mekim long pasin yumi no save bihainim. Olsem wanem? Bai yumi hariap long kisim tingting olsem samting em i mekim i  no stret? Nogat. Ating yumi bai kisim tingting olsem yumi no save long olgeta samting i bin kamap. Sapos long pasin laikim yumi redi long mekim gut long ol pren bilong yumi, orait yumi mas redi long trastim Papa bilong yumi long heven. Pasin na tingting bilong em i winim tru pasin na tingting bilong yumi!

20, 21. Bilong wanem yumi no ken sutim tok long Jehova long ol hevi i painim yumi?

²⁰ Tingim as tru bilong ol hevi i painim yumi. Yumi mas tingim olsem sampela taim yumi yet i save kamapim ol hevi i painim yumi. (Gal. 6:7) Yumi no ken sutim tok long Jehova long ol hevi i painim yumi. Bilong wanem? Olsem: Wanem samting bai kamap sapos wanpela man i draivim kar na em i spit tru taim em i tanim kona long rot? Em inap bamim kar. Yu ting em bai sutim tok long kampani i wokim dispela kar? Nogat tru! Long wankain pasin, Jehova i givim fridom long yumi long mekim ol disisen. Tasol em i skulim yumi tu long olsem wanem yumi inap mekim ol gutpela disisen. Olsem na yumi no ken sutim tok long Jehova sapos yumi mekim rong.

²¹ Tasol i gat narapela samting tu i stap olsem as bilong ol hevi i painim yumi. Sampela hevi i painim yumi, long wanem, “taim nogut i save painim yumi olgeta.” (Sav. 9:11) Na tu, oltaim yumi mas tingim olsem Satan em as tru bilong ol pasin nogut yumi lukim long nau. (1 Jon 5:19; Rev. 12:9) Satan em i birua bilong yumi, na i no Jehova!—1 Pita 5:8.

22, 23. Taim ol hevi i kamap na yumi bel hevi, orait yumi mas tingim wanem samting?

²² Taim ol bikpela hevi i painim yu, orait yu mas tingim eksampel bilong Josua na Kalep. Taim ol man i go lukstil long Graun Bilong Promis na kam bek, 10-pela bilong ol i givim ripot nogut, tasol Josua na Kalep i givim gutpela ripot. (Nam. 14:6-9) Ol i bilip long Jehova. Tasol ol tu i mas raun olsem ol tripman wantaim olgeta Israel inap 40 yia. Olsem wanem? Yu ting Josua na Kalep i bin komplein o kros, long wanem, i no gat as long ol i kisim strafe? Nogat. Tupela i bilip tru long Jehova, olsem na Jehova i blesim tupela. Maski planti Israel i bin dai long ples drai nating, Jehova i larim Josua na Kalep long go insait long Graun Bilong Promis. (Nam. 14:30) Long wankain pasin, Jehova bai blesim yumi sapos “yumi no givap” long mekim laik bilong em.—Gal. 6:9; Hib. 6:10.

²³ Sapos ol narapela o yu yet i mekim rong na hevi i kamap na yu bel hevi long en, orait yu mas mekim wanem? Tingim olsem Jehova em i gutpela God. Tingim ol gutpela samting em Jehova i tok promis long givim long yu. Traim tingim laip bilong yu bai stap olsem wanem sapos yu no stap pren bilong Jehova. Stap klostu long em, na long bel yu no ken tru kros long em!