1, 2. (a) Wanem gutpela samting i save kamap taim wasman i lukautim gut ol sipsip? (b) Bilong wanem planti manmeri long taim bilong Jisas i stap olsem ol sipsip i no gat wasman?

 OL SIPSIP i save stap gut sapos wasman i mekim gut wok bilong lukautim ol. Wanpela buk i stori long wok bilong lukautim ol sipsip na i tok, sapos wasman i larim ol sipsip yet i stap na kaikai gras na em i no lukautim ol long ol narapela samting ol i nidim, orait insait long sampela yia tasol, ol sipsip bai i no gat strong moa na sik bai painim ol. Tasol sapos wasman i lukautim gut olgeta wan wan sipsip, orait lain sipsip olgeta bai i stap gut na sik i no inap painim ol.

² Olsem tasol, taim ol wasman Kristen i lukautim gut olgeta wan wan sipsip insait long kongrigesen, dispela bai helpim kongrigesen olgeta na ol bai stap gut. Tingim, Jisas i bin sori tru long bikpela lain manmeri, long wanem, “ol man i bin mekim nogut long ol na ol i stap nogut tru olsem ol sipsip i no gat wasman.” (Mat. 9:36) Bilong wanem ol manmeri long taim bilong Jisas i stap olsem ol sipsip i no gat wasman? Long wanem, ol man husat i gat wok long skulim ol long Lo Bilong God, ol i mekim hatpela pasin na bosim ol strong, na ol i no mekim ol samting ol i skulim ol man long en. Ol hetman bilong lotu i no laikim ol manmeri na ol i no mekim wok bilong lukautim ol, olsem na ol manmeri i pilim olsem i hatwok tru long mekim wok bilong God. Ol manmeri i pilim olsem ol i karim “ol samting i hevi tumas” long sol bilong ol.—Mat. 23:4.

3. Ol elda i mas tingim wanem samting taim ol i mekim wok bilong lukautim ol sipsip?

³ Long nau, ol elda i gat bikpela wok long mekim. Ol i lukautim ol sipsip bilong Jehova na Jisas. Ol dispela sipsip i dia tumas long Jisas, em “gutpela wasman,” olsem na em i givim laip bilong em long helpim ol sipsip. Em i “baim” ol long blut bilong em i “dia tumas.” (Jon 10:11; 1 Kor. 6:20; 1 Pita 1:18, 19) Oltaim ol elda i mas tingim olsem ol i stap aninit  long wok bos bilong Jisas Krais, em “bikpela wasman bilong ol sipsip.” Olsem na Jisas bai skelim wok ol i mekim long lukautim ol sipsip.—Hib. 13:20.

4. Bai yumi kisim wanem skul long dispela stadi?

⁴ Ol elda i mas mekim wanem pasin long ol sipsip? Olgeta insait long kongrigesen i mas “bihainim tok bilong ol man i go pas” long ol. Tasol Jehova i tokim tu ol elda olsem ol i no ken “strong long bosim ol manmeri bilong God.” (Hib. 13:17; ritim 1 Pita 5:2, 3.) Olsem wanem ol elda i ken “go pas” long ol sipsip na i no “strong long bosim ol”? O, olsem wanem ol elda i ken lukautim ol sipsip long ol samting ol i nidim na ol i no mekim wok nogut long namba em God i givim long ol?

5. Taim yumi ritim Aisaia 40:11, yumi kisim wanem skul long pasin bilong Jehova?

⁵ Profet Aisaia i tok long Jehova olsem: “Em i save was gut long ol lain manmeri bilong en, olsem wasman bilong sipsip i save lukautim ol sipsip bilong en. Wasman i save putim ol pikinini sipsip long bros na karim wokabaut. Na em i save wokabaut isi na soim rot long ol sipsip i gat liklik pikinini.” (Ais. 40:11) Dispela skripsa i stori long pasin Jehova i save mekim bilong lukautim ol man em bilip bilong ol i no strong moa o ol i nidim helpim. Em i save long ol samting olgeta wan wan insait long kongrigesen i nidim na em i amamas long helpim ol, wankain olsem wasman i save gut long ol samting em olgeta wan wan sipsip i nidim. Na tu, wankain olsem wasman i save putim pikinini sipsip klostu long bros bilong em, Jehova bai mekim gut bel bilong yumi na lukautim gut yumi taim bikpela traim o bikpela hevi i painim yumi. Jehova em i “Papa bilong marimari.”—2 Kor. 1:3, 4.

6. Olsem wanem elda inap bihainim pasin bilong Jehova?

⁶ Wasman insait long kongrigesen inap kisim gutpela skul tru long pasin bilong Papa bilong yumi long heven! Olsem Jehova, wasman i mas tingim gut ol sipsip na luksave long ol samting ol i sot long en. Sapos elda i save long ol hevi i painim ol sipsip, orait em bai save long wanem taim na olsem wanem em bai givim gutpela tok bilong strongim na helpim ol. (Snd. 27:23) Dispela i makim olsem elda i mas lusim sampela haptaim bilong toktok gut wantaim ol bratasista na putim gut yau long ol. I tru olsem elda i no inap subim nus long ol samting bilong ol arapela, tasol em i tingim gut ol samting em i lukim na harim insait long kongrigesen, na long pasin laikim em i lusim sampela haptaim long helpim “ol man i no gat strong.”—Apo. 20:35; 1 Tes. 4:11.

7. (a) Ol wasman i bin mekim wanem long ol sipsip bilong God long taim bilong Esekiel na Jeremaia? (b) Jehova i bin sakim ol wasman husat i no mekim gut wok bilong ol, na dispela inap givim wanem skul long yumi?

⁷ Tingim pasin em ol wasman bilong lain sipsip bilong God i bin mekim long taim bilong Esekiel na Jeremaia. Jehova i bin sakim ol dispela wasman, long wanem, ol i no bin lukautim ol sipsip bilong em. Jehova i tok: “Ol wel animal i bin kilim i dai ol dispela sipsip na kaikai. Na ol wasman mi bin makim bilong lukautim ol sipsip bilong mi, ol i no painim ol sipsip i lus. Ol i lukautim ol yet tasol na ol i no was long ol sipsip.” Hevi i painim ol manmeri, long wanem, ol lida bilong ol i gat pasin gridi na ol i tingim laik bilong ol yet tasol. (Ese. 34:7-10; Jer. 23:1) God i sakim ol lida bilong Kristendom, long wanem, ol tu i gat pasin gridi na ol i tingim laik bilong ol yet tasol. Jehova i bin sakim ol wasman husat i no mekim gut wok bilong ol, olsem na dispela inap givim wanem bikpela skul long ol elda? Ol i mas tingim na lukautim gut lain sipsip bilong Jehova.

8. Olsem wanem ol elda inap bihainim gutpela pasin bilong Jisas taim ol i givim tok kaunsel long ol bratasista?

⁸ Yumi sinman, olsem na sampela long kongrigesen i no inap save gut long samting Jehova i laik yumi mas mekim. Ating ol bai mekim ol  disisen we ol stiatok bilong Baibel i no as bilong en, o pasin bilong ol inap soim olsem ol i no kamap strong yet long tok i tru. Ol elda i mas mekim wanem? Ol i mas bihainim pasin bilong Jisas, olsem em i save mekim pasin isi na i no les kwik long ol disaipel bilong em. Planti taim ol disaipel i tok pait long husat bai stap namba 1 long Kingdom, tasol i no gat wanpela taim we Jisas i bin kros long ol. Em i wok yet long skulim ol na givim gutpela tok kaunsel long kirapim ol long bihainim pasin daun. (Luk 9:46-48; 22:24-27) Na tu, em i wasim lek bilong ol long skulim ol long pasin daun. Long nau, ol elda tu i mas bihainim pasin daun.—Ritim Jon 13:12-15; 1 Pita 2:21.

9. Ol aposel i bin holim wanem tingting kranki em Jisas i mas stretim?

⁹ Aposel Jems na Jon i ting olsem taim man i stap olsem wasman, dispela i makim olsem em bai bosim strong ol narapela. Ol i askim Jisas long givim ol bikpela namba long Kingdom. Tasol Jisas i stretim tingting bilong ol na em i skulim ol long holim stretpela tingting. Em i tok: “Yupela i save olsem ol king i bosim ol kantri, ol i save strong tumas long bosim ol manmeri, na ol bikman i save strong tumas long ol manmeri i mas bihainim olgeta tok bilong ol. Dispela i no ken stap olsem pasin bilong yupela. Nogat. Man i laik kamap bikman namel long yupela, em i mas stap wokman bilong yupela.” (Mat. 20:25, 26) Ol aposel i mas sakim laik bilong “strong tumas long bosim” ol bratasista. Olsem, i no long olgeta taim ol i mas tokim ol bratasista long samting ol i mas mekim.

10. Jisas i laik bai ol elda i bihainim wanem pasin long lukautim ol sipsip? Olsem wanem pasin bilong Pol i stap olsem gutpela eksampel?

¹⁰ Jisas i laik bai ol elda i bihainim wankain pasin olsem em i bin mekim long ol sipsip bilong em. Ol elda i mas redi long mekim wok bilong helpim ol bratasista na no ken stap olsem bos bilong ol. Olsem Jisas, aposel Pol i bihainim pasin daun na em i mekim wok bilong helpim ol narapela. Em i tokim ol elda long kongrigesen long Efesus olsem: “Yupela i save gut long ol pasin mi bin mekim namel long yupela stat long namba 1 de mi kam long provins Esia. Mi bihainim pasin daun tru na stap wokboi bilong Bikpela.” Pol i laik bai ol elda i bihainim pasin daun na ol i mas wok hat long helpim ol brata. Long olgeta samting Pol i mekim, em i soim ol elda long olsem wanem ol inap “helpim ol man i no gat strong.” (Apo. 20:18, 19, 35) Long wanpela pas em i raitim, em i tokim ol bratasista long Korin olsem em i no bosim bilip bilong ol, nogat. Em i wokman bilong God, wankain olsem ol, na em i laik helpim ol long stap amamas long mekim wok bilong God. (2 Kor. 1:24) Ol elda long nau i ken bihainim gutpela pasin bilong Pol long daunim ol yet na givim bel tru long mekim ol wok.

11, 12. Elda i ken mekim wanem bilong helpim brata long mekim disisen?

¹¹ Taim elda bilong kongrigesen i laik givim tok kaunsel, oltaim em i mas bihainim “trupela tok,” em tok bilong Baibel. (Tai. 1:9) Na tu, em i mas givim tok kaunsel “long pasin isi.” (Gal. 6:1) Gutpela wasman i no inap fosim ol bratasista long bihainim wanpela kain pasin, nogat, em i save kirapim ol long tingim pasin bilong ol long laikim tru Jehova na tok bilong Baibel na larim dispela i stiaim ol taim ol i mekim ol disisen bilong ol yet. Olsem: Taim wanpela brata i laik mekim wanpela bikpela disisen, elda inap toktok wantaim em long ol stiatok bilong Baibel o skelim wanpela atikol long ol buk na nius bilong yumi. Na tu, em inap tokim brata long skelim kain kain rot em inap bihainim, na kirapim brata long tingim olsem ol dispela rot bai mekim wanem long pasin bilong em long pas gut wantaim Jehova. Elda inap kirapim brata long tingim olsem em i bikpela samting long em i mas beten askim God long stiaim em paslain long em i  mekim wanpela disisen. (Snd. 3:5, 6) Taim elda i stori pinis wantaim brata, orait nau elda bai larim brata yet long mekim disisen.—Rom 14:1-4.

¹² Oltaim ol elda i mas bihainim tok bilong Baibel tasol taim ol i givim tok kaunsel. Olsem na em i bikpela samting tru long ol i mas mekim gutpela wok long Baibel na oltaim ol i mas larim tok bilong Baibel i stiaim tok ol i givim. Taim ol i mekim olsem, ol i mekim gut wok long namba em God i givim long ol. Ol i no stap olsem ol bosman bilong ol sipsip, nogat. Olgeta wan wan sipsip insait long kongrigesen bai bekim tok long Jehova na Jisas long ol disisen ol yet i mekim.—Gal. 6:5, 7, 8.

13, 14. Olsem wanem elda inap stap olsem gutpela piksa long ol sipsip i ken bihainim?

¹³ Pita i tokim ol elda olsem ol i “no ken strong long bosim” ol bratasista, nogat, ol i mas “stap gutpela piksa bilong ol dispela sipsip.” (1 Pita 5:3) Olsem wanem elda inap stap olsem gutpela piksa long ol sipsip i ken bihainim? Orait, tingim 2-pela pasin ol brata i mas bihainim bambai ol inap winim mak bilong mekim wok elda. Namba 1, brata i mas “bihainim gutpela tingting.” Dispela i makim olsem em i kliagut long ol stiatok bilong Baibel na em i save long olsem wanem em inap bihainim ol dispela stiatok long laip bilong em. Long taim bilong hevi, em i save stap isi na skelim gut ol samting paslain long em i mekim ol disisen. Namba 2, em i mas “bosim gut ol wanhaus bilong em.” Dispela i makim olsem sapos elda i gat famili, em i mas stap gutpela eksampel olsem man marit na papa, long wanem, “sapos man i no save long pasin bilong bosim gut meri pikinini bilong em yet, orait olsem wanem bai em i lukautim gut kongrigesen bilong God?” (1 Tim. 3:1, 2, 4, 5) Ol bratasista insait long kongrigesen i pilim olsem ol inap trastim ol elda husat i gat ol dispela pasin.

¹⁴ Ol elda i stap olsem gutpela eksampel taim ol i go pas long mekim wok autim tok, olsem Jisas i bin mekim. Taim Jisas i stap long graun, wok bilong autim gutnius bilong Kingdom em bikpela samting long laip bilong em, na em i skulim ol disaipel long olsem wanem ol inap mekim dispela wok. (Mak 1:38; Luk 8:1) Long nau, ol pablisa i save amamas long mekim wok autim tok wantaim ol elda. Ol i lukim pasin bilong ol elda long givim bel tru long mekim dispela bikpela wok, na ol inap kisim skul tu long wok tisa bilong ol elda. Taim ol elda i yusim taim na strong bilong ol long autim gutnius maski ol i bisi tru, dispela bai kirapim ol bratasista long bihainim wankain pasin. Na tu, ol elda inap stap olsem gutpela eksampel taim ol i redim ol miting, bekim tok, na mekim ol wok olsem klinim na lukautim gut Haus Kingdom.—Efe. 5:15, 16; Ritim Hibru 13:7.

15. Bilong wanem ol elda i mas mekim ol sepeding visit?

¹⁵ Gutpela wasman i save kirap kwik long helpim sipsip taim sipsip i kisim sampela bagarap o em i sik. Long wankain pasin, ol elda i mas kirap kwik long helpim ol bratasista husat i gat hevi o ol i nidim tok kaunsel o tok bilong strongim ol.  Ol lapun na ol bratasista husat i sik, ating ol bai nidim sampela long helpim ol, tasol moa yet, ol i nidim tok bilong Baibel long strongim ol na mekim gut bel bilong ol. (1 Tes. 5:14) Ating ol yangpela insait long kongrigesen i wok strong long daunim “ol laik i save kamap long bel bilong ol yangpela.” (2 Tim. 2:22) Ol elda i save helpim olgeta long kongrigesen taim ol i mekim sepeding visit. Taim ol i mekim ol dispela visit, ol i traim long pilim hevi bilong ol bratasista na ol i givim tok bilong Baibel long strongim ol. Sapos ol elda i kirap kwik long helpim ol bratasista long samting ol i nidim, dispela inap helpim ol bratasista long abrusim planti bikpela hevi.

16. Taim wanpela insait long kongrigesen i gat bikpela hevi, ol elda i ken mekim wanem?

¹⁶ Olsem wanem sapos wanpela brata insait long kongrigesen i gat bikpela hevi na dispela inap bagarapim pasin bilong em long pas gut wantaim Jehova? Jems, wanpela man bilong raitim Baibel, em i tok: “I gat wanpela namel long yupela i sik? Orait em i mas singautim ol hetman bilong kongrigesen i kam, na ol i ken beten long em na long nem bilong Jehova ol i ken welim em long oil. Beten bilong man i bilip bai mekim sikman i kamap orait, na Jehova bai helpim em long kamap strong. Na tu, sapos man i bin mekim sin, orait God bai fogivim em.” (Jems 5:14, 15) Maski sapos wanpela brata i “sik” na em i no “singautim ol hetman,” ol elda yet i mas kirap kwik long helpim em taim ol i save long hevi bilong em. Taim ol elda i stap wantaim ol brata na mekim beten o ol elda yet i mekim beten bilong helpim ol brata, na helpim ol long taim bilong hevi, ol elda i soim olsem ol i gutpela wasman husat i save strongim ol brata long stap amamas yet long mekim wok bilong God.—Ritim Aisaia 32:1, 2.

17. Taim ol elda i bihainim pasin bilong “bikpela wasman,” olsem wanem dispela i helpim kongrigesen?

¹⁷ Long olgeta samting ol elda i mekim insait long oganaisesen bilong Jehova, ol elda i wok strong long bihainim pasin bilong Jisas Krais, em “bikpela wasman.” Ol elda i helpim ol sipsip long kamap strong na stap gut long mekim wok bilong God. Yumi amamas tru long ol gutpela wasman na bikpela Wasman bilong yumi, em Jehova.