1. Planti yangpela i mekim wanem ol wok na ol i kisim ol gutpela ekspiriens long en?

 YUMI stap long taim we ol bikpela samting i wok long kamap. Long nau, winim olgeta taim bipo, planti milion manmeri long olgeta kantri i wok long kam long lotuim Jehova. (Rev. 7:9, 10) Planti yangpela i kisim ol gutpela ekspiriens tru long singautim ol narapela long kam na “kisim wara bilong laip” na “ol i ken kisim fri.” (Rev. 22:17) Ol dispela yangpela i helpim ol manmeri long stadi long Baibel na mekim sindaun bilong ol i kamap gutpela moa. Sampela i wok strong long lainim nupela tokples na autim gutnius long ol teritori we ol man bilong narapela tokples i sindaun long en. (Sng. 110:3; Ais. 52:7) Yu mas mekim wanem na bai yu tu inap insait long dispela gutpela wok?

2. Olsem wanem eksampel bilong Timoti i soim olsem Jehova i laik givim wok long ol yangpela? (Lukim piksa long kirap bilong stadi.)

² Long nau, yu inap mekim ol disisen we bai opim rot na bihain yu inap mekim sampela wok moa bilong Jehova. Olsem: Timoti i bin mekim ol gutpela disisen, olsem na taim em i gat 19 o 20 krismas samting, em i winim mak long mekim wok misineri. (Apo. 16:1-3) Ating bihain long sampela mun tasol, Pol i askim Timoti long go lukim nupela kongrigesen long Tesalonaika, em taun we ol birua i mekim nogut tru long ol brata. Ol man i birua nogut tru long Pol, olsem na em i no inap stap moa long Tesalonaika. Tasol em i bilip olsem Timoti inap strongim ol  brata. (Apo. 17:5-15; 1 Tes. 3:1, 2, 6) Ating Timoti i bin amamas tru taim em i kisim dispela asainmen!

3. Wanem nambawan bikpela disisen yu bai mekim long laip bilong yu? Wanem taim em gutpela taim long mekim dispela disisen?

³ Taim yu stap yangpela yet, dispela em taim bilong mekim ol bikpela disisen. Wanem nambawan bikpela disisen yu bai mekim? Em disisen bilong yu long mekim wok bilong Jehova. Wanem taim em gutpela taim long mekim dispela disisen? Jehova i tokim yu long tingim em taim yu stap yangpela yet. (Sav. 12:1) Wanpela rot tasol bilong tingim Jehova em long givim bel olgeta long mekim wok bilong em. (Lo 10:12) Dispela em nambawan bikpela disisen i winim tru olgeta arapela disisen yu bai mekim. Dispela disisen bai stiaim olgeta samting yu mekim long laip bilong yu.—Sng. 71:5.

4. Wanem ol bikpela disisen bai stiaim ol samting yu mekim long wok bilong God?

⁴ Taim yu mekim disisen long mekim wok bilong Jehova, i no dispela tasol bai stiaim laip bilong yu long bihain, nogat. Yu bai mekim disisen olsem yu bai marit o nogat, na yu bai maritim husat, na yu bai mekim wanem kain wok mani. Em ol bikpela disisen tru, tasol namba 1 disisen em olsem: Yu mas mekim disisen long givim bel olgeta long mekim wok bilong Jehova. (Lo 30:19, 20) Bilong wanem? Long wanem, ol dispela disisen i poroman wantaim. Disisen yu mekim long sait bilong marit na wok mani bai stiaim ol samting yu mekim long wok bilong God. Na tu, laik bilong yu long mekim wok bilong God bai stiaim ol disisen yu mekim long sait bilong marit na wok mani. (Skelim Luk 14:16-20.) Olsem na yu mas mekim disisen long wanem samting bai stap nambawan bikpela samting long laip bilong yu.—Fili. 1:10.

5, 6. Stori long olsem wanem stretpela disisen inap opim rot long yumi inap kisim planti gutpela ekspiriens long bihain. (Long dispela Wastaua, lukim tu atikol “Disisen Mi Mekim Taim Mi Pikinini Yet.”)

⁵ Taim yu mekim pinis disisen long mekim wok bilong Jehova, orait yu mas tingim ol samting em i laik yu mas mekim, na mekim disisen long wanem ol samting yu bai mekim long wok bilong God. Wanpela brata long Japan i tok: “Taim mi gat 14 krismas, mi go autim tok wantaim wanpela elda bilong kongrigesen na elda i luksave olsem mi no amamas long autim tok. Orait long pasin isi em i tokim mi olsem: ‘Yuichiro, yu ken go long haus. Sindaun long des bilong yu na tingim gut ol samting Jehova i bin mekim bilong helpim yu.’ Orait, mi mekim samting em i tokim mi long mekim. Mi skelim gut dispela samting na beten inap sampela de. Isi isi, tingting bilong mi i senis. I no longtaim mi luksave olsem mi amamas long mekim wok bilong Jehova. Mi amamas long ritim stori bilong ol misineri, na mi kirap long tingting long mekim planti samting moa long wok bilong God.”

⁶ Yuichiro i kirap long mekim ol gutpela disisen. Olsem na bihain, rot i op na em inap mekim wok bilong Jehova long narapela kantri. Em i tok: “Mi mekim disisen long kisim kos bilong tok Inglis. Taim mi pinisim skul, mi mekim haptaim wok bilong skulim ol narapela long tok Inglis, na dispela i helpim mi long mekim wok painia. Taim mi gat 20 krismas, mi kirap long lainim tok Mongolia, na rot i op long mi inap visitim wanpela grup bilong tok Mongolia. Tupela yia bihain, long 2007, mi go long Mongolia. Taim mi go autim tok wantaim sampela painia na lukim olsem planti man i laik save long tok i tru, dispela i kirapim laik bilong mi long go long dispela hap na helpim ol. Mi go bek long Japan long mekim plen long ol samting mi bai mekim. Mi mekim wok painia long Mongolia kirap long Epril 2008. I gat ol hatwok. Tasol ol manmeri i amamas long harim gutnius, na mi inap helpim ol long i go klostu long Jehova. Mi pilim olsem mi mekim disisen long mekim wok we i nambawan tru.”

7. Yu mas mekim wanem ol disisen? Yumi inap kisim wanem skul long eksampel bilong Moses?

⁷ Yu yet i mas mekim ol disisen long olsem wanem yu bai yusim laip bilong yu long mekim wok bilong Jehova. (Jos. 24:15) Mipela i no inap tokim yu long marit o yu mas maritim husat. Mipela i no inap tokim yu long wanem kain wok mani yu  mas mekim. Olsem wanem? Bai yu kisim wanpela wok mani we yu kisim liklik trening tasol long en? Sampela bilong yupela i stap long ol ples we ol man i stap rabis, na sampela narapela i stap long ol taun we ol man i gat planti mani kago. Yupela olgeta i gat narapela narapela pasin, save bilong mekim wok, ekspiriens, laik, na bilip. Ating yupela i kain olsem Moses, laip bilong em i no wankain long laip bilong ol yangpela Hibru long Isip. Moses i stap olsem pikinini bilong pikinini meri bilong King, olsem na em i gat planti mani kago, tasol ol narapela yangpela Hibru i stap olsem ol sleiv. (Kis. 1:13, 14; Apo. 7:21, 22) Olsem yu, ol i bin stap long taim we ol bikpela samting tru i kamap. (Kis. 19:4-6) Tasol olgeta wan wan bilong ol i mas mekim disisen bilong ol yet long olsem wanem ol bai yusim laip bilong ol. Moses i mekim stretpela disisen long mekim laik bilong Jehova.—Ritim Hibru 11:24-27.

8. Olsem wanem yu inap kisim helpim long mekim ol gutpela disisen?

⁸ Jehova i givim ol skultok bilong helpim yu long mekim ol stretpela disisen. Em i save givim ol skultok long wanem rot? Em i skulim yu long ol stiatok bilong Baibel em yu inap yusim maski yu gat wanem kain sindaun. (Sng. 32:8) Sapos yu no save long olsem wanem yu inap bihainim ol dispela stiatok, orait yu ken askim papamama bilong yu o ol elda long helpim yu. (Snd. 1:8, 9) Orait yumi ken skelim 3-pela stiatok bilong Baibel we inap helpim yu long mekim ol gutpela disisen long nau.

9. (a) Olsem wanem yumi ken tok Jehova i givim biknem long yumi taim em i larim yumi stap fri long mekim ol disisen? (b) Sapos yu “painim Kingdom pastaim,” dispela bai helpim yu olsem wanem?

⁹ Painim Kingdom Bilong God pastaim na stretpela pasin bilong em. (Ritim Matyu 6:19-21, 24-26, 31-34.) Jehova i givim biknem long yu, long wanem, em i larim yu i stap fri long mekim disisen long olsem wanem yu bai yusim taim bilong yu. Em i no tokim yu long yusim olgeta haptaim bilong yu long mekim wok autim tok. Tasol Jisas i skulim yumi olsem em i bikpela samting long yumi mas painim Kingdom pastaim. Taim yu painim Kingdom pastaim, rot bai op long yu inap mekim planti wok moa. Olsem: Rot bai op long yu inap mekim planti wok long soim olsem yu laikim Jehova na ol narapela man, na bilong soim olsem yu tenkyu long promis bilong kisim laip oltaim. Yu ting disisen yu mekim long sait bilong marit na wok mani bai soim olsem yu tingting planti moa long mani kago, o yu ting disisen bilong yu bai soim olsem yu tingim tru wok bilong “painim Kingdom pastaim na stretpela pasin bilong God”?

10. Wanem samting i mekim Jisas i amamas? Yu mas mekim wanem na bai yu stap amamas?

¹⁰ Kisim amamas long mekim wok bilong helpim ol narapela. (Ritim Aposel 20:20, 21, 24, 35.) Dispela em samting tru i save kamap long laip bilong ol man. Jisas i save long dispela, olsem na em i mekim laik bilong Papa na mekim wok bilong helpim ol narapela taim em i skulim ol long gutnius. Dispela i mekim em i amamas. (Luk 10:21; Jon 4:34) Ating yu tu i bin pilim kain amamas olsem taim yu mekim wok bilong helpim ol narapela. Olsem na taim yu laik mekim ol disisen, yu mas tingim ol stiatok em Jisas i bin skulim yumi long en. Taim yu mekim olsem, yu bai kisim amamas na Jehova tu bai amamas.—Snd. 27:11.

11. Wanem samting i mekim na Baruk i no stap amamas moa? Jehova i givim wanem tok kaunsel long em?

¹¹ Yumi bai kisim bikpela amamas tru taim yumi mekim wok bilong Jehova. (Snd. 16:20) Wanpela taim, Baruk em sekreteri bilong Jeremaia, em i no amamas moa long mekim wok bilong God. Baruk i tingting tasol long samting em yet i laikim, na em i no tingting moa long samting Jehova i laikim. Jehova i lukim dispela, olsem na em i tokim Baruk long lusim pasin bilong tingting olsem “gutpela samting tasol i ken kamap” long em. Sapos em i bihainim tok, orait laip bilong em i no inap lus taim bagarap i painim Jerusalem. (Jer. 45:2-5) Wanem samting bai givim bikpela amamas moa long Baruk? Em bai mekim samting em i laik mekim na kisim bagarap, o em bai mekim samting Jehova i laikim na laip bilong em i no inap lus taim bagarap i painim Jerusalem?—Jems 1:12.

12. Ramiro i bin mekim wanem ol disisen na dispela i helpim em long i stap amamas?

 ¹² Ramiro em wanpela brata husat i kisim amamas taim em i mekim wok bilong helpim ol narapela. Em i tok: “Mi kam long wanpela famili i stap rabis na mipela i stap long wanpela viles long ol maunten Andes. Olsem na taim bikpela brata bilong mi i tok em bai baim skulfi bilong mi long yunivesiti, dispela em bikpela samting tru long mi. Tasol i no longtaim i go pinis, mi kisim baptais na kamap wanpela Witnes Bilong Jehova, na rot i op long mi inap mekim narapela wok—wanpela painia i singautim mi long autim tok wantaim em long wanpela liklik taun. Mi go long dispela hap na mi lain long katim gras bilong ol man, na mi laik lukautim mi yet, olsem na mi kirapim wanpela bisnis bilong katim gras bilong ol man.” Planti manmeri bilong dispela taun i amamas long stadi long Baibel. Bihain, wanpela nupela kongrigesen i kamap, na ol i mekim tokples bilong dispela ples. Olsem na em i mekim disisen long bung wantaim dispela kongrigesen, na em i stap long dispela kongrigesen inap 10-pela yia nau. Em i tok, taim em i yusim tokples stret bilong ol man long skulim ol long Baibel, amamas em i kisim long dispela wok i winim tru amamas em i kisim long ol narapela wok.

13. Bilong wanem na nau em i gutpela taim bilong yu long givim bel olgeta long mekim wok bilong Jehova?

¹³ Amamas long mekim wok bilong Jehova. (Ritim Saveman 12:1.) No ken kisim tingting olsem yu mas kisim gutpela wok mani pastaim na bihain yu ken mekim wok painia, nogat. Nau em gutpela taim tru long yu ken givim bel olgeta long mekim wok bilong Jehova, paslain long yu mekim wok bilong lukautim famili. Yu gat gutpela helt na strong long mekim ol bikpela wok. Long wok bilong Jehova, yu laik mekim wanem kain wok? Ating yu putim mak long mekim wok painia, o ating yu laik autim tok long ol man bilong narapela tokples. Ating yu inap mekim sampela wok moa long kongrigesen bilong yu yet. Maski yu laik winim wanem ol mak long wok bilong God, yu mas mekim wok mani bilong lukautim yu yet. Askim  yu yet: ‘Mi bai mekim wanem kain wok mani? Mi mas kisim hamas trening long mekim dispela wok?’

14. Taim yu wok long painim wok mani, yu mas was gut long wanem samting?

¹⁴ Dispela 3-pela stiatok bilong Baibel em yumi stori pinis long en, ol inap stiaim yu taim yu mekim disisen long wanem kain wok mani bai i stret long yu. Ol tisa long skul o sampela ofis bilong gavman inap save long wanem kain ol wok i stap long hap bilong yu o long hap yu laik i go long en. Ol dispela lain inap helpim yu, tasol yu mas was gut. Ol manmeri husat i no laikim Jehova, ol inap kirapim yu long laikim ol samting bilong dispela graun. (1 Jon 2:15-17) Taim yu skelim ol samting bilong dispela graun, orait yu no ken lusim tingting olsem bel inap giamanim yu.—Ritim Sindaun 14:15; Jer. 17:9.

15, 16. Husat inap givim gutpela skultok bilong helpim yu long skelim wanem kain wok mani yu inap mekim?

¹⁵ Taim yu save pinis long wanem ol wok i stap we yu inap mekim, yu mas tingim sampela gutpela skultok. (Snd. 1:5) Husat inap yusim ol stiatok bilong Baibel na helpim yu long skelim wanem wok mani yu inap mekim? Putim yau long ol man husat i laikim Jehova, laikim yu, na ol i save gut long yu na sindaun bilong yu. Ol bai helpim yu long luksave long tingting tru bilong yu long wanem samting yu inap long mekim na wanem samting yu laik mekim. Ating tok bilong ol bai helpim yu long skelim gen ol mak yu laik winim. Sapos papamama bilong yu i laikim Jehova, ol inap givim bikpela helpim long yu. Na tu, ol elda long kongrigesen bai givim yu gutpela skultok. Askim ol painia na ol wasman raun na bai ol i ken stori long wanem samting i kirapim ol long yusim taim na strong bilong ol long mekim wok bilong God. Olsem wanem ol i bin kirap long mekim dispela wok? Ol i bin mekim wanem kain wok mani? Ol i bin kisim wanem ol blesing?—Snd. 15:22.

¹⁶ Ol lain husat i save gut long yu, ol inap givim gutpela skultok long yu. Olsem: Ating yu laik lusim haiskul na kirap long mekim wok painia, long wanem, yu les long planti hatwok em skul i save putim long yu. Wanpela husat i laikim yu bai inap luksave long risen na yu lusim skul. Olsem na em inap helpim yu long luksave olsem pasin bilong wok hat long skul bai helpim yu long kisim pasin bilong i no les kwik. Dispela pasin i bikpela samting sapos yu laik mekim wok bilong Jehova inap oltaim.—Sng. 141:5; Snd. 6:6-10.

17. Yu mas abrusim wanem kain ol disisen?

¹⁷ Olgeta manmeri husat i mekim wok bilong Jehova bai bungim ol hevi we inap daunim bilip bilong ol na pulim ol i go longwe long Jehova. (1 Kor. 15:33; Kol. 2:8) Sampela wok mani inap pundaunim bilip bilong yu. Ating yu luksave olsem sampela i bin lusim bilip bihain long ol i mekim wanpela kain wok mani. (1 Tim. 1:19) Em gutpela yu abrusim ol disisen we inap bagarapim pasin bilong yu long pas gut wantaim Jehova.—Snd. 22:3.

18, 19. Sapos yu no tingting yet long mekim wok painia, orait yu ken mekim wanem?

¹⁸ Sapos yu gat bikpela laik long mekim wok bilong Jehova, orait mekim olsem taim rot i op long yu taim yu stap yangpela yet. Mekim ol disisen we bai opim rot long yu inap amamas long mekim wok bilong God long dispela spesel taim yumi stap long en long nau.—Sng. 148:12, 13.

¹⁹ Olsem wanem sapos yu pilim olsem yu no redi yet long mekim wok bilong Jehova? No ken les long mekim ol samting bilong strongim bilip bilong yu long Jehova. Pol i stori long samting em i mekim na bai Jehova inap blesim em. Em i tok: “Sapos yupela i gat narapela tingting long wanpela samting, orait God bai kamapim stretpela tingting long yupela. Tasol yumi bin wok long kamap strong moa, olsem na yumi mas wokabaut stret yet long dispela wankain pasin.” (Fili. 3:15, 16) Yu mas tingim olsem Jehova i laikim yu. Em i save givim ol gutpela skultok. Larim em i helpim yu long mekim ol gutpela disisen long nau taim yu stap yangpela yet.