1. God i bin wokim yumi i kamap olsem em yet, olsem na yumi inap mekim wanem ol samting?

 PLANTI man i save mekim dispela hap tok, “Em i kisim stret pasin bilong papa bilong em.” Dispela samting i save kamap, long wanem, olgeta pikinini i save kisim sampela pasin bilong papa na sampela pasin bilong mama. Jehova em Papa bilong yumi long heven, na em i Man Bilong Givim laip. (Sng. 36:9) Yumi stap olsem ol pikinini bilong em, na yumi kisim sampela pasin bilong em. God i bin wokim yumi i kamap olsem em yet, olsem na yumi inap wokim tingting, mekim ol disisen, na kisim pasin bilong stap pren na pas gut wantaim ol narapela.—Stt. 1:26.

2. Olsem wanem Jehova inap stap Pren bilong yumi?

² Jehova inap kamap nambawan gutpela Pren bilong yumi. Yumi inap stap pren bilong God, long wanem, em i laikim yumi na yumi bilip long em na Pikinini bilong em. Jisas i tok: “God i laikim tumas olgeta manmeri bilong graun, olsem na em i givim dispela Pikinini tru bilong en long ol bai olgeta man husat i bilip long em ol inap abrusim bagarap na kisim laip oltaim.” (Jon 3:16) I gat stori bilong planti manmeri husat i bin pas gut wantaim Jehova. Orait nau yumi ken skelim stori bilong 2-pela bilong ol.

3, 4. Olsem wanem pasin pren namel long Abraham na Jehova i narapela kain long pasin pren namel long lain Israel na Jehova?

³ Jehova i kolim tumbuna papa bilong lain Israel olsem “pren bilong  mi, Abraham.” (Ais. 41:8) Na tu, 2 Stori 20:7 i kolim Abraham olsem pren bilong God. Wanem samting i mekim na Abraham inap kamap pren na pas gut wantaim Krieta bilong em? Abraham i bilip long God.—Stt. 15:6; ritim Jems 2:21-23.

⁴ Ol tumbuna pikinini bilong Abraham husat i kamap lain Israel, ol tu i bin larim Jehova i stap olsem Papa na Pren bilong ol. Tasol isi isi ol i lusim pasin bilong i stap pren bilong God. Bilong wanem? Long wanem, ol i no bilip moa long ol tok promis bilong Jehova.

5, 6. (a) Olsem wanem Jehova i kamap Pren bilong yu? (b) Yumi ken givim wanem ol askim long yumi yet?

⁵ Taim yu kisim sampela save moa long Jehova, bilip bilong yu bai kamap strong moa, na yu bai laikim em moa yet. Tingim gen namba 1 taim yu bin kisim save olsem God em i wanpela Man i stap tru na yu inap kamap pren bilong em. Yu bin lain olsem yumi olgeta i sinman, long wanem, Adam i no bin bihainim tok bilong God. Na tu, yu bin kisim save olsem ol manmeri bilong dispela graun i stap longwe long God. (Kol. 1:21) Bihain, yu luksave olsem gutpela Papa bilong yumi long heven i stap klostu long yumi na em i save tingim yumi. Taim yumi kisim save olsem God i bin givim Jisas olsem ofa bilong baim bek ol man na yumi bilip long dispela ofa, dispela i kirapim yumi long kisim pasin bilong kamap pren bilong God.

⁶ Taim yumi tingim bek ol dispela samting, yumi ken askim yumi yet olsem: ‘Mi wok long mekim ol samting bilong strongim pasin bilong mi long stap pren bilong God? Mi bilip strong long God? Pasin bilong mi long laikim Jehova, em gutpela Pren bilong mi, i wok long kamap strong moa long olgeta de?’ Narapela man bilong bipo husat i bin stap gutpela pren bilong Jehova em Gideon. Orait nau yumi ken skelim gutpela eksampel bilong Gideon na kisim skul long en.

7-9. (a) Wanem gutpela samting i bin painim Gideon? Dispela i kirapim Gideon long mekim wanem? (Lukim piksa long kirap bilong stadi.) (b) Olsem wanem yumi inap stap pren bilong Jehova?

⁷ Hetman Gideon i mekim wok bilong Jehova long wanpela haptaim we bikpela hevi tru i painim lain Israel bihain long ol i go sindaun long Graun Bilong Promis. Buk Hetman sapta 6 i stori olsem ensel bilong Jehova i go lukim Gideon long Ofra. Long dispela taim, lain Midian i birua tru long lain Israel. Olsem na taim Gideon i rausim ol lip samting bilong rais wit, em i no stap long ples klia, nogat, em i stap long hap bilong krungutim pikinini bilong wain, na long dispela hap em inap haitim kwik rais wit. Gideon i kirap nogut long ensel i kamap na kolim em olsem “strongpela man bilong pait.” Jehova i bin kisim bek lain Israel long Isip, olsem na Gideon i laik save olsem tru tru Jehova bai helpim ol long nau o nogat. Ensel i kamapim tok bilong Jehova na tokim Gideon olsem Jehova bai sambai long em.

⁸ Gideon i tingting planti long olsem wanem em bai “kisim bek ol Israel long han bilong ol Midian.” Jehova i tokaut stret long em olsem: “Yu inap daunim ol, long wanem, mi bai helpim yu. Bai yu kilim ol Midian olsem yu kilim wanpela man tasol.” (Het. 6:11-16) Ating Gideon i tingting planti yet, olsem na em i askim God long kamapim wanpela sain. Tingim, taim dispela toktok i kamap namel long Gideon na ensel, Gideon i tingim Jehova olsem wanpela Man i stap tru.

⁹ Samting i kamap bihain i strongim bilip bilong Gideon na helpim em long i go klostu moa long God. Gideon i redim kaikai na givim long ensel. Orait ensel i holim wanpela stik na em i putim stik i go tatsim kaikai, na long rot bilong mirakel, paia i kamap na i kukim dispela kaikai. Gideon i luksave olsem tru tumas dispela ensel em mausman bilong Jehova. Gideon i kirap nogut na tok: “God, Bikpela, mi lukim pinis pes bilong ensel bilong yu. Nau bai wanem samting i kamap long mi?” (Het. 6:17-22) Tasol yu ting dispela samting i mekim na Gideon i stap longwe long God? Nogat tru! Dispela samting i kirapim Gideon long i go klostu moa long God. Gideon i kisim sampela save moa long Jehova na em i stap bel isi. Yumi save long dispela, long wanem, Gideon i bin sanapim wanpela alta long dispela hap na kolim nem bilong en olsem, Jehova-salom. Mining bilong dispela nem em, “Bikpela em i man bilong bel isi.” (Ritim Hetman 6:23, 24.) Taim  yumi tingim tingim ol samting Jehova i mekim bilong helpim yumi long olgeta wan wan de, yumi luksave olsem em i stap Pren tru bilong yumi. Taim yumi beten long God long olgeta taim, yumi bai pilim olsem yumi stap bel isi tru na pasin pren bilong yumi wantaim God bai kamap strong moa.

10. Olsem Song 15:3, 5 i kamapim, Jehova i laik yumi mas mekim wanem sapos yumi laik kamap pren bilong em?

¹⁰ Yumi mas mekim sampela samting na bai Jehova inap stap Pren bilong yumi. Long Buk Song sapta 15, Devit i kolim ol samting yumi mas mekim na bai yumi inap “i stap long haus bilong [Bikpela],” olsem kamap pren bilong God. (Sng. 15:1) Orait nau yumi ken stori long 2-pela samting: yumi mas abrusim pasin bilong krungutim gutnem na yumi mas mekim tok tru long olgeta taim. Devit i tok man husat i stap long haus bilong Jehova, “em i no save krungutim gutpela nem bilong narapela man.” Na tu, “ol man i no inap grisim em long mani bilong mekim em i kotim ol man i no gat rong.”—Sng. 15: 3, 5.

11. Bilong wanem yumi no ken krungutim gutnem bilong narapela?

¹¹ Long narapela song, Devit i tok lukaut olsem: “Yu no ken mekim tok nogut.” (Sng. 34:13) Sapos yumi sakim dispela tok lukaut, dispela bai mekim na yumi stap longwe long Papa bilong yumi long heven. Pasin bilong krungutim gutnem em pasin bilong Satan, em nambawan birua bilong Jehova. Dispela tok “Devil” i kam long wanpela tok Grik, mining bilong en, “man bilong krungutim gutnem.” Taim yumi was gut long ol tok yumi mekim long ol narapela, dispela bai helpim yumi long pas gut yet wantaim Jehova. Yumi mas was gut moa long ol tok yumi mekim long ol brata husat i holim wok insait long kongrigesen.—Ritim Hibru 13:17; Jut 8.

12, 13. (a) Bilong wanem yumi mas mekim tok tru long olgeta samting? (b) Taim yumi mekim tok tru, wanem gutpela samting i save kamap?

¹² Ol wokman bilong Jehova i save mekim tok tru long olgeta samting. Aposel Pol i tok: “Yupela i mas wok oltaim long beten bilong helpim mipela. Mipela i bilip olsem maus bilong bel bilong mipela i stap stret, na long olgeta samting mipela i mekim, mipela i laik wokabaut stret.” (Hib. 13:18) Yumi tingting strong long “wokabaut stret” long olgeta taim, olsem na yumi no laik giamanim ol brata Kristen bilong yumi. Olsem: Sapos yumi gat bisnis na ol brata Kristen i stap wokman bilong yumi, orait yumi mas mekim wankain pasin long ol olsem yumi mekim long ol narapela wokman na baim ol olsem yumi bin pasim tok pinis long mekim. Yumi ol Kristen i mas mekim tok tru long ol wokman bilong yumi na olgeta narapela man. Na sapos yumi stap wokman bilong wanpela brata, orait yumi no ken strong long em i mekim wansait pasin na mekim gut moa long yumi tasol, nogat.

¹³ Planti taim ol manmeri i save tok amamas long gutpela pasin bilong ol Witnes Bilong Jehova! Olsem: Dairekta bilong wanpela bikpela konstraksen kampani i luksave olsem ol Witnes Bilong Jehova i save truim tok bilong ol, na em i tok: “Oltaim yupela i save bihainim tok yupela i bin mekim.” (Sng. 15:4) Dispela pasin i helpim yumi long stap yet olsem ol pren bilong Jehova. Na moa yet, dispela pasin i litimapim nem bilong Papa bilong yumi long heven.

14, 15. Taim yumi autim tok, olsem wanem yumi inap helpim ol narapela long kamap pren bilong Jehova?

¹⁴ Taim yumi mekim wok autim tok, yumi bungim ol man husat i bilip olsem God i stap, tasol ol i no tingim em olsem nambawan gutpela Pren bilong ol. Olsem wanem yumi inap helpim ol? Tingim tok em Jisas i givim long 70 disaipel taim em i salim ol i go 2-pela 2-pela long autim tok, em i tok: “Taim yupela i go insait long wanpela haus, pastaim yupela i mas tok: ‘Bel isi i ken i stap long dispela haus.’ Na sapos i no gat wanpela pren bilong bel isi i stap, orait bel isi bilong yupela bai kam bek long yupela. Tasol sapos i gat  pren bilong bel isi i stap, orait bel isi bilong yupela i ken i stap long em.” (Luk 10:5, 6) Sapos yumi soim gutpela pasin pren taim yumi autim tok, dispela inap kirapim ol manmeri long laikim tok i tru. Sapos yumi soim gutpela pasin pren long ol man husat i birua long yumi, dispela inap daunim belhat bilong ol na ating bihain ol bai amamas long putim yau long tok i tru.

¹⁵ Taim yumi bungim ol man husat i givim bel tru long lotu giaman o ol i bihainim ol kastam we i no stret wantaim tok bilong Baibel, yumi mas wok yet long soim pasin pren na stap bel isi. Yumi amamas long welkamim ol man husat i kam long ol miting bilong yumi, em ol man husat i no amamas long ol samting i kamap long graun na ol i laik kisim sampela save moa long dispela God yumi lotuim. Planti ekspiriens bilong ol kain man olsem i stap aninit long het tok “Baibel i Save Senisim i Stap Bilong Man.”

16. Olsem wanem yumi inap stap olsem ol pren na “ol wanwok” bilong Jehova?

¹⁶ Ol manmeri husat i wok wantaim, ol i save kamap ol gutpela pren na ol i pas gut wantaim. Olgeta manmeri husat i dediket long Jehova, ol i stap olsem ol pren na “ol wanwok” bilong em. (Ritim 1 Korin 3:9.) Taim yumi autim tok na kamapim ol disaipel, yumi kisim sampela save moa long ol gutpela pasin bilong Papa bilong yumi long heven. Yumi luksave long olsem wanem holi spirit i helpim yumi long autim gutnius.

17. Olsem wanem ol tok i kamap long ol kibung i soim olsem Jehova em Pren bilong yumi?

¹⁷ Taim yumi lusim bikpela haptaim moa long mekim wok bilong autim tok, yumi pilim olsem yumi go klostu moa long Jehova. Olsem: Yumi luksave long ol samting Jehova i mekim bilong pasim rot bilong ol birua. Yumi ken tingim ol samting i bin kamap insait long sampela yia i go pinis. Yumi inap luksave long ol samting God i mekim bilong stiaim yumi. Yumi amamas tru long planti gutpela tok God i givim bilong strongim bilip bilong yumi. Ol kibung i save kamapim klia olsem Papa bilong yumi i laikim yumi, na em i save kamapim ol savetok bilong helpim yumi long karim ol hevi na inapim yumi long ol samting yumi nidim. Bihain long wanpela kibung, wanpela famili i raitim pas na i tok: “Mipela i pilim tru ol tok i kamap long program. Mipela i pilim tru olsem Jehova i laikim tru mipela olgeta wan wan na em i laik bai mipela i stap gut.” Bihain long tupela marit bilong Jemani i go long wanpela spesel kibung long Aialan, tupela i pilim tru pasin bilong ol brata long welkamim na lukautim ol gut, na ol i tok: “Mipela i tenkyu moa yet long Jehova na King Jisas Krais. Ol i invaitim mipela long bung wantaim dispela lain husat i stap wanbel tru. Lain bilong yumi i save toktok long pasin wanbel, tasol moa yet, long olgeta de yumi save stap wanbel. Ol ekspiriens mipela i bin kisim long spesel kibung long Dublin, oltaim dispela bai kirapim mipela long tingim wanpela spesel samting, olsem mipela inap wok bung  wantaim yupela olgeta long mekim wok bilong God.”

18. Yumi ken givim wanem ol askim long yumi yet long pasin bilong yumi long toktok wantaim Jehova?

¹⁸ Pasin bilong toktok gut wantaim i save strongim pasin pren. Long nau, planti manmeri i save toktok wantaim long rot bilong Intenet na telefon samting. Tasol olsem wanem long pasin bilong yumi olgeta wan wan long toktok wantaim Jehova, em nambawan gutpela Pren bilong yumi? Em tru olsem Jehova em Man bilong “harim beten.” (Sng. 65:2) Tasol hamas taim yumi save painim rot long toktok wantaim em?

19. Sapos yumi pilim hatwok long kamapim tingting tru bilong yumi long Jehova, orait yumi inap kisim helpim long wanem rot?

¹⁹ Sampela wokman bilong God i hatwok long kamapim tingting tru i stap long bel bilong ol. Tasol Jehova i laik bai yumi kamapim tingting tru bilong yumi taim yumi beten. (Sng. 119:145; Kra. 3:41) Maski yumi hatwok long autim tingting tru i stap long bel bilong yumi, yumi gat rot bilong kisim helpim. Pol i raitim pas long ol Kristen long Rom na em i tok: “Sampela taim yumi no save yumi mas beten askim God long wanem samting. Yumi krai long bel na yumi no inap toktok. Long kain taim olsem holi spirit yet i save mekim askim long God bilong helpim yumi. God i save skelim bel bilong ol man na em i kliagut long mining bilong ol tok em holi spirit i as bilong en. Long wanem, holi spirit i mekim ol askim i stret wantaim laik bilong God, na dispela i bilong helpim ol manmeri holi.” (Rom 8:26, 27) Taim yumi tingim tingim ol tok i stap long Baibel, olsem long Buk Jop, Buk Song, na Buk Sindaun, dispela bai helpim yumi long kamapim tingting tru bilong yumi long Jehova.

20, 21. Olsem wanem tok bilong Pol long Filipai 4:6, 7 i mekim gut bel bilong yumi?

²⁰ Taim ol bikpela hevi i painim yumi, yumi mas tingim skultok em Pol i bin givim long ol Kristen long Filipai, em i tok: “Yupela i no ken tingting planti long wanpela samting, nogat. Long olgeta samting, kamapim ol askim bilong yupela long God, mekim long rot bilong ol beten, na long ol prea we yu beten strong, na long ol beten bilong tok tenkyu long God.” Pasin bilong toktok gut wantaim nambawan gutpela Pren bilong yumi bai mekim gut bel bilong yumi. Pol i tok moa olsem: “Dispela bel isi bilong God i winim tru tingting bilong man, em bai lukautim bel bilong yupela na tingting bilong yupela long rot bilong Krais Jisas.” (Fili. 4:6, 7) “Bel isi bilong God” em gutpela samting tru na oltaim yumi mas tenkyu tru olsem dispela bel isi i lukautim bel na tingting bilong yumi.

²¹ Pasin bilong beten i helpim yumi long kisim pasin bilong stap pren bilong Jehova. Olsem na yumi “mas beten oltaim.” (1 Tes. 5:17) Dispela stadi i ken strongim pasin bilong yumi long pas gut wantaim God na mekim samting em i laik yumi mas mekim. Na yumi mas lusim sampela haptaim long tingim tingim ol blesing yumi kisim, long wanem, Jehova i stap olsem Papa, God, na Pren bilong yumi.