1, 2. (a) Wanem samting i save kamap taim yumi tingim wanpela yumi laikim tru na yumi stori long ol pasin bilong em? (Lukim piksa long kirap bilong stadi.) (b) Yumi bai skelim wanem ol askim?

 TAIM yumi tingim wanpela man yumi laikim tru na yumi stori long ol pasin bilong em, dispela bai strongim pasin pren bilong yumi wantaim dispela man. Dispela i wankain long pasin pren bilong yumi wantaim God Jehova. Taim Devit i mekim wok olsem wasman bilong sipsip, planti taim long nait em i save lukluk long ol sta na tingim tingim long bel ol gutpela wok bilong God. Em i tok: “Taim mi lukim skai yu bin wokim, na taim mi lukim mun na olgeta sta yu bin putim i stap antap, mi save ting olsem. Mipela man i wanem samting na yu save tingting long mipela? Mipela i samting nating. Bilong wanem yu save was gut long mipela?” (Sng. 8:3, 4) Taim aposel Pol i skelim ol gutpela samting Jehova i mekim bilong inapim samting em i tingting pinis long mekim long ol Kristen God i bin makim, em i tok: “Olaman! Ol blesing na savetingting na save bilong God i daun tumas olsem solwara.”—Rom 11:17-26, 33.

² Taim yumi go autim tok, yumi save tingim Jehova na tokim ol man long ol pasin bilong em. Dispela i save strongim pasin pren bilong yumi wantaim em. Planti painia i pilim olsem pasin bilong ol long laikim Jehova i kamap strong moa, long wanem, ol inap lusim bikpela haptaim moa long autim tok. Dispela stadi bai helpim ol painia na ol narapela husat i laik kamap painia long tingim gut ol dispela askim: Olsem wanem wok painia inap strongim yu long pas gut moa wantaim Jehova? Sapos yu mekim wok painia, wanem samting bai helpim yu long mekim yet dispela gutpela wok? Sapos yu no kirap yet long mekim wok painia, yu ken mekim wanem na bai yu inap mekim dispela wok? Orait, nau yumi ken stori long sampela rot we wok painia inap strongim pasin pren bilong yumi wantaim Jehova.

3. Taim yumi stori long ol blesing em Kingdom bai kamapim long bihain, dispela i helpim yumi olsem wanem?

³ Taim yumi stori long ol blesing em Kingdom bai kamapim long bihain, dispela i helpim yumi long i go klostu moa long Jehova. Taim yu autim tok long ol haus, yu save amamas moa long yusim wanem skripsa? Ating em Song 37:10, 11; Daniel 2:44; Jon 5:28, 29; o Revelesen 21:3, 4. Olgeta taim yumi tokim ol man long ol dispela tok promis, dispela i helpim yumi long tingim gen olsem “olgeta gutpela presen na olgeta presen i nambawan tru” i kam long gutpela God bilong yumi, Jehova. Dispela i helpim yumi long i go klostu moa long em.—Jems 1:17.

4. Bilong wanem yumi save pilim tru gutpela pasin bilong God taim yumi autim tok?

⁴ Taim yumi lukim sindaun bilong ol manmeri, olsem ol i stap bel hevi tru na ol i no gat helpim, dispela i helpim yumi long pilim moa yet tok i tru. Ol manmeri bilong dispela graun i no gat rot bilong kisim helpim bilong mekim sindaun bilong ol i kamap gutpela moa na ol i ken stap amamas. Planti man i wari long ol bai gat wanem kain sindaun long bihain, na ol i no bilip olsem gutpela samting bai painim ol. Ol i no save yumi stap bilong mekim wanem. Na tu, planti man bilong lotu i no save long tok bilong Baibel. Ol i wankain stret olsem ol manmeri bilong Ninive. (Ritim Jona 4:11.) a Taim yumi lusim bikpela haptaim moa long autim tok long ol man, yumi bai luksave tru olsem Jehova i lukautim gut yumi. (Ais. 65:13) Jehova i save lukautim gut ol manmeri bilong em, na tu, em i mekim sampela samting moa. Em i opim rot long olgeta man inap kisim bel isi na bilip na wetim gutpela samting bai kamap bihain. Dispela i helpim yumi long tingim olsem Jehova i gat gutpela pasin tru.—Rev. 22:17.

5. Taim yumi skulim ol narapela long tok i tru, yumi save pilim olsem wanem long ol hevi bilong yumi yet?

⁵ Taim yumi skulim ol narapela long tok i tru, dispela i helpim yumi na yumi no wari tumas long ol hevi bilong yumi yet. Trisha, em wanpela sista husat i mekim wok painia oltaim, em i tok em i bin bel hevi tru taim papa na mama bilong em i divos. Wanpela taim bel hevi i daunim em olgeta na em i no laik i go autim tok. Tasol em i strongim bel long i go mekim Baibel stadi. Em i stadi wantaim 3-pela pikinini husat i kamap bikpela insait long famili we i gat planti hevi. Papa bilong ol i lusim ol, na bikpela brata bilong ol i save mekim hatpela pasin long ol. Trisha i tok: “Hevi bilong ol i winim tru bel hevi bilong mi. Taim mipela i stadi, ol i save smail, pes bilong ol i lait, na ol i save amamas tru. Tasol long dispela de stret, ol dispela pikinini i olsem presen i kam long Jehova.”

6, 7. (a) Taim yumi skulim ol narapela long tok i tru bilong Baibel, olsem wanem dispela i strongim bilip bilong yumi? (b) Yumi pilim olsem wanem taim yumi lukim olsem ol stiatok bilong Baibel i helpim ol sumatin long mekim sindaun bilong ol i kamap gutpela moa?

⁶ Taim yumi skulim ol narapela long tok i tru bilong Baibel, dispela i strongim bilip bilong yumi. Long taim bilong aposel Pol, sampela Juda i no bihainim ol samting ol i skulim ol narapela long en, olsem na Pol i tok: “Orait olsem wanem? Yu save skulim ol arapela, tasol yu no save skulim yu yet?” (Rom 2:21) Ol painia i gat planti rot long skulim ol narapela long tok i tru na mekim ol Baibel stadi. Bilong mekim gut dispela wok, pastaim ol i mas skulim ol yet. Ol i mas redi paslain long ol i go lukim olgeta wan wan stadi, na ol i ken mekim wok painimaut long bekim ol askim. Janeen, wanpela painia sista, em i tok taim em i skulim ol narapela long tok i tru, dispela i save strongim bilip bilong em yet long tok i tru.

⁷ Taim yumi lukim ol sumatin i bihainim ol stiatok bilong Baibel na mekim sindaun bilong ol i kamap gutpela moa, dispela i helpim yumi long pilim moa yet savetingting bilong God. (Ais. 48:17, 18) Dispela i kirapim laik bilong yumi long bihainim yet ol dispela stiatok. Adrianna,  wanpela painia sista, em tu i tok: “Planti hevi inap painim ol man taim ol i bihainim savetingting bilong ol yet. Tasol taim ol i kirap long bihainim savetingting bilong Jehova, dispela i save helpim tru sindaun bilong ol.” Wanpela painia brata, nem bilong em Phil, em i tok em i kirap nogut long lukim olsem Jehova inap helpim ol man long mekim ol senis long laip bilong ol.

8. Taim yumi autim tok wantaim ol bratasista, dispela i save helpim yumi olsem wanem?

⁸ Taim yumi autim tok wantaim ol bratasista, dispela i strongim bilip bilong yumi. (Snd. 13:20) Ol painia i save lusim bikpela haptaim long autim tok wantaim ol bratasista. Planti rot i op long ol inap “strongim” narapela narapela. (Rom 1:12; ritim Sindaun 27:17.) Wanpela painia sista nem bilong em Lisa, em i tok long ples wok bilong em, ol manmeri i save jeles long narapela narapela na ol i save mekim olgeta kain samting bilong daunim ol narapela. Olgeta de em i save harim ol manmeri i tok baksait na mekim ol tok nogut. Em i tok moa olsem: “Sampela taim ol man i tok bilas long mi, long wanem, mi bihainim pasin Kristen. Tasol taim mi autim tok wantaim ol arapela wanbilip Kristen, dispela i save strongim mi. Long pinis bilong de, taim mi kam bek long haus, mi save pilim olsem mi kisim nupela strong maski mi taiet nogut tru.”

9. Taim tupela poroman marit i mekim wok painia wantaim, olsem wanem dispela i helpim marit bilong ol?

⁹ Taim yumi mekim wok painia wantaim poroman marit bilong yumi, dispela i strongim marit bilong yumi. (Sav. 4:12) Madeline i mekim wok painia wantaim man bilong em na em i tok: “Mitupela man bilong mi inap lusim sampela haptaim long stori long wok autim tok mipela i mekim long olgeta wan wan de, na stori tu long ol tok bilong Baibel ritim we inap helpim mipela long autim tok. Long olgeta yia mitupela i mekim wok painia wantaim, dispela i helpim  mitupela long pas gut moa wantaim narapela narapela.” Trisha tu i tok em na man bilong em i pasim tok olsem ol i no inap baim ol samting em mani bilong ol i sot long baim. Olsem na ol i no save kros pait long mani. Na tu, ol i save poroman wantaim long lukim ol gobek na mekim ol Baibel stadi. Dispela i helpim marit bilong ol long kamap strong moa.

10. Taim yumi putim Kingdom i stap namba 1 na kisim helpim i kam long God, dispela i save mekim wanem long pasin bilong yumi long trastim Jehova?

¹⁰ Pasin bilong yumi long trastim Jehova bai kamap strong moa taim yumi putim Kingdom i stap namba 1, yumi kisim helpim i kam long Jehova, na yumi kisim bekim long ol beten bilong yumi. Em tru olsem olgeta Kristen husat i stap gut long Jehova, ol i trastim em. Tasol ol painia i luksave olsem wanpela rot tasol bilong mekim yet wok painia em long trastim tru Jehova. (Ritim Matyu 6:30-34.) Wanpela painia brata nem bilong em Curt, em i mekim wok tu olsem helpim bilong wasman sekit, na em i tok orait long i go visitim kongrigesen i stap 2 na hap aua longwe long hap em i stap long en. Meri bilong em tu i mekim wok painia oltaim. Kar bilong ol i gat liklik fiul inap long bringim ol i go long visitim kongrigesen, tasol ol bai sot long fiul bilong kam bek long hap ol i stap long en, na fotnait bilong em bai kamap 1-pela wik bihain. Curt i tok ol i kisim 2-pela tingting olsem ol bai go, o nogat. Tasol ol i beten na wanbel long mekim dispela asainmen. Ol i trastim God, olsem em bai lukautim ol long ol samting ol i nidim. Paslain stret long ol i go, wanpela sista i ringim ol na tok em i laik givim wanpela presen long ol. Dispela sista i givim mani inap stret long helpim ol long i go visitim kongrigesen na kam bek long hap ol i stap long en. Curt i tok sapos ol kain samting olsem i kamap planti taim, yumi inap luksave olsem Jehova yet i givim yumi ol samting yumi nidim.

11. Ol painia i save kisim wanem ol blesing?

¹¹ Planti taim ol painia i tok olsem, taim ol i pas gut moa wantaim God na insait moa long wok bilong em, ol i save kisim planti blesing. (Lo 28:2) Tasol wok painia i gat ol hatwok tu long en. Yumi olgeta i karim pen na hevi, long wanem, yumi gat sin na yumi stap namel long ol man nogut. Sampela taim ol hevi inap mekim na ol painia i lusim wok bilong ol inap sampela haptaim. Tasol i gat rot long ol inap stretim na abrusim ol dispela hevi. Wanem samting inap helpim ol painia long mekim yet gutpela wok bilong ol?

12, 13. (a) Painia i mas mekim wanem sapos em i hatwok long winim aua bilong wok painia? (b) Bilong wanem em i bikpela samting long painia i mas ritim Baibel long olgeta de, mekim stadi bilong em yet, na tingim tingim long bel ol samting em i lainim?

¹² Planti painia i save bisi stret long mekim wok. Sampela taim i hatwok long mekim olgeta samting, olsem na em i bikpela samting long ol i mas stretim gut sediul bilong ol. (1 Kor. 14:33, 40) Sapos wanpela painia i hatwok long winim aua bilong wok painia, orait em i mas skelim gut olsem wanem em i yusim taim bilong em. (Efe. 5:15, 16) Em i ken askim em yet olsem: ‘Mi save lusim bikpela haptaim tumas long mekim ol samting bilong kisim amamas? Mi inap senisim sediul bilong wok mani? Mi save lusim bikpela haptaim long mekim ol samting we i no bikpela samting?’ Oltaim ol painia i mas givim ol dispela askim long ol yet na mekim ol senis sapos i gat wok long mekim olsem.

¹³ Painia i mas mekim sediul bilong ritim Baibel long olgeta de, mekim stadi bilong em yet, na tingim tingim long bel ol samting em i lainim. Painia i mas was gut na no ken larim ol liklik samting i pulim taim bilong em na em i no gat taim long mekim ol bikpela samting. (Fili. 1:10) Tingim olsem: Wanpela painia i autim tok inap de olgeta na em i kam bek long haus. Em i laik yusim haptaim long apinun long redim miting. Tasol pastaim em i ritim pas bilong em. Na bihain em i onim kompiuta na ritim na bekim ol e-mail. Taim em i skelim ol samting long Intenet, em i sekim prais bilong wanpela samting em i laik baim. Em i no luksave olsem 2-pela aua i  lus pinis na em i no kirap yet long redim miting. Bilong wanem dispela i kain olsem wanpela hevi? Sapos wanpela man bilong ran i laik stap yet long pilai resis inap planti yia, orait oltaim em i mas kisim ol gutpela kaikai. Long wankain pasin, oltaim painia i mas mekim stadi bilong em yet bambai em i ken mekim yet wok painia.—1 Tim. 4:16.

14, 15. (a) Bilong wanem ol painia i mas abrusim pasin bilong bungim planti mani kago? (b) Taim hevi i kamap, painia i mas mekim wanem?

¹⁴ Ol gutpela painia i save wok strong long abrusim pasin bilong bungim planti mani kago. Jisas i bin kirapim ol disaipel bilong em long mekim olsem. (Mat. 6:22) Jisas i no bin bungim planti mani kago, olsem na em inap putim tingting olgeta i go long wok autim tok. Long dispela as em inap tok olsem ol foks na ol pisin i gat hap bilong slip, “tasol Pikinini bilong man i no gat ples bilong slip.” (Mat. 8:20) Ol painia husat i kisim skul long pasin bilong Jisas, ol i tingim olsem sapos ol i gat planti kago na ol dispela samting i bagarap, ol bai lusim bikpela haptaim moa long stretim o senisim ol dispela samting.

¹⁵ Ol painia i luksave olsem ol i mekim gutpela wok tru, tasol ol i no holim tingting olsem ol i gutpela moa winim ol arapela, nogat. Ol i tingim olsem wok painia em wanpela presen i kam long Jehova. Olsem na sapos ol painia i laik mekim yet dispela wok, orait ol i mas trastim Jehova. (Fili. 4:13) Sampela taim ol hevi inap bungim ol. (Sng. 34:19) Taim hevi i kamap, ol painia i mas askim Jehova long stiaim ol na ol i mas larim em i helpim ol, na ol i no ken kirap kwik long lusim wok painia. (Ritim Song 37:5.) Taim ol i lukim ol samting Jehova i mekim bilong lukautim ol, dispela bai strongim pasin pren bilong ol wantaim em.—Ais. 41:10.

16. Sapos yu laik mekim wok painia, orait yu mas mekim wanem?

¹⁶ Sapos yu laik mekim wok painia na kisim ol wankain blesing olsem ol painia, orait beten long Jehova. (1 Jon 5:14, 15) Toktok wantaim ol lain husat i mekim wok painia. Putim ol mak we inap helpim yu long mekim wok painia. Keith na Erika, em tupela marit, ol i bin mekim olsem. Tupela i bin mekim wankain samting olsem ol wanlain bilong ol i bin mekim. Tupela i mekim wok mani, olsem na bihain tasol long tupela i marit, ol i baim wanpela haus na nupela kar. Ol i tok: “Mipela i ting olsem ol dispela samting bai helpim mipela long i stap amamas, tasol nogat tru.” Bihain long Keith i lusim wok mani, em i kirap long mekim wok painia haptaim. Em i tok: “Wok painia i helpim mi long luksave olsem taim mi mekim wok autim tok, dispela i save givim bikpela amamas tru long mi.” Ol i kamap pren bilong tupela marit husat i mekim wok painia. Dispela tupela painia marit i helpim ol long luksave olsem ol i save kisim bikpela amamas moa taim ol i mekim wok painia na abrusim pasin bilong bungim planti mani kago. Keith na Erika i mekim wanem? Ol i wokim lista bilong ol mak ol i laik winim, na putim dispela lista long dua bilong frits, na ol i tikim wan wan mak taim ol i winim dispela mak. Bihain, ol i kirap long mekim wok painia.

17. Bilong wanem i gutpela long yu mas skelim gut sapos yu inap long mekim wok painia?

¹⁷ Yu inap mekim wok painia? Sapos yu pilim olsem yu no inap long mekim wok painia long nau, orait yu mas wok strong long autim tok na long dispela rot yu inap i go klostu moa long Jehova. Sapos yu beten long Jehova na skelim gut sindaun bilong yu, yu inap luksave olsem sapos yu mekim sampela senis, dispela bai opim rot long yu inap mekim wok painia. Taim yu kirap long mekim wok painia, amamas yu kisim bai bikpela moa winim ol samting yu bin lusim. Yu bai amamas, long wanem, yu putim Kingdom Bilong God i stap namba 1 samting long laip bilong yu, na yu givim bikpela haptaim moa long helpim ol narapela. (Mat. 6:33) Yu bai gat planti rot moa long tingim Jehova na stori long ol pasin bilong em, na dispela bai strongim pasin bilong yu long laikim em na yu bai mekim em i amamas.