BAIBEL i tokaut klia olsem man marit i mas ‘laikim meri bilong em olsem em i save laikim em yet.’ Meri marit i mas “i gat bikpela rispek long man bilong en.” Tupela wantaim i mas mekim wok bilong ol olsem “wanpela bodi tasol.” (Efe. 5:33; Stt. 2:23, 24) Bihain long sampela haptaim, tupela marit bai pas gut moa, na pasin laikim bilong ol bai kamap strong moa. Wankain olsem ol rop bilong 2-pela diwai i gro klostu long narapela narapela, filings bilong tupela marit i save kamap strong moa na tupela i save pas gut wantaim taim ol yia i kam na i go.

Tasol olsem wanem sapos poroman marit i dai? Dispela bai brukim strongpela pasin bilong tupela long pas gut wantaim. Poroman marit husat i stap laip yet, em inap pilim bikpela bel hevi, pilim wanpis, na ating em inap belhat o pilim olsem em i gat asua. Daniella i marit inap 58 yia na em i save long planti em poroman marit bilong ol i dai. a Taim man bilong em i dai, em i tok: ‘Pastaim mi no bin kliagut long man i save pilim olsem wanem taim poroman marit i dai. Taim dispela samting i kamap long yu, long dispela taim tasol yu inap kliagut long en.’

Sampela saveman i tok olsem taim poroman marit i dai, bel hevi man i kisim i winim tru bel hevi em i kisim long ol narapela samting. Planti manmeri em poroman marit bilong ol i dai, ol i wanbel long dispela tok. Man bilong Millie i dai planti yia i go pinis. Em i stori long laip bilong em olsem wanpela wido na em i tok: “Mi pilim olsem mi wanpela lek nogut.” Dispela tok i makim bel hevi bilong em bihain long man bilong em i dai—tupela i bin marit inap 25 yia.

Susan i bin ting olsem i no stret long ol wido i krai sori inap planti yia taim man bilong ol i dai. Tasol bihain, man bilong em i dai—tupela i bin marit inap  38 yia. Nau em 20 yia i go pinis, na em i tok: “Long olgeta wan wan de mi save tingim em.” Planti taim em i save aiwara, long wanem, em i misim tru man bilong em.

Baibel i stori olsem taim poroman marit i dai, bikpela bel hevi i save bagarapim tru sindaun bilong poroman na dispela bel hevi i save stap longpela taim. Taim Sara i dai, man bilong em Abraham “i sori tru na i krai long em.” (Stt. 23:1, 2) Maski Abraham i bilip strong long kirap bek, em i pilim bikpela bel sori tru taim gutpela meri bilong em i dai. (Hib. 11:17-19) Resel em naispela meri bilong Jekop, na taim Resel i dai, Jekop i no lusim tingting long em. Em i stori gut long ol pikinini man bilong em long pasin bilong Resel.—Stt. 44:27; 48:7.

Yumi mas kisim wanem skul long ol dispela stori bilong Baibel? Ol manmeri em poroman marit bilong ol i dai, ol i save bel hevi inap planti yia. Yumi no ken ting olsem aiwara na bel hevi bilong ol i makim olsem ol i no gat strong. Dispela em nomol, long wanem, ol i misim tru poroman husat i dai. Ating ol bai nidim yumi long pilim hevi bilong ol na helpim ol inap longpela taim.

Taim wanpela poroman marit i dai, i stap bilong narapela bai i no wankain olsem long taim em i stap singel yet. Bihain long man na meri i marit inap planti yia pinis, man marit i save lain long olsem wanem em bai mekim gut bel bilong meri bilong em na strongim em taim em i bel hevi o kros. Sapos man marit i dai, orait pasin laikim na pasin bilong em long mekim gut bel bilong meri tu bai pinis. Wankain tu long meri, em i lain long olsem wanem em inap mekim man i amamas na bilip tru long em yet. Meri i gat gutpela pasin tru bilong putim han i go isi na tatsim man bilong em, mekim gutpela tok, na tingim gut ol samting man i laikim na nidim. Sapos meri i dai, man bai pilim olsem em i sot tru long olgeta samting. Olsem na sampela em poroman marit bilong ol i dai, ol i tingting planti na pret long ol samting bai kamap long bihain. Wanem stiatok bilong Baibel inap helpim ol long pilim olsem ol bai stap gut na stap bel isi?

Baibel i tok: “No ken tingting planti long ol samting bilong de antap, long wanem, de antap bai i gat ol wari bilong en. Hevi bilong wanpela de em inap long dispela de tasol.” (Mat. 6:34) Dispela tok bilong Jisas i makim ol samting yumi nidim olsem klos na kaikai, tasol dispela tok i bin helpim planti manmeri long sanap strong yet na karim bel hevi taim poroman marit i dai. Sampela mun bihain long meri bilong Charles i dai, em i tok: “Mi misim tru Monique taim em i dai, na dispela bel hevi i stap yet, na sampela taim i luk olsem dispela bel hevi i wok long i go bikpela moa yet. Tasol mi luksave olsem em nomol long mi pilim olsem, na bihain long sampela haptaim dispela bel hevi bai go daun isi isi.”

Charles i karim yet dispela bel hevi “bihain long sampela haptaim.” Olsem wanem em i bin mekim olsem? Em i tok, “Jehova i helpim mi long karim hevi bilong wan wan de.” Charles i no larim bel hevi i daunim em, nogat. Bel hevi bilong em i no pinis hariap, tasol em i no larim dispela bel hevi i daunim em. Sapos poroman marit bilong yu i bin dai pinis, orait traim long karim bel hevi bilong yu long olgeta wan wan de. Yu no save, ating long neks de yu bai kisim tok bilong helpim o strongim yu.

Dai em i no samting em Jehova i tingting pinis long kamapim long namba 1 taim, nogat. Dai em wanpela bilong “ol samting Satan i kamapim.” (1 Jon 3:8; Rom 6:23) Satan i save yusim dai na pasin bilong pret long dai long kontrolim ol man olsem ol sleiv, na bai ol i no  ken bilip na wet long gutpela samting i kamap bihain. (Hib. 2:14, 15) Satan i save amamas taim ol man i no gat bilip olsem ol inap i stap belgut na amamas tru. Na tu, Satan i save amamas taim man i no gat bilip olsem em inap i stap belgut na amamas tru long nupela taim God bai kamapim. Sin bilong Adam na pasin bikhet bilong Satan i mekim na taim poroman marit i dai, poroman bilong em i save pilim bikpela bel hevi. (Rom 5:12) Jehova bai pinisim tru dispela hevi em Satan i kamapim na em bai daunim tul bilong Satan, em dai. Ol man husat bai kamap fri long pret em Satan i kamapim, planti bilong ol em ol lain em poroman marit bilong ol i dai pinis, na ating yu tu yu wanpela bilong ol.

Ol man husat bai kirap bek long nupela taim, sampela senis bai kamap long sindaun bilong ol. Pasin i stap namel long ol manmeri bai senis. Olsem: Ol papamama, ol bubu, na ol narapela lain tumbuna bai kirap bek na isi isi ol bai kamap gutpela olgeta, na tu, ol pikinini na ol tumbuna pikinini bilong ol tu bai kamap gutpela olgeta. Hevi bilong kamap lapun bai pinis. Long nau, ol yangpela i no save rispektim ol lapun, tasol long nupela taim ol bai givim bikpela rispek tru long ol lapun. Ol dispela senis bai helpim sindaun bilong ol manmeri long kamap gutpela moa.

Ating i gat planti samting yumi laik save long en long ol manmeri i kirap bek. Olsem: Wanem samting bai kamap long ol manmeri em 2-pela o 3-pela poroman marit bilong ol i dai pinis? Ol Sadyusi i givim askim long wanem samting bai painim wanpela meri em namba 1 man bilong em i dai, na bihain namba 2 man i dai, na i go inap long 5-pela moa man bilong em i dai. (Luk 20:27-33) Wanem samting bai kamap taim olgeta i kirap bek? Yumi no save, na i no gat as long yumi  ges o wari long bekim bilong ol dispela askim. Long nau, yumi mas trastim God. Yumi ken bilip olsem olgeta samting Jehova i mekim long bihain bai i gutpela. Yumi amamas long wetim dispela taim bai kamap, na i no gat wok long yumi pret.

Wanpela samting em Baibel i tokaut klia long en em olsem, ol pren na ol wanfamili husat i dai pinis, ol bai kirap bek. Baibel i gat ol stori long sampela man husat i bin kirap bek long bipo, na dispela i soim klia olsem “olgeta man i stap long matmat ol bai harim nek bilong [Jisas] na kam ausait.” (Jon 5:28, 29) Long dispela taim, ol manmeri bai amamas tru taim ol i bung gen wantaim ol wanfamili husat i kirap bek. Amamas bilong ol lain husat i kirap bek bai bikpela tru winim amamas em yumi inap tingim.

Planti bilion manmeri bai kirap bek na kisim laip, na bikpela amamas tru bai kamap long graun, winim long bipo. (Mak 5:39-42; Rev. 20:13) Taim yumi tingim tingim dispela mirakel bai kamap bihain, dispela bai mekim gut bel bilong olgeta manmeri em ol pren na ol wanfamili bilong ol i dai pinis.

Yu ting i gat wanpela samting bai mekim na ol man i bel hevi taim ol manmeri i kirap bek long matmat? Baibel i tok i no gat wanpela man bai bel hevi. Olsem Aisaia 25:8 i kamapim, Jehova “bai i pinisim dai tru na bai dai i no kamap moa.” Dispela i makim olsem God bai pinisim dai olgeta na ol hevi we dai i save kamapim. Tok profet long Buk Aisaia i tok tu olsem: “God, Bikpela bai i pinisim krai bilong ol na mekim drai wara bilong ai bilong olgeta manmeri.” Sapos poroman marit bilong yu i dai pinis na yu bel hevi long nau, orait yu no inap tingim moa dispela bel hevi taim em i kirap bek.

I no gat wanpela man i kliagut long olgeta samting God bai mekim long nupela taim. Jehova i tok: “Skai i stap antap tru long graun, olsem tasol ol pasin bilong mi na tingting bilong mi i winim tru ol pasin bilong yupela na tingting bilong yupela.” (Ais. 55:9) Taim yumi bilipim tok promis bilong Jisas long kirap bek, dispela i soim olsem yumi trastim Jehova, wankain olsem Abraham i bin mekim. Long nau, em i bikpela samting long olgeta Kristen i mas mekim ol samting God i tokim ol long mekim. Sapos yumi mekim olsem, yumi bai winim mak bilong kisim laip long nupela taim wantaim ol lain husat bai kirap bek long matmat.—Luk 20:35.

Sapos yu tingim gut samting yu bilip na wet long en, dispela bai helpim yu na yu no inap tingting planti long ol samting bai kamap bihain. Planti manmeri i no ting olsem gutpela samting bai kamap long bihain. Tasol Jehova i tok promis olsem samting i gutpela moa bai kamap. Yumi no save long olsem wanem stret Jehova bai kamapim dispela samting, tasol yumi inap bilip tru olsem em bai inapim olgeta samting yumi nidim na laikim. Aposel Pol i tok: “Sapos man i lukim pinis samting em i bilip na wet long en, orait em i no gat wok moa long wetim dispela samting, a? Tasol yumi no lukim yet samting yumi bilip na wet long en, olsem na yumi mas wok yet long sanap strong na wetim dispela samting i kamap.” (Rom 8:24, 25) Taim yu bilip strong long ol tok promis bilong God, dispela bai helpim yu long stap strong taim poroman marit bilong yu i dai. Sapos yu sanap strong, yu tu bai stap long gutpela taim i kamap bihain we Jehova bai “givim yu ol samting yu laikim tru.” Em bai “inapim laik bilong olgeta samting i gat laip.”—Sng. 37:4; 145:16, NW; Luk 21:19.

Paslain liklik long taim we Jisas bai dai, ol aposel i bel hevi tru, pret, na tingting planti. Olsem na Jisas i mekim gut bel bilong ol na em i tok: “Yupela i no ken tingting planti. Yupela i mas bilip long God, na bilip long mi tu.” Em i tokim ol olsem: “Mi no inap lusim yupela na larim yupela i stap olsem pikinini i no gat papamama, nogat. Mi bai kam long yupela.” (Jon 14:1-4, 18, 27) Tok bilong Jisas i strongim ol disaipel, em ol Kristen God i bin makim, na insait long planti handret yia ol i sanap strong na bilip na wet long gutpela samting i kamap bihain. Ol manmeri husat i laik tru long lukim ol pren na ol wanfamili i kirap bek long matmat, ol tu i mas holim strong pasin bilong bilip na wet long gutpela samting. Jehova na Pikinini bilong em i no inap lusim yu. Ol man husat i dai pinis, ol bai kirap bek. Klostu nau yu bai bungim gen wanpela husat i dai na yu misim em tru.