Skelim Pasin Yupela i Mas Bihainim
“Olsem na yupela i mas tingting long pasin yupela i mas bihainim. Yupela i mas wokabaut long pasin i holi na bihainim pasin bilong givim bel tru long God.”—2 PITA 3:11.
1, 2. Yumi mas bihainim wanem kain pasin na bai God i orait long yumi?
PLANTI man i laik save, ol arapela i gat wanem tingting long ol. Tasol bikpela samting long yumi ol Kristen em tingting bilong Jehova long yumi. Jehova em i nambawan Man tru long heven na long graun, na em i “as tru bilong laip.”—Sng. 36:9.
2 Aposel Pita i tok, sapos yumi laik bai Jehova i orait long yumi, orait yumi mas “wokabaut long pasin i holi na bihainim pasin bilong givim bel tru long God.” (Ritim 2 Pita 3:11.) “Pasin” bilong yumi bai stap holi sapos yumi bihainim klinpela pasin long olgeta samting yumi mekim. Dispela i makim tingting bilong yumi, pasin yumi mekim, na pasin bilong yumi long lotuim God. Na tu, pasin bilong laikim tru na rispektim God i mas kirapim yumi long “bihainim pasin bilong givim bel tru long God.” Olsem na God i no skelim tasol pasin yumi mekim, nogat, em i skelim tu tingting bilong yumi. Jehova i save skelim “bel bilong olgeta man,” olsem na em i save olsem pasin bilong yumi i holi na yumi givim bel tru long lotuim em o nogat.—1 Sto. 29:17.
3. Yumi mas givim wanem ol askim long yumi yet?
3 Satan i no laik bai God i orait long yumi. Satan i mekim olgeta samting em inap long mekim na bai yumi lusim pasin bilong pas gut wantaim Jehova. Oltaim Satan i save mekim ol tok giaman bilong pulim yumi long lusim pasin bilong lotuim Jehova. (Jon 8:44; 2 Kor. 11:13-15) Olsem na yumi mas askim yumi yet olsem, ‘Olsem wanem Satan i save giamanim ol man? Mi inap mekim wanem bilong lukautim pasin bilong mi long pas gut wantaim Jehova?’
OLSEM WANEM SATAN I SAVE GIAMANIM OL MAN?
4. Satan i traim long mekim wanem bilong bagarapim pasin bilong yumi long pas gut wantaim God? Bilong wanem?
4 Disaipel Jems i tok: “Laik bilong bel bilong olgeta man wan wan i save traim ol, dispela laik i save giamanim ol na pulim ol. Na taim dispela laik i stap long bel i kamap bikpela, em i save kamapim sin, na taim sin i kamap pinis, em i save bringim dai i kam.” (Jems 1:14, 15) Satan i traim long yusim laik i stap long bel bilong yumi long bagarapim pasin bilong yumi long pas gut wantaim God.
5, 6. (a) Olsem wanem Satan inap yusim laik i stap long bel bilong yumi? (b) Satan i yusim wanem 3-pela samting long kirapim ol laik nogut long bel bilong yumi? Em i yusim ol dispela samting long wanem ol rot?
5 Olsem wanem Satan inap yusim laik i stap long bel bilong yumi? Baibel i tok: “Dispela graun olgeta i stap long han bilong Satan.” (1 Jon 5:19) Satan i yusim “ol samting bilong dispela graun” long pulim yumi. (Ritim 1 Jon 2:15, 16.) Inap planti tausen yia pinis, Satan i bilasim gut ol samting bilong dispela graun long giamanim ol manmeri. Yumi stap long dispela graun, olsem na yumi mas lukaut na abrusim ol trik bilong Satan.—Jon 17:15.
6 Satan i traim long kirapim ol laik nogut long bel bilong yumi. Em i yusim 3-pela “samting bilong dispela graun” em aposel Jon i kolim: (1) “laik nogut bilong bel,” (2) “pasin bilong aigris,” na (3) “pasin bilong hambak long mani kago.” Long ples drai nating, Satan i bin yusim ol dispela 3-pela samting long traim Jisas. Inap planti yia pinis Satan i bin yusim ol dispela trik, olsem na em i save gut long pasin bilong yusim ol dispela trik, na em i save gut long wanem trik em inap yusim bilong giamanim olgeta wan wan man. Paslain long yumi kisim save long ol samting yumi ken mekim bilong lukautim yumi yet, yumi ken skelim olsem wanem Satan i bin giamanim Iv, tasol em i no inap giamanim Pikinini Bilong God.
“LAIK NOGUT BILONG BEL”
Satan i yusim “laik nogut bilong bel” long giamanim Iv (Lukim paragraf 7)
7. Olsem wanem Satan i yusim “laik nogut bilong bel” long traim Iv?
7 Olgeta man i mas kisim kaikai bilong i stap laip. Man Bilong Wokim olgeta samting i bin wokim gut graun na bai planti kaikai i ken kamap long en. Satan inap yusim laik bilong kisim kaikai long traim yumi long mekim samting em God i no amamas long en. Yumi ken stori long olsem wanem Satan i bin traim Iv. (Ritim Stat 3:1-6.) Satan i tokim Iv olsem em i no inap dai sapos em i kaikai prut bilong “diwai bilong givim gutpela save long wanem samting i gutpela na wanem samting i nogut.” Em i tokim Iv olsem sapos em i kaikai prut bilong dispela diwai, em bai kamap wankain olsem God. (Stt. 2:9) Satan i laik kirapim Iv long ting olsem em inap i stap laip yet maski em i sakim tok bilong God. Tasol dispela em wanpela bikpela tok giaman! Orait taim Satan i kirapim Iv long kisim dispela tingting, nau Iv i mas mekim disisen long 2-pela samting: Em bai sakim tingting bilong Satan, o em bai tingim tingim na larim laik bilong em long kaikai prut i kamap strong moa. Maski em inap kisim kaikai long ol narapela diwai tu, em i tingting yet long dispela diwai i stap namel long gaden. Olsem na em i kaikai prut bilong dispela diwai. Satan i kirapim laik bilong em long kisim samting em God i bin tambuim.
Jisas i no lusim tingting long samting we i bikpela samting moa (Lukim paragraf 8)
8. Olsem wanem Satan i yusim “laik nogut bilong bel” long traim Jisas? Bilong wanem traim bilong Satan i no pundaunim Jisas?
8 Satan i yusim wankain trik long traim Jisas. Taim Jisas i stap long ples drai nating na em i no kaikai inap 40 de na 40 nait, Satan i yusim laik bilong kisim kaikai long traim em. Satan i tok: “Sapos yu pikinini bilong God, orait tokim dispela ston long tanim i kamap bret.” (Luk 4:1-3) Jisas i mas mekim disisen long 2-pela samting: Em i no inap yusim strong bilong em long inapim laik bilong em long kisim kaikai, o em inap yusim. Jisas i save olsem i no stret long em i yusim strong bilong em long inapim laik bilong em yet. Maski em i hangre, em i holim tingting olsem pasin bilong pas gut wantaim God i bikpela samting moa winim kaikai. Jisas i bekim tok olsem: “Rait Holi i tok: ‘Man i no inap stap laip long bret tasol, nogat. Em i mas bihainim tu olgeta tok i kamap long maus bilong Jehova.’”—Mat. 4:4; Luk 4:4.
“PASIN BILONG AIGRIS”
9. Wanem samting inap kirapim man long kisim “pasin bilong aigris”? Olsem wanem Satan i yusim dispela pasin long trikim Iv?
9 Jon i kolim tu narapela trik bilong Satan, em “pasin bilong aigris.” Wanpela man inap aigris long wanpela samting taim em i lukluk long en. Satan i yusim dispela pasin long trikim Iv na em i tok: “Bai ai bilong yutupela i op.” Iv i lukluk yet long prut, na dispela i kirapim laik bilong em long kisim dispela prut. Iv i lukim olsem “dispela diwai i naispela tru.”
10. Olsem wanem Satan i yusim “pasin bilong aigris” long traim Jisas? Jisas i bekim wanem tok?
10 Olsem wanem Satan i yusim “pasin bilong aigris” long traim Jisas? Satan “i soim em olgeta kingdom bilong graun. Na Satan i tokim em: ‘Mi bai givim yu namba long bosim olgeta dispela kingdom, na tu, bai mi givim yu ol nambawan gutpela samting bilong ol.’” (Luk 4:5, 6) I no olsem long ai tru bilong Jisas em i lukim olgeta kingdom i stap long graun, nogat, em i lukim piksa tasol bilong ol nambawan gutpela samting bilong ol dispela kingdom. Ating Satan i ting olsem samting Jisas i lukim long ai bai kirapim laik bilong em. Em i tokim Jisas olsem: “Sapos nau yu lotu long mi, orait olgeta dispela samting bai kamap ol samting bilong yu.” (Luk 4:7) Jisas i no laik tru long bihainim pasin we Satan i laik bai em i bihainim. Kwiktaim Jisas i bekim tok olsem: “Rait Holi i tok: ‘Yu mas lotu long Jehova, God bilong yu, na yu mas mekim wok bilong em wanpela tasol.’”—Luk 4:8.
“PASIN BILONG HAMBAK LONG MANI KAGO”
11. Olsem wanem Satan i giamanim Iv?
11 Bihain, Jon i kolim “pasin bilong hambak long mani kago.” Taim Adam na Iv tasol i bin stap long graun, i no gat ol arapela manmeri i stap na bai tupela inap hambak long ol samting ol i gat. Tasol ol i kisim pasin antap. Satan i kirapim Iv long bilip olsem i gat wanpela gutpela samting we i stret long em i kisim, tasol God i no laik givim long em. Satan i tokim em olsem sapos em i kisim kaikai long “dispela diwai bilong givim gutpela save long wanem samting i gutpela na wanem samting i nogut,” em bai “kisim save long wanem samting i gutpela, na wanem samting i nogut,” na em bai “kamap wankain olsem God.” (Stt. 2:17; 3:5) Satan i laik bai Iv i ting olsem em yet inap long bosim wokabaut bilong em na i no gat wok long Jehova i bosim em. Ating pasin antap i mekim na Iv i bilipim dispela tok giaman. Em i kaikai dispela prut tambu na em i ting olsem em i no inap i dai. Tasol tingting bilong em i kranki olgeta.
12. Satan i mekim wanem bilong traim Jisas? Jisas i mekim wanem?
12 Iv i bihainim pasin antap, tasol Jisas i bihainim pasin daun na em i stap gutpela piksa tru long yumi ken bihainim! Satan i laik kirapim Jisas long mekim samting bilong amamasim ol arapela na dispela bai traim God. Tasol Jisas i sakim dispela tingting, long wanem, dispela bai soim olsem em i gat pasin antap! Em i tokaut stret olsem: “Tok i stap olsem: ‘Yu no ken traim Jehova, God bilong yu.’”—Ritim Luk 4:9-12.
LUKAUTIM PASIN BILONG PAS GUT WANTAIM JEHOVA
13, 14. Long nau, Satan i yusim wanem ol samting long giamanim yumi?
13 Long nau tu, Satan i yusim ol wankain trik em i bin yusim bilong traim Iv na Jisas. Em i yusim “laik nogut bilong bel” long kirapim ol manmeri long mekim pasin pamuk o long kaikai na dring planti tumas. Em i yusim “pasin bilong aigris” long kirapim laik bilong ol manmeri long lukim ponografi long Intenet. Na tu, em i yusim “pasin bilong hambak long mani kago” long kirapim laik bilong ol man long kisim pasin antap, kisim strong na namba, na planti moa mani kago.
Wanem ol stiatok bilong Baibel inap helpim yu long kain taim olsem? (Lukim paragraf 13, 14)
14 Satan i yusim “ol samting bilong dispela graun” wankain olsem man bilong kisim pis i save yusim beit. Beit i luk nais long ai bilong pis, tasol huk i stap insait long beit. Long wankain pasin, Satan i yusim ol samting we i luk olsem i no gat rong long en bilong kirapim laik bilong yumi long sakim ol lo bilong God. Satan i laik bai yumi tingting tasol long kisim ol samting bilong lukautim yumi yet na mekim sindaun bilong yumi i kamap gutpela moa, na em i laik bai yumi ting olsem dispela pasin i bikpela samting moa winim pasin bilong mekim laik bilong God. Olsem wanem? Bai yu larim Satan i giamanim yu?
15. Olsem Jisas, yumi ken mekim wanem na bai Satan i no ken giamanim yumi?
15 Satan i giamanim Iv, tasol em i no inap long giamanim Jisas. Long olgeta wan wan taim Satan i traim long trikim Jisas, Jisas i yusim ol tok bilong Rait Holi long bekim tok bilong Satan, em i tok: “Rait Holi i tok” o “Tok i stap olsem.” Sapos yumi stadi gut long Baibel, yumi bai save gut long ol tok bilong Baibel na tingim ol ves we inap helpim yumi taim traim i painim yumi. (Sng. 1:1, 2) Taim yumi tingim eksampel bilong ol gutpela wokman bilong God, dispela inap helpim yumi long stap gut long God wankain olsem ol i bin mekim. (Rom 15:4) Sapos yumi rispektim Jehova, olsem yumi laikim ol samting em i laikim na yumi heitim ol samting em i heitim, dispela bai helpim yumi long abrusim ol pasin i no stret.—Sng. 97:10.
16, 17. Olsem wanem “gutpela tingting” inap stiaim wokabaut bilong yumi?
16 Aposel Pol i kirapim yumi long yusim “gutpela tingting” na bai yumi inap larim tingting bilong Jehova i stiaim yumi, na i no tingting bilong dispela graun. (Rom 12:1, 2) Pol i kirapim yumi long tingim gen olsem yumi mas bosim gut ol samting yumi tingting long en. Em i tok: “Mipela i save daunim ol tingting kranki na olgeta samting i pasim rot bilong save bilong God. Na mipela i bosim olgeta tingting na mekim tingting i bihainim tok bilong Krais.” (2 Kor. 10:5) Samting yumi tingting long en i gat strong bilong stiaim wokabaut bilong yumi, olsem na oltaim yumi mas tingim ol samting em God i amamas long en.—Fili. 4:8.
17 Sapos yumi laik stap klin, orait yumi mas abrusim ol tingting na laik nogut. Yumi mas i gat “klinpela bel” na bai yumi inap laikim Jehova. (1 Tim. 1:5) Tasol bel bilong man i save giamanim man, na ating yumi no inap luksave olsem “ol samting bilong dispela graun” i wok long givim hevi long yumi. (Jer. 17:9) Em i bikpela samting olsem yumi mas bihainim skultok bilong Pol, olsem: “Oltaim yupela i mas skelim yupela yet na bai yupela i ken save olsem yupela i holimpas bilip o nogat.” Taim yumi stadi long Baibel, yumi mas askim yumi yet olsem, ‘God i orait long ol tingting na laik bilong mi?’—2 Kor. 13:5.
18, 19. Bilong wanem yumi mas wok strong long bihainim pasin em Jehova i laikim?
18 Narapela samting we inap helpim yumi long sakim “ol samting bilong dispela graun,” em yumi mas tingim tok bilong Jon. Em i tok: “Ol manmeri i stap longwe long God, ol bai pinis na laik bilong ol tu bai pinis, tasol man i bihainim laik bilong God em bai stap oltaim oltaim.” (1 Jon 2:17) I luk olsem dispela haptaim em Satan i bosim bai stap oltaim. Tasol wanpela taim bai kamap na dispela haptaim bai pinis. Olgeta samting bilong dispela graun long nau bai pinis olgeta. Taim yumi holim dispela tingting, dispela bai helpim yumi na yumi no inap pundaun long ol trik bilong Satan.
19 Aposel Pol i tok yumi mas bihainim pasin em God i orait long en taim yumi “tingim na wetim de bilong Jehova i kamap. Long dispela de skai bai paia na pinis na ol samting bilong skai na graun bai hat nogut tru na tanim i kamap olsem wara!” (2 Pita 3:12) Klostu tru nau dispela de bai kamap, na Jehova bai bagarapim olgeta samting long graun bilong Satan. Tasol long haptaim i stap yet, Satan bai wok yet long yusim “ol samting bilong dispela graun” long traim yumi wankain olsem em i bin mekim long Iv na Jisas. Yumi no ken bihainim pasin bilong Iv na traim long inapim ol laik bilong yumi yet. Sapos yumi mekim olsem, i olsem yumi larim Satan i kamap god bilong yumi. Maski Satan i mekim ol dispela traim i luk nais long ai bilong yumi, yumi mas bihainim pasin bilong Jisas na sakim ol dispela traim. Yumi olgeta wan wan i mas wok strong long bihainim pasin em Jehova i laikim.