Taim 2-pela painia i go insait long wanpela haus long Kenya, ol i kirap nogut long lukim wanpela sotpela man i slip long bet. Em i gat liklik bodi tru na ol sotpela han. Taim ol i stori long em long tok promis bilong God olsem “ol lek nogut bai ol i kalap olsem ol dia,” pes bilong dispela man i lait na em i smail.—Ais. 35:6.

Nem bilong dispela man em Onesmus, na nau em i gat 38 krismas samting. Ol painia i kisim save olsem Onesmus i bin bon wantaim sik bilong bun i bruk nating nating (osteogenesis imperfecta). Ol bun bilong em i no strong, olsem na sapos ol i holim strong liklik, bun inap bruk. I no gat marasin bilong oraitim dispela sik, olsem na Onesmus i tingting olsem em bai karim pen na sindaun tasol long wilsia long laip olgeta bilong em.

Onesmus i orait long stadi long Baibel. Tasol mama bilong em i no laik bai em i go long ol miting Kristen, long wanem, em i ting dispela bai bagarapim bodi bilong Onesmus na givim bikpela pen long em. Olsem na ol brata i rekodim ol tok i kamap long miting, na Onesmus i save harim ol dispela tok long haus. Bihain long Onesmus i stadi inap 5-pela mun pinis, em i wokim disisen olsem em bai go long ol miting, maski dispela inap givim hevi long em.

Olsem wanem? Ol miting Kristen i givim bikpela pen long Onesmus? Nogat, ol miting i helpim em. Onesmus i tok: “Pen mi save pilim oltaim i pinis taim mi stap long ol miting.” Em i pilim olsem nupela bilip bilong em i helpim em long kamap orait. Mama bilong Onesmus i lukim olsem pikinini man bilong em i senisim pasin bilong em, na em i amamas tru na em tu i laik stadi long Baibel. Em i save tok: “Wok bilong God em marasin bilong pikinini man bilong mi.”

I no longtaim, Onesmus i kamap pablisa i no baptais. Bihain, em i kisim baptais na nau em i mekim wok olsem kongrigesen sevan. Maski Onesmus i no inap long yusim ol lek na wanpela han bilong em, em i laik tru long mekim olgeta samting em inap mekim long wok bilong Jehova. Em i laik mekim wok painia haptaim, tasol em i no laik putim aplikesen. Bilong wanem? Long wanem, em i save olsem oltaim i mas i gat wanpela man long pusim wilsia bilong em. Taim em i kamapim tingting bilong em long ol wanbilip bilong em, ol i tok promis olsem ol bai helpim em. Ol i mekim olsem, na ol i helpim Onesmus long mekim wok painia haptaim.

Bihain, Onesmus i laik mekim wok painia oltaim, tasol em i gat wankain tingting. Tasol wanpela taim, teks bilong de i givim nupela strong long em. Dispela teks em Song 34:8, em i tok: “Traim na lukim na bai yupela i save olsem Bikpela i gutpela tru.” Bihain long Onesmus i tingim tingim dispela skripsa, em i wokim disisen long kamap painia oltaim. Long nau, em i save autim tok long 4-pela de bilong wik na em i lukautim sampela Baibel stadi husat i wok long kamap strong long tok i tru. Long 2010, em i go long Skul Bilong Wok Painia. Onesmus i amamas tru olsem wanpela bilong ol brata husat i bin bungim em long namba 1 taim, em i stap olsem tisa bilong em long skul bilong wok painia!

Papamama bilong Onesmus i dai pinis, tasol ol bratasista long kongrigesen i save lukautim em long ol samting em i nidim long olgeta wan wan de. Em i tenkyu tru long olgeta blesing em i kisim long nau, na em i wetim dispela taim we “i no gat man . . . bai i tok olsem, ‘Mi gat sik.’”—Ais. 33:24.