“Kingdom Bilong Yu i Mas i Kam” Wanem Taim?
“Taim yupela i lukim ol dispela samting, yupela i mas save olsem . . . em i stap pinis long dua.”—MAT. 24:33.
1, 2. (a) Wanem samting inap mekim na sampela taim yumi no lukim stret samting yumi laik lukim? (b) Yumi ken save tru olsem Kingdom Bilong God bai mekim wanem samting?
ATING yu luksave olsem sampela taim ol man i no save tingim olgeta samting we i bin kamap long wanpela taim. Long wankain pasin, ating i hatwok long wanpela i tingim stret olgeta tok bilong dokta, taim dokta i painimaut long sik bilong man na stori long en. O ating man i no inap lukim ki o aiglas bilong em maski ol dispela samting i stap ples klia. Bilong wanem kain samting olsem i save kamap? Ol saveman i tok, taim yumi laik mekim planti samting long wankain taim, dispela i save mekim na yumi no inap lukim stret wanpela samting, i olsem yumi kamap aipas. Kru bilong yumi i no inap tingim planti samting long wankain taim, nogat, em inap tingim gut wanpela samting tasol.
2 Planti manmeri long nau i no luksave long ol samting i wok long kamap long graun, i olsem ol i stap aipas. Ating ol inap tok olsem, kirap long 1914 ol bikpela senis tru i bin kamap long graun, tasol ol i no kliagut long as tru bilong ol dispela samting. Yumi save stadi long Baibel, olsem na yumi save olsem Kingdom Bilong God i kam long 1914 taim Jisas i kamap King long heven. Tasol yumi no kisim yet olgeta bekim bilong dispela beten olsem, “Kingdom bilong yu i mas i kam. Laik bilong yu i mas kamap long graun olsem em i save kamap long heven.” (Mat. 6:10) Dispela beten bai kisim olgeta bekim bilong en taim pasin nogut bilong nau i pinis. Taim dispela samting i kamap, orait laik bilong God bai kamap long graun olsem i kamap long heven.
3. Taim yumi stadi long Baibel, dispela i helpim yumi long luksave long wanem samting?
3 Olgeta taim yumi save stadi long Baibel, olsem na yumi inap lukim olsem ol tok profet i wok long kamap tru long nau. Tasol planti man long nau i no luksave long dispela samting! Ol i bisi tru long laip bilong ol, olsem na ol i no luksave long ol samting i soim klia olsem, Krais i mekim wok King kirap long 1914 na klostu nau em bai pinisim pasin nogut bilong dispela graun. Askim yu yet olsem: ‘Mi bilip yet olsem pinis bilong dispela graun i klostu tru na ol samting i kamap long graun i soim klia dispela samting?’ Maski sapos yu bin stap Witnes inap sotpela taim tasol, yu putim tingting i go long wanem samting? Maski yu putim tingting i go long wanem samting, yumi ken stori long 3-pela bikpela risen na yumi save olsem klostu nau God bai kamapim laik bilong em long dispela graun.
OL MAN I SINDAUN LONG HOS I KAM PINIS
4, 5. (a) Jisas i bin mekim wanem kirap long 1914 na i kam? (Lukim piksa long kirap bilong stadi.) (b) Ol dispela 3-pela man i sindaun long ol hos na bihainim Jisas, ol i olsem piksa i makim wanem ol samting? Olsem wanem dispela tok profet i kamap tru?
4 Long 1914, Jisas Krais i kisim namba long mekim wok King long Kingdom Bilong God. Tok profet i stap long Revelesen sapta 6 i stori olsem Jisas i sindaun long waitpela hos na ron i go. Bihain tasol long em i kamap King, kwiktaim em i kirap long mekim ol samting bilong daunim graun nogut bilong Satan na winim pait. (Ritim Revelesen 6:1, 2.) Tok profet i kamapim olsem taim Kingdom Bilong God i kirap long mekim wok, pasin bilong ol manmeri long graun bai kamap nogut moa. Woa, bikpela hangre, sik, na ol narapela hevi we i save mekim man i dai, bai kamap bikpela moa. Tripela man husat i sindaun long ol hos na bihainim Jisas Krais, ol i olsem piksa bilong makim ol dispela hevi.—Rev. 6:3-8.
5 Olsem tok profet i kamapim, woa i “tekewe bel isi long graun.” Dispela samting i kamap maski planti kantri i promis long wok bung wantaim na stap bel isi. Wol Woa 1 em fes woa we i bagarapim tru sindaun bilong ol man na ol manmeri i no stap bel isi moa. Kirap long 1914, planti wok i bin kamap long helpim sait bilong mani na saiens, tasol hevi bilong sot long kaikai i putim bikpela hevi yet long ol man. Olgeta man i luksave olsem sik, bikpela disasta, na ol narapela bikpela hevi i save mekim na planti milion man i dai long olgeta yia. Ol dispela hevi i save nogutim tru ol man, na kamap planti taim moa, na kilim planti manmeri moa winim olgeta taim bipo. Olsem wanem? Yu luksave long risen na ol dispela samting i kamap?
Ol man i sindaun long hos na ron, olsem na pasin nogut bilong graun i kamap nogut moa (Lukim paragraf 4, 5)
6. Husat lain i bin luksave long truim bilong tok profet bilong Baibel? Ol i bin mekim wanem taim tok profet i kamap tru?
6 Wol Woa 1 na bikpela sik kus bilong Spen i bin pulim tingting bilong planti manmeri. Tasol ol Kristen God i bin makim, ol i bilip olsem “haptaim bilong ol manmeri bilong ol arapela lain” bai pinis long 1914. (Luk 21:24) Ol dispela Kristen i no save long olsem wanem stret tok profet bilong Baibel bai kamap tru, tasol ol i save olsem long 1914 wanpela bikpela samting tru bai kamap long Kingdom Bilong God. Taim ol i save gut olsem dispela tok profet i bin kamap tru, ol i strongim bel na tokaut long ol narapela olsem wok bos bilong God i kirap pinis. Ol man i mekim nogut tru long planti manmeri husat i autim tok bilong Kingdom. Dispela pasin birua i truim narapela tok profet bilong Baibel. Kirap long dispela taim na i go inap planti yia bihain, ol birua bilong Kingdom i yusim ol lo long stopim wok bilong autim tok. Na tu, ol i paitim ol brata, kalabusim ol, na kilim sampela i dai.—Sng. 94:20; Rev. 12:15.
7. Bilong wanem planti manmeri i no luksave long as tru bilong ol samting i wok long kamap long nau?
7 Sapos i gat planti samting i soim klia olsem long nau Kingdom Bilong God i mekim wok long heven, orait bilong wanem planti man i no luksave long dispela? Bilong wanem ol i no luksave olsem ol samting i kamap long graun i wok long truim ol tok profet bilong Baibel wankain stret olsem ol manmeri bilong God i wok long tokaut long en inap planti yia nau? Yu ting ol i laik lukim tasol ol samting ol i laik lukim? (2 Kor. 5:7) Yu ting ol i bisi long laip bilong ol yet na ol i no luksave long samting God i wok long mekim? (Mat. 24:37-39) Yu ting ol samting bilong dispela graun bilong Satan i pulim tingting bilong sampela bilong ol? (2 Kor. 4:4) Yumi mas bilip na yumi mas i gat save bilong tok i tru, na dispela bai helpim yumi long luksave long ol samting em Kingdom Bilong God i wok long mekim. Yumi ken amamas tru olsem yumi inap luksave stret long ol samting i wok long kamap!
PASIN NOGUT I KAMAP BIKPELA MOA
8-10. (a) Olsem wanem tok bilong 2 Timoti 3:1-5 i kamap tru? (b) Bilong wanem yumi ken tok olsem pasin nogut i wok long kamap nogut moa?
8 I gat namba 2 samting we i mekim na yumi save olsem klostu nau Kingdom Bilong God bai bosim graun: Pasin bilong dispela graun i nogut moa winim bipo, na i wok long i go nogut moa yet. Klostu 100 yia nau, yumi lukim truim bilong tok profet bilong 2 Timoti 3:1-5. Ol pasin bilong ol man em ol dispela ves i stori long en i wok long kamap long olgeta hap bilong graun. Olsem wanem? Yu luksave tu long dispela samting? Orait nau yumi ken skelim sampela eksampel.—Ritim 2 Timoti 3:1, 13.
9 Tingim ol samting i bin kamap bihain long 1940 o 1950 samting na ol manmeri i kirap nogut long en, na skelim dispela wantaim ol samting i kamap nau long ples wok, long sait bilong amamas, spots, na long sait bilong bilas. Long olgeta hap bilong graun, ol man i save pait na bagarapim man, mekim pasin pamuk, na mekim hatpela pasin. Ol manmeri i save mekim ol dispela pasin na bai ol narapela i kirap nogut long en. Long ol yia bihain long 1950 samting, i gat sampela program bilong televisen em ol man i ting i no gutpela, tasol long nau ol man i ting dispela kain program i gutpela long famili i ken lukim. Planti manmeri i luksave olsem ol gei na ol lesbien i gat strong long amamasim ol manmeri, stiaim tingting bilong ol manmeri long stail bilong bilas, na ol i save soim pasin bilong ol long ples klia. Yumi tenkyu tru olsem yumi save long tingting bilong God long ol dispela samting!—Ritim Jut 14, 15.
10 Tingim pasin bikhet bilong ol yangpela long bipo, na skelim wantaim pasin bikhet bilong ol yangpela long nau. Olsem: Long ol yia bihain long 1950, planti papamama i no laik bai pikinini bilong ol i smok, dring alkohol, o danis long pasin we i no stret. Tasol long nau, yumi save harim nius i nogut tru, olsem: Wanpela sumatin i gat 15 krismas i yusim gan na sutim ol wanskul bilong em, kilim i dai 2-pela, na 13 sumatin i kisim bikpela bagarap. Sampela tineja i spak na ol i kilim i dai wanpela yangpela gel husat i gat 9-pela krismas na ol i paitim papa na kasen bilong em. Narapela nius ripot i tok: Long wanpela kantri long Esia, ol yangpela i save kamapim 50 pesen bilong ol hevi we i kamap insait long 10-pela yia. I no gat wanpela man bai sakim dispela tingting olsem pasin nogut bilong nau i wok long kamap nogut moa.
11. Bilong wanem planti manmeri i no luksave olsem pasin bilong ol man i wok long kamap nogut moa?
11 Tok bilong aposel Pita i stret tru taim em i tok: “Long taim bilong las de ol man bilong tok bilas bai kamap na mekim ol tok bilas, na ol bai bihainim laik bilong ol yet na tok olsem: ‘Em i bin tok promis olsem em bai kam i stap, tasol em i stap we? Kirap long taim ol tumbuna bilong yumi i bin i dai na i kam inap nau, olgeta samting i stap wankain olsem bipo tru taim God i mekim ol samting i kamap.’” (2 Pita 3:3, 4) Bilong wanem sampela man i mekim kain pasin olsem? Taim yumi lukim wanpela samting planti taim, bai yumi no inap tingting tumas long en. Sapos pasin bilong wanpela pren i senis wantu tasol, ating yumi bai kirap nogut. Tasol sapos tingting na pasin bilong ol manmeri i senis isi isi insait long wanpela haptaim we i longpela, ating yumi no inap luksave long dispela. Kain samting olsem inap nogutim yumi.
12, 13. (a) Bilong wanem yumi no ken bel hevi long ol samting i wok long kamap long graun? (b) Wanem samting inap helpim yumi long sanap strong long dispela haptaim bilong las de we i “givim hatwok” long yumi?
12 Aposel Pol i tok lukaut olsem haptaim bilong las de “bai givim hatwok long ol man.” (2 Tim. 3:1) Tasol yumi no inap abrusim ol dispela hevi. Yumi inap daunim olgeta kain bel hevi o pret yumi pilim. Yumi inap kisim helpim long Jehova, holi spirit, na kongrigesen Kristen, na yumi inap stap gut yet long Jehova. God bai givim yumi “strong i winim strong bilong yumi ol man.”—2 Kor. 4:7-10.
13 Taim Pol i mekim tok profet bilong las de, em i kirapim wantaim dispela hap tok “yu mas save olsem.” Dispela hap tok i kamapim klia olsem dispela tok profet bai kamap tru. Yumi save olsem pasin nogut bilong dispela graun bai wok yet long kamap nogut moa i go inap long taim Jehova i pinisim ol dispela pasin. Yumi skelim ol samting i bin kamap bipo na yumi luksave olsem taim ol manmeri i no bihainim moa lo bilong stretpela pasin, wanpela lain o kantri olgeta inap bungim bikpela hevi tru. I no gat wanpela taim bipo we ol manmeri long olgeta hap bilong graun i no tingim moa lo bilong stretpela pasin. Ating planti manmeri bai i no tingim as tru bilong dispela pasin, tasol ol samting i kamap long graun kirap long 1914 na i kam, i mas kirapim yumi long bilip tru olsem klostu nau Kingdom Bilong God bai pinisim olgeta pasin nogut.
“LAIN PIPOL BILONG DISPELA TAIM BAI I NO DAI YET”
14-16. Wanem namba 3 risen na yumi bilip olsem klostu nau Kingdom Bilong God bai “kam”?
14 Ol samting i bin painim ol manmeri bilong God i kamapim namba 3 risen na yumi ken bilip tru olsem pinis i klostu. Olsem: Paslain long Kingdom Bilong God i kirap mekim wok long heven, sampela Kristen i mekim wok bilong God, em ol Kristen God i bin makim ol long holi spirit. Taim tok profet i no kamap tru long 1914 olsem ol i bin tingim, ol i mekim wanem? Planti bilong ol i stap gut yet long mekim wok bilong Jehova na sanap strong taim ol hevi i painim ol na ol birua i mekim nogut long ol. Insait long planti yia bihain long 1914, planti bilong dispela lain Kristen God i bin makim, ol i stap gut long God i go inap long taim ol i dai.
15 Long tok profet bilong haptaim bilong las de bilong graun bilong Satan, Jisas i tok: “Lain pipol bilong dispela taim bai i no dai yet na ol dispela samting bai kamap.” (Ritim Matyu 24:33-35.) Taim Jisas i tok “lain pipol bilong dispela taim,” yumi save olsem tok bilong em i makim 2-pela grup bilong ol Kristen God i bin makim. Fes grup i bin stap long 1914 na ol i bin kliagut olsem Krais i kirap long mekim wok King long dispela yia. Ol Kristen husat i stap insait long dispela grup, ol i bin stap laip long 1914, na tu, God i bin makim ol long holi spirit long 1914 o paslain long 1914.—Rom 8:14-17.
16 Olgeta husat i stap long namba 2 grup bilong dispela “lain pipol bilong dispela taim,” ol i bin stap laip na God i bin makim ol long holi spirit insait long haptaim em sampela memba bilong fes grup i stap laip yet long graun. Olsem na sampela bilong ol Kristen God i bin makim ol long holi spirit na ol i stap laip long nau, ol i no insait long grup bilong dispela “lain pipol bilong dispela taim” em Jisas i bin toktok long en. Long nau, ol Kristen husat i stap long namba 2 grup, ol i wok long kamap lapun. Tasol tok bilong Jisas long Matyu 24:34 i strongim yumi long bilip tru olsem sampela bilong “lain pipol bilong dispela taim bai i no dai yet” paslain long ol i lukim kirap bilong traipela hevi tru. Dispela i strongim yumi olsem klostu nau King long Kingdom Bilong God bai bagarapim ol man nogut na kamapim nupela taim we i gat stretpela pasin tasol long en.—2 Pita 3:13.
KLOSTU NAU KRAIS BAI WINIM PAIT
17. Yumi skelim pinis ol tok profet we i wok long kamap tru long nau, na dispela inap givim wanem save long yumi?
17 Yumi skelim pinis ol tok profet we i wok long kamap tru long nau, na dispela inap givim wanem save long yumi? Olsem Jisas i bin tok lukaut long en, yumi no save long wanem de o aua stret em pinis bai kamap. (Mat. 24:36; 25:13) Tasol Pol i tok olsem yumi save long “dispela taim,” em haptaim bilong las de. (Ritim Rom 13:11.) Long nau yumi stap stret long “dispela taim.” Sapos yumi tingim gut tok profet bilong Baibel na ol samting em God Jehova na Jisas Krais i wok long mekim, yumi bai luksave tru olsem pinis bilong dispela haptaim nogut bilong nau i kam klostu pinis.
18. Wanem samting bai kamap long ol manmeri husat i no stap daun long Jisas Krais olsem King bilong ol?
18 Ol manmeri husat i sakim wok bos bilong Jisas Krais, em Man husat i sindaun long waitpela hos na i ron i go, klostu nau ol bai tokaut olsem ol i mekim rong. Ol i no inap abrusim strafe we bai painim ol. Taim dispela samting i kamap, planti man bai pret na singaut na tok: “Husat inap sanap i stap?” (Rev. 6:15-17) Sapta 7 bilong Buk Revelesen i bekim dispela askim. Long dispela taim, ol Kristen God i bin makim na ol manmeri husat i bilip na wet long kisim laip long graun, ol bai “sanap i stap,” long wanem, God i orait long ol. Orait, “bikpela lain manmeri” bilong lain arapela sipsip bai abrusim bagarap long taim bilong traipela hevi tru.—Rev. 7:9, 13-15.
19. Sapos yu bilip tru olsem pinis i klostu, orait yu laik tru long lukim wanem samting i kamap?
19 Sapos yumi wok yet long putim tingting i go long ol tok profet bilong Baibel we i wok long kamap tru long nau, yumi no inap larim graun bilong Satan i pulim tingting bilong yumi. Yumi no inap stap aipas na i no luksave long as tru bilong ol samting i wok long kamap long nau. Klostu nau, long stretpela pait bilong Armagedon, Krais bai winim pait na bagarapim ol manmeri nogut bilong nau. (Rev. 19:11, 19-21) Tingim bikpela amamas yumi bai kisim bihain long dispela samting i kamap!—Rev. 20:1-3, 6; 21:3, 4.