1, 2. Kingdom Bilong God bai mekim wanem? Olsem wanem yumi save olsem Kingdom bai kam?

 LONG yia 31 C.E., long maunten klostu long taun Kaperneam, Jisas Krais i skulim ol disaipel long beten, olsem: “Kingdom bilong yu i mas i kam.” (Mat. 6:10) Long nau, planti man i tingting planti olsem Kingdom bai kam o nogat. Tasol yumi bilip tru olsem Jehova bai bekim beten bilong yumi long Kingdom i mas i kam.

² Jehova bai yusim Kingdom bilong em long bungim lain famili bilong em long heven na long graun. Jehova bai inapim samting em i tingting pinis long mekim. (Ais. 55:10, 11) Ol bikpela samting i kamap insait long 100 yia i go pinis i kamapim klia olsem Jehova i stap King pinis long nau. God i wok long mekim ol gutpela samting bilong helpim planti milion manmeri em ol i stap gut long em. (Sek. 14:9; Rev. 15:3) Tasol, taim Jehova i kamap King, dispela i no wankain long samting bai kamap taim Kingdom Bilong God i kam, olsem Jisas i bin skulim yumi long beten long en. Olsem wanem dispela 2-pela samting i no wankain? Na ol dispela samting i helpim yumi olsem wanem?

3. (a) Wanem taim Jisas i kamap King? Em i kamap King long wanem hap? (b) Olsem wanem yu inap kamapim klia olsem Jisas i kirap mekim wok king long 1914? (Lukim futnot.)

³ Inap olsem 20 yia paslain long yia 1900 C.E., ol wokman bilong God i kirap long kliagut long wanpela tok profet em Daniel i bin raitim winim 2,500 yia i go pinis, em i tok: “Taim ol dispela king i stap  yet God bai i kirapim wanpela kingdom na dispela kingdom bai i stap oltaim oltaim.” (Dan. 2:44) Inap planti yia, ol Sumatin Bilong Baibel i tokaut olsem bikpela samting bai kamap long yia 1914. Planti manmeri long dispela taim i bilip olsem ol gutpela samting bai kamap. Wanpela man bilong raitim buk i tok: “Long 1914, ol manmeri i pulap tru long amamas na ol i wetim gutpela samting long kamap.” Tasol klostu long pinis bilong 1914, Wol Woa 1 i kirap na tok profet bilong Baibel i kamap tru. Bikpela hangre, guria, ol bikpela sik, na truim bilong ol arapela tok profet bilong Baibel i soim klia olsem Jisas Krais i kirap pinis long mekim wok king long Kingdom Bilong God long heven long 1914. a Taim Jehova i mekim Pikinini bilong em i kamap King Mesaia, i olsem Jehova i kamap King long nupela rot.

4. Stori long namba 1 samting Jisas i mekim taim em i kamap King. Bihain em i mekim wanem?

⁴ Nupela King i kirap long mekim wok, em King we God yet i bin makim. Namba 1 samting dispela King i mekim em olsem, em i mekim pait long Satan, dispela nambawan Birua bilong God. Jisas na ol ensel bilong em i rausim Satan na ol ensel nogut bilong em long heven. Dispela i kamapim bikpela amamas long heven, tasol bikpela hevi moa i kamap long graun. (Ritim Revelesen 12:7-9, 12.) Bihain long en, King i kirap long stretim stretim, skulim, na oganaisim lain manmeri bilong em long graun, na bai ol i ken mekim laik bilong God. Ol dispela manmeri i bin bihainim gut tok bilong Jisas. Orait nau yumi bai stori long olsem wanem pasin bilong ol long bihainim tok i stap olsem gutpela piksa long yumi tu i ken bihainim long nau.

5. Long haptaim namel long 1914 na kirap bilong 1919, wanem wok i kamap bilong klinim na rausim pasin doti?

⁵ Bihain long Jisas i klinim heven na rausim Satan na ol ensel nogut bilong em, Jehova i tokim Jisas long skelim na stretim stretim lain bilong em hia long graun. Profet Malakai i kolim dispela wok olsem wok bilong klinim na rausim pasin doti long sait bilong bilip. (Mal. 3:1-3) Ol samting i kamap bipo i soim olsem dispela wok bilong klinim na rausim pasin doti i bin kamap long haptaim namel long 1914 na kirap bilong 1919. b Sapos yumi laik stap insait long bikpela lain famili bilong Jehova, orait yumi mas stap klin o holi. (1 Pita 1:15, 16) Yumi no ken larim pasin doti bilong lotu giaman o wok politik i mekim wok lotu bilong yumi i kamap doti.

6. Husat i save givim ol gutpela tok olsem kaikai bilong strongim bilip bilong yumi? Bilong wanem dispela kaikai i bikpela samting tru?

⁶ Jisas i yusim namba bilong em olsem King long makim wanpela “gutpela wokboi i gat savetingting.” Oltaim dispela wokboi bai givim tok bilong God olsem kaikai long olgeta manmeri husat i insait long “wanpela lain sipsip,” em ol i stap aninit long lukaut bilong Jisas. (Mat. 24:45-47; Jon 10:16) Kirap long 1919, sampela brata bilong lain Kristen God i bin makim i mekim gut bikpela wok bilong givim kaikai long “ol arapela wokboi.” Gutpela wokboi i gat savetingting i redim planti gutpela tok bilong helpim yumi long kamap strong moa long bilip. Dispela i kirapim yumi long bihainim ol lo bilong God na mekim olgeta samting long laip bilong yumi i stap klin, olsem lotu, pasin, tingting, na bodi bilong yumi. Na tu, ol dispela gutpela tok yumi kisim olsem kaikai i skulim yumi na redim yumi na bai yumi inap wok strong moa long mekim nambawan bikpela wok i kamap nau long graun, em wok bilong autim tok. Olsem wanem? Yu save kisim ol dispela gutpela tok bilong strongim bilip bilong yu?

7. Taim Jisas i stap long graun, em i bin kirapim wanem bikpela wok? Dispela wok bai stap i go inap long wanem taim?

⁷ Taim Jisas i kirap long mekim wok autim tok long graun, em i tok: “Mi mas autim gutnius  bilong Kingdom bilong God long ol arapela taun tu, long wanem, em long dispela as na God i salim mi i kam.” (Luk 4:43) Inap 3 na hap yia, wok autim tok i stap olsem nambawan bikpela wok long laip bilong Jisas. Em i tokim ol disaipel olsem: “Yupela go na autim tok olsem: ‘Kingdom bilong heven i kam klostu pinis.’” (Mat. 10:7) Bihain long Jisas i kirap bek, em i tok profet olsem ol disaipel bai autim dispela tok “i go inap long olgeta hap bilong graun.” (Apo. 1:8) Em i tok promis long ol disaipel olsem em bai sapotim dispela bikpela wok i go inap long haptaim bilong nau i pinis.—Mat. 28:19, 20.

8. Olsem wanem King i kirapim ol disaipel bilong em long graun long autim tok?

⁸ Long 1919, ol disaipel bilong Jisas i kisim nupela save long “dispela gutnius bilong Kingdom.” (Mat. 24:14) King i mekim wok long heven, na em i bungim liklik lain disaipel long graun, em ol disaipel em i klinim ol pinis. Dispela liklik grup i amamas long bihainim tok bilong Jisas long go long olgeta hap bilong graun na autim gutnius olsem Kingdom Bilong God i kirap pinis long mekim wok long heven! (Apo. 10:42) Olsem: Long Septemba 1922, inap olsem 20 tausen manmeri em ol i stap daun long Kingdom, ol i bung long intenesenel kibung long Cedar Point, Ohio, Amerika. Tingim bikpela amamas bilong ol taim brata Rutherford i mekim wanpela tok, het tok bilong en “Kingdom,” na em i tok: “Lukim! King i kirap pinis long wok! Yupela i man bilong autim tok bilong dispela samting. Olsem na yupela i mas autim tok, autim tok, autim tok bilong King na kingdom bilong em.” Long neks de, inap olsem 2 tausen bratasista i go autim tok, na sampela i lusim ples kibung na go longwe moa inap 72 kilomita long autim tok. Wanpela brata i tok: “Mi no inap tru long lusim tingting long singaut bilong autim tok bilong Kingdom na pasin bilong olgeta long kibung long givim bel tru long autim tok!” Planti arapela tu i pilim wankain olsem dispela brata.

9, 10. (a) Wanem ol skul i trenim yumi long mekim wok autim tok? (b) Olsem wanem yu yet i kisim helpim long dispela trening?

⁹ Long 1922, winim 17 tausen pablisa i autim tok long 58 kantri long olgeta hap bilong graun. Tasol ol i mas kisim trening. Long taim bilong ol aposel, Jisas, em Man Bilong Kamap King, em i skulim gut ol disaipel long ol tok ol i mas autim, wanem hap ol i mas autim tok long en, na olsem wanem ol bai autim tok. (Mat. 10:5-7; Luk 9:1-6; 10:1-11) Long nau tu, Jisas i stiaim gut wok na bai lain bilong autim tok i kisim skul na ol i gat ol tul ol i nidim long mekim gut wok tisa. (2 Tim. 3:17) Jisas i yusim kongrigesen Kristen long trenim ol disaipel bilong em long autim tok. Wanpela rot bilong trenim ol em olsem, em i yusim Skul Tiokratik Bilong Autim Tok we i kamap long winim 111 tausen kongrigesen long olgeta hap. Dispela skul i givim trening long planti pablisa tru, winim 7 milion pablisa. Skul i trenim ol long pasin bilong autim tok na mekim wok tisa long rot we inap helpim “olgeta kain man.”—Ritim 1 Korin 9:20-23.

¹⁰ Na tu, i gat ol Baibel skul bilong trenim ol  elda bilong kongrigesen, ol painia, ol singel brata, ol marit Kristen, ol memba bilong Brens Komiti na ol meri bilong ol, ol wasman raun na ol meri bilong ol, na ol misineri. c Ol sumatin bilong wanpela klas bilong Baibel Skul Bilong Ol Marit Kristen i amamas na tok: “Dispela gutpela trening i strongim tru pasin bilong mipela long laikim Jehova, na i redim gut mipela long helpim ol narapela.”

11. Olsem wanem ol disaipel bilong Jisas inap wok yet long autim tok maski Satan i birua long ol?

¹¹ Satan, em birua bilong yumi, em i lukim olgeta dispela bikpela wok bilong autim tok na skulim ol man long gutnius. Em i laik stopim wok bilong autim tok, olsem na em bai yusim olgeta kain rot long daunim tok bilong Kingdom na ol man husat i autim dispela tok. Tasol wok bilong Satan bai i no inap kamapim samting em i laik mekim. Jehova i putim Pikinini bilong em “i stap antap tru long olgeta gavman na namba na pawa na wok bos.” (Efe. 1:20-22) Jisas i stap olsem King, olsem na em i save yusim namba bilong em long lukautim na stiaim ol disaipel na bai laik bilong Papa bilong em i mas kamap. d Yumi wok yet long autim gutnius, na skulim planti milion manmeri i gat gutpela bel long lotuim Jehova. Em i gutpela blesing tru long yumi tu inap mekim dispela gutpela wok!

12. Kirap long 1914, wanem ol gutpela senis i bin kamap insait long oganaisesen?

¹² Kirap long taim Jisas i mekim wok king long 1914, em i stretim stretim rot em ol wokman bilong God i bihainim long mekim laik bilong Papa bilong em. (Ritim Aisaia 60:17.) Long 1919, ol i makim wanpela sevis dairekta long olgeta wan wan kongrigesen long go pas long wok autim tok. Long 1927, ol kongrigesen i kirap long autim tok long olgeta Sande. Long 1931, ol wokman bilong Jehova i kirap long yusim dispela nem, ol Witnes Bilong Jehova, na dispela i kirapim ol long mekim bikpela wok moa long wok bilong Kingdom. (Ais. 43:10-12) Kirap long 1938, kongrigesen i lusim pasin bilong votim ol brata long go pas long kongrigesen. Ol brata i mas inapim ol mak em Baibel i kolim paslain long ol i kisim wok bilong go pas long kongrigesen. Long 1972, wok bilong lukautim kongrigesen i no stap moa long han bilong wanpela brata tasol, nogat, sampela elda i wok bung wantaim long mekim dispela wok. Olgeta brata husat i winim mak bilong kamap elda na kongrigesen sevan, ol i mas redi long “lukautim gut ol sipsip bilong God.” (1 Pita 5:2) Long 1976, ol i tilim ol memba bilong Gavening Bodi na kamapim 6-pela komiti bilong lukautim wok bilong Kingdom long olgeta hap bilong graun. Kirap long dispela taim, Jisas i wok yet long oganaisim ol disaipel bilong em long bihainim rot em God yet i makim.

13. Taim King Mesaia i mekim wok bilong em, olsem wanem dispela i bin helpim yu?

 ¹³ Tingim ol bikpela wok em King Mesaia i bin mekim insait long fes 100 yia bilong em long mekim wok king. Em i bin klinim wanpela lain husat bai holim nem bilong Jehova. Em i stiaim wok bilong autim gutnius bilong Kingdom long 239 kantri na em i skulim planti milion manmeri long lotuim Jehova. Em i bungim moa long 7 milion disaipel em ol i redi long givim ol yet long mekim laik bilong Papa bilong em. (Sng. 110:3) Jehova i yusim Kingdom Bilong Mesaia long mekim planti bikpela wok. Tasol planti bikpela wok moa bai kamap long bihain!

14. (a) Yumi askim God long mekim wanem taim yumi beten olsem: “Kingdom bilong yu i mas i kam”? (b) Wanem yiateks bilong yumi long 2014? Bilong wanem dispela yiateks i stret?

¹⁴ Maski Jehova i mekim Pikinini bilong em, Jisas Krais, i kamap King Mesaia long 1914, dispela i olsem hap bekim tasol long beten bilong yumi olsem “Kingdom bilong yu i mas i kam.” (Mat. 6:10) Baibel i tok profet olsem Jisas bai mekim wok bos “namel long ol birua bilong [em].” (Sng. 110:2, NW) Ol gavman bilong graun em Satan i bosim, ol i birua yet long Kingdom. Lain 144,000 bai mekim wok king wantaim King Mesaia long heven. Olsem na taim yumi beten long Kingdom Bilong God i mas i kam, i olsem yumi askim God long larim King Mesaia na lain 144,000 i pinisim na rausim wok gavman bilong ol man wantaim ol manmeri husat i birua long Kingdom. Dispela bai truim tok profet i stap long Daniel 2:44, em i tok Kingdom Bilong God bai “daunim ol na bagarapim ol [“dispela,” NW] king.” Em bai bagarapim ol gavman husat i birua long Kingdom. (Rev. 6:1, 2; 13:1-18; 19:11-21) Klostu tru nau dispela samting bai kamap. Yia 2014 em 100 yia aniveseri bilong Kingdom Bilong God long mekim wok long heven. Olsem na i stret tru long yiateks bilong 2014 i kam long Matyu 6:10, em i tok: “Kingdom bilong yu i mas i kam”!

15, 16. (a) Wanem ol bikpela samting bai kamap long Taim Bilong Wan Tausen Yia Bilong Krais i Stap King? (b) Wanem laspela samting Jisas bai mekim taim em i stap King Mesaia? Olsem wanem dispela bai inapim samting em Jehova i tingting pinis long kamapim?

¹⁵ Taim King Mesaia i bagarapim pinis ol birua bilong God, em bai tromoi Satan na ol ensel nogut bilong em i go insait long hul i no gat as na ol bai stap long hap inap 1 tausen yia. (Rev. 20:1-3) Jisas i givim pinis ofa bilong baim bek ol man. Olsem na taim Satan na ol ensel nogut i no stap moa, Kingdom bai mekim wok long ofa bilong Jisas na helpim ol manmeri na pinisim olgeta hevi em sin bilong Adam i kamapim. King bai kirapim bek planti milion manmeri na oganaisim bikpela wok tru bilong skulim ol manmeri long Jehova. (Rev. 20:12, 13) Graun olgeta bai kamap ples paradais wankain olsem gaden Iden, na olgeta stretpela manmeri bai kamap gutpela olgeta.

¹⁶ Bihain long Taim Bilong Wan Tausen Yia Bilong Krais i Stap King, Jehova bai inapim pinis samting em i tingting pinis long kamapim long dispela graun. Jisas bai putim Kingdom i go bek long han bilong Papa. (Ritim 1 Korin 15:24-28.) Long dispela taim, yumi bai i no nidim wanpela long stap olsem namelman namel long yumi na Jehova. Olgeta pikinini man bilong God long heven na ol pikinini bilong em long graun bai stap wanbel wantaim Papa bilong ol long heven, na olgeta bai stap olsem wanpela bikpela lain famili bilong heven na graun.

17. Yu tingting strong long mekim wanem bilong helpim wok bilong Kingdom?

¹⁷ Ol bikpela samting i kamap insait long 100 yia bilong Kingdom long mekim wok, i soim olsem Jehova i kontrolim ol samting na em bai inapim samting em i tingting pinis long kamapim long graun. I gutpela yumi stap gut yet long em na autim yet tok bilong King na Kingdom bilong em. Yumi bilip tru olsem klostu nau Jehova bai bekim dispela beten bilong yumi: “Kingdom bilong yu i mas i kam”!