LONG yia 1929, namel long Ogas na Septemba, winim 10 tausen pablisa i mekim bikpela wok tru bilong autim tok inap 9-pela de long olgeta hap bilong Amerika. Ol i tilim 250 tausen buk na nius. Inap olsem 1 tausen kolpota, em nem bilong ol painia long bipo, ol tu i mekim dispela bikpela wok bilong autim tok bilong Kingdom. Namba bilong ol kolpota i go antap tru! Nius Bulletin a i tok “i hatwok long bilip” olsem planti manmeri moa i insait long wok painia kirap long 1927 i go inap 1929.

Long pinis bilong 1929, bikpela hevi i bin kamap long sait bilong mani. Long Oktoba 29, 1929, em de ol i kolim olsem Black Tuesday, Stok Ekseins long New York i bagarap na dispela i kamapim bikpela hevi tru long sait bilong mani na wok bisnis. Ol fam, ol bikpela faktori, na planti tausen benk i pas. Planti milion manmeri i lusim wok mani bilong ol. Long 1933, long olgeta wan wan de ol i save rausim 1 tausen manmeri long haus ol i stap long en, long wanem, ol i no bekim olgeta dinau bilong haus.

Olsem wanem ol lain bilong autim tok fultaim inap lukautim ol yet long dispela taim bilong hevi? Wanpela samting i bin helpim ol em haus kar. I no gat wok long baim rent na takis bilong haus kar, olsem na haus kar i helpim planti painia long mekim yet wok autim tok na ol i no tromoi bikpela mani long baim ol samting. b Na long taim bilong kibung, ol haus kar i stap olsem ol rum bilong hotel we i fri long yusim. Long 1934, nius Bulletin i stori long sampela rot bilong wokim liklik haus kar we i gat ol gutpela samting olsem, paip wara, stov, bet ol i save foldim, na masin bilong mekim haus i stap hot long taim bilong kol.

Ol gutpela pablisa long olgeta hap bilong graun i kirap long wokim ol haus kar. Wanpela brata, Victor Blackwell, i tok: “Noa i no gat save long wokim bot, na mi no gat save long wokim wanpela haus kar.” Maski i olsem, Victor i wokim wanpela haus kar.

Avery na Lovenia Bristow i gat wanpela haus kar. Avery i tok: “Mi olsem trausel i stap insait long sel—oltaim haus bilong mi i stap wantaim mi.” Avery na Lovenia i mekim wok painia wantaim Harvey na Anne Conrow. Insait long haus kar bilong Harvey na Anne, ol i putim kolta long ol liklik pepa na stikim long wol. Olgeta taim ol pepa i save lus na pundaun taim ol i muvim haus kar bilong ol. Avery i tok: “I no bin i gat kain haus kar olsem long bipo, na long nau tu i no gat kain haus kar olsem!” Avery i tok, Harvey na Anne na 2-pela pikinini man bilong ol, em ol “famili i save stap amamas tru.” Harvey Conrow i tok, “Mipela i no bin sot long wanpela samting, na mipela i pilim olsem taim mipela i mekim wok bilong Jehova, em i lukautim gut mipela na mipela i stap gut tru.” Bihain, Harvey na Anne wantaim 2-pela pikinini man bilong ol, olgeta i go long Skul Gileat na ol i kisim asainmen bilong i go mekim wok misineri long Peru.

Olgeta long famili Battaino tu i mekim wok painia. Taim Giusto na Vincenza i painimaut olsem ol bai gat pikinini, ol i senisim bikpela kar bilong ol na mekim i kamap haus. Orait, taim ol i skelim dispela haus kar wantaim ol haus sel ol i bin stap long en long pastaim, dispela haus kar “i luk olsem naispela hotel.” Taim  liklik pikinini gel bilong ol i bon, ol i stap yet long asainmen ol i laikim tru, na ol i autim tok long ol lain Itali long Amerika.

Planti man i amamas long harim gutnius, tasol ol rabisman na ol man i no gat wok mani, ol i no gat mani bilong givim olsem kontribiusen bilong ol buk na nius bilong Baibel. Olsem na ol i save givim kain kain samting olsem kontribiusen. Tupela painia i wokim lista bilong ol samting ol manmeri i givim olsem kontribiusen, na lista bilong ol i soim 64 kain kain samting. Lista i luk “olsem lista bilong ol samting i stap long wanpela stua.”

Fred Anderson i bungim wanpela fama na fama i laikim na kisim sampela buk bilong yumi, na em i givim aiglas bilong mama bilong em olsem kontribiusen. Taim Fred i go kamap long narapela fam, wanpela man i laikim ol buk na nius bilong yumi, tasol em i tok, “Mi no gat aiglas bilong ritim ol dispela buk.” Tasol taim em i putim aiglas em Fred i bin kisim long narapela fama, em inap ritim gut ol buk, olsem na em i amamas na givim kontribiusen bilong ol dispela buk na aiglas.

Herbert Abbott i save karim liklik haus kakaruk long kar bilong em. Taim em i tilim ol buk na nius na kisim 3-pela o 4-pela kakaruk, em i save bringim i go long maket na salim na yusim mani em i kisim long baim fiul bilong kar. Em i tok: “Sampela taim mipela i save sot tru long mani, tasol mipela i no larim dispela i pasim mipela. Sapos mipela i gat fiul long kar, mipela bai mekim wok yet, na mipela bai bilip long Jehova na trastim em.”

Maski i gat bikpela hevi tru long dispela taim bipo, ol manmeri bilong Jehova i bin bilip tru long em na dispela i helpim ol long stap strong na karim hevi. Wanpela taim, bikpela win na ren i kamap na Maxwell na Emmy Lewis i lusim haus kar bilong ol na ranawe, na long dispela taim stret wanpela diwai i pundaun na brukim haus kar long 2-pela hap. Maxwell i tok: “Ol dispela samting i no pasim rot bilong mipela, em ol liklik hevi tasol, na mipela i no tingting long lusim asainmen bilong mipela. Planti wok i stap yet, na mipela i laik mekim ol dispela wok.” Maxwell na Emmy i tingting strong long stap yet na mekim wok, olsem na sampela gutpela pren i helpim ol long wokim gen haus kar.

Long taim bilong hevi long nau, planti milion Witnes Bilong Jehova i save bihainim wankain pasin bilong daunim laik bilong ol yet na redi long helpim ol narapela. Wankain olsem ol dispela painia bilong bipo, yumi tingting strong long mekim yet wok bilong autim tok i go inap long taim Jehova i tok dispela wok i pinis.