1, 2. (a) Bilong wanem em i bikpela samting long yumi mas “redi oltaim long beten”? (b) Yumi mas givim wanem ol askim long yumi yet long pasin bilong beten?

 WANPELA man husat i save wok long nait i tok olsem: “Man i save pilim aislip stret taim tulait i laik bruk.” Ating ol narapela husat i save wok long nait olgeta bai mekim wankain tok olsem em. Dispela i wankain long taim bilong yumi long nau. Yumi stap klostu tru long dispela haptaim we pasin bilong dispela graun em Satan i bosim bai pinis. Haptaim yumi stap long en i olsem biknait stret, olsem na ol Kristen long nau i mas wok strong na bai ol i no ken slip. (Rom 13:12) Sapos yumi slip, olsem yumi no stap strong long bilip, bikpela bagarap inap painim yumi. Em i bikpela samting long yumi “mas bihainim gutpela tingting,” na bihainim yet pasin bilong “redi oltaim long beten.”—1 Pita 4:7.

² Yumi stap klostu tru long pinis bilong pasin bilong dispela graun em Satan i bosim, olsem na em savetingting long askim yumi yet olsem: ‘Mi save tingim gut pasin bilong mi long beten? Mi save mekim olgeta kain beten, na beten long olgeta taim? Mi save beten askim God long helpim ol narapela, o mi save beten tasol long ol samting mi yet i nidim o laikim? Olsem wanem beten inap helpim mi long abrusim bagarap?’

3. Yumi ken mekim wanem kain ol beten?

³ Taim Pol i raitim pas i go long Efesus, em i kolim “olgeta kain beten.” (Efe. 6:18) Taim yumi beten long Jehova, planti taim yumi save askim em long givim yumi ol samting yumi nidim na helpim yumi long stretim ol hevi. Baibel i tok Jehova em i Man bilong “harim beten,” na em i laikim yumi, olsem na em i save putim yau taim yumi askim em long helpim yumi. (Sng. 65:2) Taim yumi beten, yumi ken askim long ol samting yumi nidim, na tu, yumi ken beten long ol narapela samting. Yumi mas litimapim nem bilong Jehova, tok tenkyu long em, na askim em long helpim yumi.

4. Bilong wanem oltaim yumi mas litimapim nem bilong Jehova long ol beten bilong yumi?

 ⁴ I gat planti risen long litimapim nem bilong Jehova long ol beten bilong yumi. Olsem: God i stap “nambawan tru na em i gat biknem i antap tru,” na taim yumi tingim “ol bikpela wok” bilong em, dispela bai kirapim yumi long litimapim nem bilong em. (Ritim Song 150:1-6.) Skelim ol tok i stap long Buk Song sapta 150. Long 6-pela ves, em i kolim dispela tok litimapim nem bilong Jehova inap 11-pela taim. Narapela man bilong raitim Song i kamapim olsem em i laikim tru Jehova taim em i tok: “7-pela taim long olgeta de mi save tenkyu long yu long ol stretpela tok yu mekim long kot.” (Sng. 119:164) I stret tru long yumi mas litimapim nem bilong Jehova. Olsem na taim yumi beten, yumi mas litimapim nem bilong em “7-pela taim long olgeta de,” dispela i makim olsem yumi mas beten long olgeta taim.

5. Olsem wanem pasin bilong tok tenkyu insait long beten i lukautim yumi?

⁵ Narapela beten em beten bilong tok tenkyu. Long pas Pol i raitim long ol Kristen long Filipai, em i tok: “Yupela i no ken tingting planti long wanpela samting, nogat. Long olgeta samting, kamapim ol askim bilong yupela long God, mekim long rot bilong ol beten, na long ol prea we yu beten strong, na long ol beten bilong tok tenkyu long God.” (Fili. 4:6) Yumi stap klostu long pinis bilong pasin bilong dispela graun em Satan i bosim na yumi stap namel long ol manmeri husat ‘i no save tok tenkyu.’ Olsem na em i bikpela samting long yumi mas tok tenkyu long Jehova long ol blesing em i givim long yumi. Taim yumi mekim olsem, yumi bai stap narapela kain long ol manmeri bilong dispela graun. (2 Tim. 3:1, 2) Ol manmeri bilong dispela graun i no gat pasin bilong tok tenkyu. Sapos yumi no was gut, yumi inap bihainim pasin bilong ol. Tasol taim yumi beten na tok tenkyu, yumi bai amamas na yumi no komplein long ol samting i painim yumi. (Jut 16) Taim het bilong famili i beten wantaim famili bilong em na tok tenkyu insait long beten, dispela bai kirapim meri na ol pikinini bilong em long tok tenkyu.

6, 7. Taim yumi beten strong long God, i olsem yumi mekim wanem? Yumi inap beten strong na askim God long helpim yumi long wanem ol samting?

⁶ Taim yumi beten strong long God i helpim yumi, dispela i makim olsem yumi kamapim tru tingting i stap long bel bilong yumi. Yumi ken beten strong long God long helpim yumi long wanem samting? Yumi ken askim Jehova long helpim yumi taim ol man i mekim nogut long yumi o yumi gat wanpela sik we inap mekim na yumi lusim laip bilong yumi. Long kain taim olsem, yumi bai beten strong na askim Jehova long helpim yumi. Tasol taim ol man i mekim nogut long yumi o yumi gat sik, yu ting long dispela taim tasol yumi mas beten strong na askim Jehova long helpim yumi?

⁷ Bilong helpim yumi long bekim dispela askim, yumi ken skelim ol tok Jisas i mekim taim em i skulim ol disaipel long beten, na em i kolim nem bilong God, Kingdom Bilong God, na laik bilong God. (Ritim Matyu 6:9, 10.) Pasin nogut i pulap tru long dispela graun, na ol gavman i no inap givim olgeta samting ol man i nidim. Dispela i mekim na yumi mas beten long nem bilong God i mas stap holi na Kingdom bilong em i mas rausim wok bos bilong Satan long dispela graun. Na tu, nau em taim bilong beten askim Jehova long kamapim laik bilong em long dispela graun olsem i kamap long heven. Olsem na yumi mas was i stap na mekim olgeta kain beten.

8, 9. Bilong wanem yumi no ken sutim tok long Pita na ol arapela aposel long ol i bin slip long gaden Getsemani?

⁸ Pita i raitim pas i go long ol Kristen na i em kirapim ol long ol i mas “redi oltaim long beten,” tasol wanpela taim em yet i no bin mekim olsem. Pita em i wanpela bilong ol disaipel husat i bin slip taim Jisas i beten i stap long gaden Getsemani. Jisas i bin tokim ol long ol “i mas was i stap na beten oltaim,” tasol ol i slip.—Ritim Matyu 26:40-45.

 ⁹ Yumi no ken sutim tok long Pita na ol arapela aposel long ol i bin slip, nogat. Yumi mas tingim olsem ol i taiet nogut tru, long wanem, ol i bin mekim planti wok long dispela de. Ol i bin redim ol samting na mekim bung bilong Pasova long dispela apinun. Jisas i bin skulim ol disaipel long ol samting ol i mas mekim long Kaikai Bilong Bikpela na bai ol inap save long ol samting ol i mas mekim bilong tingim indai bilong em. (1 Kor. 11:23-25) Baibel i tok: “Ol i mekim pinis singsing bilong litimapim nem bilong God na ol i go long maunten Oliv.” Bilong i go kamap long hap, ol i mas wokabaut longpela hap liklik namel long ol strit bilong Jerusalem. (Mat. 26:30, 36) Ating em biknait pinis long dispela taim. Sapos yumi bin stap long gaden Getsemani long dispela nait, ating yumi tu bai slip pinis. Jisas i no krosim ol aposel, em ol i taiet pinis. Nogat. Em i luksave olsem “bel bilong man i redi long mekim olgeta samting, tasol bodi i no gat strong.”

10, 11. (a) Pita i kisim wanem skul long samting i bin painim em long gaden Getsemani? (b) Samting i bin painim Pita i givim wanem skul long yu?

¹⁰ Pita i kisim skul long wanpela bikpela samting tru long dispela nait em i bin slip long gaden Getsemani. Paslain long dispela, Jisas i bin tok: “Samting i kamap long mi long dispela nait bai mekim yupela olgeta i pundaun.” Tasol Pita i tok: “Maski olgeta arapela i pundaun long samting i kamap long yu, bai mi no inap tru long pundaun!” Bihain, Jisas i tok inap 3-pela taim Pita bai tok em i no save long Jisas. Tasol Pita i no bilipim tok bilong Jisas, na em i tok: “Maski sapos mi mas i dai wantaim yu, bai mi no inap tru long tok mi no save long yu.” (Mat. 26:31-35) Tok bilong Jisas i kamap tru taim Pita i tok em i no save long Jisas. Taim Pita i luksave long samting em i bin mekim, em i bel hevi na “krai nogut tru.”—Luk 22:60-62.

¹¹ Samting i bin painim Pita i skulim em olsem em i no ken bilip long em yet. Pasin bilong beten i bin helpim em. Olsem wanem yumi save long dispela? Long wanem, Pita yet i tok yumi mas “redi oltaim long beten.” Olsem wanem? Yumi save bihainim dispela tok kaunsel bilong Baibel? Yumi save beten long olgeta taim, na soim olsem yumi bilip long Jehova? (Sng. 78:7) Yumi mas bihainim tu tok kaunsel bilong Pol, em i tok: “Man i ting em i sanap strong i stap, em i mas lukaut, nogut em i pundaun.”—1 Kor. 10:12.

12. Bilong wanem pasin bilong Nehemia i stap olsem gutpela eksampel yumi ken bihainim?

¹² Narapela man husat i stap gutpela eksampel em Nehemia. Long yia 450 B.C.E., Nehemia i mekim wok olsem man bilong lukautim wain bilong King Artaserksis bilong Persia. Nehemia i stap gutpela eksampel long pasin bilong pilim tru ol samting long bel na beten long Jehova. Baibel i tok em i tingim bikpela hevi i painim ol Juda long Jerusalem, olsem na em i bin tambu long  kaikai na em i beten inap sampela de. (Neh. 1:4) Taim Artaserksis i askim Nehemia long wanem samting i mekim na em i no amamas, Nehemia i “prea kwik long God bilong heven.” (Neh. 2:2-4) Wanem samting i kamap? Jehova i bekim beten bilong em na mekim ol samting bilong helpim lain Juda, em ol manmeri bilong Jehova yet. (Neh. 2:5, 6) Ating olgeta dispela samting i bin strongim bilip bilong Nehemia!

13, 14. Yumi mas mekim wanem na bai yumi inap holim yet strongpela bilip na yumi no larim Satan i daunim yumi?

¹³ Sapos olgeta taim yumi beten olsem Nehemia i bin mekim, dispela bai helpim yumi long holimpas strongpela bilip. Satan i no gat pasin bilong marimari, na oltaim em bai daunim yumi taim yumi no gat strong. Olsem: Sapos yumi kisim wanpela bikpela sik o yumi bel hevi tru, yumi inap kirap long kisim tingting olsem God i no tingim haptaim yumi bin lusim long autim tok long olgeta wan wan mun. Sampela bilong yumi inap bel hevi tru, long wanem, ating sampela hevi i bin painim yumi long bipo. Satan i laik bai yumi ting olsem yumi no gutpela moa. Em i laik yusim ol dispela kain tingting kranki long daunim bilip bilong yumi. Tasol sapos yumi “redi oltaim long beten,” dispela inap helpim yumi long holim yet strongpela bilip. Baibel i tok bilip bilong yumi i kain olsem hap plang, em inap helpim yumi long sakim “olgeta spia paia bilong Satan.”—Efe. 6:16.

¹⁴ Sapos yumi “redi oltaim long beten,” orait taim wanpela traim i painim yumi, yumi bai stap gut yet long Jehova. Taim ol traim na hevi i painim yumi, orait yumi mas tingim eksampel bilong Nehemia na kwiktaim yumi mas beten long God. Jehova tasol inap helpim yumi long sakim ol traim na sanap strong na karim ol hevi i painim yumi.

15. Taim yumi tingim pasin bilong beten long helpim ol arapela, yumi mas givim wanem ol askim long yumi yet?

¹⁵ Jisas i beten strong long helpim Pita na bai  bilip bilong em i no ken pundaun. (Luk 22:32) Epafras em wanpela Kristen husat i bin stap long taim bilong ol aposel, na em i bin bihainim pasin bilong Jisas. Epafras i wok strong long mekim ol beten bilong helpim ol brata bilong em long Kolosi. Pol i raitim pas long ol na tok: “Oltaim em i save strong tru long beten askim God long helpim yupela, bai yupela i ken kamap strong olgeta na bilip tru long olgeta laik bilong God.” (Kol. 4:12) Yumi mas askim yumi yet olsem: ‘Mi wok strong long mekim ol beten bilong helpim ol bratasista bilong mi long olgeta hap bilong graun? Sapos bikpela disasta i kamap na givim hevi long ol bratasista bilong mi, orait hamas taim mi save mekim ol beten bilong helpim ol? Wanem taim mi bin beten long helpim ol lain husat i mekim bikpela wok insait long oganaisesen bilong Jehova? Long nau mi beten tu long helpim wanpela insait long kongrigesen husat i gat hevi?’

16. Yu ting em i bikpela samting long yumi mas beten long helpim ol bratasista bilong yumi? Stori long dispela.

¹⁶ Taim yumi beten askim Jehova long helpim ol bratasista bilong yumi, dispela inap helpim ol. (Ritim 2 Korin 1:11.) I no gat wok long Jehova i mekim sampela samting maski planti wokman bilong em i beten planti taim long wanpela samting. Tasol taim em i bekim ol beten bilong ol, em i save amamas long lukim olsem ol i tingim gut narapela narapela. Olsem na yumi mas tingim tru olsem yumi gat wok long beten long helpim ol narapela. Yumi mas bihainim pasin bilong Epafras na wok strong long beten long helpim ol bratasista bilong yumi, na long dispela rot yumi soim olsem yumi laikim ol. Yumi bai amamas moa taim yumi mekim olsem, long wanem, “amamas bilong givim samting i winim amamas bilong kisim samting.”—Apo. 20:35.

17, 18. Sapos yumi “redi oltaim long beten,” dispela bai helpim yumi olsem wanem?

¹⁷ Paslain long Pol i tok “klostu nait i laik pinis na tulait i laik kamap,” em i tok: “Yupela i save long dispela taim nau yumi stap long en. Nau em taim bilong yupela long lusim slip na kirap. Long wanem, taim bilong God long kisim bek yumi em i klostu moa, winim taim yupela i bin kirap bilip long Jisas.” (Rom 13:11, 12) Klostu nau God bai kamapim nupela taim, na taim bilong God long kisim bek yumi em i klostu moa. Nau em i no taim bilong slip long tok i tru. Yumi no ken larim ol samting bilong dispela graun i pulim taim bilong yumi na yumi no beten long Jehova. Nogat, yumi mas “redi oltaim long beten.” Sapos yumi mekim olsem, dispela bai helpim yumi long “wokabaut long pasin i holi na bihainim pasin bilong givim bel tru long God.” (2 Pita 3:11, 12) Ol samting yumi mekim long laip bilong yumi bai soim olsem yumi no slip long tok i tru, na yumi bilip tru olsem pinis bilong pasin nogut bilong dispela graun i klostu pinis. Olsem na yumi mas “beten oltaim.” (1 Tes. 5:17) Yumi mas bihainim pasin bilong Jisas na painim wanpela hap we yumi tasol i ken stap na beten long Jehova. Sapos yumi lusim sampela haptaim long beten long Jehova, dispela bai mekim na yumi inap i go klostu moa long em. (Jems 4:7, 8) Dispela em wanpela gutpela blesing tru!

¹⁸ Baibel i tok: “Taim Krais i stap man long graun, em i bin singaut strong na krai na aiwara i pundaun taim em i beten strong na mekim ol askim long dispela Man husat inap kisim em bek long indai. Na God i bin amamas long harim beten bilong em, long wanem, em i save pret long God.” (Hib. 5:7) Taim Jisas i bin stap hia long graun, em i beten strong long Jehova na mekim ol askim long Em, na em i stap gut long God i go inap long taim em i dai. Olsem na Jehova i kirapim bek Pikinini bilong em na givim em laip olsem wanpela spirit long heven na em i no inap i dai moa. Yumi tu inap stap gut long Papa bilong yumi long heven maski wanem wanem hevi o traim i painim yumi long bihain. Sapos yumi “redi oltaim long beten,” yumi inap kisim prais bilong laip oltaim.