1, 2. (a) Husat em “King bilong oltaim oltaim”? Bilong wanem yumi inap tok olsem? (Lukim piksa long kirap bilong stadi.) (b) Bilong wanem yumi laik bai Jehova i bosim yumi?

 KING SOBHUZA Namba 2 bilong Swasilan i mekim wok king inap olsem 61 yia. Yumi kirap nogut olsem wanpela man inap mekim wok king inap longpela taim, tasol i gat narapela king husat i stap longpela taim moa winim ol man bilong graun. Baibel i tok dispela man em i “King bilong oltaim oltaim.” (1 Tim. 1:17) Man bilong raitim song i kolim nem bilong dispela King. Em i tok: “Jehova i stap king inap oltaim oltaim.”—Sng. 10:16, NW.

² God i bin mekim wok king inap longpela taim tru, olsem na wok bos bilong em i narapela kain long ol man. Tasol pasin Jehova i bihainim long mekim wok bos, dispela i kirapim yumi long i go klostu long em. Wanpela king husat i bin bosim lain Israel inap 40 yia i litimapim nem bilong God na i tok: “Bikpela i save sori moa yet long yumi na oltaim em i marimari long yumi. Em i no save belhat kwiktaim, na em i save laikim tru yumi. Bikpela i stap king long heven, na em i bos bilong olgeta samting.” (Sng. 103:8, 19) Jehova i stap King bilong yumi, na tu, em i stap olsem gutpela Papa bilong yumi long heven. Tasol olsem wanem Jehova i bin stap olsem wanpela Papa? Olsem wanem Jehova i soim olsem em i stap yet olsem King na em i bin  kontrolim ol samting kirap long taim pasin bikhet i kamap long Iden na i kam inap long nau? Bekim bilong ol dispela askim bai helpim yumi long go klostu moa long Jehova na kirapim yumi long bilip strong moa long em.

3. Husat em fes man long stap insait long bikpela lain famili bilong Jehova long heven na graun? God i bin wokim husat lain tu na ol i stap olsem “ol pikinini man” bilong em?

³ Ating Jehova i bin amamas tru taim em i wokim fesbon Pikinini bilong em! Jehova i no lukim em olsem wanpela pikinini nating, nogat. Jehova i laikim em tru olsem Pikinini bilong em na em i orait long tupela i ken wok wantaim long wokim planti milion ensel em ol i gutpela olgeta. (Kol. 1:15-17) Baibel i tok ol dispela ensel i amamas long stap olsem “wokman bilong Bikpela . . . na [ol] i save bihainim laik bilong em.” Jehova i givim biknem long ol taim em i kolim ol olsem “ol pikinini man” bilong em. Ol tu i insait long bikpela lain famili bilong em long heven na graun.—Sng. 103:20-22; Jop 38:7, NW.

4. Olsem wanem ol man bilong graun i insait long bikpela lain famili bilong Jehova?

⁴ Bihain long Jehova i wokim ol samting bilong ples antap na graun, em i mekim bikpela lain famili bilong em i kamap bikpela moa. Bihain long em i redim graun na mekim i kamap gutpela ples, em i wokim namba 1 man, Adam, na em i wokim Adam i kamap olsem Em yet. (Stt. 1:26-28) Jehova i wokim Adam, olsem na em i laik bai Adam i mas bihainim tok bilong em. Olsem wanpela Papa, Jehova i soim pasin laikim na pasin helpim taim em i givim ol skultok. Ol lo em i putim i no pasim ol man long mekim disisen bilong ol yet.—Ritim Stat 2:15-17.

5. Olsem wanem ol manmeri bai kamap na i go sindaun long olgeta hap bilong graun?

⁵ Jehova i save tingim ol wokman bilong em olsem famili, tasol planti king bilong graun i no save mekim olsem. Jehova i trastim ol wokman bilong em, olsem na em i amamas long givim planti wok long ol, na tu, em i givim namba long ol long mekim wok bilong ol. Olsem: Em i tokim Adam long mekim gutpela wok bilong givim nem long olgeta wan wan animal, tasol dispela wok i gat hatwok tu long en. (Stt. 1:26; 2:19, 20) God yet i no wokim olgeta wan wan man husat i stap long graun, nogat. Em i wokim wanpela meri i gutpela olgeta, em Iv, na em i stap olsem meri bilong Adam. (Stt. 2:21, 22) God i opim rot long Adam na Iv i ken kamapim ol pikinini na bai ol i kamap planti na i go sindaun long olgeta hap bilong graun. Sapos Adam na Iv i no bin mekim rong, isi isi ol manmeri inap mekim graun olgeta i kamap ples paradais. Olsem na olgeta manmeri bilong graun na ol ensel bai stap olsem wanpela lain famili na ol bai lotuim Jehova inap oltaim oltaim. Jehova i soim olsem em i wanpela Papa husat i laikim tru ol pikinini taim em i tokim Adam na Iv long gutpela samting ol i ken bilip na wet long en!

6. (a) Olsem wanem pasin bikhet i kirap insait long famili bilong God? (b) Olsem wanem yumi save olsem Jehova i kontrolim yet ol samting?

⁶ Sori tru, Adam na Iv i no larim Jehova i stap olsem King bilong ol. Ol i bihainim Satan, em ensel husat i mekim pasin bikhet long God. (Stt. 3:1-6) Dispela i kamapim pen, hevi, na dai long ol yet na long ol pikinini bilong ol tu. (Stt. 3:16-19; Rom 5:12) Olsem na long dispela taim, i no gat moa ol man long graun i bihainim tok bilong God. Tasol yu ting dispela i makim olsem God i no bosim ol moa na em i lusim wok bilong em long stap olsem nambawan bos bilong graun? Nogat tru! Jehova i rausim Adam tupela Iv long gaden Iden, na em i no laik bai ol i kam bek gen, olsem na em i makim ol serap long was long gaden. (Stt. 3:23, 24) Na long seim taim, em i soim pasin laikim bilong em olsem wanpela papa. Em i tok promis olsem em bai i gat wanpela famili em ol gutpela ensel na ol manmeri bilong graun i  insait long en. Em i tok promis olsem wanpela pikinini bilong Adam bai bagarapim Satan na rausim ol hevi em sin bilong Adam i kamapim.—Ritim Stat 3:15.

7, 8. (a) Long taim bilong Noa, ol manmeri i mekim wanem ol pasin nogut? (b) Jehova i mekim wanem bilong klinim graun na lukautim lain manmeri long graun?

⁷ Insait long planti handret yia, sampela man olsem Abel na Enok i stap gut long Jehova. Tasol planti man i no larim Jehova long stap olsem Papa na King bilong ol. Long taim bilong Noa, olgeta hap bilong graun i pulap long pasin bilong “pait na bikhet tasol.” (Stt. 6:11) Yu ting dispela i makim olsem Jehova i no kontrolim ol samting i kamap long graun? Baibel i tok wanem?

⁸ Baibel i tok olsem Jehova i givim ol tok em Noa i mas bihainim long wokim wanpela traipela sip we bai seivim em na famili bilong em. God i soim pasin laikim bilong em long ol manmeri taim em i makim Noa long “tokaut long stretpela pasin.” (2 Pita 2:5) Ating Noa i tokim ol man long tanim bel na em i tok lukaut long bagarap bai painim ol, tasol i no gat wanpela man i putim yau long tok bilong em. Inap planti yia, Noa na famili bilong em i stap long taim nogut bilong pait na bikhet na ol man i save mekim kain kain pasin i nogut tru. Jehova i stap olsem wanpela gutpela Papa na em i lukautim na stiaim dispela 8-pela manmeri em ol i stap gut long em. Taim Jehova i kamapim Bikpela Tait, em i rausim ol bikhet manmeri na ol ensel nogut, na dispela i soim olsem em i kontrolim ol samting.—Stt. 7:17-24.

9. Bihain long Bikpela Tait, Jehova i opim rot long ol manmeri inap mekim wanem?

⁹ Bihain long Noa na famili bilong em i lusim sip na kam ausait, ating ol i bin tenkyu tru long Jehova i bin lukautim ol gut. Bihain tasol long ol i lusim sip, Noa i wokim wanpela alta na givim ol ofa bilong lotuim Jehova. God i blesim famili bilong Noa na tokim ol long “karim planti pikinini, bai ol lain bilong [ol] i pulapim olgeta hap bilong graun.” (Stt. 8:20–9:1) Rot i op gen long ol manmeri inap stap wanbel long lotuim Jehova na pulapim olgeta hap bilong graun.

10. (a) Bihain long Bikpela Tait, ol manmeri i bin stap long wanem hap na ol i kirap long bikhet long Jehova? Pasin bikhet bilong ol i kirap olsem wanem? (b) Jehova i mekim wanem na bai laik bilong em i ken kamap?

¹⁰ Tasol bihain long Bikpela Tait, ol manmeri i stap yet olsem ol sinman. Maski ol manmeri i no inap lukim Satan na ol spirit nogut long ai tru bilong ol, Satan na ol spirit nogut i wok yet long stiaim ol. I no longtaim, ol manmeri i kirap gen long sakim gutpela wok bos bilong Jehova. Wanpela man husat i bin sakim Jehova em tumbuna pikinini bilong Noa, em Nimrot. Nimrot “i bikhet long Jehova na em i strongpela man bilong raunim ol animal.” Em i wokim ol bikpela taun, olsem taun Babel, na mekim em yet i kamap king “long graun bilong Babilonia.” (Stt. 10:8-12, NW) Jehova bai mekim wanem long dispela bikhet king? Jehova bai mekim wanem long ol samting em Nimrot i mekim na i no stret wantaim laik bilong God? God i paulim tokples bilong ol manmeri na bai lain bilong Nimrot i go nabaut long olgeta hap bilong graun. Long olgeta hap ol i go long en, ol i bringim lotu giaman na pasin ol i save bihainim long mekim wok bos.—Stt. 11:1-9.

11. Olsem wanem Jehova i soim olsem em i stap gut long pren bilong em Abraham?

¹¹ Bihain long Bikpela Tait, planti manmeri i lotuim ol giaman god, tasol i gat sampela bilipman em ol i bin stap gut long lotuim Jehova. Wanpela bilong ol em Abraham. Em i gat gutpela haus long taun Ur, tasol em i bihainim tok bilong Jehova na lusim dispela taun na stap long ol haus sel inap planti yia. (Stt. 11:31; Hib. 11:8, 9) Abraham i no bilip olsem wanpela king bilong graun o banis bilong taun inap lukautim em, nogat. Jehova yet i bin lukautim Abraham na famili bilong em. Man bilong raitim song i stori long pasin lukaut bilong Jehova olsem wanpela papa na em i tok: “Bikpela i no larim . . . sampela lain i daunim ol. Nogat. Em i helpim ol  na em i krosim ol king i laik mekim nogut long ol.” (Sng. 105:13, 14) Jehova i stap gut long pren bilong em Abraham, na em i tok promis olsem em bai mekim sampela long “lain pikinini bilong [Abraham] . . . i kamap king.”—Stt. 17:6; Jems 2:23.

12. Olsem wanem Jehova i soim klia long lain Isip olsem em i stap nambawan bos? Olsem wanem dispela i bin helpim lain bilong em?

¹² God i tok promis long pikinini na tumbuna pikinini bilong Abraham, em Aisak na Jekop, olsem em bai blesim ol na ol tumbuna pikinini bilong ol bai kamap king. (Stt. 26:3-5; 35:11) Tasol, paslain long ol tumbuna pikinini bilong Jekop i kamap king, ol i stap olsem ol sleiv long Isip. Yu ting dispela i makim olsem Jehova i no inap truim tok promis bilong em o em i no laik stap moa olsem nambawan bos bilong graun olgeta? Nogat tru! Long taim em yet i makim, Jehova i kamapim klia strong bilong em na soim olsem em i gat bikpela namba moa winim bikhetman Fero. Lain Israel i bilip long Jehova, na em i mekim narapela kain samting bilong kisim bek ol, em i bringim ol i go long solwara Retsi na larim ol i go fri. Dispela i soim klia olsem Jehova i stap yet olsem King Bilong Heven na Graun. Na tu, em i stap olsem wanpela Papa husat i lukautim gut ol pikinini, olsem na em i yusim bikpela strong bilong em long lukautim lain bilong em.—Ritim Kisim Bek 14:13, 14.

13, 14. (a) Lain Israel i singim song na ol i tok wanem long wok king bilong Jehova? (b) God i mekim wanem tok promis long Devit?

¹³ Bihain tasol long Jehova i kisim bek lain Israel long Isip, ol i singim song bilong litimapim nem bilong God, olsem i stap long Kisim Bek sapta 15. Ves 18 i tok: “Bikpela, yu bai stap king oltaim oltaim.” Yes, Jehova i kamap King na i bosim nupela lain Israel. (Lo 33:5) Jehova i stap King bilong ol, na ol i no inap lukim em long ai tru bilong ol. Maski i olsem, ol i pilim olsem dispela i no inap. Inap 400 yia bihain long ol i lusim Isip, ol i askim God long makim wanpela man long kamap king bilong ol, wankain olsem ol lain haiden i stap klostu long ol. (1 Sml. 8:5) Tasol long taim Devit i stap king, ol samting i kamap i soim klia olsem Jehova i stap yet olsem King.

¹⁴ Devit i bringim Bokis Kontrak i go long Jerusalem. Long dispela de bilong amamas, ol Livai i singim wanpela song bilong litimapim nem bilong Jehova, na ol i mekim dispela bikpela tok i stap long 1 Stori 16:31: “Tokim ol lain manmeri  olsem, ‘Bikpela i stap king.’” Tasol Jehova em i King bilong oltaim oltaim, olsem na long wanem rot em i kamap King long dispela taim bipo? Jehova i save kamap King taim em i yusim namba bilong em o makim wanpela man long stap olsem mausman bilong em. Em i bikpela samting tru long yumi mas kliagut long olsem wanem Jehova i save kamap King. Paslain long Devit i dai, Jehova i tok promis long em olsem wok king bilong em bai stap oltaim, em i tok: “Bai mi mekim wanpela pikinini man bilong yu i kamap king, na bai em i kamap strongpela king na bai mi no larim wanpela samting i daunim em.” (2 Sml. 7:12, 13) Dispela tok promis i bin kamap tru taim “pikinini man” bilong Devit i kamap moa long 1 tausen yia bihain. Dispela “pikinini man” em i husat? Em i kamap King long wanem taim?

15, 16. Wanem taim God i makim Jisas long kamap King long bihain? Taim Jisas i stap long graun, em i bin mekim wanem bilong redim Kingdom bilong em?

¹⁵ Long yia 29 C.E., Jon Bilong Baptais i kirap long autim tok olsem “Kingdom bilong heven i kam klostu pinis.” (Mat. 3:2) Taim Jon i baptaisim Jisas, Jehova i makim Jisas olsem Mesaia na Man husat bai kamap King long Kingdom Bilong God long bihain. Jehova i stap olsem Papa bilong Jisas na em i kamapim klia pasin laikim bilong em na tok: “Dispela em i Pikinini bilong mi, mi laikim em tumas na mi amamas long em.”—Mat. 3:17.

¹⁶ Taim Jisas i mekim wok autim tok, em i givim biknem long Papa bilong em. (Jon 17:4) Em i mekim olsem taim em i autim tok long Kingdom Bilong God. (Luk 4:43) Na tu, em i lainim ol disaipel long beten long dispela Kingdom i mas i kam. (Mat. 6:10) Jisas bai mekim wok king long bihain, olsem na em inap tokim ol birua bilong em olsem: “Kingdom bilong God i stap namel long yupela.” (Luk 17:21) Bihain, long nait paslain long Jisas i dai, em i mekim ‘kontrak long wanpela Kingdom’ wantaim ol disaipel bilong em. Dispela i makim olsem sampela gutpela disaipel bai mekim wok king wantaim em long Kingdom Bilong God.—Ritim Luk 22:28-30.

17. Long yia 33 C.E., Jisas i kirap long bosim wanem lain? Bilong wanem em i mas wet?

¹⁷ Wanem taim bai Jisas i kirap long mekim wok king long Kingdom Bilong God? Em i no inap mekim dispela wok wantu tasol, nogat. Long apinun long neks de, ol man i kilim i dai Jisas na ol disaipel i ranawe. (Jon 16:32) Tasol wankain olsem long bipo, Jehova i kontrolim yet ol samting. Long namba 3 de, Jehova i kirapim bek Pikinini bilong em, na long de Pentikos bilong yia 33 C.E., Jisas i kirap long bosim kongrigesen Kristen. (Kol. 1:13) Tasol Jisas, em dispela “pikinini man” bilong promis, em i mas wet inap long em bai kisim namba bilong mekim wok king na bosim graun olgeta. Olsem na Jehova i tokim Pikinini bilong em: “Yu sindaun long han sut bilong mi inap mi putim ol birua bilong yu i stap aninit long yu.”—Sng. 110:1.

18, 19. Yumi gat bikpela laik long mekim wanem? Long stadi i kamap bihain long dispela, bai yumi kisim save long wanem ol samting?

¹⁸ Inap planti tausen yia, ol ensel na ol manmeri i bin bikhet long wok bos bilong Jehova. Tasol oltaim Jehova i save kontrolim ol samting na em i no lusim wok em i holim olsem nambawan bos. Olsem wanpela gutpela Papa, em i bin lukautim ol wokman bilong em husat i stap gut long em, olsem Noa, Abraham, na Devit. Dispela i kirapim yumi long stap daun long King bilong yumi na go klostu moa long em.

¹⁹ Tasol ating bai yumi laik save: Olsem wanem Jehova i kamap King long taim bilong yumi? Olsem wanem yumi inap stap gut long Jehova na kamap ol pikinini i gutpela olgeta insait long bikpela lain famili bilong em? Taim yumi beten long Kingdom Bilong God long kam, dispela i makim wanem samting? Bai yumi bekim ol dispela askim long stadi i kamap bihain long dispela.