1. Olsem wanem yumi inap holimpas bilip bilong yumi?

 PLANTI man i tok ol i save bilip long ol samting ol yet inap lukim long ai bilong ol. Tasol Baibel i tok olsem “i no gat wanpela man i bin lukim God long wanpela taim.” (Jon 1:18) Yumi no inap lukim God, olsem na taim ol man i tok olsem ol i no bilip long God, hau bai yumi inap helpim ol long bilip long em? Olsem wanem yumi olgeta wan wan inap holimpas bilip bilong yumi long Jehova, em “dispela God ol man i no inap lukim”? (Kol. 1:15) Pastaim, yumi mas save long ol tok we i pasim rot bilong ol man long kisim stretpela save long God. Bihain, yumi mas lain long yusim gut Baibel bambai yumi inap kamapim klia olsem ol dispela tok “i pasim rot bilong save bilong God.”—2 Kor. 10:4, 5.

2, 3. Wanem 2-pela tok i pasim ol man long kisim stretpela save long God?

² Wanpela tok giaman we i save pasim rot bilong ol man long kisim stretpela save long God, em evolusen. Dispela tok bilong ol man i no stret wantaim tok bilong Baibel, na em i pasim rot bilong ol man long bilip na wetim gutpela samting bai kamap bihain. Long bilip bilong evolusen, ol i skulim ol man olsem ol samting i gat laip i kamap nating. Sapos dispela tok em i tru, dispela bai makim olsem i no gat as long yumi stap laip long graun.

³ Sampela lain bilong lotu Kristendom i tok olgeta samting long ples antap wantaim graun na olgeta samting i gat laip long en, ol i bin i stap inap sampela tausen yia tasol. Dispela lain i skulim ol man olsem God i bin wokim olgeta samting insait long 6-pela de i gat 24 aua long en. Ol man husat i bilipim dispela tok, ol i sakim olgeta evidens bilong saiens we i pait wantaim bilip bilong ol. Ating ol i rispektim tok bilong Baibel, tasol bilip bilong ol i mekim na i hatwok long ol narapela long trastim tok bilong God. Bilong wanem? Long wanem, bilip bilong ol i mekim na i luk olsem tok bilong Baibel  i no stret. Ol man husat i gat dispela bilip ol i wankain olsem sampela man long taim bilong ol aposel. Ol i givim bel tru long lotuim God, “tasol ol i no gat stretpela save na ol i mekim olsem.” (Rom 10:2) Bilip bilong evolusen na dispela tingting olsem God i bin wokim olgeta samting insait long 6-pela de i gat 24 aua long en, em “ol samting i gat strong,” olsem na hau bai yumi inap yusim Tok Bilong God long kamapim klia olsem ol dispela bilip em ol tok giaman? Yumi inap helpim ol sapos yumi yet i wok strong long kisim stretpela save long ol tok bilong Baibel.

4. Wanem samting i mas i stap olsem as bilong bilip bilong yumi?

⁴ Baibel i skulim yumi olsem yumi mas laikim tru long kisim olkain save, wankain olsem yumi laikim tru wanpela samting i dia tumas. (Snd. 10:14) Jehova i laik bai evidens na gutpela tingting i stap olsem as bilong bilip bilong yumi, na i no tingting bilong ol man o pasin bilong lotu. (Ritim Hibru 11:1.) Sapos yumi laik strongim bilip bilong yumi long God, orait pastaim yumi mas save gut tru olsem Jehova i stap. (Ritim Hibru 11:6.) Yumi bilip olsem God i stap, long wanem, yumi bin skelim ol tok i tru na mekim wok long “gutpela tingting,” na i no olsem yumi laik bilip nating long wanpela samting.—Rom 12:1.

5. Wanem wanpela risen bilong yumi long bilip olsem God i stap?

⁵ Aposel Pol i kolim wanpela risen bilong bilip olsem God i stap, maski yumi no inap lukim Em. Pol i tok: “Kirap long taim God i wokim olgeta samting na i kam inap long nau, ol man i lukim ol samting God i bin wokim na long dispela rot ol inap save long ol pasin bilong en i stap hait. Na ol i save long bikpela strong bilong en i stap oltaim na ol i save olsem tru tru em i God.” (Rom 1:20) Sapos man i gat 2-pela tingting olsem God i stap o nogat, olsem wanem yu inap helpim em long bilip olsem tok bilong Pol em i tru? Yu ken stori long sampela samting God i bin wokim we i kamapim klia bikpela strong na savetingting bilong em.

6, 7. Wanem 2-pela samting i kamapim klia strong bilong Jehova?

⁶ Strong bilong Jehova i stap ples klia taim yumi skelim 2-pela samting i stap olsem banis na i lukautim yumi. Namba 1 em atmosfia, dispela i makim win yumi pulim na win i raunim graun olgeta. Namba 2 em strong insait long graun we i mekim wok olsem magnet. Atmosfia i save kamapim win yumi save pulim, na tu, em i mekim wok bilong lukautim yumi. Olsem wanem em i lukautim yumi? Ol bikpela hap ston i save spit i go i kam long ples antap, na sapos ol dispela hap ston i bamim graun bilong yumi, dispela inap kamapim bikpela bagarap. Tasol dispela samting i no save kamap, long wanem, ol dispela hap ston i save paia na pinis taim ol i kam insait long atmosfia i raunim graun. Taim ol dispela hap ston i paia, dispela i save kamapim naispela lait long skai we i save sut i go nabaut na yumi inap lukim long nait.

⁷ Narapela samting we i lukautim yumi em dispela strong olsem magnet i stap insait long graun. Insait tru long planet bilong yumi, long namel stret, i gat ain i hot na i melt na kamap olsem wara. Dispela samting i kamapim bikpela strong olsem magnet, na yumi inap pilim dispela strong long graun na i go longwe tru long ples antap. Dispela strong i banisim yumi na hatpela lait bilong san i no bagarapim yumi. Hatpela lait bilong san i kamapim rediesen, em lait i gat strong bilong bagarapim man. Tasol gutpela tru olsem dispela strong i stap insait long graun i banisim hatpela lait bilong san long kukim olgeta samting long graun. Dispela strong i save pulim ol dispela lait nogut na sakim i go bek long ples antap. Olsem na dispela i save kamapim ol lait i gat naispela kala long en we i save bilasim skai long nait klostu long Not Pol na Saut Pol. Tru tumas, Jehova “i gat olgeta strong.”—Ritim Aisaia 40:26.

8, 9. I kam inap long nau, wanem samting i mekim na ol man na ol animal i stap laip yet? Olsem wanem dispela i soim olsem Jehova i gat savetingting?

⁸ Yumi inap kisim skul long savetingting bilong Jehova taim yumi skelim ol samting em i mekim bilong helpim yumi long i stap laip long graun. Olsem: Piksaim wanpela taun i gat planti milion manmeri na banis i raunim taun. Dispela taun i no gat rot long kisim gutpela wara o rausim ol pipia. Kain taun olsem bai kamap doti tru na ol man i no inap stap moa long en. Graun bilong yumi i kain olsem dispela taun. I gat mak long saplai bilong wara, na yumi no inap rausim olgeta pipia. Tasol graun bilong yumi inap helpim ol man na ol animal wantaim long kisim ol samting ol i nidim bilong i stap laip. Olsem wanem graun bilong yumi inap mekim olsem? Long wanem, dispela graun inap yusim gen olgeta samting ol man na ol animal i nidim bilong i stap laip.

⁹ Yumi ken stori long olsem wanem graun i save kamapim win oksijen em olgeta man na ol animal i nidim bilong i stap laip. Planti bilion man na animal i save pulim win oksijen na rausim win nogut, em win kabon daioksait. Maski dispela samting i save kamap long olgeta taim, win oksijen i no save sot na em inap long olgeta man i ken pulim. Olsem wanem dispela samting inap kamap? Ol grinpela lip na plaua samting i save pulim kabon daioksait, wara, lait bilong san, na ol gutpela marasin, na ol i save kamapim ol kabohaidret na win oksijen. Taim yumi pulim win oksijen na rausim win kabon daioksait, dispela i save inapim tru olgeta wok. Nem bilong dispela pasin em fotosintesis. Tru tumas, Jehova i save yusim ol plaua samting long ‘givim laip na win long olgeta manmeri.’ (Apo. 17:25) Em savetingting tru!

10, 11. Olsem wanem wanpela kain bataflai na dragonflai i kamapim klia savetingting bilong Jehova?

¹⁰ Na tu, yumi inap lukim klia savetingting bilong Jehova taim yumi skelim planti binatang na ol animal em i bin wokim. Wok painimaut i soim olsem namba bilong ol kain kain animal na ol binatang long graun em namel long 2 milion na 100 milion. (Ritim Song 104:24.) Yumi inap kisim skul long savetingting bilong em taim yumi skelim sampela bilong ol animal na ol binatang em i bin wokim.

¹¹ Olsem: Kru bilong wanpela bataflai (monarch bataflai), em i olsem sais bilong poin bilong bairo. Maski kru bilong en i liklik tru, dispela bataflai inap lusim Kanada na flai inap olsem 3,000 kilomita i go long Meksiko. Lait bilong san i save helpim bataflai long makim rot em bai go long en. Tasol san i save muv i go long hapsait bilong skai, olsem na hau bai bataflai i bihainim lait bilong san? Jehova i bin wokim gut liklik kru bilong bataflai, olsem na maski san i muv i go, bataflai inap bihainim yet rot i stret long em i go long en. Yumi ken tingim tu wanpela kain grasopa ol i kolim olsem dragonflai. Tupela ai bilong en i gat 30 tausen kiau long en. Taim dragonflai i lukim ol samting, liklik kru bilong en inap luksave long ol dispela samting, na  em inap luksave tu long taim ol samting i meknais liklik tasol.

12, 13. Wanem samting i kirapim yumi long pilim tru wei Jehova i wokim ol sel bilong yumi?

¹² Yumi pilim tru pasin em Jehova i bihainim long wokim ol sel bilong olgeta samting i gat laip. Olsem: Bodi bilong yu i gat 100 trilion sel. Insait long olgeta wan wan sel i gat wanpela samting i luk olsem wanpela liklik rop, nem bilong en DNA (deoxyribonucleic acid). DNA i holim olgeta save we i makim olsem bodi olgeta bilong yu bai wanem kain.

¹³ Wanem skel bilong save i stap long DNA? Sapos yumi skelim DNA na hevi bilong en inap olsem 1-pela gram, skel bilong en bai wankain olsem olgeta tok i stap long wanpela CD. Olgeta tok i stap insait long wanpela dikseneri inap pulimapim wanpela CD. Yumi kirap nogut, long wanem, CD em wanpela liklik samting ol i wokim long plastik. Tasol sapos yu laik putim ol tok i stap insait long 1-pela gram bilong DNA long CD, orait yu bai nidim 1 trilion CD! O yumi ken tok, sapos ol i draim DNA na skelim long wanpela liklik tispun, dispela tasol i holim planti save tru inap long wokim bodi bilong olgeta man i stap laip long nau! Na em i holim save inap long wokim planti manmeri moa, winim 2 trilion manmeri!

14. Ol samting ol saientis i kisim save long en i kirapim yu long pilim olsem wanem long Jehova?

¹⁴ King Devit i tok, i olsem Jehova i kisim wanpela buk na raitim olgeta tok long wei bilong wokim bodi bilong man. Devit i tok: “Yu lukim mi taim mama i no karim mi yet. Mi no kamap yet long graun, tasol yu raitim pinis long buk bilong yu olgeta de yu laik bai mi mas i stap long graun.” (Sng. 139:16) Taim Devit i tingim olsem wanem Jehova i bin wokim bodi bilong em, yumi inap kliagut long as na em i laik litimapim nem bilong Jehova. Yumi kirap nogut long planti samting ol saientis i bin kisim save long en long bodi bilong man. Save ol i kisim i mekim na yumi wanbel long tok em man bilong raitim song i mekim long Jehova. Em i tok: “Mi pret long yu, olsem na mi save litimapim nem bilong yu. Olgeta samting yu wokim i narakain na i nambawan tru. Mi save gut long dispela samting na mi pilim tru.” (Sng. 139:14) Ol samting God i wokim i kamapim klia olsem tru tru God i stap!

15, 16. (a) Olsem wanem ol buk na nius bilong yumi i bin helpim ol man long kisim save long ol samting Jehova i wokim? (b) Yu yet i bin laikim tru wanem stori bilong ol dispela atikol?

¹⁵ Inap planti yia nau, ol buk na nius bilong ol Witnes Bilong Jehova i bin helpim planti milion manmeri long kisim save long God i Gat Olgeta Strong long rot bilong ol samting em i bin wokim. Olsem: Sampela buk na nius bilong yumi i bin helpim ol man i bilip long evolusen na ol narapela bilip giaman. Wanpela sista i bin ritim ol kain buk na nius olsem na em i raitim pas i go long brens ofis long Amerika na tok: ‘Gutpela samting tru i kamap long wok bilong tilim nius. Wanpela meri i laikim 20 kopi bilong wanpela nius. Em wanpela saiens tisa na em i laik givim wan wan kopi bilong dispela nius long ol sumatin.’ Wanpela brata i tok: “Mi bin mekim wok autim tok kirap long 1948 samting na i kam, na klostu nau bai mi winim 75 krismas. Long dispela mun, amamas mi kisim long wok autim tok i winim amamas mi bin kisim long bipo.”

¹⁶ Kirap long sampela yia i go pinis, ol buk na nius bilong yumi i kamapim planti moa atikol we i gat stori bilong ol samting God i wokim. Ol dispela sotpela atikol i stori long olsem wanem ol samting God i wokim i narakain tru, na ol man i bin traim long bihainim ol samting Krieta bilong yumi i bin wokim. Ol dispela atikol i helpim yumi long amamas moa long Jehova long ol samting em i bin wokim. Ol askim i stap long ol dispela atikol i helpim man long tingim na skelim ol tok em i bin ritim. Yumi ken yusim sampela tok bilong ol dispela atikol taim yumi autim tok.

17, 18. (a) Ol papamama i gat wanem wok? (b) Long taim bilong famili lotu, yupela i bin yusim ol atikol i stori long ol samting God i bin wokim?

¹⁷ Yupela papamama, long taim bilong famili  lotu yupela i bin ritim ol dispela atikol wantaim ol pikinini bilong yupela? Sapos yupela i mekim olsem, dispela inap strongim bilip bilong ol long Jehova. Ating yupela i gat ol tineja husat i stap long haiskul. Ol tisa bilong evolusen i wok strong long kirapim ol pikinini bilong yupela long bilip olsem i no gat Krieta. Ol saientis, ol tisa, ol muvi, na ol program long TV i stori long graun na animal samting, ol i skulim ol man olsem evolusen em samting i bin kamap tru. Yupela inap helpim ol tineja bilong yupela long sambai long tok i tru long rot bilong yusim ol atikol bilong nius Wastaua. Ol dispela atikol i helpim ol yangpela long kisim “pasin bilong tingting gut.” (Snd. 2:10, 11) Dispela i skulim ol long olsem wanem ol i ken skelim olsem tok ol i lainim long skul i stret o nogat.

¹⁸ Sampela taim ol yangpela i save harim nius olsem ol saientis i bin painim sampela olpela bun samting i kamapim klia olsem evolusen em i tru. O ol inap harim ol nius olsem ol saientis i bin kamapim wanpela samting i gat laip. Helpim ol yangpela na bai ol yet i ken skelim olsem ol dispela tok i tru o nogat. Yupela papamama, yusim ol dispela atikol long helpim ol pikinini long daunim pret na strongim bel taim ol i stori long as na ol i bilip olsem i gat Man i bin wokim olgeta samting.—Ritim 1 Pita 3:15.

19. Yumi olgeta i holim wanem gutpela wok?

¹⁹ Oganaisesen bilong Jehova i redim planti buk na nius we i stori long ol samting God i bin wokim, na dispela i helpim yumi long kisim save long ol gutpela pasin bilong Jehova. Olgeta dispela samting i kirapim yumi long litimapim nem bilong Jehova. (Sng. 19:1, 2) Yumi holim wanpela wok i gutpela tru. Olsem, yumi givim ona na biknem we i stret tru long givim long Jehova, em Man Bilong Wokim olgeta samting!—1 Tim. 1:17.