1, 2. Bilong wanem Jehova i tok em i stap olsem wasman bilong sipsip?

 JEHOVA i tok em i stap olsem wasman bilong sipsip. (Ese. 34:11-14) Dispela i helpim yumi long kliagut long pasin bilong Jehova. Gutpela wasman i save tingim gut ol sipsip em i lukautim, na em i pilim olsem laip bilong ol i stap long han bilong em. Em i save bringim ol i go long hap i gat kaikai na wara, na taim mama sipsip i karim nupela pikinini sipsip, wasman i save putim pikinini sipsip long bros na karim na wokabaut. (Sng. 23:1, 2; Ais. 40:11) Em i save was long ol sipsip long san na nait na em i save lukautim ol na bai ol wel animal i no ken bagarapim ol. (1 Sml. 17:34, 35; Luk 2:8) Sapos sampela sipsip i lus, orait em i save go painim ol na kisim bek ol, na em i save lukautim ol sipsip i kisim bagarap.—Ese. 34:16.

² Long bipo, planti manmeri long lain bilong God i mekim wok bilong lukautim ol sipsip na mekim wok gaden. Olsem na ol i save gut long as na Jehova i kolim em yet olsem wasman bilong sipsip. Ol i save olsem ol i mas lukautim na tingim gut ol sipsip na bai ol sipsip i ken stap gut na kamap planti. Olsem tasol, ol manmeri i nidim gutpela lukaut na tok bilong stiaim ol i kam long Jehova. (Mak 6:34) Ol manmeri bai kisim planti hevi sapos Jehova i no stiaim na lukautim ol. Ol i no save long wanem pasin i stret na wanem pasin i no stret, na i no gat man bilong lukautim ol. Ol i olsem “ol sipsip i no gat wasman.” (1 Kin. 22:17) Tasol ol manmeri husat i larim Jehova i stap olsem wasman bilong ol, ol i gat olgeta samting ol i nidim.

3. Bai yumi kisim save long wanem ol samting long dispela stadi?

³ Yumi tu i kliagut long olsem wanem Jehova i stap olsem wasman. Long nau, em i save lukautim gut tru ol manmeri bilong em. Yumi bai kisim save long olsem wanem em i save stiaim na lukautim yumi long ol samting yumi nidim. Bihain, yumi bai stori long ol samting yumi mas mekim  na bai yumi inap kisim helpim long ol tok Jehova i givim bilong stiaim na lukautim yumi.

4. Olsem wanem Jisas i lukautim ol sipsip bilong Jehova?

⁴ Jehova i bin makim Jisas long i stap Het bilong kongrigesen Kristen. (Efe. 1:22, 23) Jisas, “gutpela wasman bilong sipsip,” em i wankain olsem Papa bilong em. Jisas i laikim ol sipsip na em i save lukautim ol gut. Na tu, em i bin givim laip bilong em long helpim ol sipsip. (Jon 10:11, 15) Ofa bilong baim bek ol man em gutpela presen tru bilong helpim olgeta lain man! (Mat. 20:28) Samting Jehova i tingting pinis long kamapim em olsem, em i laik bai olgeta man husat i bilip long Jisas, “ol inap abrusim bagarap na kisim laip oltaim”!—Jon 3:16.

5, 6. (a) Jisas i bin makim husat long lukautim ol sipsip bilong em? Sapos ol sipsip i laik stap aninit long lukaut bilong Jisas, orait ol i mas mekim wanem? (b) Yumi gat wanem bikpela risen long bihainim tok bilong ol elda?

⁵ Olsem wanem ol sipsip i soim olsem Jisas Krais em i Wasman bilong ol? Jisas i tok: “Ol sipsip bilong mi i save putim yau long nek bilong mi, na mi save long ol na ol i save bihainim mi.” (Jon 10:27) Taim ol sipsip i putim yau long nek bilong Gutpela Wasman, oltaim ol bai bihainim tok bilong em. Na tu, ol bai bihainim tok bilong ol man em i makim bilong helpim em long lukautim ol sipsip. Long pastaim, Jisas i bin makim ol aposel na ol disaipel long lukautim lain sipsip bilong em. Em i tokim ol long skulim na givim kaikai long “ol liklik sipsip” bilong em. (Mat. 28:20; ritim Jon 21:15-17.) Taim ol manmeri i harim gutnius, planti moa i kamap disaipel bilong Krais. Olsem na Jisas i stretim rot na bai i gat ol strongpela wasman bilong lukautim ol kongrigesen.—Efe. 4:11, 12.

⁶ Bihain, Pol i raitim pas i go long ol elda long kongrigesen long Efesus na em i tok: “Holi spirit i bin makim yupela olsem wasman bilong ol bai yupela i ken lukautim kongrigesen bilong God.” (Apo. 20:28) Long nau tu, holi spirit i makim ol elda. Bilong wanem yumi inap tok olsem? Long wanem, ol elda i winim ol mak i stap long Baibel, na holi spirit yet i as bilong ol tok i stap long Baibel. Olsem na taim yumi bihainim tok bilong ol elda, yumi soim rispek long Jehova na Jisas, em 2-pela nambawan Wasman. (Luk 10:16) Dispela em bikpela risen na yumi mas bihainim tok bilong ol elda. Tasol i gat ol narapela risen tu.

7. Olsem wanem ol elda i helpim yu long strongim pasin pren bilong yu wantaim Jehova?

⁷ Oltaim ol elda i save yusim ol tok bilong Baibel long strongim na stiaim ol bratasista. Ol elda i no save tokim ol bratasista long wanem pasin ol i mas bihainim long laip bilong ol, nogat. (2 Kor. 1:24) Ol i laik helpim ol bratasista long bihainim ol stiatok bilong Baibel na mekim disisen bilong ol yet. Long dispela rot, ol elda i helpim kongrigesen long i stap wanbel na bel isi. (1 Kor. 14:33, 40) Baibel i tok long ol elda olsem: “Oltaim ol i was long yupela.” Dispela i makim olsem ol elda i laik helpim olgeta wan wan insait long kongrigesen long stap klostu long Jehova. Olsem na ol i save kirap kwik long helpim wanpela brata o sista husat i mekim samting i no stret o klostu em i laik pundaun long mekim rong. (Gal. 6:1, 2; Jut 22) I gat planti gutpela risen na yumi mas “bihainim tok bilong ol man i go pas” long yumi.—Ritim Hibru 13:17.

8. Olsem wanem ol elda i save lukautim gut kongrigesen?

⁸ Aposel Pol i stap gutpela wasman na em i givim tok lukaut long ol brata long Kolosi, em i tok: “Yupela lukaut, nogut wanpela i trapim yupela long rot bilong savetingting bilong ol man na tok giaman. Kastam bilong ol man i as bilong ol dispela samting na i stret wantaim ol bikpela tingting bilong graun, tasol i no stret wantaim ol tok Krais i skulim ol man long en.” (Kol. 2:8) Dispela tok lukaut i helpim yumi long luksave long narapela risen na em i bikpela samting long yumi mas bihainim tok bilong ol elda.  Ol i lukautim ol brata na bai ol narapela i no ken pulim ol long lusim Jehova. Aposel Pita i bin tok lukaut olsem, taim ol Kristen i no stap strong long bilip, “ol giaman profet” na “ol giaman tisa” bai i traim long pulim ol long sakim tok bilong Jehova. (2 Pita 2:1, 14) Long nau, ol elda i mas givim wankain tok lukaut taim ol i lukim olsem kain samting olsem inap kamap. Ol elda em ol Kristen husat i bihainim gutpela tingting na ol i save gut long ol samting i save painim ol man. Ol i bin kamap elda, long wanem, ol i soim olsem ol i kliagut long ol tok bilong Baibel na ol i winim mak bilong skulim ol narapela long tok i tru bilong Baibel. (1 Tim. 3:2; Tai. 1:9) Ol i stap strong long tok i tru, na ol i bihainim gutpela tingting na skelim stret ol samting na holim savetingting i kam long Baibel, na dispela i helpim ol long stiaim gut ol bratasista.

9. Olsem wanem Jisas i givim kaikai na stiaim kongrigesen long nau?

⁹ Jehova i yusim oganaisesen bilong em long skulim na stiaim lain brata long olgeta hap bilong graun. Yumi save kisim planti gutpela skultok bilong Baibel long ol buk na nius bilong yumi. Sampela taim, oganaisesen i save givim stret ol tok bilong stiaim ol elda long kongrigesen. Ol elda i save kisim ol dispela tok long rot bilong ol pas o ol tok i kam long ol wasman raun. Long olgeta dispela rot, ol sipsip i save kisim ol tok bilong stiaim ol.

10. Gutpela wasman i save mekim wanem taim wanpela brata o sista i lusim kongrigesen?

¹⁰ Ol gutpela wasman i gat wok long tingim gut na lukautim ol sipsip. Ol elda Kristen i  tingim tru ol bratasista em bilip bilong ol i no strong moa, o ol i mekim ol bikpela rong. (Ritim Jems 5:14, 15.) Ating sampela i lusim kongrigesen na ol i no mekim moa wok bilong God. Gutpela wasman bai i mekim wanem bilong helpim kain lain olsem? Em bai mekim olgeta samting em inap mekim long painim ol na kirapim ol long kam bek long kongrigesen. Jisas i tok: “Papa bilong mi long heven i no laik bai wanpela bilong ol dispela man i no gat nem i lus.”—Mat. 18:12-14.

11. Bilong wanem sampela inap pilim hatwok long bihainim tok bilong ol elda?

¹¹ Jehova na Jisas em ol Wasman i gutpela olgeta. Ol i yusim ol man bilong graun, em ol i sinman, long stap olsem wasman na lukautim kongrigesen. Ating dispela i mekim na i hatwok long sampela bratasista long bihainim tok bilong ol elda. Ol inap kisim tingting olsem: ‘Ol elda tu ol i sinman, wankain olsem mipela. Bilong wanem bai mipela i bihainim tok kaunsel bilong ol?’ Em tru olsem ol elda tu ol i sinman, tasol yumi no ken tingim ol pasin kranki na popaia bilong ol.

12, 13. (a) Long bipo, ol gutpela wokman bilong God i bin mekim wanem ol popaia? (b) Bilong wanem Jehova i larim stori bilong ol popaia bilong ol gutpela wokman bilong em i stap long Baibel?

¹² Baibel i tokaut stret long ol popaia bilong ol man em Jehova i bin yusim ol long go pas long ol manmeri bilong em long bipo. Olsem: God i bin makim Devit long kamap king bilong Israel, tasol bihain Devit i mekim sin. Devit i mekim pasin pamuk wantaim wanpela maritmeri na bihain em i kilim i dai man bilong dispela meri. (2 Sml. 12:7-9) Na tingim tu aposel Pita. Maski em i mekim bikpela wok insait long kongrigesen Kristen, em tu i bin mekim ol bikpela rong. (Mat. 16:18, 19; Jon 13:38; 18:27; Gal. 2:11-14) Kirap long taim bilong Adam i kam inap long nau, olgeta manmeri i gat sin. Jisas tasol em man i gutpela olgeta.

¹³ Bilong wanem Jehova i larim stori bilong ol popaia bilong sampela gutpela wokman bilong em i stap long Baibel? Wanpela risen em olsem, Jehova i laik soim olsem em inap yusim ol sinman long lukautim ol manmeri bilong em. Jehova i bin mekim olsem long bipo yet na i kam inap long nau. Ol elda bilong nau tu ol i sinman, olsem na yumi no ken tingim ol pasin kranki bilong ol na komplein long wok ol i mekim o luk daun long wok bos bilong ol. Jehova i laik bai yumi mas rispektim na bihainim tok bilong ol elda.—Ritim Kisim Bek 16:2, 8.

14, 15. Yumi inap kisim wanem skul long rot Jehova i bihainim long givim tok long ol manmeri bilong em long bipo?

¹⁴ Em i bikpela samting tru long yumi mas bihainim tok bilong ol elda. Bilong wanem? Tingim rot em Jehova i bin yusim bilong givim tok long ol manmeri bilong em na bai ol i ken abrusim ol bagarap long bipo. Olsem: Taim lain Israel i lusim Isip, God i yusim Moses na Aron long givim ol bikpela toksave long ol manmeri. Na tu, lain Israel i mas bihainim tok na bai ol inap abrusim bagarap bilong namba 10 hevi. Ol i mas wokim wanpela spesel kaikai, kilim i dai wanpela sipsip, na kisim sampela blut bilong en na peintim long 2-pela pos bilong dua bilong haus. Yu ting God i bin toktok stret wantaim ol manmeri long dispela taim? Nogat. God i givim tok long Moses, na Moses i givim tok long ol hetman, na ol hetman i givim dispela tok long ol manmeri. (Kis. 12:1-7, 21-23, 29) Long dispela rot, Jehova i yusim Moses na ol hetman long stiaim ol manmeri bilong em. Long nau, Jehova i yusim ol elda long stiaim lain bilong em.

¹⁵ Ating yu inap tingim planti narapela stori long Baibel we i kamapim olsem Jehova i bin yusim ol man bilong graun na ol ensel long givim tok long ol manmeri bilong em. Planti taim, ol dispela tok i bin helpim ol manmeri long abrusim bagarap. God i bin makim ol narapela long  stap olsem ol mausman bilong em na tokim lain bilong em long ol samting ol i mas mekim long taim nogut. Yumi ken bilip tru olsem Jehova bai mekim wankain pasin long ol manmeri bilong em long taim bilong Armagedon. Tru tumas, ol elda long nau husat i kisim wok long stap olsem mausman bilong Jehova o oganaisesen bilong em, ol i mas was gut na ol i no ken mekim nabaut long namba ol i holim.

16. Yumi mas putim yau long harim wanem ol tok?

¹⁶ Ol manmeri bilong Jehova i stap olsem “wanpela lain sipsip” na ol i gat “wanpela wasman,” em Jisas Krais. (Jon 10:16) Jisas i tok em bai stap wantaim ol disaipel bilong em “olgeta de i go inap long pinis bilong dispela taim.” (Mat. 28:20) Jisas i stap King long heven na em i kontrolim olgeta samting we bai kamap paslain long em i bagarapim graun bilong Satan. Olsem wanem yumi inap stap wanbel na stap gut insait long oganaisesen bilong God? Baibel i tok: “Taim yupela i wokabaut na yupela i paul long wanem rot yupela i mas bihainim, . . . orait em bai i stap baksait long yupela na em bai i tokim yupela long rot yupela i mas bihainim.” Dispela tok yumi harim i makim tok Jehova i kamapim insait long Baibel na tok em Jehova na Jisas i kamapim long rot bilong ol wasman em ol i bin makim.—Ritim Aisaia 30:21; Revelesen 3:22.

17, 18. (a) Wanem hevi inap painim ol manmeri bilong God? Yumi ken bilip tru long wanem samting? (b) Bai yumi kisim bekim bilong wanem askim long stadi i kamap bihain long dispela?

¹⁷ Baibel i tok Satan i “olsem wanpela laion i singaut strong na i painim ol man bilong kaikai.” (1 Pita 5:8) Satan i olsem wanpela wel animal i hangre na em i wok long bihainim ol sipsip, na em i laik bagarapim ol sipsip sapos wanpela sipsip i no gat strong o em i lusim ol narapela sipsip na i go longwe. Dispela em wanpela bikpela risen long oltaim yumi mas pas gut wantaim kongrigesen na stap klostu long man husat i stap olsem “wasman” na em i lukautim yumi. (1 Pita 2:25) Revelesen 7:17 i stori long lain husat bai abrusim bagarap long taim bilong traipela hevi tru. Dispela ves i kamapim olsem Jisas “bai lukautim ol olsem wasman i save lukautim sipsip. Em bai kisim ol i go long ol hulwara i gat wara bilong laip. Na God bai rausim olgeta aiwara long ai bilong ol.” Dispela em wanpela gutpela tok promis tru!

¹⁸ Wok bilong ol elda long lukautim kongrigesen em wanpela bikpela wok tru. Olsem wanem ol inap lukautim gut ol sipsip bilong Jisas? Bai yumi skelim bekim bilong dispela askim long neks stadi.