BAIBEL i tok: “God i mekim gut long yumi na givim yumi ol pikinini olsem presen. Ol i gutpela blesing tru yumi kisim long God.” (Sng. 127:3) Ol papamama i save amamas tru taim pikinini i bon.

Ol nupela papamama bai kisim bikpela amamas, tasol ol i gat ol bikpela wok tu long mekim. Olgeta de ol i mas givim gutpela kaikai long pikinini bambai em inap kamap helti man o meri long bihain. Olsem tasol, sapos ol i laik bai pikinini i pas gut wantaim Jehova, orait ol i mas trenim em na stiaim em gut. Ol i mas skulim em long ol stiatok bilong Baibel. (Snd. 1:8) Orait, ol i mas kirap long skulim pikinini long wanem taim? Na ol i mas skulim em long wanem samting?

Baibel i kamapim stori bilong Manoa, em wanpela man husat i bin stap long taun Sora, long Israel. Manoa na meri bilong em i no gat pikinini, tasol ensel bilong Jehova i tokim em olsem ol bai gat wanpela pikinini man. (Het. 13:2, 3) Maski Manoa na meri bilong em i amamas tru long harim dispela tok, ol i tingting planti tu long olsem wanem ol bai mekim gutpela wok long lukautim dispela pikinini. Olsem na Manoa i beten olsem: “Bikpela, dispela man yu bin salim i kam, mi laik bai yu salim em i kam gen long mitupela. Na em i ken tokim mitupela long olgeta samting mitupela i mas mekim long dispela pikinini bihain bai i kamap.” (Het. 13:8) Manoa na meri bilong em i skulim pikinini man bilong ol, Samson, long Lo Bilong God, na i luk olsem em i bin bihainim skul em i kisim. Baibel i stori olsem holi spirit bilong Jehova i helpim Samson long mekim ol strongpela wok olsem wanpela hetman bilong Israel.—Het. 13:25; 14:5, 6; 15:14, 15.

Papamama i mas kirap long trenim pikinini long wanem taim? Mama bilong Timoti, em Yunis, na bubu meri Lois, ol i bin skulim Timoti long Jehova “kirap long taim [em i] stap bebi yet.” (2 Tim. 1:5; 3:15) Em nau, ol i bin skulim Timoti long Jehova kirap long taim em i liklik yet.

I gutpela long ol papamama Kristen i ken beten askim God long stiaim ol, na ol i mas tingting gut na plenim ol samting bambai ol inap trenim pikinini “kirap long taim [em i] stap bebi yet.” Sindaun 21:5 i tok: “Ol man bilong wok ol i save tingting gut na mekim wok, olsem na wok bilong ol i kamap gutpela.” Paslain long nupela bebi i bon, ating papamama bai redi gut. Ating ol bai wokim lista bilong olgeta samting ol bai nidim bilong lukautim bebi. Na tu, em i bikpela samting long ol i mas mekim plen long olsem wanem ol bai skulim bebi long Jehova. Ol i mas putim mak long skulim bebi bihain stret long em i bon.

Wanpela buk i stori long olsem wanem ol pikinini i save kamap bikpela, na em i tok insait long ol mun bihain stret long bebi i bon, kru bilong em i redi long kisim save. Olsem na em i bikpela samting tru long ol papamama i yusim dispela haptaim long skulim pikinini long Jehova na ol lo bilong em!

Wanpela mama husat i mekim wok painia oltaim na em i gat pikinini meri, em i tok: ‘Kirap long taim em i gat 1-pela mun, mi save kisim em i go wantaim mi long autim tok. Maski em i no save long ol samting i kamap, mi save olsem mi helpim em taim mi kisim em i go wantaim mi long autim tok. Taim em i gat 2-pela krismas, em i no pret long tilim ol liklik nius long ol lain mipela i bungim long wok autim tok.’

Gutpela samting tru inap kamap sapos papamama i skulim pikinini kirap long taim em i bebi yet. Tasol ol papamama i save olsem sampela taim i hatwok long mekim olsem.

Em isi long ol samting i pulim tingting bilong pikinini, olsem na dispela inap givim hatwok long ol papamama long skulim pikinini. Ol pikinini i gat laik long kisim save long olgeta kain samting. Olsem wanem papamama inap helpim pikinini long putim gut yau long skul ol i givim long em?

Tingim tok Moses i bin mekim. Lo 6:6, 7 i tok: “Yupela i mas tingim ol dispela lo nau mi givim long yupela. Na yupela i mas lainim ol pikinini bilong yupela long ol dispela lo. Na tokim ol long taim yupela i stap long haus na long taim yupela i wokabaut long rot, na long taim yupela i malolo na long taim yupela i wok.” Bilong “lainim” pikinini long ol lo bilong God, papamama i no ken skulim pikinini 1-pela taim tasol, nogat, ol i mas mekim planti taim. Liklik pikinini i wankain olsem liklik diwai em planti taim yumi mas givim wara long en. Ol bikpela man i save lainim kwik wanpela samting taim ol i harim wankain tok planti taim, na olsem tasol, pikinini tu bai lain kwik taim em i harim wankain tok planti taim.

Papamama i mas lusim bikpela haptaim long stap wantaim ol pikinini bambai ol inap skulim ol long tok i tru bilong God. Tasol ating bai i hatwok, long wanem, ol papamama i save bisi stret. Aposel Pol i tokim ol Kristen long “yusim gut taim” long mekim ol nambawan bikpela wok. (Efe. 5:15, 16) Olsem wanem papamama inap mekim olsem? Wanpela brata i mekim wok elda na meri bilong em i bisi tru long mekim wok painia oltaim. Olsem na tupela i skelim gut haptaim ol bai yusim long skulim gut pikinini, na haptaim ol bai yusim long helpim kongrigesen na mekim wok mani. Olsem wanem ol i gat taim long skulim pikinini meri bilong ol? Papa i tok: ‘Olgeta moning paslain long mi go wok, mi na meri bilong mi i  save rit long pikinini. Mipela i save ritim buk Baibel Stori Buk Bilong Mi o buklet Skelim Sampela Tok Bilong Baibel Long Olgeta De. Long apinun, mipela i save rit long em paslain long em i slip, na taim mipela i go autim tok, mipela i save kisim em i go wantaim mipela. Mipela i laik skulim em gut taim em i stap pikinini yet na mipela i no laik bai dispela haptaim i lus nating.’

Yumi laik bai ol pikinini bilong yumi i kamap ol gutpela manmeri long bihain, tasol nambawan bikpela samting yumi laik skulim ol long en em olsem, ol i mas laikim tru God long bel bilong ol.—Mak 12:28-30.

Song 127:4 i tok: “Ol pikinini man bilong yangpela man i olsem ol spia i stap long han bilong wanpela soldia.” Baibel i tok ol pikinini i olsem ol spia bilong sutim stret long mak. Man i save holim spia inap sotpela taim tasol, na taim em i tromoim pinis spia, em i no inap kisim bek dispela spia. Olsem tasol, ol pikinini i save stap sotpela taim tasol wantaim papamama paslain long ol i kamap bikpela man o meri. Olsem na em i bikpela samting tru long papamama i mas yusim dispela haptaim long skulim pikinini long laikim tru na bihainim ol lo bilong God.

Aposel Jon i bin helpim planti manmeri long lotuim Jehova, na em i tok: “Taim mi harim olsem ol pikinini bilong mi i wokabaut yet long tok i tru, dispela i save givim bikpela amamas tru long mi.” (3 Jon 4) Ol papamama Kristen i save amamas taim ol i lukim olsem ol pikinini bilong ol i “wokabaut yet long tok i tru.”