TAIM Pascal i wok long kamap bikpela long Kot Diwa, em wanpela hap we ol man i stap rabis, em i laik tru long kisim gutpela sindaun. Em i kirap lain long boksen, na em i tingting olsem, ‘Bai mi go we na mi inap kisim biknem long spots na kamap maniman?’ Taim em i gat 25 samting krismas, em i pilim olsem em i mas go long Yurop. Tasol em i no gat paspot samting, olsem na em i tingting long bihainim narapela rot we i no stret wantaim lo bilong gavman.

Long 1998, taim Pascal i gat 27 krismas, em i kirapim raun bilong em. Em i abrusim boda na go long Gana, katim namel long Togo na Benin, na em i go kamap long taun Birni Nkonni long Naija. Nau em bai mekim raun we bikpela hevi tru inap painim em. Bilong go long hap not, em i mas kalap long wanpela trak na brukim ples wesan nating bilong Sahara. Taim em i kamap long Mediterenian, em bai kalap long bot na seil i go long Yurop. Dispela em plen bilong em, tasol taim em i stap long Naija, 2-pela samting i kamap na i stopim em.

Namba 1, em i sot long mani. Namba 2, em i bungim Noé, em wanpela painia husat i kirapim Baibel stadi wantaim em. Em i pilim tru ol samting em i kisim skul long en na dispela i kirapim em long senisim tingting bilong em. Em i lusim laik bilong em long kisim biknem long sait bilong spots na em i tingim ol samting bilong lotu. Long Disemba 1999, Pascal i kisim baptais. Em i laik soim olsem em i tenkyu tru long Jehova, olsem na long 2001, em i kirap mekim wok painia long Naija—em dispela taun we em i bin kisim save long tok i tru. Em i pilim olsem wanem long wok painia bilong em? Em i tok, “Mi amamas tru long laip bilong mi!”

Wankain olsem Pascal, planti i luksave olsem ol i save kisim bikpela amamas tru taim ol i mekim wok bilong lotu. Bilong mekim olsem, sampela i bin lusim Yurop na ol i go long Afrika na helpim wok long ol hap we i sot tru long ol pablisa bilong autim tok bilong Kingdom. Inap olsem 65 Witnes long Yurop, em krismas bilong ol i namel long 17 na 70, ol i go bilong helpim wok autim tok long ol kantri long Wes Afrika, olsem Benin, Bekina Faso, Naija, na Togo. a Wanem samting i kirapim ol long lusim gutpela sindaun bilong ol na go long ol dispela hap? Wanem samting i kamap long wok ol i mekim?

Anne-Rakel em i bilong Denmak, na em i tok: “Papamama bilong mi i bin mekim wok misineri long Senegal. Oltaim ol i save stori long wok misineri bilong ol, olsem na mi tu mi laik mekim kain wok olsem.” Inap 15 yia i go pinis, taim Anne-Rakel i gat 20 krismas samting, em i go long Togo na em i helpim wok insait long wanpela kongrigesen bilong tokples Sain. Olsem wanem samting em i mekim i kirapim ol arapela? Em i tok: “Bihain, liklik susa na liklik brata bilong mi i bihainim mi na kam long Togo.”

Aurele, em wanpela brata long Frans husat i marit na em i gat 70 krismas, em i tok: “Inap 5-pela yia i go pinis, mi  ritaia long wok na mi mas mekim wanpela disisen: Mi bai stap tasol long Frans na wetim Paradais long kamap o mi bai mekim bikpela wok moa long wok autim tok.” Aurele i mekim disisen long mekim bikpela wok moa long wok autim tok. Inap 3-pela yia i go pinis, em wantaim meri bilong em, Albert-Fayette i lusim Frans na go long Benin. Aurele i tok: “Em nambawan gutpela samting tru long mipela inap givim mipela yet long mekim wok bilong Jehova long hia.” Em i smail na tok moa olsem: “Sampela hap long teritori bilong mipela i stap klostu long nambis, na dispela i kirapim mi long tingim Paradais.”

Clodomir na meri bilong em Lysiane, i lusim Frans na go long Benin inap 16 yia i go pinis. Pastaim, ol i misim tru famili na ol pren bilong ol long Frans, na ol i pret olsem ol i no inap lain long nupela sindaun bilong ol. Tasol i no gat as long ol i pret. Ol i amamas tru. Clodomir i tok: “Insait long dispela 16 yia, mipela i amamas long helpim ol arapela, na long olgeta wan wan yia mipela i helpim 1-pela man long kam insait long tok i tru.”

Tupela marit, em Sébastien na Johanna, long 2010 ol i lusim Frans na go stap long Benin. Sébastien i tok: “I gat planti wok long mekim insait long kongrigesen. Taim mipela i mekim wok long hia, dispela i kain olsem mipela i kisim wanpela tiokratik kos!” Olsem wanem? Ol man i amamas long harim tok? Johanna i tok: “Ol man i hangre tru long harim tok i tru. Maski em i no taim bilong autim tok, ol manmeri i save stopim mipela long rot na givim ol askim long tok bilong Baibel, na ol i save kisim ol buk na nius bilong yumi.” Olsem wanem dispela i bin helpim marit bilong ol? Sébastien i tok: “Dispela i strongim marit bilong mipela. Mi amamas olsem long de olgeta mi save wok wantaim meri bilong mi long wok autim tok.”

Eric na meri bilong em Katy, ol i mekim wok painia long hap not bilong Benin we i no gat planti man. Taim ol i stap yet long Frans inap 10-pela yia i go pinis, ol i kirap long ritim ol atikol we i stori long pasin bilong i go helpim wok long ol hap i sot long ol pablisa, na tu, ol i toktok wantaim ol fultaim sevan. Dispela i kirapim laik bilong ol long i go long Benin, na ol i mekim olsem long 2005. Ol i kirap nogut long lukim olsem planti manmeri i wok long kam insait long tok i tru. Eric i tok: “Inap 2-pela yia i go pinis, grup bilong mipela long taun Tanguiéta i gat 9-pela pablisa, tasol nau mipela i gat 30 pablisa. Long Sande, namel long 50 na 80 manmeri i save kam long ol miting. Mipela i kisim bikpela amamas tru long lukim olsem planti manmeri i wok long kam long ol miting!”

Taim ol bratasista i go long helpim wok long ol hap i sot long ol pablisa, ol i save bungim wanem ol hevi? Benjamin em brata bilong Anne-Rakel, na em i gat 33 krismas. Long yia 2000, em i stap long Denmark na em i bungim  wanpela misineri husat i mekim wok long Togo. Benjamin i tok: “Taim mi tokim dispela misineri olsem mi laik mekim wok painia, em i tok: ‘Yu inap mekim wok painia long Togo.’” Benjamin i tingim tingim dispela tok. Em i tok: “Mi no winim yet 20 krismas long dispela taim, tasol 2-pela sista bilong mi ol i go stap pinis long Togo na mekim wok painia. Dispela i opim rot na em isi long mi inap i go long dispela hap.” Olsem na em i go. Tasol i gat wanpela hevi i stap yet. Benjamin i tok: “Mi no save liklik long tok Frans. Kirap long taim mi go kamap long hap, na i go inap 6-pela mun, mi no inap toktok wantaim ol arapela.” Bihain, em i lain long mekim tok Frans. Long nau, Benjamin i mekim wok long Betel long Benin. Em i save mekim wok bilong bringim ol buk na nius i go long ol kongrigesen na helpim wok long kompiuta dipatmen.

Eric na Katy, em yumi stori pinis long ol, ol i bin helpim kongrigesen bilong narapela tokples taim ol i stap long Frans paslain long ol i go long Benin. Long Wes Afrika, wanem ol samting i narapela kain? Katy i tok: “I hatwok long painim wanpela gutpela haus. Inap planti mun mipela i stap long wanpela haus we i no gat pawa na wara long en.” Eric i tok moa olsem: “Ol neiba i save pilaim musik na musik i save pairap bikpela i go inap long biknait. Yumi no ken les kwik taim kain samting olsem i kamap, na yumi mas redi long lain long nupela kain sindaun.” Tupela wantaim i wanbel na tok: “Amamas mipela i kisim long dispela hap we i no gat man i bin autim tok long en, dispela i winim tru ol hevi i painim mipela.”

Michel na Marie-Agnès, em tupela marit husat i gat 58 krismas samting, ol i lusim Frans na i go sindaun long Benin inap 5-pela yia i go pinis. Pastaim ol i bin tingting planti. Michel i tok: “Sampela man i tok samting mipela i mekim i kain olsem man i wokabaut long rop ol i taitim antap long bikpela baret na em i pusim wilbaro antap long dispela rop—mipela i sindaun insait long wilbaro! Ating bai yu pret sapos yu no save olsem Jehova em i dispela man husat i wokabaut antap long rop. Olsem na mipela i lusim Frans na i go sindaun long Benin bambai mipela inap mekim wok bilong Jehova, na Jehova i helpim mipela.”

Ol lain husat i gat ekspiriens long i go helpim wok long ol hap i sot tru long ol pablisa, ol i tok em i bikpela samting long yu mas redim yu yet. Yu mas mekim ol dispela samting: Plenim gut ol samting yu bai mekim. Lain long nupela kain sindaun. Mekim baset na bihainim dispela baset. Bilip strong long Jehova.—Luk 14:28-30.

Sébastien, em yumi stori pinis long em, em i tok: “Paslain long mitupela Johanna i go long Benin, inap 2-pela yia mipela i sevim sampela mani. Mipela i lusim sampela amamas we mipela i save tromoi mani long en, na mipela i lusim pasin bilong baim nating ol samting.” Ol i laik stap yet long Benin na helpim wok, olsem na long olgeta wan wan yia ol i save mekim wok mani long Yurop inap sampela  mun, na dispela i opim rot long ol inap mekim wok painia long Benin long yia olgeta.

Marie-Thérèse em wanpela bilong ol 20 singel sista husat i go long helpim wok long Wes Afrika. Em i mekim wok olsem wanpela bas draiva long Frans; tasol long 2006 em i kisim malolo inap 1-pela yia long mekim wok painia long Naija. I no longtaim na em i luksave olsem em i laik tru long mekim dispela kain wok. Marie-Thérèse i tok: “Taim mi kam bek long Frans, mi tokim bos bilong mi olsem mi laik senisim sediul bilong mi long wok, na em i tok em bai senisim. Long nau, kirap long Me i go long Ogas, mi save mekim wok olsem bas draiva long Frans, na long Septemba i go inap long Epril, mi save mekim wok painia long Naija.”

Ol man husat i “painim Kingdom pastaim,” ol i ken bilip olsem Jehova ‘bai givim olgeta samting long ol.’ (Mat. 6:33) Olsem: Tingim samting i bin kamap long Saphira, wanpela singel sista bilong Frans husat i gat 28 krismas samting na em i mekim wok painia long Benin. Long 2011, em i go bek long Frans long mekim wok mani bilong kisim liklik mani inap long lukautim em taim em i stap wanpela moa yia long Afrika—dispela bai namba 6 yia bilong em. Saphira i tok: “Em Fraide, laspela de bilong mi long wok, tasol mi mas wok 10-pela de moa na bai mi ken kisim mani inap long lukautim mi long narapela yia. Mi gat 2-pela wik moa long stap long Frans. Mi beten long Jehova na tokim em long hevi bilong mi. Bihain liklik, wanpela kampani i ringim mi na askim sapos mi inap kisim ples bilong wanpela wokmeri inap 2-pela wik.” Long Mande, Saphira i go long ples wok na bai em i kisim trening long dispela wokmeri we em bai kisim ples bilong em. Em i tok: “Mi kirap nogut long painimaut olsem dispela wokmeri em wanpela sista Kristen husat i nidim 10-pela de malolo na bai em inap go long Skul Bilong Wok Painia! Bos i no orait long dispela sista i kisim malolo. Bos bai tok orait sapos sista i painim wanpela long kisim ples bilong em. Sista i bin beten askim Jehova long helpim em—wankain olsem mi bin mekim.”

Sampela bratasista i bin go helpim wok long Wes Afrika inap planti yia na dispela hap i kamap olsem ples bilong ol. Sampela narapela i bin stap inap sampela yia na ol i go bek long kantri bilong ol. Tasol long nau tu, ol bratasista husat i bin i go helpim wok inap planti yia long ol hap i sot long ol pablisa, ol i kisim helpim yet long wok ol i bin mekim. Ol i luksave olsem taim man i mekim wok bilong Jehova, em bai kisim bikpela amamas tru.