1. Planti man i gat wanem tingting long wokboi nating? Olsem wanem dispela i no wankain long wokboi em Rom 12:11 i tok long en?

 LONG tingting bilong planti man, wokboi em man ol narapela i save bosim na mekim hatpela pasin long em. Wankain samting i no painim man husat i stap olsem wokboi bilong God. Tasol Baibel i tok ol Kristen i ken makim olsem em i laik stap wokboi bilong wanpela gutpela Bosman. Taim aposel Pol i kirapim ol Kristen long “stap olsem wokboi [o sleiv] i mekim wok bilong Jehova,” em i tokim ol long mekim wok bilong God, long wanem, ol i laikim Em. (Rom 12:11) Dispela kain wokboi i save mekim wanem ol wok? Yumi mas mekim wanem na bai yumi no kamap wokboi nating, o sleiv, bilong Satan na dispela graun em i bosim? Na yumi inap kisim wanem ol gutpela samting taim yumi stap wokboi bilong Jehova na mekim gut wok bilong em?

2. (a) Bilong wanem sleiv long lain Israel inap mekim disisen long stap yet olsem sleiv? (b) Sapos sleiv i larim bosman i mekim hul long yau bilong em, dispela i makim wanem samting?

² Lo em God i givim long ol Israel i helpim yumi long kliagut long ol samting wokboi bilong Jehova i mas mekim. Long lain Israel, bosman i save larim wokboi i go fri taim wokboi i mekim wok inap 7-pela yia pinis. (Kis. 21:2) Tasol sapos wanpela sleiv i laikim tumas bosman na em i laik stap yet olsem sleiv bilong em, orait em i ken i stap yet. Lo Bilong Jehova i tok orait long dispela pasin. Bosman i mas kisim sleiv i go klostu long dua o long pos bilong dua na kisim nil na mekim hul long yau bilong sleiv. (Kis. 21:5, 6) Bilong wanem bosman i mas mekim hul long yau bilong sleiv? Long Tok Hibru, pasin bilong bihainim tok i makim olsem man i harim tok na putim yau. Olsem na taim sleiv i larim bosman i mekim hul long yau bilong em, dispela i makim olsem sleiv i laik bihainim yet tok bilong bosman na mekim wok bilong em. Dispela i wankain long dediket bilong yumi. Taim yumi dediket long Jehova, i olsem yumi tok yumi redi long bihainim tok bilong em, long wanem, yumi laikim em tru.

3. Wanem samting i kirapim yumi long dediket long God?

 ³ Paslain long yumi kisim baptais, yumi mekim disisen long mekim wok bilong Jehova, olsem kamap sleiv bilong em. Taim yumi dediket long Jehova, yumi tok promis olsem yumi bai bihainim tok bilong em na mekim laik bilong em. I no gat man i fosim yumi long mekim olsem. Taim ol yangpela tu i baptais, em laik bilong ol yet na ol i mekim olsem, na i no olsem ol i laik amamasim tasol papamama bilong ol. Yumi olgeta wan wan i mekim disisen bilong yumi yet long dediket long Bosman bilong yumi long heven, em Jehova, long wanem, yumi laikim em tru. Aposel Jon i tok: “Pasin bilong laikim God i olsem, yumi bihainim ol lo bilong en.”—1 Jon 5:3.

4. Yumi mas mekim wanem bilong “kamap wokboi bilong stretpela pasin”?

⁴ Yumi tenkyu tru olsem Jehova i givim yumi ol samting yumi nidim bilong i stap sleiv bilong em! Bilip bilong yumi long ofa bilong Krais long baim bek ol man i opim rot na yumi no stap moa olsem sleiv bilong sin. Dispela i makim olsem maski yumi no gutpela olgeta, yumi mekim disisen long bihainim tok bilong Jehova na Jisas, na larim ol i stap olsem ol Bosman bilong yumi. Pol i bin stori gut long dispela samting long wanpela pas bilong em. Em i tok: “Yupela tu i mas i gat dispela tingting: Long pasin bilong mekim sin yupela i stap olsem man i dai pinis, tasol yupela i stap laip bai yupela i ken mekim laik bilong God long rot bilong Krais Jisas.” Na bihain em i tok lukaut olsem: “Ating yupela i no save, a? Sapos yupela i givim yupela yet long wanpela man olsem wokboi i bihainim tok bilong em, orait yupela i stap wokboi bilong em. Olsem na sapos yupela i stap wokboi bilong sin, orait dai bai painim yupela. Tasol sapos yupela i stap wokboi bilong God na bihainim tok bilong em, orait bai yupela i kamap stretpela man. Bipo yupela i stap wokboi bilong sin, tasol nau long bel bilong yupela, yupela i bihainim dispela tok God i bin putim yupela i stap aninit long en. Na mi tenkyu long God long dispela samting. Yes, yupela i no stap kalabus moa long sin, nogat. Yupela i kamap wokboi bilong stretpela pasin.” (Rom 6:11, 16-18) Tingim, Pol i tok yumi mas bihainim tok “long bel bilong [yumi].” Olsem na taim yumi dediket long God, yumi “kamap wokboi bilong stretpela pasin.”

5. Yumi olgeta i laik winim wanem pait? Bilong wanem?

⁵ Yumi stap ol sleiv bilong God na yumi dediket pinis long em, olsem na i gat 2-pela pait em yumi mas winim. Namba 1, yumi mas pait long sin i stap long skin bilong yumi. Pol tu i bin mekim dispela pait. Em i tok: “Long bel bilong mi, mi laikim tumas lo bilong God. Tasol mi lukim olsem narapela lo i stap insait long bodi bilong mi. Na dispela lo i save pait wantaim lo i stap long tingting bilong mi. Na dispela lo bilong sin i wok long kalabusim mi.” (Rom 7:22, 23) Yumi no gutpela olgeta, olsem na oltaim yumi mas mekim pait bilong daunim ol laik nogut bilong skin. Aposel Pita i tok: “Yupela i mas wokabaut olsem ol manmeri i stap fri. Tasol dispela pasin bilong i stap fri i no ken i stap olsem rot bilong mekim pasin nogut, nogat. Yupela i mas wokabaut olsem ol wokboi bilong God.”—1 Pita 2:16.

6, 7. Olsem wanem Satan i mekim ol samting bilong dispela graun i luk nais?

⁶ Namba 2, yumi mas mekim pait long sakim pasin bilong dispela graun em ol spirit nogut i bosim. Satan em hetman bilong dispela graun, na em i save mekim olgeta kain samting bilong kirapim yumi long lusim Jehova na Jisas. Satan i laik pulim yumi long bihainim pasin bilong dispela graun na bai yumi kamap sleiv bilong em. (Ritim Efesus 6:11, 12.) Wanpela rot em olsem, em i mekim ol samting bilong dispela graun i luk nais long ai bilong yumi. Aposel Jon i tok lukaut olsem: “Sapos man i laikim pasin bilong dispela graun, pasin bilong laikim Papa i no stap long em, long wanem, olgeta samting bilong dispela graun, olsem laik nogut bilong bel na pasin bilong aigris na pasin bilong hambak long mani kago, ol i no kam long Papa, nogat, ol i kam long dispela graun.”—1 Jon 2:15, 16.

⁷ Long olgeta hap bilong graun, ol man i laik bungim planti moa mani kago. Satan i kirapim ol man long ting olsem ol bai stap amamas sapos ol i gat planti mani. Ol bikpela bikpela stua i stap long olgeta hap. Ol edvetaismen i kirapim ol man long ting olsem em i bikpela samting tru long kisim  planti mani kago, na mekim planti samting bilong kisim amamas. Olsem: Sampela kampani i save kirapim ol man long bung wantaim ol man husat i bihainim pasin bilong graun, na ol i ken raun i go long ol naispela ples. Yes, long olgeta hap yumi harim ol tok na lukim ol samting we i kirapim yumi long bihainim pasin bilong ol man bilong dispela graun.

8, 9. Sapos yumi no was gut, yumi inap kamap sleiv bilong wanem samting? Bilong wanem?

⁸ Long taim bilong ol aposel, Pita i tok lukaut long ol Kristen olsem sampela insait long kongrigesen i stat long bihainim tingting bilong graun. Em i tok: “Ol i ting pasin bilong dring na kaikai planti long san em i samting bilong amamas long en. Ol i olsem ol doti i pas long klos na ol mak i stap long pes. Ol i save amamas tru long kamapim ol bilip giaman bilong ol taim ol i kaikai wantaim yupela. Ol i hambak na mekim ol tok i no kamapim gutpela samting. Ol i bihainim ol laik bilong bodi na ol i bihainim pasin bikhet na i no sem. Na long dispela rot ol i pulim ol lain em ol i wok long lusim ol man i mekim pasin i no stret. Ol dispela man nogut i tok promis olsem ol man i bihainim tok bilong ol i ken kamap fri, tasol ol yet i stap wokboi bilong ol pasin nogut. Long wanem, sapos wanpela man i larim wanpela samting i bosim em, dispela man i stap olsem wokboi bilong dispela samting.”—2 Pita 2:13, 18, 19.

⁹ Sapos yumi laik kisim ol samting yumi “aigris” long en, orait yumi no inap i stap fri. Yumi bai kamap sleiv bilong Satan, em bosman bilong dispela graun. (1 Jon 5:19) Hevi inap painim yumi sapos yumi kamap sleiv bilong mani kago. Sapos dispela samting i kamap, yumi bai kalabus tru long en na i hatwok long abrusim.

10, 11. Long nau, Satan i save tagetim husat? Olsem wanem ol bikpela skul inap putim hevi long ol yangpela Kristen?

¹⁰ Long nau, Satan i save tagetim ol man i gat liklik save tasol. Em i save wok strong long pundaunim ol yangpela. Em i no save amamas taim wanpela yangpela, o ol narapela tu, i mekim disisen long kamap sleiv bilong Jehova. Satan i laik mekim na bai ol manmeri husat i dediket long Jehova, ol i lusim em na i no givim bel moa long mekim wok bilong em.

¹¹ Taim bosman i mekim hul long yau bilong sleiv, dispela sleiv inap pilim pen. Tasol bihain pen bai pinis, na hul long yau bai soim olgeta man olsem dispela sleiv i bin mekim disisen long stap wantaim bosman bilong em. Taim yangpela i mekim disisen i no wankain long ol narapela lain, dispela inap givim hatwok long em, i olsem em i pilim pen. Olsem: Satan i kirapim ol man long ting olsem, sapos ol i laik bai laip bilong ol i gat as tru bilong en, orait ol i mas kisim gutpela wok mani long dispela graun em i bosim. Tasol yumi mas tingim olsem, taim yumi putim Jehova i stap nambawan  tru long laip bilong yumi, long dispela rot tasol bai yumi mekim laip bilong yumi i gat as tru bilong en. Jisas i tok: “Ol man i hangre long kisim save long God, ol i ken amamas.” (Mat. 5:3) Ol Kristen i dediket, long wanem, ol i laik mekim laik bilong Jehova, na i no laik bilong Satan. Ol i save ritim Baibel na tingim tingim tok bilong en “long san na long nait.” (Ritim Song 1:1-3.) Tasol planti bikpela skul long nau i pulim bikpela haptaim, olsem na ol wokman bilong God i no gat taim long tingim tingim Tok Bilong God na mekim wok bilong Em.

12. Planti yangpela long nau inap mekim wanem disisen?

¹² Sapos wanpela Kristen wokboi i stap aninit long bosman bilong dispela graun, dispela inap putim bikpela hevi tru long em. Long namba 1 pas Pol i raitim long ol Korin, em i tok: “Olsem wanem? Yu bin stap wokboi taim God i bin singautim yu? No ken tingting planti long dispela. Tasol sapos yu gat rot long kamap fri, orait i gutpela yu mekim olsem.” (1 Kor. 7:21) Sapos Kristen i stap aninit long bosman bilong dispela graun na bosman i putim bikpela hevi long em, orait gutpela moa sapos dispela Kristen i lusim dispela bosman na kamap fri. Long nau, lo bilong planti kantri i makim hamas yia ol yangpela i mas i go long skul. Taim ol sumatin i pinisim skul, ol yet i mas mekim disisen. Ol bai kisim sampela skul moa, o nogat. Sapos wanpela Kristen i laik kisim bikpela skul na bai em inap kisim gutpela wok mani long dispela graun, orait em bai i no gat rot long i stap fri na mekim wok bilong Jehova long fultaim sevis.—Ritim 1 Korin 7:23.

13. Wanem kain skul i save helpim gut ol wokboi bilong Jehova?

¹³ Pol i bin tok lukaut long ol Kristen long Kolosi olsem: “Yupela lukaut, nogut wanpela i trapim yupela long rot bilong savetingting bilong ol man na tok giaman. Kastam bilong ol man i as bilong ol dispela samting na i stret wantaim ol bikpela tingting bilong graun, tasol i no stret wantaim ol tok Krais i skulim ol man long en.” (Kol. 2:8) Planti tisa i save skulim ol sumatin long ol ‘savetingting bilong ol man na tok giaman, em kastam bilong ol man i as bilong en.’ Taim ol sumatin i go long ol bikpela skul, ol i kisim ol dispela save na ol narapela save tu, tasol dispela i no save redim ol long mekim ol samting bilong lukautim ol yet long olgeta wan wan de. Tasol ol Kristen i save mekim disisen long kisim skul we i helpim ol long holim liklik kago inap long skel bilong ol na ol inap mekim wok bilong God. Ol i tingim gut tok Pol i givim long Timoti, em i tok: “Tru tumas, pasin bilong givim bel tru long God na tingting olsem ol samting yu holim pinis em inap long yu, dispela em i rot bilong kisim planti samting. Olsem na sapos yumi gat kaikai na laplap na haus samting, orait yumi ken ting ol dispela samting em inap long yumi.” (1 Tim. 6:6, 8) Ol Kristen tru i no tingting long kisim ol digri na biknem bilong yunivesiti, nogat. Ol i givim bel  tru long autim tok na bai ol inap ‘kisim ol pas i tokaut olsem ol i gutpela man.’—Ritim 2 Korin 3:1-3.

14. Taim yumi ritim Filipai 3:8, yumi kisim wanem skul long tingting bilong Pol long stap sleiv bilong God na Krais?

¹⁴ Yumi inap kisim skul long stori bilong Pol. Gamaliel, tisa bilong Lo Bilong Ol Juda, em i bin skulim Pol. Skul em Pol i bin kisim i kain olsem skul ol man i kisim long yunivesiti long nau. Tasol Pol i gat wanem tingting taim em i tingim skul em i bin kisim na skelim wantaim gutpela wok em i mekim long stap sleiv bilong God na Krais? Em i tok: “Mi tingim olgeta samting i olsem samting nating, na as bilong dispela tingting em nambawan gutpela save long Krais Jisas, Bikpela bilong mi.” Na em i tok moa olsem: “Long em tasol, mi orait long olgeta samting i lus na mi tingim ol olsem pipia nating. Mi mekim olsem bai mi ken kisim Krais.” (Fili. 3:8) Tingting bilong Pol inap helpim ol yangpela Kristen na ol papamama bilong ol long mekim gutpela disisen long skul ol yangpela bai kisim. (Lukim ol piksa.)

15, 16. Oganaisesen bilong Jehova i save givim wanem skul long ol man? Wanem wok bilong dispela skul?

¹⁵ Olsem wanem long tingting na pasin bilong ol manmeri long planti bikpela skul? Planti taim ol i pilim olsem ol i stap fri long mekim pasin bikhet na soim olsem ol i kros long gavman na ol narapela lain husat i mekim wok bos. (Efe. 2:2) Tasol oganaisesen bilong Jehova i givim nambawan gutpela skul insait long ol kongrigesen, we olgeta manmeri i stap bel isi. Long olgeta wik, yumi olgeta inap kisim helpim i kam long Skul Tiokratik Bilong Autim Tok. Na tu, i gat ol narapela skul yumi inap kisim helpim long en. Olsem: I gat Baibel Skul Bilong Ol Singel Brata, na dispela i bilong skulim ol singel brata husat i mekim wok painia, na i gat Baibel Skul Bilong Ol Marit Kristen, na dispela i bilong skulim ol marit husat i mekim wok painia wantaim. Ol dispela skul i helpim yumi long bihainim tok bilong Jehova, em Bosman bilong yumi long heven.

¹⁶ Yumi inap painim ol gutpela save bilong Baibel long Watch Tower Publications Index o long Watchtower Library long CD-ROM. Nambawan bikpela wok bilong skul yumi kisim long Baibel em long helpim yumi long lotuim Jehova. Dispela skul i lainim yumi long olsem wanem yumi inap helpim ol narapela long kamap pren bilong God. (2 Kor. 5:20) Na ol manmeri yumi skulim, ol tu bai skulim ol arapela.—2 Tim. 2:2.

17. Taim yumi mekim disisen long kisim nambawan gutpela skul, dispela i helpim yumi olsem wanem?

¹⁷ Long tok piksa bilong Jisas long mani talen, bosman i tok amamas long 2-pela wokboi husat i mekim gut wok bilong ol. Dispela i mekim na tupela i amamas na bosman tu i amamas. Bilong soim olsem em i orait long tupela, em i makim tupela long lukautim planti wok moa. (Ritim Matyu 25:21, 23.) Sapos yumi mekim disisen long kisim nambawan gutpela skul, yumi bai i stap amamas na laip bilong yumi bai i gat as tru bilong en. Olsem: Michael i kisim ol gutpela mak tru long skul. Taim ol tisa i singautim em i go bilong toktok wantaim em olsem em inap i go long yunivesiti, ol i kirap nogut olsem Michael i no gat laik long kisim bikpela skul moa. Em i kisim sotpela trening we i redim em long mekim wok mani, na tu, em inap yusim dispela save long helpim em yet. Dispela skul i opim rot long em inap lukautim em yet na mekim wok painia. Olsem wanem? Em i pilim olsem em i mekim rong disisen? Em i tok skul em i bin kisim long Baibel taim em i mekim wok elda insait long kongrigesen i bin helpim em tru. Em i tok: “Ol blesing mi kisim na ol gutpela wok mi mekim i winim tru mani mi inap kisim. Mi amamas tru olsem mi no bin mekim disisen long kisim bikpela skul moa.”

18. Bilong wanem yumi mas mekim disisen long kisim nambawan gutpela skul?

¹⁸ Nambawan gutpela skul i helpim yumi long kisim save long laik bilong God na i helpim yumi long i stap sleiv bilong Jehova. Dispela skul i helpim yumi long “lusim dispela kalabus bilong bagarap,” na bihain yumi inap “kisim dispela pasin bilong i stap fri i nambawan tru olsem bilong ol pikinini bilong God.” (Rom 8:21) Bikpela samting tru em olsem, em nambawan rot bilong soim olsem yumi laikim tumas Bosman bilong yumi, Jehova.—Kis. 21:5.