1. Wanem samting inap mekim na yumi kisim pasin bilong les long wet?

 TAIM Krais i kamap King long heven long 1914, dispela i kirapim las de bilong haptaim bilong nau em Satan i bosim. Woa i kamap long heven, na Jisas i tromoi Satan na ol ensel nogut bilong em i kam daun long graun. (Ritim Revelesen 12:7-9.) Satan i save olsem em i gat “sotpela taim tasol” bilong i stap. (Rev. 12:12) Tasol dispela “sotpela taim” i no pinis hariap olsem sampela bilong yumi i bin tingim. Olsem wanem? Yumi les pinis long wetim taim we Jehova bai pinisim haptaim bilong nau em Satan i bosim?

2. Dispela stadi bai bekim wanem ol askim?

² Pasin bilong les long wet inap nogutim yumi. Bilong wanem? Taim yumi les long wet, yumi no inap tingting gut paslain long yumi mekim ol samting. Olsem na wanem samting inap helpim yumi long kisim pasin bilong wet? Dispela stadi bai helpim yumi long bekim ol dispela askim. (1) Yumi inap kisim wanem skul long pasin bilong profet Maika long i no les kwik? (2) Wanem ol samting bai soim olsem pinis i klostu? (3) Olsem wanem yumi inap soim Jehova olsem yumi tenkyu long pasin bilong em long i no les kwik?

3. Lain Israel i bin stap olsem wanem long taim bilong Maika?

³ Ritim Maika 7:2-6. Maika, profet bilong Jehova, em i lukim olsem isi isi lain Israel i no stap gut moa long Jehova, olsem na ol i givim baksait olgeta long Jehova long taim bilong King Ahas. Maika i tok lain Israel husat i no stap gut long God, ol i kain olsem gras i gat nil long en na inap bagarapim man. Dispela lain Israel i olsem gras i gat nil, long wanem, ol i mekim nogut long ol narapela na bagarapim ol. Dispela hevi i go nogut tru, olsem na ol wanblut i no laikim moa narapela narapela. Maika i save olsem em i no inap stretim dispela hevi, olsem na long bel olgeta em i beten long Jehova. Bihain em i stap isi na wet long God i helpim em. Maika i bilip  olsem Jehova bai stretim hevi long taim Em yet i makim.

4. Wanem ol hevi i save painim yumi?

⁴ Wankain olsem Maika, yumi tu i stap namel long ol manmeri husat i save tingim ol yet. Planti manmeri i “no tok tenkyu, ol bai i no stap gut long narapela, ol bai i no gat pasin bilong laikim ol wanfamili.” (2 Tim. 3:2, 3) Taim ol wanwok, ol wanskul, na ol neiba i bihainim pasin bilong tingim ol yet tasol, dispela inap givim hevi long yumi. Tasol sampela bilong yumi i gat hevi i bikpela moa. Jisas i tok taim ol man i kamap disaipel bilong em, famili bilong ol yet bai birua long ol. Tok bilong Jisas i wankain long tok yumi ritim long Maika 7:5, 6. Jisas i tok: “Mi kam bilong brukim lain, man bai birua long papa bilong en na pikinini meri bai birua long mama bilong en na maritmeri bai birua long tambu mama bilong en. Tru tumas, ol wanhaus bilong man bai kamap birua bilong en.” (Mat. 10:35, 36) Taim ol wanfamili husat i no lotuim Jehova i tok bilas na birua long yumi, dispela inap putim bikpela hevi tru long yumi. Sapos kain hevi olsem i painim yumi, orait yumi no ken larim dispela i daunim yumi. Yumi mas stap gut yet long Jehova na wet long em i stretim hevi bilong yumi. Sapos yumi wok yet long beten askim em long helpim yumi, em bai givim yumi strong na savetingting we yumi mas i gat bilong helpim yumi long stap gut yet long em.

5, 6. Olsem wanem Jehova i bin blesim Maika? Maika i no bin lukim wanem samting?

⁵ Maika i no bin les kwik, olsem na Jehova i blesim em. Maika i bin stap yet taim King Ahas, em king nogut, i dai na wok king bilong em i pinis. Em i bin lukim Hesekia, pikinini man bilong Ahas, i kamap king na helpim lain Israel long bihainim gen lotu i tru. Maika i bin raitim tok profet long samting bai painim taun Samaria, na em i bin stap na lukim truim bilong dispela tok profet taim ol Asaria i kam pait long kingdom bilong Israel long hap not.—Mai. 1:6.

⁶ Tasol Maika i dai paslain long em i lukim truim bilong olgeta tok profet em Jehova i bin kirapim em long raitim. Maika i bin tok: “Wanpela taim bai i kamap bihain na dispela maunten, haus bilong Bikpela i sanap long en, bai i stap antap tru na i winim olgeta arapela maunten. Na planti lain manmeri bai i kam bung long en. Na bai ol i tok, ‘Kam, yumi go antap long maunten Saion, em maunten bilong Bikpela.’” (Mai. 4:1, 2) Maski ol man i stap klostu long Maika i bihainim wanem pasin, Maika i tingting strong long stap gut long Jehova i go inap long taim em i dai. Em i tok: “Maski olgeta arapela lain pipel i lotu long ol giaman god bilong ol yet na bihainim ol, bai yumi Israel i lotu long God, Bikpela bilong yumi oltaim oltaim, na bihainim em wanpela tasol.” (Mai. 4:5) Maski ol hevi i painim Maika, em i wet na i no les kwik, long wanem, em i bilip olsem Jehova bai truim olgeta tok promis bilong Em. Dispela gutpela profet i trastim Jehova.

7, 8. (a) Bilong wanem yumi ken trastim Jehova? (b) Yumi mas mekim wanem na bai yumi lukim olsem taim i wok long i go hariap moa?

⁷ Olsem wanem? Yumi trastim Jehova olsem Maika i bin mekim? I gat gutpela risen long yumi mas trastim Jehova. Yumi bin lukim truim bilong tok profet bilong Maika. Long dispela taim bilong las de, planti milion manmeri bilong olgeta kantri, olgeta lain, na olgeta tokples i kam long “dispela maunten, haus bilong Bikpela i sanap long en.” Maski ol i kam long ol kantri we i save pait long narapela narapela, ol dispela manmeri i “paitim bainat bilong ol i kamap olsem ain bilong brukim graun,” na ol i “no skul moa long pait.” (Mai. 4:3) Em gutpela samting tru long stap olsem ol manmeri bilong Jehova husat i stap wanbel wantaim!

⁸ Yumi olgeta i laik bai Jehova i pinisim pasin nogut bilong dispela haptaim nogut bilong nau. Tasol sapos yumi laik kisim pasin bilong wet na i no les kwik, orait yumi mas kisim wankain tingting olsem Jehova. God i bin makim Jisas Krais long mekim wok jas na skelim ol man, na Em i makim pinis de bilong mekim olsem. (Apo. 17:31) Tasol paslain long dispela de i kamap, God i opim rot long olgeta manmeri i ken  kisim “stretpela save long tok i tru,” na bihainim ol samting ol i kisim save long en, na God inap kisim bek ol. Yumi mas tingim olsem ol manmeri inap kisim bagarap. (Ritim 1 Timoti 2:3, 4.) Klostu nau pinis bai kamap. Sapos yumi bisi long helpim ol manmeri long kisim save long Jehova, bai yumi lukim olsem taim i wok long i go hariap moa na pinis i kam klostu tru. Taim pinis i kamap, bai yumi amamas tru olsem yumi bin bisi long wok autim tok!

9-11. Truim bilong 1 Tesalonaika 5:3 i kamap pinis, o nogat? Stori long dispela.

⁹ Ritim 1 Tesalonaika 5:1-3. Klostu nau ol manmeri bai tok: “Nau em i taim bilong bel isi na gutpela sindaun!” Sapos yumi no laik bai ol i giamanim yumi, orait yumi mas “was i stap na holim stretpela tingting.” (1 Tes. 5:6) Orait, nau yumi bai skelim sampela samting we i opim rot long ol manmeri bai mekim dispela bikpela tokaut.

¹⁰ Bihain long 2-pela bikpela pait, ol manmeri i laik tru long i stap bel isi. Taim Wol Woa 1 i pinis, ol man i kamapim Lig ov Nesen bilong kamapim bel isi. Bihain long Wol Woa 2, ol manmeri i ting olsem Yunaitet Nesen bai kamapim bel isi. Gavman na ol bikman bilong lotu i trastim dispela 2-pela oganaisesen. Olsem: Yunaitet Nesen i tokaut olsem 1986 em Intenesenel Yia Bilong Gutaim. Long dispela yia, planti lida bilong politik na lotu i bung wantaim hetman bilong Misin Katolik na ol i beten long kamapim bel isi.

¹¹ Tasol dispela tokaut na ol narapela tokaut olsem i no truim tok profet bilong 1 Tesalonaika 5:3, olsem em taim bilong “bel isi na gutpela sindaun.” Bilong wanem? Long wanem, dispela “bagarap” we bai kamap “wantu tasol,” em i no kamap yet.

12. Yumi gat wanem save long dispela tokaut bilong “Bel isi na gutpela sindaun”?

¹² Husat bai mekim dispela tokaut bilong “Bel isi na gutpela sindaun”? Olsem wanem ol bikman bilong Kristendom na ol arapela lotu i insait long dispela tokaut? Olsem wanem bai ol gavman tu i insait long en? Baibel i no tokaut long  dispela samting. Yumi save olsem maski dispela tokaut i kamap long wanem rot, na hamas man i bilipim dispela tokaut, dispela tokaut bilong “bel isi na gutpela sindaun” em i tok giaman tasol. Satan bai bosim yet dispela haptaim bilong nau. Dispela haptaim bilong nau em i bagarap olgeta na em bai stap olsem tasol. Sori tru sapos yumi bilipim dispela tok giaman bilong Satan na yumi insait long ol samting bilong dispela graun!

13. Bilong wanem ol ensel i holim strong win bilong kamapim bagarap?

¹³ Ritim Revelesen 7:1-4. Taim yumi wet long lukim truim bilong 1 Tesalonaika 5:3, ol strongpela ensel i holim strong win na bai win i no ken i go bilong kamapim bagarap bilong traipela hevi tru. Bilong wanem ol i holim strong win? Aposel Jon i tok “ol wokboi bilong God bilong yumi,” em God i bin makim ol long holi spirit, ol i mas kisim laspela mak bilong ol. a Taim dispela bikpela wok i pinis, ol ensel bai lusim ol win bilong kamapim bagarap. Orait, wanem samting bai kamap?

14. Wanem samting i soim olsem klostu nau Bikpela Babilon bai bagarap?

¹⁴ Bikpela Babilon, em olgeta lotu giaman, i mas bagarap na i stret bagarap i mas painim em. Taim bagarap i painim em, i no gat wanpela lain bai inap long helpim em. Yumi inap lukim olsem taim bilong em long bagarap i kam klostu pinis. (Rev. 16:12; 17:15-18; 18:7, 8, 21) Yumi inap luksave long dispela, long wanem, ol nius long televisen na redio i wok long sutim tok long ol lotu na ol bikman bilong ol. Maski i olsem, ol bikman bilong lotu i pilim olsem ol i stap orait. Tasol, dispela tingting bilong ol i kranki olgeta! Bihain long ol i mekim tokaut bilong “Bel isi na gutpela sindaun!” wantu tasol ol gavman bai bagarapim ol lotu giaman na pinisim ol olgeta. Bikpela Babilon bai pinis olgeta! Tru tumas, i stret long yumi wet na i no les kwik na bai yumi inap lukim truim bilong ol dispela bikpela samting.—Rev. 18:8, 10.

15. Bilong wanem Jehova i wet na i no les kwik?

¹⁵ Maski ol man i bin bagarapim nem bilong Jehova, em i no les kwik na em i wet long taim stret bilong stretim bek nem bilong em. Jehova i no laik bai ol man i gat gutpela bel i kisim bagarap. (2 Pita 3:9, 10) Olsem wanem? Yumi tu i pilim olsem? Paslain long pinis i kamap, i gat planti samting yumi ken mekim bilong soim olsem yumi tenkyu long pasin bilong Jehova long wet na i no les kwik.

16, 17. (a) Bilong wanem yumi laik helpim ol lain husat i lusim wok bilong Jehova? (b) Bilong wanem em i bikpela samting olsem ol man husat i lusim wok bilong Jehova, ol i mas i kam bek long em long nau?

¹⁶ Helpim ol man em bilip bilong ol i no strong moa. Maski 1-pela sipsip tasol i lus, Jisas i tok bikpela amamas i save kamap long heven taim wasman i painim dispela sipsip. (Mat. 18:14; Luk 15:3-7) Jehova i tingim tru ol man husat i soim olsem ol i laikim em, maski sapos long nau yet ol i no mekim wok bilong em. Jehova na ol ensel i save amamas taim yumi helpim ol man long kam bek long Jehova.

¹⁷ Olsem wanem? Yu wanpela bilong ol lain husat i no mekim wok bilong God long nau? Ating yu no go moa long ol miting, long wanem, wanpela long kongrigesen i bin mekim yu bel hevi. Ating sampela haptaim i lus pinis. Olsem na askim yu yet olsem: ‘Long nau, sindaun bilong mi i gutpela moa na mi stap amamas tru? Jehova i mekim na mi bel hevi o wanpela sinman i mekim na mi bel hevi? God Jehova i bin mekim wanpela samting bilong bagarapim mi, o nogat?’ Oltaim Jehova i save mekim gutpela pasin long yumi. Maski long nau yumi no bihainim tok promis bilong yumi long mekim wok bilong em, em i larim yumi long amamas long ol gutpela samting em i givim long yumi. (Jems 1:16, 17) Tasol klostu nau de bilong Jehova bai kamap. Nau em  taim bilong yumi long go bek long gutpela Papa bilong yumi, Jehova, na long kongrigesen. Dispela tasol em ples we yumi inap stap seif long en long dispela taim bilong las de.—Lo 33:27; Hib. 10:24, 25.

18. Bilong wanem yumi mas helpim ol man husat i go pas long mekim wok?

¹⁸ Helpim gut ol man husat i go pas long mekim wok. Jehova em wanpela gutpela Wasman, na em i save stiaim na lukautim gut yumi. Em i makim Pikinini bilong em long stap olsem Nambawan Wasman bilong sipsip. (1 Pita 5:4) Ol elda long planti kongrigesen, winim 1 handret tausen kongrigesen, ol i save lusim sampela haptaim long lukautim olgeta wan wan sipsip bilong God. (Apo. 20:28) Taim yumi helpim gut ol man husat i go pas long mekim wok, yumi soim Jehova na Jisas olsem yumi amamas long olgeta samting ol i mekim bilong helpim yumi.

19. Olsem wanem yumi inap bung wantaim ol bratasista bilong yumi?

¹⁹ Go klostu long ol bratasista bilong yu. Wanem insait bilong dispela tok? Taim birua i pait long soldia husat i bin kisim gutpela trening, ol arapela soldia i save kam klostu moa na bung wantaim na bai i no gat spes i stap nating namel long ol. Long dispela rot, ol birua i no inap tru long daunim ol. Satan i yusim planti samting moa long bagarapim lain bilong God. Nau em i no taim bilong yumi long birua long ol bratasista bilong yumi, nogat. Nau em i taim bilong yumi long i go klostu moa long narapela narapela, na no ken tingim ol rong bilong ol, na trastim Jehova.

20. Yumi mas mekim wanem long nau?

²⁰ Yumi mas strongim pasin bilong yumi long pas gut wantaim Jehova na soim olsem yumi gat pasin bilong wet. Yumi no ken les kwik na yumi mas wet long harim tokaut bilong “Bel isi na gutpela sindaun!” na lukim taim bai kamap na ol Kristen God i bin makim ol bai kisim laspela mak. Bihain long dispela, ol 4-pela ensel bai lusim ol win bilong kamapim bagarap, na Bikpela Babilon bai bagarap. Taim yumi wet long lukim ol dispela bikpela samting i kamap, yumi mas bihainim tok bilong ol man husat i go pas long mekim wok insait long oganaisesen bilong Jehova. Yumi mas pas gut wantaim na sakim Satan na ol spirit nogut! Nau em taim bilong bihainim tok kaunsel em man bilong raitim song i kamapim, em i tok: “Yupela olgeta manmeri i bilip long Bikpela, yupela sanap strong, na bel bilong yupela i ken kisim strong oltaim.”—Sng. 31:24.