PAPA na mama bilong mi i bin bung long 1919 long wanpela kibung bilong ol Intenesenel Sumatin Bilong Baibel long Cedar Point, Ohio, Amerika. Long dispela yia yet ol i marit. Mi bon long 1922, na 2-pela yia bihain brata bilong mi, Paul, i bon. Meri bilong mi, Grace, i bon long 1930. Papamama bilong Grace, em Roy na Ruth Howell, ol i kamap bikpela insait long famili husat i stap olsem ol Sumatin Bilong Baibel. Ol bubu bilong em tu i stap olsem ol Sumatin Bilong Baibel, na ol i pren bilong Brata Charles Taze Russell.

Mi bin bungim Grace long 1947, na mitupela i marit long Julai 16, 1949. Paslain long mipela i marit, mipela i toktok gut long samting mipela bai mekim long bihain. Mipela i mekim disisen olsem mipela bai mekim wok autim tok fultaim, na mipela i no inap kamapim pikinini. Long Oktoba 1, 1950, mitupela wantaim i kirap long mekim wok painia. Na long 1952, ol i singautim mipela long mekim wok sekit.

Mitupela wantaim i pilim olsem mipela i nidim bikpela helpim na bai mipela inap mekim gut wok long nupela asainmen. Mi kisim skul long ol brata husat i gat ekspiriens na mi laik bai Grace tu i kisim gutpela trening. Mi toktok wantaim Marvin Holien, em brata husat i pas gut wantaim famili bilong mi na em i gat ekspiriens long mekim wok wasman raun. Mi tokim em olsem: “Grace em yangpela na em i no gat ekspiriens. Inap yu makim wanpela sista husat inap wok wantaim em na bai em inap kisim sampela trening?” Marvin i tok Edna Winkle em wanpela sista husat i mekim wok painia inap planti yia pinis na em inap helpim gut Grace. Bihain, Grace i tok Edna i helpim em na em i no pret long toktok wantaim ol man em i bungim long wok autim tok, na em i lain long bekim gut tok taim ol man i no wanbel long tok em i autim, na em i lain long putim gut yau na kamapim gutpela bekim. Grace i tok tu olsem: “Dispela sista i bin helpim mi gut tru!”

Mitupela Grace i mekim wok long 2-pela sekit long Iowa. Sampela hap bilong Minnesota na South Dakota i insait long sekit bilong mipela. Bihain mipela i go mekim wok long New York Sekit Namba 1, na ol hap bilong Brooklyn na Queens i insait long dispela sekit. Mipela i pilim olsem mipela i no gat save long  mekim dispela wok. Brooklyn Heights Kongrigesen i stap tu long sekit bilong mipela, na dispela kongrigesen i save bung long Haus Kingdom long Betel we i gat ol memba bilong famili Betel husat i stap longpela taim long tok i tru. Bihain long mi mekim namba 1 sevis tok bilong mi long dispela kongrigesen, Brata Nathan Knorr i kam long mi na em i tok: “Malcolm, yu givim sampela tok kaunsel mipela i mas bihainim, na i stret yu mekim olsem. No ken lusim tingting olsem, sapos yu no givim gutpela tok kaunsel long helpim mipela, orait dispela i soim olsem yu no helpim wok bilong oganaisesen. Olsem na mekim yet gutpela wok bilong yu.” Taim miting i pinis, mi stori long Grace long dispela samting. Bihain, mipela i go antap long rum bilong mipela long Betel. Mipela i bin tingting planti na dispela i putim presa long mipela, olsem na mipela i krai.

Sampela mun bihain, mipela i kisim pas i singautim mipela long insait long namba 24 klas bilong Skul Gileat, em ol sumatin bai grediuet long Februeri 1955. Paslain long mipela i go long skul, ol i tokim mipela olsem dispela trening i no bilong redim mipela long mekim wok misineri, nogat. Dispela trening bai helpim mipela long mekim gut wok bilong raun. Mipela i pilim tru ol samting mipela i lainim long skul, na tu, mipela i lain long bihainim pasin daun.

Taim mipela i pinisim skul, ol i makim mipela long mekim wok distrik. Mipela i mekim wok distrik long hap bilong Indiana, Michigan, na Ohio. Long Disemba 1955, mipela i kirap nogut taim mipela i kisim pas i kam long Brata Knorr, em i tok: “Yupela i mas kamapim stret tingting bilong yupela. Toksave long mi sapos yupela i amamas long kam long Betel na stap long hia . . . o sapos yupela i amamas long mekim wok long narapela kantri bihain long yupela i stap liklik long Betel. Sapos yupela i laik mekim wok distrik o wok sekit, mi bai amamas long save long dispela tu.” Mipela i bekim tok olsem mipela bai amamas long olgeta kain asainmen ol i givim long mipela. Kwiktaim ol i singautim mipela i go long Betel!

Long ol yia mi wok long Betel, mi kisim asainmen bilong givim ol tok na mekim wok tisa long planti hap bilong Amerika. Mi trenim planti yangpela man em bihain ol tu i mekim bikpela wok long oganaisesen bilong Jehova. Bihain mi wok olsem sekreteri bilong Brata Knorr long ofis we i lukautim wok autim tok long olgeta hap bilong graun.

Mi amamas long ol yia mi bin wok long Dipatmen Bilong Wok Autim Tok. Long dispela taim mi bin wok wantaim T. J. (Bud) Sullivan. Em i bin mekim wok olsem ovasia bilong dispela dipatmen inap planti yia. Tasol mi kisim skul tu long ol arapela brata. Wanpela bilong ol em Fred Rusk, em brata ol i bin makim long  trenim mi. Wanpela taim mi askim olsem bilong wanem em i mekim planti senis long pas bilong mi. Em i lap na tok: “Malcolm, taim yu toktok yu inap yusim sampela tok moa long kamapim klia samting yu toktok long en, tasol taim yu raitim wanpela tok, dispela tok i mas stret na isi long ol man inap kliagut long en.” Bihain em i tokim mi olsem: “Strongim bel. Yu mekim gutpela wok, na bihain wok bilong yu bai kamap gutpela moa.”

Long ol yia mipela i stap long Betel, Grace i mekim wok olsem hauskipa, na tu, em i mekim sampela narapela wok. Em i amamas long wok em i mekim. I kam inap long nau, taim mipela i bungim ol brata em ol i bin stap long Betel long taim ol i yangpela, ol i save smail na tokim Grace olsem: “Yu bin skulim mi gut long pasin bilong stretim bet, na mi inap tokim yu olsem mama bilong mi i amamas long dispela.” Grace i bin amamas tu long wok long Magasin Dipatmen, Dipatmen Bilong Raitim Ol Pas, na Dipatmen Bilong Rekodim Kaset. Taim em i mekim wok long ol dispela dipatmen, em i luksave olsem maski yumi mekim wanem kain wok insait long oganaisesen bilong Jehova, dispela i givim gutnem long yumi na em i olsem wanpela blesing. Long nau tu, em i holim yet wankain tingting.

Long 1975 samting, mipela i luksave olsem ol papamama bilong mipela i lapun na ol i nidim ol narapela long lukautim ol. Olsem na mipela i mas mekim wanpela bikpela disisen. Mipela i no laik lusim Betel na ol bratasista mipela i laikim ol tru. Tasol mi pilim olsem em wok bilong mi long lukautim ol papamama bilong mipela. Bihain, mipela i lusim Betel, tasol mipela i bilip olsem taim sindaun bilong mipela i senis mipela inap kam bek gen.

Bilong kisim mani long lukautim famili bilong mipela, mi kisim wok bilong salim insurens. Oltaim mi bai tingim tok bilong wanpela maneja taim mi kisim trening i stap, em i tok: “Long dispela bisnis, ol man bai ringim yu long apinun. Long dispela taim yu inap lukim ol man. Em i bikpela samting tru long yu mas stap na ringim ol man long olgeta apinun.” Mi tokim em olsem mi rispektim save bilong em na tok em i mekim, tasol oltaim mi save putim wok bilong lotuim God i stap namba 1 long laip bilong mi na mi no inap senisim dispela samting. Mi tok orait olsem mi bai wok na ringim ol man long sampela apinun, tasol long Tunde na Fonde apinun, mi mas i go long ol miting we i bikpela samting tru. Taim mi mekim wok mani, mi no lusim pasin bilong i go long ol miting, olsem na Jehova i blesim mi.

Mipela i bin stap wantaim mama bilong mi taim em i dai long haus we ol i save lukautim ol lapun, long Julai 1987. Nes husat i lukautim dispela hap, em i kam na tokim Grace olsem: “Misis Allen, yu ken i go long haus na malolo liklik. Olgeta man i save olsem olgeta taim yu save stap wantaim tambu mama bilong yu. Yu no ken tingting planti na bel bilong yu i ken stap isi.”

Long Disemba 1987, mipela i putim gen aplikesen bilong i go wok long Betel, em ples mipela i laikim  tru. Tasol sampela de bihain, mipela i painimaut olsem Grace i gat sik kensa bilong bel. Em i kisim operesen na kamap orait, na ol dokta i tok kensa bilong em i pinis. Long dispela taim, mipela i kisim pas i kam long Betel na dispela pas i tok mipela i ken wok wantaim kongrigesen i stap klostu long mipela. Mipela i tingting strong long mekim yet wok bilong Jehova.

Bihain, mi kisim wok mani long Texas. Mipela i pilim olsem ples i hot na dispela i gutpela long mipela. Kirap long taim mipela i kam long Texas inap 25 yia i go pinis, mipela i stap wantaim ol bratasista husat i tingim tru mipela na mipela i stap pren tru bilong narapela narapela.

Insait long planti yia, Grace i gat sik kensa bilong bel, sik long tairoit bilong em, na kensa long susu, tasol em i no komplein liklik long ol dispela samting. Oltaim em i rispektim wok bos mi mekim insait long famili na em i wok gut wantaim mi. Planti taim ol man i save askim em long wanem samting i helpim marit bilong mitupela na mipela i stap amamas. Em i save tokim ol olsem mitupela i stap olsem gutpela pren tru, mitupela i save toktok wantaim long olgeta de, mitupela i save lusim sampela haptaim long stap wantaim, na mitupela i save stretim bel kros paslain long mitupela i slip. Em tru olsem sampela taim mitupela i save sikirapim bel bilong narapela narapela, tasol oltaim mitupela i save fogivim narapela narapela, na dispela i save helpim tru mipela.

Long olgeta hevi i bin painim mipela, mipela i bin kisim sampela gutpela skul:

1. Oltaim yumi mas trastim Jehova na redi long karim ol hevi i painim yumi. No ken trastim save bilong yumi yet.—Snd. 3:5, 6; Jer. 17:7.

2. Maski wanem ol hevi i kamap, oltaim yumi mas larim tok bilong Baibel i stiaim yumi. Em i bikpela samting tru long yumi mas bihainim tok na ol lo bilong Jehova. Yumi no inap mekim 2-pela samting wantaim—yumi bai bihainim tok o yumi bai i no inap bihainim tok.—Rom 6:16; Hib. 4:12.

3. Nambawan bikpela samting long laip bilong yumi em long mekim ol samting na bai Jehova i orait long yumi. Putim laik bilong Jehova i stap namba 1 samting long laip bilong yumi, na i no mani kago.—Snd. 28:20; Sav. 7:1; Mat. 6:33, 34.

4. Beten askim Jehova long helpim yumi long wok strong na mekim gut wok bilong em. Tingim ol samting yumi inap mekim, na i no ol samting yumi no inap mekim.—Mat. 22:37; 2 Tim. 4:2.

5. Yumi mas save olsem i no gat narapela oganaisesen we Jehova i save laikim na blesim ol wok bilong en.—Jon 6:68.

Mitupela Grace i marit inap olsem 65 yia nau, na mitupela wan wan i mekim wok bilong Jehova winim 75 yia. Mitupela i amamas tru olsem mitupela i poroman wantaim long mekim wok bilong Jehova inap planti yia. Mipela i bilip na beten olsem olgeta bratasista inap kisim wankain amamas taim ol i bilip long Jehova.