Bihain tasol long yia 1900, ol man i amamas long lukim wanpela muvi, nem bilong en A Trip Down Market Street. Muvi i stori long sindaun bilong ol man long San Francisco, Amerika, long dispela taim bipo. Ol man bilong wokim muvi i putim kamera long fran bilong kar na kisim vidio long olgeta samting ol i lukim long rot. Dispela muvi i soim piksa bilong ol hos i pulim ol karis, ol kar bilong bipo, na tu, ol man i raun long ol stua, na ol yangpela man i salim ol niuspepa samting.

Sapos yumi lukim dispela muvi long nau, yumi bai sori stret. Ating ol i bin kisim vidio bilong dispela muvi long Epril 1906, paslain stret long bikpela guria na paia i kamap long Epril 18 na kilim i dai planti tausen manmeri na bagarapim planti hap bilong dispela biktaun. Sampela man long dispela muvi i dai bihain tasol long sampela de. Scott Miles, em tumbuna pikinini bilong wanpela bilong ol man husat i bin wokim dispela muvi, em i tok: “Mi lukim olsem ol man i stap tasol, na ol i no save long wanem samting bai painim ol. Olsem na yu bai sori tru long ol.”

Taim yumi tingim dispela samting i bin kamap bipo na skelim wantaim taim bilong yumi long nau, dispela inap kirapim tru tingting bilong yumi. Yumi tu bai sori long ol neiba bilong yumi. Ol i bisi long ol wok bilong olgeta wan wan de na ol i no save olsem klostu nau bai bikpela bagarap i kamap. Dispela bagarap bai painim ol man nogut bilong nau wantaim pasin nogut bilong ol. Tasol dispela bagarap i no wankain olsem guria we inap kamap wantu tasol, nogat. Yumi gat sotpela taim tasol long toksave long ol man olsem Jehova i gat de bilong mekim kot na klostu nau bai dispela de i kamap. Ating long olgeta wik yu save yusim sampela haptaim long autim tok long ol haus. Tasol yu ting yu inap mekim sampela wok moa long givim tok lukaut long ol narapela?

Jisas i soim gutpela pasin tru yumi ken bihainim. Oltaim em i redi long autim tok long olgeta man em i bungim. Em i bin autim tok long wanpela takisman em i bungim long rot, na wanpela meri em i bungim long hulwara long taim em i laik malolo long belo. (Luk 19:1-5; Jon 4:5-10, 21-24) Maski sampela taim Jisas i laik malolo, em i save redi long senisim plen bilong em na bai em inap skulim ol man. Em i sori tru long ol man, na dispela i kirapim em long mekim bikpela wok moa long skulim ol. (Mak 6:30-34) Olsem wanem ol pablisa long nau i bihainim pasin bilong Jisas long redi oltaim long autim wanpela tok we i bikpela samting tru?

Melika i stap long wanpela flet i gat sekiuriti long en na i hatwok long i go insait long dispela hap. Planti  neiba em ol sumatin i kam long ol narapela kantri. Ol dispela sumatin i yusim ol mobail fon, tasol fon namba bilong ol i no stap long telefon buk, na nem bilong ol i no stap long lista i gat nem bilong ol lain i stap long dispela flet. Taim rot i op, em i save amamas long toktok wantaim ol long Baibel taim em i bungim ol long fran bilong flet o insait long eleveta. Em i tok: “Mi tingim dispela hap olsem teritori bilong mi yet.” Melika i save holim ol nius bilong kain kain tokples, na planti neiba i amamas long kisim ol liklik nius na ol magasin. Na tu, em i save tokim ol long Web-sait bilong yumi, em jw.org. Em i kirapim pinis sampela Baibel stadi.

Sonia tu i save autim tok long ol man taim rot i op. Em i wok long klinik bilong wanpela dokta, na em i putim mak long autim tok long olgeta wanwok. Pastaim, em i painimaut long ol samting ol wanwok i gat laik long save long en. Bihain, em i yusim haptaim bilong belo long lukim wan wan bilong ol na toktok wantaim ol long Baibel. Long dispela rot, Sonia i kirapim 2-pela Baibel stadi. Na tu, em i tingting long yusim malolo taim bilong em long stap na autim tok long hap we ol man i save kam sindaun na wet long lukim dokta.

Wanpela man husat i bin abrusim bagarap bilong bikpela guria long yia 1906, em i tok dispela em wanpela bikpela bagarap tru, na bipo i no gat kain bagarap olsem i bin kamap long wanpela taun o siti. Tasol klostu nau bagarap bai painim “ol lain husat i no save long God,” na dispela bagarap bai winim tru olgeta narapela bagarap i bin kamap bipo. (2 Tes. 1:8) Jehova i laik tru bai ol man i senisim tingting na pasin bilong ol na putim yau long tok lukaut em ol Witnes bilong em i autim.—2 Pita 3:9; Rev. 14:6, 7.

Yu mekim gutpela wok tru long helpim ol man long kliagut olsem yumi stap long haptaim bilong planti hevi tru. Ol man i no ken tingting moa long inapim ol laik bilong ol yet, nogat, ol i mas kirap nau long mekim wok bilong Jehova. (Sef. 2:2, 3) Olsem wanem? Taim rot i op, yu inap autim tok long ol wanwok, ol neiba, na ol man yu bungim long olgeta de? Yu ting yu inap mekim sampela wok moa long givim tok lukaut long ol narapela?