1, 2. (a) God i bin kirapim Solomon long givim wanem skultok long ol yangpela? (b) Bilong wanem ol Kristen husat i winim pinis 50 krismas, ol tu i ken tingim skultok bilong Solomon?

 JEHOVA i kirapim King Solomon long tokim ol yangpela manmeri olsem, “God i bin wokim [yupela] olgeta. Olsem na long taim yupela i yangpela yet, yupela i mas tingim em” paslain long “taim nogut i painim yupela.” Dispela “taim nogut” i makim wanem samting? Dispela tok i makim ol hevi i painim man taim em i kamap lapun. Solomon i stori gut tru long ol hevi i save painim ol lapun, olsem: han i guria, lek i guria, tit i pundaun, ai i no lukluk gut, yau i no harim gut, wait gras, na baksait i krungut. Olsem na Solomon i tokim yumi long tingim Man Bilong Wokim yumi taim yumi stap yangpela yet.—Ritim Saveman 12:1-5.

² Planti Kristen husat i winim pinis 50 krismas, ol i gat bikpela strong i stap yet. Ating ol i gat waitpela gras, tasol ol i no gat olgeta hevi em Solomon i stori long en. Yu ting ol dispela lapun Kristen tu inap bihainim skultok em Solomon i givim long ol yangpela, olsem: “God i bin wokim [yupela] olgeta. Olsem na . . . yupela i mas tingim em”? Orait olsem wanem ol inap bihainim dispela skultok?

3. Taim yumi tingim Nambawan Bikpela Krieta bilong yumi, dispela i makim wanem samting?

 ³ Ating yu bin mekim wok bilong Jehova inap planti yia, tasol sampela taim em gutpela long tingim tingim ol bikpela wok em Krieta bilong yumi i bin mekim. Laip em wanpela gutpela presen. Ol samting God i wokim i narapela kain tru na yumi ol man i no inap kliagut long en. Jehova i bin wokim kain kain gutpela samting, na dispela i opim rot na yumi inap mekim planti kain kain samting bilong i stap amamas. Taim yumi tingim ol samting Jehova i wokim, dispela i makim olsem yumi tingim gen bikpela pasin laikim, savetingting, na bikpela strong bilong em. (Sng. 143:5) Taim yumi tingim Nambawan Bikpela Krieta bilong yumi, dispela i makim tu olsem yumi tingim ol samting em i laik yumi mas mekim. Taim yumi tingim tingim ol dispela samting, dispela i kirapim yumi long soim tenkyu bilong yumi taim yumi yusim laip olgeta bilong yumi long mekim olgeta samting yumi inap mekim long wok bilong em.—Sav. 12:13.

4. Ol Kristen husat i stap planti yia long tok i tru, ol i ken givim wanem askim long ol yet? Bilong wanem?

⁴ Sapos yu stap laip inap planti yia pinis, orait askim yu yet olsem, ‘Bai mi mekim wanem nau long laip bilong mi taim mi gat strong i stap yet?’ Yu stap Kristen inap planti yia pinis, olsem na rot i op long yu inap mekim ol samting em ol narapela i no inap mekim. Olsem: Yu inap skulim ol yangpela long ol samting Jehova i bin skulim yu long en. Yu inap stori long ol narapela long ol gutpela ekspiriens yu bin kisim taim yu mekim wok bilong God. King Devit i bin beten askim Jehova long opim rot long em i ken mekim olsem. Em i tok: “God, yu bin skulim mi long taim mi liklik yet . . . Nau mi lapun pinis na gras bilong mi i waitpela olgeta, tasol God, yu no ken lusim mi. Yu mas i stap wantaim mi na bai mi autim tok bilong bikpela strong bilong yu long ol lain manmeri i kamap bihain.”—Sng. 71:17, 18.

5. Olsem wanem ol Kristen i stap longpela taim long tok i tru inap skulim ol arapela long ol samting ol i bin lainim?

⁵ Olsem wanem yu inap skulim ol narapela long ol gutpela tingting na save em yu bin lainim insait long ol yia i go pinis? Yu ting yu inap singautim ol yangpela long kam bung long haus bilong yu na yupela inap strongim narapela narapela? Yu ting yu inap pasim tok long autim tok wantaim ol na rot i op long ol inap lukim amamas bilong yu long mekim wok bilong Jehova? Elihu i tok: “Yupela i gat planti krismas na yupela tasol i mas toktok na autim gutpela tingting na save bilong yupela.” (Jop 32:7) Aposel Pol i tokim ol meri em ol i stap Kristen inap planti yia olsem toktok na pasin bilong ol i mas strongim ol arapela. Em i tok: “Ol meri i gat bikpela krismas . . . ol i mas skulim ol arapela long ol gutpela samting.”—Tai. 2:3.

6. Bilong wanem yumi nidim ol Kristen husat i stap longpela taim long tok i tru?

⁶ Sapos yu wanpela Kristen husat i bin stap longpela taim long tok i tru, orait i gat planti samting yu inap mekim bilong helpim ol arapela. Tingim samting yu kliagut long en long nau, em yu no bin save long en inap 30 o 40 yia i go pinis. Yu save pinis long olsem wanem yu inap bihainim ol stiatok bilong Baibel long laip bilong yu. Yu inap helpim ol narapela long pilim tok i tru bilong Baibel. Sapos yu wanpela elda, orait yu save pinis long olsem wanem yu inap helpim ol brata husat i no mekim gutpela disisen. (Gal. 6:1) Ating yu lain pinis long lukautim ol wok bilong kongrigesen, lukautim ol dipatmen bilong kibung, o wok bilong sanapim ol Haus Kingdom. Ating yu save pinis long olsem wanem yu inap kirapim ol dokta long yusim ol narapela rot na ol i no yusim blut taim ol i mekim operesen. Maski yu baptais nupela, yu bin stap laip inap planti yia pinis na yu gat gutpela ekspiriens long mekim ol wok samting. Olsem: Sapos yu bin lukautim ol pikinini, orait yu gat gutpela ekspiriens we inap helpim yu. Ol lapun Kristen i gat save na ol inap helpim ol manmeri bilong God taim ol i skulim, stiaim, na strongim ol.—Ritim Jop 12:12.

7. Ol lapun Kristen i ken givim wanem gutpela trening long ol yangpela?

⁷ Olsem wanem yu inap yusim save bilong yu  long helpim ol narapela? Ating yu inap skulim ol yangpela long pasin bilong kirapim na lukautim ol Baibel stadi. Sapos yu wanpela sista, orait yu ting yu inap helpim ol yangpela mama long skelim gut haptaim ol i yusim bilong mekim wok bilong Jehova na lukautim ol pikinini? Sapos yu wanpela brata, orait yu ting yu inap skulim ol yangpela brata long givim bel tru long mekim ol tok na mekim gut wok bilong autim gutnius? Yu ting yu inap soim ol long pasin bilong strongim ol lapun brata na sista taim yu visitim ol? Maski sapos yu no gat strong moa olsem long bipo, ol gutpela rot i op long yu inap trenim ol yangpela. Baibel i tok: “Ol yangpela man i gat strong, na dispela i mekim ol manmeri i amamas long ol. Tasol ol lapun i gat waitpela gras, na ol manmeri i save tingting long dispela na givim biknem long ol.”—Snd. 20:29.

8. Aposel Pol i bin mekim wanem taim em i kamap lapun?

⁸ Aposel Pol i bisi tru long mekim wok bilong Jehova maski em i kamap lapun. Taim Pol i lusim kalabus long Rom long yia 61 C.E. samting, em i kamap misineri na mekim planti bikpela wok na karim planti hevi. Ating em inap mekim disisen long stap tasol long Rom na autim tok. (2 Kor. 11:23-27) Ol brata long Rom bai amamas tru sapos Pol i bin stap long Rom na helpim ol. Tasol Pol i luksave olsem ol narapela kantri i sot long ol wokman bilong autim tok. Em i kirapim gen wok misineri, na Timoti na Taitus i bihainim em na ol i go long Efesus, go long Krit, na ating bihain ol i go long Masedonia. (1 Tim. 1:3; Tai. 1:5) Yumi no save sapos em i bin go long Spen, tasol em i bin tingting long go long dispela hap.—Rom 15:24, 28.

9. Wanem taim Pita i go sindaun long hap we i sot long ol wokman? (Lukim piksa long kirap bilong stadi.)

⁹ Ating aposel Pita i winim pinis 50 krismas taim em i go long hap we i sot long ol wokman bilong autim tok. Olsem wanem yumi save long dispela? Sapos krismas bilong em i bin wankain olsem bilong Jisas o i bikpela liklik, dispela bai makim olsem em i gat 50 krismas samting long yia 49 C.E. taim em i bung wantaim ol arapela disaipel long Jerusalem. (Apo. 15:7) Sampela haptaim bihain long dispela miting, Pita i go long Babilon na ating em i laik autim tok long planti Juda husat i stap long dispela hap. (Gal. 2:9) Em i stap long Babilon taim holi spirit i kirapim em long raitim namba 1 pas bilong em long yia 62 C.E. samting. (1 Pita 5:13) I hatwok long i go sindaun long hap we i sot long ol wokman bilong autim tok. Tasol Pita i no larim krismas bilong em i pasim em long kisim amamas long givim bel olgeta long mekim wok bilong Jehova.

10, 11. Robert na meri bilong em i mekim wanem taim ol i winim 55 krismas samting?

¹⁰ Long nau, planti Kristen husat i winim pinis 50 krismas ol i lukim olsem sindaun bilong ol i senis na ol inap mekim wok bilong Jehova long ol narapela rot. Sampela i go sindaun long hap we i sot long ol wokman bilong autim tok. Robert na meri bilong em i bin mekim olsem. Tupela i gat 55 krismas samting taim ol i luksave olsem planti nupela rot i op long ol inap mekim wok bilong Jehova. Tupela i gat wanpela pikinini man tasol na em i lusim ol pinis na i go stap em yet, na tupela i no gat wok moa long lukautim ol lapun papamama bilong tupela. Tupela i kisim liklik mani samting em papamama bilong ol i dai na lusim long ol, na tupela i luksave olsem sapos ol i salim haus, ol bai inap long bekim dinau na ol bai gat mani inap long lukautim ol i go inap long Robert i kisim pensen bilong em. Ol i harim olsem planti manmeri long Bolivia i amamas long stadi long Baibel na ol i no nidim bikpela mani long stap long dispela hap. Olsem na ol i mekim disisen long i go sindaun long dispela hap. Robert i tok: “I hatwok long lain long stap long nupela ples. Olgeta samting i narapela kain tru long laip bilong mipela long Not Amerika. Tasol hatwok bilong mipela i no lus nating.”

¹¹ Robert i tok moa olsem: “Long nau mipela i tingting tasol long mekim ol wok bilong kongrigesen. Sampela bilong ol manmeri mipela i bin stadi wantaim ol long Baibel, ol i kisim baptais. Mipela i stadi wantaim wanpela famili em ol i no gat gutpela sindaun, na ol i stap long wanpela ples i stap longwe. Tasol long olgeta wan wan wik, sampela  long dispela famili i save bihainim longpela rot i go long taun bilong stap long miting. Mipela i bin amamas tru taim dispela famili i kamap strong long tok i tru na bikpela pikinini man bilong ol i kirap mekim wok painia!”

12, 13. Bihain long Brian i ritaia long wok, em wantaim meri bilong em i mekim wanem?

¹² Ol kongrigesen na ol grup i mekim narapela tokples, ol inap kisim bikpela helpim taim ol i lukim gutpela eksampel bilong ol lapun bratasista. Na tu, yu inap kisim bikpela amamas long autim tok long ol man i mekim narapela tokples. Olsem: Brian, em wanpela brata long Briten, em i tok taim em i winim 65 krismas na em i ritaia long wok, em na meri bilong em i pilim olsem ol i no gat strong moa long mekim wanpela gutpela wok. Em i tok: “Ol pikinini bilong mipela i lusim mipela na ol i go stap ol yet, na mipela i hatwok tru long painim ol man husat i laik stadi long Baibel. Bihain, mi bungim wanpela yangpela man bilong Saina husat i mekim wok painimaut long yunivesiti long hap mipela i stap long en. Mi invaitim em na em i kam long miting na mi kirapim Baibel stadi wantaim em. Bihain long sampela wik, em i bringim wanpela wanwok bilong em i kam, na dispela wanwok tu i bilong Saina. Tupela wik bihain, em i bringim namba 3 wanwok i kam, na bihain em i bringim namba 4 wanwok tu i kam.

¹³ “Taim namba 5 man bilong Saina husat i mekim wok painimaut long yunivesiti i askim long mekim Baibel stadi, mi tingting olsem, ‘Maski mi gat 65 krismas, dispela i no makim olsem mi mas ritaia long wok bilong Jehova.’ Olsem na mi askim meri bilong mi husat i gat 63 krismas, sapos em i amamas long lainim tokples Saina. Mipela i save harim ol kaset i gat rekoding bilong lainim tokples Saina. Mipela i bin mekim olsem inap 10-pela yia i go pinis. Taim mipela i autim tok long narapela tokples, mipela i pilim olsem mipela i stap yangpela gen. I kam inap long nau, mipela i bin mekim Baibel stadi wantaim 112 manmeri bilong Saina! Planti bilong ol i bin kam long ol miting. Wanpela bilong ol i mekim wok painia nau wantaim mipela.”

14. Ol lapun Kristen i no ken lusim tingting long wanem samting? Olsem wanem eksampel bilong Pol inap strongim ol?

¹⁴ I no olgeta Kristen husat i winim 55 krismas  samting inap mekim ol nupela samting long wok bilong Jehova. Sampela i no gat gutpela helt, na sampela arapela i lukautim ol pikinini o ol papamama bilong ol husat i lapun pinis. Tasol no ken lusim tingting olsem Jehova i pilim tru olgeta samting yu mekim long wok bilong em. Olsem na maski sapos sampela taim yu bel hevi olsem yu no inap mekim sampela samting, orait yu mas amamas long ol samting yu inap mekim. Tingim eksampel bilong aposel Pol. Inap planti yia, em i stap olsem kalabusman na em i no inap mekim raun bilong em olsem misineri. Tasol taim ol man i kam visitim em, oltaim em i save stori wantaim ol long ol tok bilong Rait Holi na helpim ol long stap gut yet long mekim wok bilong God.—Apo. 28:16, 30, 31.

15. Bilong wanem Jehova i tingim tru ol lapun Kristen?

¹⁵ Jehova i amamas tru long ol samting ol lapun Kristen inap mekim long wok bilong em. Solomon i tok, taim man i kamap lapun, dispela inap pasim em long mekim planti samting long wok bilong Jehova, tasol Jehova i pilim tru ol samting ol lapun Kristen i mekim bilong litimapim nem bilong em. (Luk 21:2-4) Ol bratasista long kongrigesen i pilim tru gutpela eksampel bilong ol lapun bratasista long bilip na sanap strong.

16. Ating Ana i no gat rot long mekim wanem ol samting? Tasol em inap mekim wanem bilong lotuim God?

¹⁶ Long Baibel yumi ritim stori bilong Ana, em i wanpela bilipmeri na em i lapun. Em i wido na em i gat 84 krismas taim Jisas i bon. Em i lapun tru, olsem na i no gat rot long em inap mekim wok bilong Jehova olsem ol narapela i mekim. Ating em i no gat planti yia bilong i stap laip, olsem na em i no inap kamap disaipel bilong Jisas, na God i no inap makim em long holi spirit, na em i no inap mekim wok autim tok. Tasol em i amamas long mekim wok bilong Jehova long ol narapela rot. Olsem: Long olgeta moning na apinun, em i save go long banis bilong tempel na beten inap olsem hap aua taim pris i kukim paura i gat gutpela smel na mekim olsem ofa i go long Jehova. Baibel i tok “em i save go long tempel long olgeta taim, na long san na long nait em i save lotuim God.” (Luk 2:36, 37) Taim em i lukim yangpela pikinini Jisas, “em i kirap tokim ol man long dispela pikinini, em ol man husat i wetim God long kisim bek Jerusalem.”—Luk 2:38.

17. Olsem wanem ol bratasista long kongrigesen inap helpim ol Kristen husat i lapun o i gat sik na bai ol inap insait yet long wok bilong lotu i tru?

¹⁷ Long nau, yumi mas painim rot bilong helpim ol brata na sista husat i lapun o ol i gat sik. I gat planti lapun husat i laik bung wantaim yumi long ol miting na ol kibung, tasol i hatwok long ol i kam. Olsem wanem ol bratasista long kongrigesen inap helpim ol? Long sampela hap, ol brata inap stretim rot long ol dispela lapun bratasista inap harim tok bilong miting long rot bilong telefon. Long sampela hap, ating i no gat rot long mekim olsem. Maski sapos ol lapun bratasista i no inap go long ol miting, ol inap yet long mekim sampela samting long sapotim lotu i tru. Olsem: Ol inap beten long helpim kongrigesen.—Ritim Song 92:13, 14.

18, 19. (a) Olsem wanem ol lapun Kristen inap strongim ol arapela? (b) Husat inap bihainim dispela tok kaunsel: ‘God i bin wokim yumi olgeta, olsem na yupela i mas tingim em’?

¹⁸ Ating ol lapun Kristen i no luksave olsem ol i strongim tru ol narapela. Tingim Ana, inap planti yia em i save go oltaim long tempel. Ating em i no luksave olsem stori bilong pasin em i save bihainim na pasin bilong em long laikim Jehova, dispela stori inap stap long Baibel na i wok yet long strongim yumi long nau. Long wankain pasin, ol brata na sista bilong yu i no inap tru long lusim tingting long pasin bilong yu long laikim Jehova. Olsem na Baibel i tok: “Ol man i lukim waitpela gras bilong ol lapun, na ol i save, ol lapun i bin bihainim stretpela pasin na ol i stap longpela taim long graun. Olsem na ol i givim biknem long ol”!—Snd. 16:31.

¹⁹ Yumi olgeta i no inap mekim olgeta samting yumi laik mekim long wok bilong Jehova. Taim yu gat strong i stap yet, yu mas tingting strong olsem ‘God i bin wokim yumi olgeta, olsem na yupela i mas tingim em’ paslain long “taim nogut i painim yupela.”—Sav. 12:1.