1. (a) Taim ol man i kisim tok bilong kirapim ol long tingim gen ol samting, ol i save mekim wanem narapela narapela pasin? Bilong wanem? (b) Man i gat pasin antap i save mekim wanem taim em i kisim tok kaunsel?

 TAIM ol man i kisim wanpela tok, ol i save mekim narapela narapela pasin. Olsem: Taim wanpela man i givim tok bilong kirapim ol narapela long tingim gen ol samting, sampela man inap putim yau sapos dispela tok i kam long man i gat biknem na namba. Tasol ating ol inap sakim sapos dispela tok i kam long man husat i gat wankain krismas olsem ol, o em i no gat biknem na namba. Taim sampela man i kisim tok bilong stretim ol, ol inap bel hevi o pilim sem. Tasol long sampela man, dispela tok inap strongim ol na kirapim ol long mekim gut ol wok. Bilong wanem sampela man i save bel hevi taim ol narapela i givim tok long ol? Wanpela risen em pasin antap. Sapos ol i givim tok kaunsel long man i gat pasin antap, dispela man bai pilim olsem dispela tok i no stret long em. Olsem na em bai sakim tok kaunsel na em i no inap larim dispela tok i helpim em.—Snd. 16:18.

2. Bilong wanem ol Kristen tru i save amamas long kisim ol skultok i kam long Baibel?

² Ol Kristen tru i save bihainim narapela pasin. Yumi save amamas long ol gutpela skultok, na moa yet taim ol dispela skultok i kam long Baibel. Taim Jehova i givim ol tok bilong kirapim yumi long tingim gen ol samting, dispela i helpim yumi long luksave long hevi inap kamap sapos yumi bihainim ol pasin i no stret. Olsem: Ol dispela tok i helpim yumi long abrusim ol pasin we inap bagarapim yumi, kain olsem pasin bilong laikim tumas mani kago, pasin pamuk, pasin bilong kisim drak, na dring planti alkohol. (Snd. 20:1; 2 Kor. 7:1; 1 Tes. 4:3-5; 1 Tim. 6:6-11) Na tu, bel bilong yumi “bai i pulap long amamas,” long wanem, yumi bihainim ol tok i kam long God.—Ais. 65:14.

3. Yumi mas bihainim wanem pasin olsem man bilong raitim song i bin mekim?

³ Sapos yumi laik pas gut yet wantaim Papa bilong yumi long heven, orait yumi mas wok yet long bihainim ol gutpela  skultok i kam long Jehova. Yumi mas bihainim pasin bilong man bilong raitim song, em i tok: “Mi save holim tok bilong yu oltaim oltaim. Na dispela tok i save mekim bel bilong mi i amamas tru.” (Sng. 119:111) Olsem wanem? Olsem man bilong raitim song i bin mekim, yu tu yu amamas long bihainim ol tok i kam long Jehova? O sampela taim yu pilim olsem ol dispela tok i hatwok tumas long bihainim? Maski sapos sampela taim yu pilim olsem i hatwok long kisim sampela tok kaunsel, orait yu no ken bel hevi. Yu ken bilip tru olsem sapos yu bihainim ol tok i kam long God, oltaim dispela bai helpim yu. Orait yumi ken stori long 3-pela rot bilong strongim bilip bilong yumi.

4. Long laip bilong Devit, wanem samting i no bin senis?

⁴ Long laip bilong King Devit, sampela taim em i stap amamas na sampela taim ol hevi i painim em, tasol wanpela samting long laip bilong em i no bin senis. Oltaim em i bilip tru long Man Bilong Wokim em. Em i tok: “Bikpela, nau mi beten long yu. Yu God bilong mi. Mi save bilip long yu tasol.” (Sng. 25:1, 2) Olsem wanem Devit i kisim pasin bilong trastim tru Papa bilong em long heven?

5, 6. Ol beten bilong Devit i soim klia wanem ol samting long pasin bilong em long pas gut wantaim Jehova?

⁵ Taim ol bikpela hevi i kamap, long dispela taim tasol planti manmeri i save beten long God. Ol i kain olsem wanpela pren husat i no save toktok wantaim yu long olgeta taim, nogat. Em i save toktok wantaim yu taim em i nidim mani o em i laik bai yu helpim em. Tasol bihain, yu inap tingting planti olsem tru tru em i laikim yu, o nogat. Tasol pasin bilong Devit long pas gut wantaim Jehova i no olsem. Long laip olgeta bilong Devit, long gutpela taim na long taim bilong hevi, ol beten bilong em i soim klia olsem em i laikim tru Jehova na trastim em.—Sng. 40:8.

⁶ Tingim ol tok Devit i mekim bilong litimapim nem bilong Jehova na tok tenkyu long em. Devit i tok: “God, yu Bikpela bilong mipela. Long olgeta hap bilong graun nem bilong yu i nambawan tru. Biknem bilong yu i inapim olgeta hap bilong skai.” (Sng. 8:1) Olsem wanem? Long tok Devit i mekim, yu inap luksave long pasin bilong em long pas gut wantaim Papa bilong em long heven? Devit i amamas tru long bikpela namba na glori bilong Jehova, olsem na dispela i kirapim em long litimapim nem bilong Jehova “long san na long nait.”—Sng. 35:28.

7. Pasin bilong toktok oltaim wantaim Jehova inap helpim yumi olsem wanem?

⁷ Olsem Devit, oltaim yumi mas toktok wantaim Jehova bambai yumi inap strongim pasin bilong yumi long trastim em. Baibel i tok: “Yupela i mas i go klostu long God, na em bai kam klostu long yupela.” (Jems 4:8) Beten bai helpim yumi long i go klostu moa long Jehova, na tu, em nambawan rot bilong kisim holi spirit.—Ritim 1 Jon 3:22.

8. Bilong wanem yumi mas abrusim pasin bilong kolim ol wankain tok taim yumi beten?

⁸ Olsem wanem? Taim yu beten, olgeta taim yu save kolim ol wankain tok? Sapos yu save mekim olsem, orait paslain long yu beten, yu mas lusim sampela haptaim long tingim ol samting yu laik kolim insait long beten. Tingim dispela tok piksa: Sapos olgeta taim yu mekim wankain tok long pren bilong yu, em bai pilim olsem wanem? Ating em bai les long harim toktok bilong yu. Em tru olsem Jehova i no inap tru long sakim ol beten bilong ol gutpela wokman bilong em. Tasol yumi mas abrusim pasin bilong kolim ol wankain tok long olgeta taim yumi beten.

9, 10. (a) Yumi mas kolim wanem ol samting long beten bilong yumi? (b) Wanem samting bai helpim yumi long mekim ol beten i kamap gutpela moa?

⁹ Sapos yumi laik i go klostu long God, orait yumi bai beten na tokim Jehova long olgeta tingting na samting yumi pilim tru long bel, na dispela bai strongim pasin bilong yumi long trastim em. Yumi mas kolim wanem ol samting long beten? Baibel i tok: “Long olgeta samting, kamapim ol askim bilong yupela long God, mekim long rot bilong ol beten, na long ol prea we yu  beten strong, na long ol beten bilong tok tenkyu long God.” (Fili. 4:6) Yumi ken beten long olgeta samting i painim yumi, na beten tu long pasin bilong yumi long pas gut wantaim God.

¹⁰ Yumi inap kisim planti skul long ol beten bilong ol bilipman na ol bilipmeri bilong bipo. (1 Sml. 1:10, 11; Apo. 4:24-31) Olsem: Buk Song i kolim planti beten na singsing em ol man i mekim long Jehova taim ol i stap bel hevi tru na long taim ol i stap amamas. Taim yumi skelim ol dispela beten, dispela inap helpim yumi long mekim ol beten bilong yumi i kamap gutpela moa.

11. Bilong wanem yumi mas tingim tingim long bel ol tok kaunsel bilong Baibel?

¹¹ Devit i tok: “Tok bilong Bikpela em i samting yumi inap bilip tru long en. Em i save givim gutpela tingting long ol man i no gat planti save.” (Sng. 19:7) Olsem na maski yumi no gat planti save, yumi inap kisim gutpela tingting na save sapos yumi bihainim ol tok i kam long God. I gat sampela tok kaunsel bilong Baibel em yumi mas tingim tingim long bel sapos yumi laik holimpas bilip long olgeta kain taim. Olsem: Taim yu tingim tingim long bel ol stiatok bilong Baibel, dispela inap helpim yu long stap gut long God taim traim i painim yu long skul o long ples wok. Na tu, yu bai bihainim ol lo bilong God na yu no kisim blut o insait long ol samting bilong graun, na yu bai bihainim ol stiatok bilong Baibel taim yu laik baim ol klos. Taim yumi tingim tingim long bel ol tok kaunsel bilong God, dispela inap redim yumi long mekim ol gutpela disisen, na abrusim ol bikpela hevi.—Snd. 15:28.

12. Yumi mas tingim na skelim wanem ol askim na bai dispela i ken helpim yumi long holim yet tok bilong God?

¹² Olsem wanem? Taim yumi wet long lukim truim bilong ol tok promis bilong God, yumi soim olsem yumi bilip strong yet long ol dispela tok promis, na laik bilong God i stap yet olsem namba 1 samting long laip bilong yumi? Yumi bilip tru olsem klostu nau Bikpela Babilon bai bagarap? Ol blesing bai kamap bihain em laip oltaim long paradais long graun, na tok promis bilong kirap bek. Olsem wanem? Yumi bilip strong yet long ol dispela tok promis wankain olsem yumi bin mekim long namba 1 taim yumi kisim save long en? Yumi givim bel yet long autim tok o yumi putim laik bilong yumi yet i stap namba 1? Wok bilong mekim holi nem bilong Jehova na kamapim klia olsem em tasol i nambawan bos, dispela i stap yet olsem bikpela samting tru long yumi, o nogat? Taim yumi tingim na skelim ol dispela kain askim, dispela bai helpim yumi long “holim tok bilong [God] oltaim oltaim.”—Sng. 119:111.

13. Bilong wanem ol Kristen long taim bilong ol aposel i no bin kliagut long sampela samting? Stori long wanpela eksampel.

¹³ I gat sampela tok bilong Baibel em yumi no kliagut long en, long wanem, Jehova i makim olsem nau em i no taim stret bilong kamapim klia ol dispela samting. Planti taim Jisas i tokim ol aposel olsem em bai karim pen na hevi na ol man bai kilim em i dai. (Ritim Matyu 12:40; 16:21.) Tasol ol aposel i no kliagut long tok bilong em. Bihain, taim Jisas i kirap bek na i kamap long ol disaipel, long dispela taim ol i kliagut long tok bilong em, long wanem, em i helpim ol long kliagut long ol tok profet i stori long Krais. (Luk 24:44-46; Apo. 1:3) Na bihain long ol disaipel bilong Krais i kisim holi spirit long Pentikos bilong yia 33 C.E., long dispela taim ol i kliagut olsem Kingdom Bilong God bai i stap long heven na bosim graun.—Apo. 1:6-8.

14. Yumi inap kisim wanem skul long samting i bin painim ol brata bilong yumi bihain long yia 1900 C.E.?

¹⁴ Wankain samting i bin painim ol Kristen tru bihain long yia 1900 C.E. Ol i gat tingting kranki long samting bai kamap long “taim bilong las de.” (2 Tim. 3:1) Olsem: Long yia 1914, sampela Kristen i ting olsem God bai kisim ol i go long heven, tasol dispela samting i no bin kamap. Ol dispela Kristen i stadi moa long ol tok bilong Baibel na ol i luksave olsem i gat wanpela bikpela wok i stap yet, em wok bilong autim tok. (Mak 13:10) Olsem na long yia 1922, J. F. Rutherford,  em man husat i go pas long wok autim tok long dispela taim, em i tokim ol manmeri husat i bung long kibung intenesenel long Cedar Point, Ohio, Amerika olsem: “Lukim! King i kirap pinis long wok! Yupela i man bilong autim tok bilong dispela samting. Olsem na yupela i mas autim tok, autim tok, autim tok bilong King na kingdom bilong em.” Kirap long dispela taim, ol Witnes Bilong Jehova i kisim nem olsem lain bilong autim “gutnius bilong Kingdom.”—Mat. 4:23; 24:14.

15. Bilong wanem i gutpela long yumi mas tingim tingim long bel ol samting em Jehova i bin mekim long helpim lain bilong em?

¹⁵ I gutpela long yumi tingim tingim ol gutpela samting Jehova i bin mekim bilong truim ol tok promis bilong em long lain manmeri bilong em long bipo na long nau. Dispela bai helpim yumi long bilip tru olsem long bihain Jehova bai inapim samting em i tingting pinis long mekim. Taim yumi tingim tingim long bel ol tok promis bilong God, dispela bai mekim na yumi amamas yet long ol dispela tok promis, na bilip tru olsem ol dispela tok promis bai kamap tru.

16. Yumi kisim wanem ol blesing taim yumi wok strong long mekim wok bilong God?

¹⁶ Jehova em God i gat bikpela strong tru, em God bilong mekim planti wok. Man bilong raitim song i tok: “I no gat wanpela i gat bikpela strong olsem yu.” Na em i tok moa olsem: “Yu gat bikpela strong tumas. Strong bilong yu i moa yet.” (Sng. 89:8, 13) Jehova em God bilong mekim planti wok, olsem na em i save belgut taim yumi givim bel tru long mekim wok bilong em, na em i save blesim yumi. Em i lukim olsem ol wokman bilong em, ol man na ol meri, na ol yangpela na ol lapun, ol “i no save les.” Ol i save wok hat. (Snd. 31:27) Taim yumi wok strong long mekim wok bilong dispela Man husat i bin wokim yumi, i olsem yumi bihainim pasin bilong em. Na tu, dispela i save givim amamas long yumi na mekim Jehova i belgut.—Ritim Song 62:12.

17, 18. Olsem wanem pasin bilong yumi long trastim Jehova i kamap strong moa taim yumi bihainim ol tok bilong em? Stori long wanpela eksampel.

 ¹⁷ Olsem wanem ol gutpela wok bilong lotu i strongim pasin bilong yumi long trastim Jehova? Tingim samting i bin kamap taim lain Israel i laik i go insait long Graun Bilong Promis. Jehova i tokim ol pris husat i karim bokis kontrak long ol i mas wokabaut stret i go insait long wara Jordan. Tasol taim ol manmeri i go klostu long wara, ol i lukim olsem wara i tait, long wanem, em taim bilong ren. Lain Israel bai mekim wanem? Ol bai stap arere long wara na wet i stap inap sampela wik o wet liklik inap tait i go daun? Nogat, ol i trastim tru Jehova na bihainim ol tok em i givim long ol. Orait wanem samting i kamap? Baibel i tok, taim ol pris “i putim lek i go daun long wara,” long dispela taim stret “wara i pas olgeta na i no moa ran.” Bihain, ol pris i “sanap i stap long graun i drai namel stret long wara Jordan, inap olgeta manmeri i kamap pinis long hapsait bilong wara.” (Jos. 3:12-17) Tingim, ating lain Israel i bin amamas tru taim ol i lukim olsem dispela tait wara i stop na i no ran moa! Bilip bilong ol long Jehova i kamap strong, long wanem, ol i bihainim ol tok em i givim long ol.

¹⁸ Em tru olsem long nau Jehova i no save wokim ol dispela kain mirakel long helpim lain bilong em. Tasol em i save blesim yumi taim yumi soim olsem yumi bilip long em na bihainim ol tok em i givim long yumi. Holi spirit bilong God i helpim yumi long strongim bel na autim tok bilong Kingdom long olgeta hap bilong graun. Jisas Krais, em nambawan man bilong autim tok bilong Jehova, em i tok promis long ol disaipel olsem em bai sambai long ol taim ol i mekim dispela bikpela wok. Em i tok: “Yupela i mas i go na kamapim ol disaipel long olgeta lain man.” Bihain em i tok promis olsem: “Mi stap wantaim yupela olgeta de i go inap long pinis bilong dispela taim.” (Mat. 28:19, 20) Planti Witnes husat i gat pasin bilong sem o pret long toktok wantaim ol arapela, ol i tok taim ol i mekim wok autim tok, holi spirit bilong God i save strongim bel bilong ol na ol inap toktok wantaim ol man em ol i no save long ol.—Ritim Song 119:46; 2 Korin 4:7.

19. Maski yumi no inap mekim bikpela wok moa long wok bilong God, yumi ken bilip tru long wanem samting?

¹⁹ Sampela bratasista i laik mekim bikpela wok moa long wok bilong God, tasol ol i no inap mekim olsem, long wanem, ol i sik o ol i kamap lapun pinis. Tasol ol i ken bilip tru olsem “Papa bilong marimari na God bilong mekim isi bel bilong ol man long olgeta kain taim” i pilim tru hevi bilong ol. (2 Kor. 1:3) Em i pilim tru olgeta samting yumi inap mekim long wok bilong em. Yumi olgeta i mas tingim olsem sapos yumi laik bai God i kisim bek yumi, orait yumi mas bilip long ofa bilong Krais long baim bek ol man.—Hib. 10:39.

20, 21. Wanem sampela samting yumi inap mekim bilong soim olsem yumi trastim Jehova?

²⁰ Long wok lotu, yumi yusim taim, strong, na mani kago bilong yumi inap tru long skel bilong yumi long mekim wok bilong God. Yumi laik givim bel tru long mekim wok autim tok. (2 Tim. 4:5) Yumi amamas long helpim ol arapela long “kisim stretpela save long tok i tru.” (1 Tim. 2:4) Taim yumi litimapim nem bilong Jehova na givim biknem long em, dispela bai helpim yumi long pas gut moa wantaim em, i olsem yumi kisim planti gutpela samting. (Snd. 10:22) Na tu, yumi bai trastim tru Man Bilong Wokim yumi, maski wanem wanem samting i kamap.—Rom 8:35-39.

²¹ Olsem yumi stori pinis, yumi mas wok strong bambai yumi inap kisim pasin bilong trastim ol tok i kam long Jehova. Olsem na yu mas beten na strongim pasin bilong yu long trastim God. Tingim tingim olsem wanem Jehova i bin truim ol tok promis bilong em long bipo na olsem wanem em bai truim ol tok promis bilong em long bihain. Wok yet long strongim pasin bilong yu long trastim Jehova taim yu mekim wok lotu. Tingim, ol tok bilong Jehova i no gat pinis bilong en. Na sapos yu bihainim ol tok i kam long Jehova, yu inap i stap laip oltaim!