‘Yupela i Mas Tingim Dispela Samting’
“Yupela i mas makim dispela de bai em i stap bikpela de bilong lotu, bilong tingim dispela samting mi Bikpela, mi bin mekim.”—KIS. 12:14.
1, 2. Ol Kristen i mas kisim save long wanem kain aniveseri? Bilong wanem?
TAIM yu harim dispela tok “aniveseri,” yu save tingim wanem samting? Sapos yu marit pinis, ating bai yu tingim weding aniveseri bilong yu. Ating sampela bai tingim wanpela bikpela de we planti man i save tingim, kain olsem det em kantri bilong ol i kisim indipendens. Tasol olsem wanem? Yu save long wanpela aniveseri em ol manmeri bilong wanpela kantri i selebretim long bipo yet i kam inap long nau na em i winim pinis 3,500 yia?
2 Dispela aniveseri em bung bilong Pasova. Em bung bilong tingim taim we God i bin kisim bek ol manmeri bilong kantri Israel long kalabus long Isip. Pasova i mas stap olsem bikpela samting long laip bilong yu. Bilong wanem? Long wanem, em i mekim sampela bikpela samting long yu. Ating yu inap kisim tingting olsem: ‘Pasova em bung bilong ol Juda, tasol mi wanpela Kristen. Bilong wanem mi mas kisim save long bung bilong Pasova?’ Bekim bilong dispela askim i stap long dispela bikpela tok: “Ol i sakrifaisim Krais pinis, em sakrifais bilong yumi long pasova.” (1 Kor. 5:7) Wanem mining bilong dispela tok? Bilong save long bekim bilong dispela askim, yumi mas kisim sampela save moa long Pasova bilong ol Juda, na olsem wanem aniveseri bilong dispela bung i stret wantaim lo em God i givim long olgeta Kristen.
PASOVA—BILONG WANEM?
3, 4. Wanem samting i kamap paslain long namba 1 Pasova?
3 Planti milion manmeri long olgeta hap bilong graun husat i no bilong lain Juda, ol i save long wanpela bikpela samting i bin kamap paslain long namba 1 Pasova. Ating ol i ritim dispela stori long Buk Kisim Bek long Baibel, o ol i harim ol narapela i stori long en, o ating ol i lukim muvi bilong dispela stori. Olsem wanem? Yu inap tingim ol samting i bin kamap?
4 Lain Israel i stap kalabus long Isip inap planti yia pinis, olsem na Jehova i salim Moses na Aron long tokim Fero long larim lain bilong God long i go fri. Tasol Fero i gat pasin antap na em i no larim lain Israel long i go fri. Olsem na Jehova i givim 10-pela bikpela hevi long lain Isip. Taim namba 10 hevi i kamap, ol fesbon pikinini man bilong ol Isip i dai. Bihain long dispela, Fero i larim lain Israel i go.—Kis. 1:11; 3:9, 10; 5:1, 2; 11:1, 5.
5. God i bin tokim lain Israel long mekim wanem paslain long ol i go fri? (Lukim piksa long kirap bilong stadi.)
5 Tasol paslain long lain Israel i lusim kalabus, ol i mas bihainim tok na mekim sampela samting. Dispela samting i bin kamap long yia 1513 B.C.E., long mun Abip, em bihain ol i kolim mun Nisan. a God i tokim ol olsem, long Nisan 10 ol i mas kirap long mekim ol samting bilong redi long wanpela bikpela samting we bai kamap taim san i go daun long Nisan 14. Bilong wanem dispela bikpela samting bai kamap long taim san i go daun? Long wanem, de bilong ol Hibru i save kirap taim san i go daun long apinun na dispela de i save pinis taim san i go daun long neks de. Long Nisan 14, olgeta famili i mas kilim wanpela sipsip man o meme man na penim sampela blut bilong en long ol freim bilong dua bilong haus. (Kis. 12:3-7, 22, 23) Famili i mas kukim mit bilong sipsip long paia, na kaikai dispela wantaim bret i no gat yis, na sampela pait kumu. Ensel bilong God bai kam na kilim i dai olgeta fesbon pikinini bilong ol Isip, tasol ensel i no inap kilim ol fesbon pikinini bilong lain Israel husat i bihainim tok. Long dispela taim, lain bilong God bai i go fri.—Kis. 12:8-13, 29-32.
6. Bilong wanem lain Israel i mas mekim bung bilong Pasova long olgeta yia?
6 Lain Israel i mas tingim de em God i bin kisim bek ol long Isip. God i tokim ol olsem: “Yupela i mas makim dispela de bai em i stap bikpela de bilong lotu, bilong tingim dispela samting mi Bikpela, mi bin mekim. Na olgeta lain bilong yupela i kamap bihain bihain, ol tu i mas mekim dispela kaikai [bilong tingim dispela de].” Bihain long bung bilong Pasova long Nisan 14, lain Israel i mas mekim tu narapela bung inap 7-pela de, em bung bilong Ol Bikpela De Bilong Bret i No Gat Yis. Olgeta dispela bung bai stap inap 8-pela de, olsem na ol inap kolim ol dispela bung olsem bung bilong Pasova. (Kis. 12:14-17; Luk 22:1; Jon 18:28; 19:14) Pasova em wanpela bikpela bung, o “aniveseri,” em lain Israel i mas tingim long olgeta yia.—2 Sto. 8:13, The Bible in Living English.
7. Jisas i tokim ol disaipel long ol i mas mekim wanem nupela bung?
7 Jisas na ol aposel bilong em i bilong lain Juda na ol i bihainim Lo Bilong Moses, olsem na ol i mekim bung bilong Pasova. (Mat. 26:17-19) Taim Jisas i mekim laspela bung bilong Pasova wantaim ol disaipel, em i tok ol disaipel i mas mekim wanpela nupela bung long olgeta yia. Dispela bung em Kaikai Bilong Bikpela. Tasol ol i mas mekim dispela bung long wanem de?
KAIKAI BILONG BIKPELA I KAMAP LONG WANEM DE?
8. Sampela man inap holim wanem askim long bung bilong Pasova na Kaikai Bilong Bikpela?
8 Bihain tasol long Jisas i mekim bung bilong Pasova wantaim ol aposel, em i kirapim bung bilong Kaikai Bilong Bikpela. Olsem na Kaikai Bilong Bikpela i kamap long wankain de olsem bung bilong Pasova. Ating yu luksave olsem, sampela taim lain Juda long nau i no mekim bung bilong Pasova long wankain de stret olsem yumi mekim Memorial bilong tingim dai bilong Krais. Bilong wanem i olsem? Yumi inap kliagut long dispela samting taim yumi skelim tok em God i givim long lain Israel long samting ol i mas mekim long kirap bilong Pasova. Ol manmeri i mas kilim sipsip long Nisan 14, na God i tokim ol long wanem taim stret ol i mas kilim sipsip, na dispela bai kirapim bung bilong Pasova.—Ritim Kisim Bek 12:5, 6.
9. Olsem Kisim Bek 12:6 i kamapim, ol i mas kilim sipsip bilong Pasova long wanem taim? (Lukim tu blok “Wanem Taim Bilong De?”)
9 Olsem Kisim Bek 12:6 i kamapim, ol i mas kilim sipsip “long apinun tru.” Sampela narapela Baibel olsem Baibel Tanakh bilong lain Juda, i tanim dispela tok olsem “klostu tru long taim bilong tudak.” Olsem na ol i mas kilim sipsip long kirap bilong Nisan 14, em long taim san i go daun, tasol ples i lait yet.
10. Sampela man i ting lain Israel i bin kilim sipsip bilong Pasova long wanem taim? Dispela i kamapim wanem askim?
10 Bihain, sampela Juda i pilim olsem ol bai lusim bikpela haptaim long kilim olgeta sipsip ol man i bringim i kam long tempel. Long tingting bilong ol, dispela haptaim em Kisim Bek 12:6 i kolim olsem “apinun tru,” dispela i makim pinis bilong de long Nisan 14, haptaim kirap long taim san i stat long go daun long apinun na i go inap long taim we tudak i laik kamap. Tasol sapos lain Israel i kilim ol sipsip long pinis bilong Nisan 14, orait ol bai kisim kaikai bilong Pasova long wanem taim? Profesa Jonathan Klawans i tok, ating lain Israel i bin kisim kaikai bilong Pasova long Nisan 15. Tasol em i tok Buk Kisim Bek long Baibel i no kolim dispela tok. Em i tok tu olsem ol rait bilong ol rabai i no stori long olsem wanem lain Israel i save mekim bung bilong Pasova paslain long yia 70 C.E., em yia we tempel i bagarap.
11. (a) Wanem samting i kamap long Jisas long de bilong Pasova long yia 33 C.E.? (b) Bilong wanem ol i kolim Nisan 15 long yia 33 C.E. olsem “wanpela spesel Sabat”? (Lukim futnot.)
11 Orait, long yia 33 C.E., ol i bin mekim kaikai bilong Pasova long wanem de? Long Nisan 13, em de paslain long Pasova, Jisas i tokim Pita na Jon olsem: “Go na redim Pasova bilong yumi long kaikai.” (Luk 22:7, 8) Orait, long Nisan 14, em Fonde apinun bihain long san i go daun, Jisas i mekim kaikai bilong Pasova wantaim ol aposel bilong em. Bihain long dispela kaikai, Jisas i kirapim bung bilong Kaikai Bilong Bikpela. (Luk 22:14, 15) Long dispela nait, ol i arestim Jisas na putim em long kot. Ol i hangamapim Jisas long diwai pos klostu long taim bilong belo long Nisan 14, na em i dai long apinun. (Jon 19:14) Olsem na “ol i sakrifaisim Krais . . , em sakrifais bilong yumi long pasova,” long wankain de olsem ol i bin kilim sipsip bilong Pasova. (Mat. 26:2; 1 Kor. 5:7; 11:23) Ol i putim Jisas long matmat paslain long kirap bilong neks de, em Nisan 15. b—Wkp. 23:5-7; Luk 23:54.
MEMORIAL YU INAP KISIM SKUL LONG EN
12, 13. Olsem wanem ol pikinini long lain Israel i insait long bung bilong Pasova?
12 Long taim ol i mekim namba 1 Pasova long Isip, God i tokim ol Israel long mekim dispela bung “long olgeta yia.” Long taim bilong Pasova long olgeta yia, ol pikinini bai askim papamama long risen bilong dispela bung. (Ritim Kisim Bek 12:24-27; Lo 6:20-23) Olsem na bung bilong Pasova i stap olsem samting “bilong tingim” na ol pikinini tu inap kisim ol skul long en.—Kis. 12:14.
13 Olgeta lain tumbuna bilong lain Israel i skulim ol pikinini bilong ol long ol bikpela samting bilong Pasova. Wanpela skul em olsem, Jehova inap lukautim ol man i lotuim em. Ol pikinini i kisim skul olsem Jehova em God i gat laip na em i stap tru, na em i save tingim tru lain bilong em na em i save lukautim ol. Em i kamapim klia dispela samting taim em i lukautim ol fesbon pikinini bilong lain Israel na ol i stap laip yet taim em i kamapim namba 10 hevi long lain Isip.
14. Ol papamama Kristen i ken yusim stori bilong Pasova long givim wanem skul long ol pikinini?
14 Yupela ol papamama Kristen, i no gat lo i makim olsem yupela i mas kamapim stori bilong Pasova long ol pikinini bilong yupela long olgeta yia. Tasol olsem wanem? Yupela i yusim stori bilong Pasova long skulim ol pikinini olsem God i save lukautim lain bilong em? Yupela i ting ol pikinini i luksave olsem yupela i bilip tru olsem God i save lukautim yumi long nau tu? (Sng. 27:11; Ais. 12:2) Yupela na ol pikinini i save toktok gut wantaim na yupela i skulim ol long dispela samting, o yupela yet i save toktok na ol i putim yau tasol? Dispela skul inap helpim famili bilong yupela long bilip strong moa long Jehova.
Yu inap yusim stori bilong Pasova long givim wanem ol skul long ol pikinini bilong yu? (Lukim paragraf 14)
15, 16. Stori bilong Pasova na stori bilong God i kisim bek lain Israel inap givim wanem skul long yumi long Jehova?
15 Narapela bikpela skul yumi inap kisim long Pasova em olsem, Jehova inap lukautim lain bilong em, na tu, em inap kisim bek ol long han bilong ol birua. Piksaim long tingting: Lain Israel i bin pilim olsem wanem taim Jehova i kisim bek ol long Isip? Jehova i yusim klaut na paia long stiaim ol i go long solwara Retsi. Bihain, ol i lukim Jehova i brukim solwara i go long 2-pela hap na solwara i sanap long sait sait olsem banis. Orait, graun namel long 2-pela hap bilong solwara i drai na ol manmeri i bihainim dispela rot na wokabaut i go long hapsait. Taim ol i kamap pinis long hapsait, ol i lukluk i stap taim solwara i kam daun na karamapim lain ami bilong Isip. Lain Israel i litimapim nem bilong Jehova long em i kisim bek ol na ol i singsing olsem: “Nau bai mi singim song long Bikpela . . . Em i tromoi ol hos wantaim ol man i sindaun long ol hos i go insait long solwara. Bikpela yet i save mekim mi strong . . . Em i save kisim bek mi.”—Kis. 13:14, 21, 22; 15:1, 2; Sng. 136:11-15.
16 Olsem wanem? Sapos yu gat ol pikinini, orait yu helpim ol long luksave olsem Jehova em i strongpela God husat bai kisim bek lain bilong em? Taim yu mekim ol disisen o toktok wantaim ol pikinini, yu ting ol i luksave olsem yu bilip long Jehova olsem em inap kisim bek yu na famili bilong yu? Long taim bilong famili lotu, yu ken stori wantaim ol long olsem wanem Jehova i kisim bek lain bilong em, na yusim ol stori i stap long Kisim Bek sapta 12 i go inap sapta 15, Aposel 7:30-36, na Daniel 3:16-18, 26-28. Yumi olgeta, ol yangpela na lapun wantaim, i mas bilip tru olsem wankain olsem Jehova i bin kisim bek lain bilong em long pastaim, em bai kisim bek yumi tu long bihain.—Ritim 1 Tesalonaika 1:9, 10.
BILONG YUMI LONG TINGIM
17, 18. Bilong wanem blut bilong Jisas i dia tru winim blut bilong sipsip bilong Pasova?
17 Ol Kristen tru i no save mekim bung bilong Pasova. Aniveseri bilong Pasova i stap aninit long Lo Bilong Moses, na yumi no bihainim dispela Lo. (Rom 10:4; Kol. 2:13-16) Yumi tingim narapela aniveseri, em dai bilong Pikinini Bilong God. Tasol yumi inap kisim planti skul long bung bilong Pasova em ol i bin kirapim long Isip.
18 Lain Israel i bin tromoi blut bilong sipsip long freim bilong dua, na dispela i bin helpim fesbon bilong ol long abrusim bagarap. Long nau, yumi no save kisim blut bilong animal na givim long God olsem ofa long bung bilong Pasova o long ol narapela taim, nogat. Tasol i gat narapela sakrifais em blut bilong en i dia tru, winim ol narapela sakrifais. Dispela blut inap kisim bek ol manmeri, na ol inap stap laip oltaim. Aposel Pol i kamapim klia olsem dispela blut em blut bilong Jisas, em “blut em i tromoi long yumi,” na dispela blut i opim rot long ol Kristen God i bin makim inap kisim laip oltaim long heven. Ol i kamap “ol fesbon pikinini em nem bilong ol i stap long heven.” (Hib. 12:23, 24) Blut bilong Jisas i opim rot na ol arapela sipsip tu inap kisim laip oltaim long graun. Oltaim yumi olgeta i mas tingim dispela tok promis: “Dispela man i givim pe bilong baim bek man long rot bilong blut bilong en, na i mekim yumi kamap fri. Yes, ol rong bilong yumi i tekewe, na dispela i stret wantaim bikpela pasin helpim bilong God.”—Efe. 1:7.
19. Ol samting i kamap long Jisas taim em i dai, olsem wanem dispela inap strongim bilip bilong yumi long ol tok profet bilong Baibel?
19 Taim lain Israel i kilim sipsip bilong mekim kaikai bilong Pasova, God i tokim ol olsem ol i no ken brukim bun bilong abus. (Kis. 12:46; Nam. 9:11, 12) Olsem wanem long ol bun bilong Jisas, em “Pikinini Sipsip bilong God,” na em i bin givim laip bilong em long baim bek ol man? (Jon 1:29) Ol i hangamapim em long diwai pos, na ol i hangamapim 2-pela raskolman klostu long em, wanpela raskol long han sut na wanpela long han kais. Ol Juda i askim Pailat long tok orait long brukim ol bun bilong Jisas na 2-pela raskolman na bai ol i dai hariap. Long dispela rot, ol Juda inap rausim ol bodi bilong ol long diwai pos paslain long Nisan 15, em de bilong 2-pela Sabat. Ol soldia i brukim ol lek bilong 2-pela raskolman, “tasol taim ol i kamap long Jisas, ol i lukim olsem em i dai pinis, olsem na ol i no brukim lek bilong em.” (Jon 19:31-34) Wankain olsem ol i mekim long ol bun bilong sipsip bilong Pasova, ol i no brukim ol bun bilong Jisas. Olsem na sipsip bilong Pasova “i olsem sedo tasol” bilong sakrifais bilong Jisas long Nisan 14 bilong yia 33 C.E. (Hib. 10:1) Dispela i truim tok bilong Song 34:20. Dispela i mas strongim bilip bilong yumi long ol tok profet bilong Baibel.
20. Olsem wanem bung bilong Pasova i no wankain long bung bilong tingim Kaikai Bilong Bikpela?
20 Tasol ol samting ol Juda i mekim long bung bilong Pasova, dispela i no wankain long ol samting Jisas i tokim ol disaipel long mekim bilong tingim Kaikai Bilong Bikpela. Olsem: Lain Israel i ken kaikai mit bilong sipsip, tasol ol i no ken dringim blut bilong en. Dispela i no wankain long samting Jisas i tokim ol disaipel bilong em long mekim. Em i tok ol manmeri husat bai mekim wok king “long Kingdom bilong God,” ol i mas kaikai bret na dringim wain, na dispela i makim bodi na blut bilong Jisas. Long neks stadi, yumi bai kisim sampela save moa long Memorial bilong tingim dai bilong Krais.—Mak 14:22-25.
21. Bilong wanem yumi mas kisim save long bung bilong Pasova?
21 Pasova em wanpela bikpela bung long histori bilong lain bilong God, na yumi olgeta wan wan inap kisim planti skul long en. Olsem na maski Pasova em wanpela bung em lain Juda i mas “tingim,” yumi ol Kristen i mas save long dispela bung na kisim ol gutpela skul long en, long wanem, “God em i as bilong olgeta tok i stap long Rait Holi.”—2 Tim. 3:16.
a Namba 1 mun long kalenda bilong ol Hibru em mun Abip, tasol bihain ol i kolim Nisan taim lain Israel i lusim kalabus long Babilon. Long dispela stadi, yumi bai yusim nem Nisan.
b De bihain long Pasova, Nisan 15, em namba 1 de bilong bung bilong Ol Bikpela De Bilong Bret i No Gat Yis, na oltaim dispela de em de sabat. Long yia 33, Nisan 15 em kirap bilong Sabat long olgeta wik (Sarere). Tupela Sabat wantaim i bin kamap long wankain de long dispela yia, olsem na ol i kolim dispela de olsem “wanpela spesel Sabat.”—Ritim Jon 19:31, 42.