Long 1985, mi gat 10-pela krismas. Sampela pikinini long Kambodia i kam long skul bilong mi long Columbus, Ohio, long Amerika. Wanpela boi i save liklik long tok Inglis. Em i yusim ol piksa na i mekim ol stori nogut bilong ol man i givim pen long ol narapela na kilim ol i dai, na em i mekim tu stori bilong ol manmeri husat i ranawe na bai laip bilong ol i no ken lus. Mi krai long nait taim mi tingim ol dispela pikinini. Mi laik stori long ol long Paradais na bilip bilong kirap bek, tasol ol i no kliagut long tokples bilong mi. Maski mi stap mangi yet, mi mekim disisen long lainim tokples bilong Kambodia na bai mi inap stori long ol wanskul bilong mi long Jehova. Mi no luksave olsem dispela disisen bai mekim bikpela samting long laip bilong mi long bihain.

I hatwok tru long lainim tokples Kambodia. Inap 2-pela taim mi laik givap, tasol Jehova i yusim papamama bilong mi long strongim mi long lainim yet dispela tokples. Bihain, ol tisa na ol wanskul i laik kirapim mi long kisim wanpela wok i gat gutpela pe bilong en. Tasol mi laik mekim wok painia, olsem na long haiskul mi kisim ol kos we bai helpim mi long painim ol haptaim wok. Bihain long skul, mi save go autim tok wantaim sampela painia. Na tu, mi amamas long helpim ol sumatin long lainim tok Inglis. Dispela disisen i helpim mi long bihain.

Taim mi gat 16 krismas, mi harim olsem i gat wanpela grup bilong tokples Kambodia i stap long Long Beach, California, Amerika. Mi go long dispela hap na mi lain long ritim tokples Kambodia. Bihain tasol long mi grediuet long skul, mi mekim wok painia na mi wok yet long autim tok long ol neiba em ol i save mekim tokples Kambodia. Taim mi gat 18 krismas, mi tingting long go long Kambodia. Dispela ples i no seif, tasol i gat 10 milion manmeri i stap long Kambodia na planti bilong ol i no harim yet gutnius. Long dispela taim, i gat 1-pela kongrigesen tasol long dispela kantri, na kongrigesen i gat 13 pablisa. Taim mi gat 19 krismas, mi go long Kambodia long namba 1 taim. Tupela yia bihain, mi mekim disisen long i go stap long hap. Mi painim wanpela haptaim wok, em wok bilong tanim tok na skulim ol narapela long tok Inglis. Bihain, mi maritim wanpela sista husat i laik winim ol wankain mak olsem mi. Mitupela i amamas long wok wantaim long helpim planti manmeri bilong Kambodia long kamap ol Witnes Bilong Jehova.

Jehova i givim mi ol samting mi laikim tru. (Sng. 37:⁠4) Wok autim tok i save mekim man i kisim bikpela amamas tru. Insait long 16 yia mi stap long Kambodia, dispela liklik kongrigesen i gat 13 pablisa long en i kamap bikpela na nau i gat 12-pela kongrigesen na 4-pela liklik grup!​—⁠Stori bilong Jason Blackwell.